ស្ថានភាពនៅតាមតំបន់សេដ្ឋកិច្ចពិសេសស្ថិតក្នុងក្រុងបាវិត ខេត្តស្វាយរៀង មានសភាពស្ងប់ស្ងាត់នៅថ្ងៃទី២៣ ធ្នូ បន្ទាប់ពីភាគីពាក់ព័ន្ធបានបើកកិច្ចចរចារកដំណោះស្រាយ ហើយអនុញ្ញាតឲ្យកម្មករឈប់សម្រាករយៈពេល ២ថ្ងៃ។ ហិង្សារវាងសមត្ថកិច្ច និងកម្មករ បានកើតឡើងជាបន្តបន្ទាប់ ក្នុងពេលកម្មករតវ៉ាទាមទារប្រាក់ឈ្នួល ២០ដុល្លារបន្ថែម។ ភាគីនិយោជកនៅតែទាមទារឲ្យរដ្ឋាភិបាល ចាត់វិធានការតាមច្បាប់ ខណៈដែលសហជីព និងអាជ្ញាធរខេត្ត ស្នើឲ្យភាគីពាក់ព័ន្ធទាំងអស់ ដោះស្រាយតាមគំនិតយោគយល់គ្នា ដើម្បីឲ្យកម្មករស្ងប់ចិត្តចូលធ្វើការងារវិញ។
កម្មករមួយចំនួន បានជិះឡានមកធ្វើការធម្មតានៅព្រឹកថ្ងៃទី២៣ ខែធ្នូ ប៉ុន្តែត្រូវបានកងកម្លាំងសមត្ថកិច្ច ដាក់បារ៉ាស់ហាមឃាត់ និងណែនាំឲ្យពួកគាត់ត្រឡប់ទៅផ្ទះឈប់សម្រាកពីរថ្ងៃ។
មន្ត្រីសម្របសម្រួលនៃសហព័ន្ធសហជីពសំឡេងយុវជនខ្មែរ គឺលោក សៅ កុសល មានប្រសាសន៍ថា ការអនុញ្ញាតឲ្យកម្មករឈប់សម្រាកនេះ គឺដើម្បីឲ្យកម្មកររម្ងាប់ចិត្ត និងទុកឱកាសឲ្យថ្នាក់ដឹកនាំ បន្តស្វែងរកដំណោះស្រាយ៖ «បើគាត់បានសម្រាកនៅផ្ទះ ឪពុកម្ដាយបានពន្យល់ពួកគាត់ខ្លះទៅ អ្នកជិតខាងពន្យល់ពួកគាត់ខ្លះទៀតទៅ ថាការធ្វើកូដកម្មបែបនេះមិនបានអ្វីទេ ហើយបើប្រើអំពើហិង្សា គឺកាន់តែខុសច្បាប់តទៅទៀត»។
ការមិនបើកទ្វារឲ្យកម្មករចូលធ្វើការនេះ នៅបន្ទាប់ពីការតវ៉ាទាមទារដំឡើងប្រាក់ឈ្នួល នៅតែរីករាលដាលទ្រង់ទ្រាយធំស្ទើរគ្រប់រោងចក្រនៅក្រុងបាវិត ហើយរហូតឈានដល់ផ្ទុះហិង្សារវាងកងកម្លាំងសមត្ថកិច្ច និងកម្មករជាបន្តបន្ទាប់ ជាពិសេសកាលពីថ្ងៃទី២២ ធ្នូ ក្រុមកម្មករបានរើសដុំថ្ម និងដបទឹកសុទ្ធ និងវត្ថុរឹងផ្សេងទៀត គប់តបតទល់នឹងសមត្ថកិច្ចដែលប្រើឡានបាញ់ទឹក និងដំបងសំពងពួកគេ។
ហេតុការណ៍នោះ បណ្ដាលឲ្យសមត្ថកិច្ច ៣នាក់រងរបួស និងឡានទឹកមួយគ្រឿងរងការខូចខាត។ ចំណែកកម្មករវិញ នៅមិនទាន់ដឹងថា មានរបួសប៉ុន្មាននាក់នៅឡើយ ប៉ុន្តែក្រុមកម្មករអះអាងថា មានកម្មការិនីមួយចំនួន ត្រូវបានសមត្ថកិច្ចចាប់វាយ និងគប់ដុំថ្មត្រូវវិញដែរ៖ «ប៉ូលិសវាយមនុស្សស្រីមួយព្រនង់ចំស្មា ហើយប៉ូលិសធ្វើអ្វីក៏ត្រូវដែរ ប៉ុន្តែកម្មករវិញធ្វើអីក៏ខុស»។
សហជីពដែលតាមឃ្លាំមើលស្ថានការណ៍ប៉ះទង្គិចគ្នានេះ អះអាងថា ដំបូងឡើយមានកម្មកររោងចក្រមួយចំនួនដែលមិនព្រមចូលធ្វើការនោះ បានគប់ដុំថ្ម និងស្រែកបង្អើលឲ្យកម្មករផ្សេងទៀត ចេញពីធ្វើការ ហើយចូលរួមតវ៉ាទាំងអស់គ្នា។ សកម្មភាពនេះ បានបណ្ដាលឲ្យចំនួនអ្នកតវ៉ាកើនឡើងនៅពេញតំបន់សេដ្ឋកិច្ចពិសេសមេនហាតធេន (MANHATTAN) និងតាយសេង (Tai Seng)។ ពេល នោះ អាជ្ញាធរចាប់ផ្ដើមបង្ក្រាបដោយប្រើឡានបាញ់ទឹក និងប្រើសម្ដីគំរាមកំហែងដាក់កម្មករ ទើបបណ្ដាលឲ្យកម្មករផ្ទុះកំហឹង បែរមុខមកតទល់គ្នាមួយសន្ទុះ។
