កសិករជាច្រើននៅខេត្តឧត្តរមានជ័យ បានចាប់ផ្ដើមច្រូតកាត់ប្រមូលផលស្រូវសម្រាប់ឆ្នាំថ្មីឆ្នាំ២០១៥ ចាប់ពីខែវិច្ឆិកា នេះជាបន្តបន្ទាប់ ក៏ប៉ុន្តែអ្វីដែលធ្វើឲ្យកសិករខកចិត្ត មិនមែនដោយសារការទទួលបានផលស្រូវតិចតួចនោះទេ គឺពួកគេមិនសប្បាយចិត្តនឹងតម្លៃស្រូវគ្រប់ប្រភេទ ដែលចុះថោក។
កសិករមួយចំនួននៅខេត្តឧត្តរមានជ័យ បានត្អូញត្អែរថា ពួកគេកំពុងខាតទុនផលិតស្រូវក្នុងឆ្នាំ២០១៥ នេះ ដោយសារតែកាលពីដើមឆ្នាំកន្លងទៅ ទឹកភ្លៀងធ្លាក់មិនគ្រប់គ្រាន់ បណ្ដាលឲ្យស្រូវមិនសូវផ្លែ ហើយនៅពេលដែលប្រមូលបានផលទៀតសោត បែរជាក្រុមឈ្មួញហ៊ានទិញក្នុងតម្លៃថោកថែមទៀតនោះ។
ការត្អូញត្អែររបស់ប្រជាកសិករនេះ បន្ទាប់ពីគេដឹងថា បច្ចុប្បន្នក្រុមឈ្មួញដែលដើរទិញស្រូវ កំពុងបញ្ចុះតម្លៃទាបបំផុត ពីព្រោះតែមិនមានអ្នកប្រកួតប្រជែងគ្នាទិញ។
កសិករម្នាក់ក្នុងចំណោមកសិករជាច្រើនទៀតនៅក្រុងសំរោង ខេត្តឧត្តរមានជ័យ គឺលោក សំ សំបូរ។ លោកមានប្រសាសន៍កាលពីរសៀលថ្ងៃច័ន្ទ ទី៩ ខែវិច្ឆិកា ថា រូបលោកក៏ដូចជាកសិករជាច្រើនទៀត មិនសប្បាយចិត្តទេ ដោយសារតែស្រូវដែលប្រមូលផលបាន ត្រូវពួកឈ្មួញហ៊ានទិញក្នុងតម្លៃថោក។ បុរសដដែលបញ្ជាក់ថា បច្ចុប្បន្ន កសិករបានប្រមូលផលស្រូវចេញពីស្រែមកទុកនៅផ្ទះជាបន្តបន្ទាប់។ ផលស្រូវទាំងនេះ គឺកសិករត្រូវការលក់ចេញខ្លះ ដើម្បីយកប្រាក់ទៅប្រើប្រាស់លើការចំណាយផ្សេងៗ ឬក៏សងបំណុលដែលជំពាក់គេកាលពីអំឡុងពេលភ្ជួររាស់ ជាដើម ក៏ប៉ុន្តែក្រុមឈ្មួញបែរជាទិញផលស្រូវទាំងនេះថោកបំផុត ដូចជាស្រូវផ្ការំដួលប្រភេទលេខ១ គេហ៊ានទិញក្នុងតម្លៃ ៨៥០រៀល និងស្រូវធ្ងន់ចាប់ឆាយធម្មតា គេហ៊ានទិញក្នុងតម្លៃ ៧០០រៀលក្នុង ១គីឡូក្រាម ជាដើម៖ «សូមឲ្យរាជរដ្ឋាភិបាល លោកជួយដាក់តម្លៃស្រូវដែលទិញពីកសិករឲ្យវាស្នើនឹងថ្លៃទិញជីកសិកម្មផង ពីព្រោះជីកសិកម្ម កាលពីយើងទិញ ១ការុងថ្លៃ ៣៥ដុល្លាររួចហើយ ប៉ុន្តែស្រូវវិញបើគិត ១០០គីឡូដូចគ្នា គឺបានថ្លៃតែ ៨៥.០០០រៀល»។
ក្រុមកសិករនៅខេត្តឧត្តរមានជ័យ ឲ្យដឹងថា ពួកគេធ្លាក់ទឹកចិត្តជាខ្លាំងចំពោះតម្លៃស្រូវចុះថោកនៅរដូវច្រូតកាត់នេះ។
មន្ត្រីមន្ទីរកសិកម្មខេត្តឧត្តរមានជ័យ បានហៅការប្រមូលទិញផលស្រូវចុះថ្លៃខ្លាំងនេះ ថាវាគឺជាទម្លាប់របស់ពួកឈ្មួញទៅហើយ នៅគ្រប់រដូវប្រមូលផលស្រូវ និងផលចម្ការ។
មន្ត្រីផ្នែកផែនការរបស់មន្ទីរកសិកម្មខេត្តឧត្តរមានជ័យ លោក គាំ វុទ្ធីធន មានប្រសាសន៍ថា ជារៀងរាល់ឆ្នាំឲ្យតែដល់ពេលកសិករប្រមូលផលដំឡូងមី និងស្រូវ ជាដើម គឺពួកឈ្មួញតែងតែដើរទិញទម្លាក់ថ្លៃយ៉ាងទាប។ មន្ត្រីដដែលបញ្ជាក់ថា លោកបានមើលឃើញបញ្ហាពិបាករកទីផ្សារលក់ដូរផលិតផលកសិកម្មនេះ ក៏ប៉ុន្តែលោកមិនអាចជួយអ្វីដល់កសិករបានទេ ពីព្រោះលោកមិនមានសិទ្ធិកំណត់តម្លៃឲ្យពួកឈ្មួញដែលដើរទិញនោះបាន៖ «តែដល់យើងទៅដំឡើងថ្លៃដូចជាអត់មានយន្តការអ្វីទេ ពីព្រោះឈ្មួញជាអ្នកប្រមូលទិញ មិនមែនយើងប្រមូលទិញទេ»។
មន្ត្រីមន្ទីរកសិកម្មខេត្តឧត្តរមានជ័យ ឲ្យដឹងថា កាលពីរដូវភ្ជួររាស់ដើមឆ្នាំ២០១៥ គឺកសិករបានដាំស្រូវលើផ្ទៃដីជាង ៧ម៉ឺន ២ពាន់ហិកតារ។ ការដាំស្រូវឆ្នាំនេះ គឺលើសផែនការ បើប្រៀបធៀបទៅនឹងឆ្នាំ២០១៤ កន្លងទៅ ដែលកសិករបានធ្វើស្រែតែ ៦ម៉ឺន ២ពាន់ហិកតារនោះ។
ទោះយ៉ាងណា មន្ត្រីមន្ទីរកសិកម្ម រំពឹងទុកថា នៅក្នុងឆ្នាំនេះ កសិករក្នុងខេត្តឧត្តរមានជ័យ អាចនឹងទទួលបានផលស្រូវតិចជាងកាលពីឆ្នាំមុន ដោយសារតែទឹកភ្លៀងធ្លាក់មិនល្អ ធ្វើឲ្យស្រូវជាច្រើនហិកតាររងការខូចខាត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។