ការប្រកាសនេះ បានធ្វើឡើងក្នុងគ្រាដែលមានការចរចាអំពីការដំឡើងប្រាក់ខែគោលឲ្យកម្មករក្នុងវិស័យវាយនភណ្ឌកាត់ដេរមិនទាន់ត្រូវរ៉ូវគ្នានៅឡើយ ដោយសារសហជីពចង់បានប្រាក់ខែគោលទៅ ១០០ដុល្លារ ហើយនិយោជកយល់ព្រមដំឡើងបាន ៧៥ដុល្លារ បូកបន្ថែមនឹងប្រាក់ទ្រទ្រង់សុខភាព ៥ដុល្លារទៀតនោះ។
លោក ហ៊ុន សែន បានប្រកាសថា រដ្ឋាភិបាលដែលគ្រប់គ្រងដោយគណបក្សប្រជាជនកម្ពុជា នឹងផ្លាស់ប្ដូរគោលនយោបាយដំឡើងប្រាក់បៀវត្សរ៍ជូនមន្ត្រីរាជការ កងកម្លាំងប្រដាប់អាវុធ និងកម្មករទៅតាមកំណើនសេដ្ឋកិច្ចរបស់ប្រទេសជារៀងរាល់ឆ្នាំ។
ថ្លែងនៅក្នុងពិធីចែកសញ្ញាបត្រដល់និស្សិតសាកលវិទ្យាល័យភូមិន្ទភ្នំពេញ នៅឯមជ្ឈមណ្ឌលកោះពេជ្រ នៅថ្ងៃទី២ ខែមេសា លោកនាយករដ្ឋមន្ត្រី ហ៊ុន បាន លើកឡើងថា កម្មករកម្មការិនី នៅតែអាចមានលទ្ធភាពដំឡើងប្រាក់ឈ្នួលគោលបន្តទៀត តាមរយៈការជួបចរចាត្រីភាគី ដើម្បីឈានទៅដល់ការកើនឡើងមួយទៅតាមកំណើនសេដ្ឋកិច្ច។
លោកថា យ៉ាងណាក៏ដោយលោកបានជំរុញឲ្យមានការពិភាក្សាត្រីភាគីយ៉ាងតិច១ឆ្នាំម្ដង ដើម្បីកែលម្អដល់ការដំឡើងប្រាក់ខែឲ្យកម្មករ៖ «ហើយយើងមានយន្តការដោះស្រាយប្រចាំឆ្នាំទៅ មួយឆ្នាំ ឬក៏អាចមុនមួយឆ្នាំ ទៅតាមការចាំបាច់នៃការវិវឌ្ឍយន្តការត្រីភាគី ម្ខាងរដ្ឋាភិបាល ម្ខាងនិយោជក ម្ខាងនិយោជិក»។
ការប្រកាសនេះគឺបានធ្វើឡើងនៅពេលដែលការបោះឆ្នោតសាកលកាន់តែខិតជិតចូលមកដល់។
យ៉ាងណាក៏ដោយ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដែលបានចូលរួមចរចាប្រាក់ឈ្នួលឲ្យកម្មករ បានហៅការឡើងប្រាក់ខែឲ្យកម្មករ និងមន្ត្រីរាជការតាមកំណើនសេដ្ឋកិច្ចរបស់ប្រទេស លុះត្រាតែមូលដ្ឋាននៃប្រាក់ខែគោលរបស់កម្មករមានលក្ខណៈសមស្របដែលអាចឆ្លើយតបនឹងការរស់នៅនឹងការចំណាយប្រចាំថ្ងៃ ទើបគោលការណ៍នេះមានប្រសិទ្ធភាព៖ «ហេតុអីបានខ្ញុំទាមទារប្រាក់ខែកម្មករដល់ ១០០ដុល្លារ ព្រោះយើងគិតថា ប្រសិនជាប្រាក់ខែបច្ចុប្បន្នវាសមរម្យហើយ។ អ៊ីចឹងវាឡើងតាមអតិផរណានោះវាត្រូវហើយ បានន័យថា វាសមស្រប»។
ដោយឡែកមន្ត្រីរាជការវិញ លោកនាយករដ្ឋមន្ត្រី ហ៊ុន សែន បានអះអាងថា គណបក្សប្រជាជនកម្ពុជា លែងមានគោលនយោបាយដំឡើងប្រាក់ខែ ២០% ក្នុងមួយឆ្នាំទៀតហើយ គឺត្រូវដំឡើងជូនមន្ត្រីរាជការទៅតាមកំណើនសេដ្ឋកិច្ចរបស់ប្រទេសជារៀងរាល់ឆ្នាំដែរ។
អ្នកវិភាគសេដ្ឋកិច្ច លោក ហេង ឌីណា យល់ថា ការដំឡើងប្រាក់ខែឲ្យកម្មករ និងមន្ត្រីរាជការដែលបានមកពីកំណើនសេដ្ឋកិច្ច គឺប្រសើរជាងការដំឡើងពីប្រាក់ដែលបានមកពីកម្ចី ឬជំនួយបរទេស៖ «ផ្ទុយមកវិញ បើគ្មានកំណើនសេដ្ឋកិច្ចហើយយើងនាំគ្នាបង្កើនប្រាក់ចំណូលហ្នឹង យើងបានមកពីណា? តើយើងបានមកពីកាត់បន្ថយភាពលេចធ្លាយនៃការចំណាយ ឬក៏យើងខ្ចីគេបន្ថែម? ខ្ចីគេ ឬក៏បោះពុម្ពលុយបន្ថែមហ្នឹងធ្វើឲ្យមានអតិផរណា។ ដំឡើងប្រាក់ខែហើយ មានអតិផរណាហ្នឹងវាពុំសូវមានន័យប៉ុន្មានទេ»។
សេដ្ឋកិច្ចកម្ពុជា ជាមធ្យមមានកំណើនប្រមាណ ៧% ក្នុងមួយឆ្នាំ។ រីឯអត្រាអតិផរណាប្រមាណ ៥% ក្នុងមួយឆ្នាំ។ ការឡើងនេះអ្នកសេដ្ឋកិច្ចបានវាយតម្លៃថា ជាកំណើនមួយខ្ពស់នៅក្នុងតំបន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។