កងរាជអាវុធហត្ថស្រុកត្រពាំងប្រាសាទ បានចាប់ខ្លួនបុរសថៅកែភោជនីយដ្ឋានយីហោកាកា០០៩ ម្នាក់ទៀត បន្ទាប់ពីចាប់ខ្លួនបុរសម្នាក់ទៅដាក់ខ្នោះ តាំងតែពីល្ងាចថ្ងៃទី១៦ ខែមេសា មក។
ការតាមចាប់ខ្លួននេះ បន្ទាប់ពីក្រុមប្រជាពលរដ្ឋមួយចំនួន បានបង្ហើបថា គេនឹងប្ដឹងប្រឆាំងមន្ត្រីកងរាជអាវុធហត្ថក្នុងស្រុកនោះចំនួន ៤នាក់ ពីបទប្រើអំពើហិង្សាទៅលើជនស៊ីវិល។
មន្ត្រី សមាគមអាដហុក (Adhoc) ការពារសិទ្ធិមនុស្ស ប្រចាំខេត្តឧត្តរមានជ័យ បានចាប់ផ្ដើមស៊ើបអង្កេតហើយ ដើម្បីរកឱ្យឃើញថា តើមន្ត្រីកងរាជអាវុធហត្ថចំនួន ៤នាក់ ក្នុងស្រុកត្រពាំងប្រាសាទ ពិតជាបានប្រើអំពើហិង្សាលើប្រជាពលរដ្ឋមែន ឬក៏យ៉ាងណា?
លោក ស្រី ណារ៉េន ជាអ្នកសម្របសម្រួលសមាគមការពារសិទ្ធិមនុស្សអាដហុក។ លោកបានមានប្រសាសន៍កាលពីរសៀលថ្ងៃព្រហស្បតិ៍ ទី១៨ ខែមេសា ថា លោកកំពុងជួបជាមួយសាក្សីខ្លះនៅក្នុងហេតុការណ៍នោះ។ មន្ត្រីដដែលបានបញ្ជាក់ថា តាមការសាកសួរ គឺមានករណីមិនប្រក្រតីមួយចំនួនដែលកងរាជអាវុធហត្ថស្រុកត្រពាំងប្រាសាទ បានប្រព្រឹត្តមិនសមរម្យ ដូចជាមិនបង្ក្រាបទៅលើក្រុមទាហានដែលចូលទៅស៊ីផឹកក្នុងហាង ហើយមិនឱ្យលុយគេ ប៉ុន្តែបានចោទប្រកាន់ទៅលើប្រជាពលរដ្ឋដែលដកហូតយកម៉ូតូទាហាន ដើម្បីដោះស្រាយរឿងស៊ីផឹកមិនឱ្យលុយនោះ ទៅជាករណីប្លន់យកម៉ូតូពីទាហានជាដើម។
លោក ស្រី ណារ៉េន៖ «សមត្ថកិច្ចចោទអារឿងករណីប្លន់អីហ្នឹង មើលទៅវាអត់ស៊ីសង្វាក់ទេ។ ឥឡូវ ខ្ញុំកំពុងបន្តសួររឿងករណីម៉ូតូទៀត។ ឥឡូវខ្ញុំកំពុងតែជួបជាមួយបងស្រីម្នាក់ ដែលគេចាប់ តែយើងអត់ទាន់បានជួបជាមួយបង លឹម ម៉េងឃាង ដែលជាបុគ្គលិកអង្គការ អត់ទាន់បានជួបទេ។ រឿងនោះយើងអាចសង្ស័យថា ទាក់ទងនឹងការប្រើអំពើហិង្សាវាយតប់ ឬក៏អាចនិយាយថា វាជារឿងធ្វើទារុណកម្មទៅលើពួកគាត់ដែរ»។
