ក្រុមអាជីវករខ្មែរ បានយករថយន្តជាង ២០គ្រឿង ដាក់តម្រៀបនៅលើស្ពានមិត្តភាពកម្ពុជា-ថៃ រវាងច្រកទ្វារអន្តរជាតិប៉ោយប៉ែត និងច្រកខ្លងលឹក ដើម្បីប្រឆាំងជំទាស់ទៅអាជ្ញាធរថៃ ដែលបានប្រកាសឲ្យពលរដ្ឋខ្មែរជាអ្នកមានរថយន្ត និងម៉ូតូចេញចូលទឹកដីថៃ ឈប់ប្រើប័ណ្ណឆ្លងព្រំដែន ហើយតម្រូវឲ្យប្រើលិខិតឆ្លងដែនវិញ (Passport)។
ការតវ៉ាបិទច្រកទ្វារដែលបណ្ដាលឲ្យកកស្ទះចរាចរមួយសន្ទុះធំ កាលពីព្រឹកថ្ងៃទី១ ខែមិថុនា នោះ ត្រូវបានរំសាយទៅក្រោយពីនគរបាលអន្តោប្រវេសន៍ខ្មែរ បានហៅម្ចាស់រថយន្តទាំងនោះឲ្យទៅដាក់ពាក្យបណ្ដឹង និងយកទៅធ្វើការសម្របសម្រួលជាមួយភាគីថៃ ប៉ុន្តែរហូតមកដល់ពេលនេះ ការសម្របសម្រួលនោះនៅពុំទាន់មានលទ្ធផលនៅឡើយ។
អាជីវករលក់ដូរនៅផ្សាររុងក្លឿ ទឹកដីថៃ ឈ្មោះ សុន កុសល បញ្ជាក់ថា ក្រុមអាជីវករខ្មែរដែលជាអ្នកមានរថយន្ត និងម៉ូតូជិះចេញចូលទៅក្នុងទឹកដីថៃ នោះ ទាមទារឲ្យភាគីថៃ ប្រចាំច្រកទ្វារខ្លងលឹក ទទួលការប្រើប្រាស់ប័ណ្ណឆ្លងព្រំដែនដូចកាលពីលើកមុន៖ «ខាងខ្ញុំទាមទារឲ្យគេបើកប័ណ្ណឆ្លងព្រំដែនវិញ ឲ្យឡានចូលធម្មតា ព្រោះខាងថៃ គេគាបយើងតាំងពីទារលុយខែ មួយខែ ៧០០បាត ហើយខាងចរាចរឲ្យស្ទីកខ័រ (sticker) មួយខែ ៥០០ ផ្សេងទៀត។ ហើយឲ្យយើងបង់ចូល ២៥បាតចូល ២៥បាតចេញទៀត យើងធ្វើគ្រប់លក្ខណៈអស់ហើយ ប៉ុន្តែគេនៅគាបពួកខ្ញុំទៀត»។
កាលពីថ្ងៃទី៣០ ខែឧសភា នគរបាលអន្តោប្រវេសន៍ និងគយថៃ បានដកលិខិតអនុញ្ញាតឲ្យរថយន្តខ្មែរចេញចូលទៅក្នុងទឹកដីថៃ និងបកស្ទីកខ័រសម្រាប់អនុញ្ញាតឲ្យឆ្លងដែន ចេញពីរថយន្តទាំងអស់ ដោយប្រកាសប្រាប់ឲ្យពលរដ្ឋខ្មែរជាអ្នកប្រើប្រាស់រថយន្តទាំងនោះ ងាកទៅប្រើប្រាស់លិខិតឆ្លងដែនវិញ។ ប៉ុន្តែ ក្រុមអាជីវករខ្មែរ បញ្ជាក់ថា ពួកគាត់ជាអ្នកប្រកបរបរលក់ដូរ ចេញចូលត្រឹមស្រុកអារាញ់ ខេត្តស្រះកែវ ថៃ ពុំមែនជាអ្នកទេសចរធ្វើដំណើរកម្សាន្តដល់ក្រុងបាងកក នោះទេ៖ «ហើយពួកខ្ញុំចូលទៅរកស៊ីលក់ដូរត្រឹមផ្សាររុងក្លឿ ដល់ពេលមិនឲ្យឡានចូលអ៊ីចឹងបិទ បើអ៊ីចឹងទាមទារមិនឲ្យឡានថៃ ចូលមកខ្មែរដែរមកបានវាស្រួល»។