កាលពីល្ងាចថ្ងៃទី១៦ ខែមេសា កន្លងទៅ ប្រជាពលរដ្ឋចំនួន ៣នាក់ និងអ្នកកាសែតម្នាក់ នៅភូមិត្រពាំងប្រាសាទ ស្រុកត្រពាំងប្រាសាទ បានរងរបួសដោយសារតែក្រុមទាហានទៅស៊ីផឹកនៅហាងមួយ យីហោ កាកា០០៩ បានវាយតប់ និងបន្ទាប់មកក៏បានប៉ះទង្គិចគ្នាម្ដងទៀតជាមួយក្រុមកងរាជអាវុធហត្ថ ដែលប្រជាពលរដ្ឋបានទូរស័ព្ទហៅទៅជួយអន្តរាគមន៍ ក៏ប៉ុន្តែពួកគេមិនចាប់ក្រុមទាហាន បែរជាប្រតាយប្រតប់ចាប់ប្រជាពលរដ្ឋដាក់ខ្នោះទៅវិញនោះ។
កាលពីល្ងាចថ្ងៃទី១៧ ខែមេសា ក្រោយពេលកើតហេតុ១ថ្ងៃ កម្លាំងកងរាជអាវុធហត្ថស្រុកត្រពាំងប្រាសាទ ព្យាយាមតាមចាប់ខ្លួនបុរសឈ្មោះ លឹម ហ៊ាង ដែលជាថៅកែប្រុសនៃហាងកាកា០០៩ នោះម្នាក់ទៀត។
មេបញ្ជាការកងរាជអាវុធហត្ថស្រុកត្រពាំងប្រាសាទ គឺលោក លី ដារិទ្ធិ បានចោទប្រកាន់ថា ការចាប់ខ្លួនប្រជាពលរដ្ឋទាំងនោះ ដោយសារតែពួកគេប្រព្រឹត្តករណីប្លន់យកម៉ូតូពីក្រុមទាហានដែលទៅស៊ីផឹកមិនឱ្យលុយនោះ៖ «បើម៉ូតូគេទុកមួយកន្លែង វាមកឆក់ប្លន់បណ្ដើរម៉ូតូគេយកទៅផ្ទះ ទៅចាក់សោទុក មិនឱ្យគេចូល វាជាករណីប្លន់ហ្នឹងហ្ន!។ ការងារនេះបានទាក់ទងដល់តុលាការតាំងពីហេតុការណ៍កើតឡើងភ្លាម ហើយគាត់ចោទថា កងរាជអាវុធហត្ថវាយស្ត្រីហ្នឹងសន្លប់ គាត់ទូរស័ព្ទមកខ្ញុំដែរ ម្ដាយរបស់គាត់នោះ។ ខ្ញុំថា ឥឡូវចង្អុលអាវុធហត្ថណាដែលវាយសន្លប់ វាអត់មាន»។
ទោះយ៉ាងណា ប្រជាពលរដ្ឋបានចោទប្រកាន់មន្ត្រីកងរាជអាវុធហត្ថ ៤នាក់ ឈ្មោះ សឿន ហៃ ឈ្មោះ ឡេង គឹមសាន ហៅ យួន ឈ្មោះ ប៊ុត សាវុធ និងឈ្មោះ ថា គឺជាអ្នកដែលបានប្រើហិង្សាមកលើអ្នកភូមិ។
នៅប្រទេសកម្ពុជា គេកម្រឮព័ត៌មានថា មានជនស៊ីវិលហ៊ានទៅប្លន់ម៉ូតូទាហាន។
សមាគមការពារសិទ្ធិមនុស្សអាដហុក បានឱ្យដឹងថា ប្រសិនបើគេរកឃើញថា ការពិតថាមន្ត្រីកងរាជអាវុធហត្ថមានកំហុស គឺគេនឹងដាក់អន្តរាគមន៍ភ្លាម ដើម្បីស្នើសុំចំណាត់ការផ្លូវច្បាប់ប្រឆាំងមន្ត្រីកងរាជអាវុធហត្ថទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។