អាជីវករប្រជាពលរដ្ឋខ្មែរជាអ្នករស់នៅតំបន់ជាយដែន និងជាអ្នកមានរថយន្ត ម៉ូតូចេញចូលទឹកថៃ នោះ មានគ្នាច្រើនរយនាក់បានប្រើប្រាស់ប័ណ្ណឆ្លងព្រំដែន ចេញចូលតាមច្រកទ្វារប៉ោយប៉ែត ខ្លងលឹក អស់រយៈពេលច្រើនឆ្នាំ។
ជាធម្មតា ពលរដ្ឋខ្មែរនៅតាមខេត្តជាប់ព្រំដែនខ្មែរ-ថៃ និយមប្រើប្រាស់ប័ណ្ណឆ្លងព្រំដែន ដែលមានកិច្ចព្រមព្រៀងរវាងរដ្ឋាភិបាលទាំងពីរ គឺកម្ពុជា និងថៃ។ ជនជាតិខ្មែរ ជាអ្នកប្រើប័ណ្ណឆ្លងព្រំដែន អាចចូលដីថៃ បានត្រឹមខេត្តស្រះកែវ និងខេត្តប្រាជិនបុរី របស់ថៃ។ ជនជាតិថៃ ដែលប្រើប្រាស់ប័ណ្ណឆ្លងព្រំដែន អាចចូលបានត្រឹមខេត្តបន្ទាយមានជ័យ និងខេត្តសៀមរាប របស់កម្ពុជា។
ការហាមនេះប៉ះពាល់ចំពោះតែជនជាតិខ្មែរជាអ្នកមានម៉ូតូ និងរថយន្តឆ្លងដែនចូលទៅផ្សារខ្លងលឹក របស់ថៃ ប៉ុណ្ណោះ។ ចំពោះអ្នកដំណើរ គឺនៅតែប្រើប័ណ្ណឆ្លងព្រំដែនជាធម្មតា។ ប័ណ្ណឆ្លងដែននោះមានតម្លៃ ៤៥០បាត ស្មើជិត ៦ម៉ឺនរៀល មានសុពលភាព ២ឆ្នាំ។ នៅពេលប្រើប័ណ្ណនោះចេញចូលទឹកដីថៃ ត្រូវឲ្យសមត្ថកិច្ចបោះត្រា ហើយត្រូវបង់លុយចំនួន ៧០បាត ហើយអាចប្រើប្រាស់ក្នុងទឹកថៃ បានរយៈពេល ៧ថ្ងៃ។
អ្នកសម្របសម្រួលសមាគមអាដហុក (Adhoc) ប្រចាំខេត្តបន្ទាយមានជ័យ លោក ស៊ុំ ច័ន្ទគា ថ្លែងថា មន្ត្រីទំនាក់ទំនងព្រំដែនគួរតែដោះស្រាយឲ្យបានឆាប់ ដើម្បីឲ្យទំនាក់ទំនងខ្មែរ និងថៃ អាចចេញធ្វើពាណិជ្ជកម្មតាមព្រំដែនងាយស្រួល។ ទន្ទឹមគ្នានេះ អាជ្ញាធរខេត្តបន្ទាយមានជ័យ គួរដោះស្រាយបញ្ហានេះ បើពុំដូច្នេះទេ វានាំឲ្យប៉ះពាល់របររកស៊ីរបស់ពលរដ្ឋខ្មែរ។
វិទ្យុអាស៊ីសេរី នៅពុំទាន់អាចទាក់ទង លោក ទ្រី ណារិន អភិបាលខេត្តបន្ទាយមានជ័យ ដើម្បីសុំសេចក្ដីបញ្ជាក់ជុំវិញបញ្ហានេះបានទេ។
ប៉ុន្តែ កាលពីថ្ងៃទី៣១ ខែឧសភា អភិបាលក្រុងប៉ោយប៉ែត លោក ង៉ោ មេងជ្រួញ បញ្ជាក់ថា អាជ្ញាធរក្រុងកំពុងធ្វើការចរចាសម្របសម្រួលជាមួយភាគីថៃ។ លោកបញ្ជាក់ថា បើយើងអនុវត្តទៅតាមអនុសញ្ញា កាលណាយើងឆ្លងដែន វាគេត្រូវប្រើលិខិតឆ្លងដែន ប៉ុន្តែបដិសេធមិនអត្ថាធិប្បាយលម្អិតទេ រង់ចាំការចរចាជាមួយថៃ សិន។ យ៉ាងណាក៏ដោយ ក្រុមអាជីវករព្រមានធ្វើបាតុកម្មបិទច្រកទ្វារនោះម្ដងទៀត បើសិនការទាមទាររបស់គេពុំទទួលជោគជ័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។