ក្រុមកម្មករមួយចំនួន អះអាងថា ការចេញតវ៉ាជាបន្តបន្ទាប់នោះ គឺក្នុងបំណងទាមទារប្រាក់ឈ្នួល ២០ដុល្លារបន្ថែមទៅលើប្រាក់ឈ្នួលគោលបច្ចុប្បន្ន ១២៨ដុល្លារអាមេរិក សម្រាប់ឆ្នាំ២០១៦ តាមការសន្យារបស់ក្រុមហ៊ុនកន្លងមក និងស្នើឲ្យអាជ្ញាធរដោះលែងកម្មករ ៤នាក់ ដែលត្រូវបានសមត្ថកិច្ចចាប់ខ្លួន ព្រមទាំងទាមទារឲ្យរោងចក្រ រក្សាប្រាក់អត្ថប្រយោជន៍ផ្សេងៗអំឡុងពេលតវ៉ា៖ «ទាមទារឲ្យឡើងបាន ២០ដុល្លារ ហើយគ្មានអ្នកណាញុះញង់ទេ គឺកម្មករចង់បានដោយខ្លួនឯង។ ប្រាក់ឈ្នួលនៅទាបពេក ហើយយើងធ្វើការទៅគេគាបពេក ដូចទាមទារគុណភាពខ្ពស់ និងចំនួនកើនឡើង ហើយទំនិញក៏ឡើងថ្លៃ»។
ទាក់ទិនបញ្ហានេះ អភិបាលរងខេត្តស្វាយរៀង លោក ហ៊ូ វតនៈ បានដឹកនាំកិច្ចប្រជុំបន្ទាន់មួយនៅរសៀលថ្ងៃទី២២ ធ្នូ ជាមួយភាគីសហជីព និងតំណាងនិយោជក ដើម្បីស្វែងរកដំណោះស្រាយ។ ក្រោយចប់កិច្ចប្រជុំនោះ លោក ហ៊ូ វតនៈ បានបង្ហាញលទ្ធផលចំនួន ៤ចំណុច ក្នុងនោះរួមមាន អំពាវនាវឲ្យកម្មករវិលចូលធ្វើការវិញ ឈប់បង្កការតវ៉ាហិង្សាខុសនីតិវិធី និងយល់ព្រមដោះលែងកម្មករចំនួន ៤នាក់ឲ្យនៅក្រៅឃុំ៖ «សម្រាប់កម្មករ ៤នាក់ គឺរដ្ឋបាលខេត្តទទួលយកបានតាមការសំណូមពរ តែសុំអនុវត្តនៅក្រៅឃុំ ដោយធ្វើតាមនីតិវិធីតុលាការ ក្នុងការដោះលែង។ សម្រាប់ប្រាក់អត្ថប្រយោជន៍នៅក្នុងថ្ងៃកូដកម្ម គឺនិយោជកកំពុងធ្វើការពិចារណា ដើម្បីសម្រួលដោះស្រាយជូនទៅតាមគំនិតនៃការយោគយល់គ្នាទៅវិញទៅមករវាងនិយោជក និងកម្មករ»។
ជុំវិញការប៉ុនប៉ងដោះលែងកម្មករ ៤នាក់ឲ្យមានសេរីភាពវិញនេះ ត្រូវបានសមាគមរោងចក្រកាត់ដេរនៅកម្ពុជា ហៅកាត់ថា ជីម៉ាក់ (GMAC) បានចេញលិខិតថ្កោលទោសនៅថ្ងៃទី២៣ ខែធ្នូ។ ជីម៉ាក់ លើកឡើងថា កម្មករទាំង ៤នាក់ដែលត្រូវបានសាលាដំបូងខេត្តស្វាយរៀង ចោទពីបទហិង្សាដោយចេតនា មានស្ថានទម្ងន់ទោស និងញុះញង់ឲ្យប្រព្រឹត្តបទឧក្រិដ្ឋនោះ គ្មាននរណាម្នាក់គួរត្រូវបានអនុញ្ញាតឲ្យធ្វើកិច្ចអន្តរាគមន៍ក្នុងប្រព័ន្ធច្បាប់ និងយុត្តិធម៌កម្ពុជា ឡើយ ហើយគួរទុកឲ្យតុលាការអនុវត្តនូវនីតិវិធីរបស់ខ្លួនក្នុងលក្ខណៈឯករាជ្យ។
ដោយឡែកចំពោះការទាមទារឲ្យរក្សាប្រាក់អត្ថប្រយោជន៍ក្នុងអំឡុងពេលតវ៉ានោះ ជីម៉ាក់ មិនយល់ព្រមឡើយ។ នៅក្នុងលិខិតនោះ ជីម៉ាក់ លើកឡើងថា គោលការណ៍មិនធ្វើការ មិនមានប្រាក់ឈ្នួល គឺជាជំហររឹងមាំរបស់និយោជក ដើម្បីផ្តល់នូវភាពយុត្តិធម៌ចំពោះភាគីទាំងពីរ គឺភាគីនិយោជក និងភាគីកម្មករនិយោជិតផងដែរ។
ចំពោះជំហររបស់ភាគីក្រុមហ៊ុននេះ អគ្គលេខាធិការសម្ព័ន្ធសហជីពការងារឯករាជ្យ លោក លួស សេង លើកឡើងថា គឺស្របនឹងច្បាប់ដែលថា ក្នុងកំឡុងពេលកូដកម្មតាវកាលិកនៃការងារ មិនត្រូវបានផ្តល់ឲ្យទេ ហើយប្រាក់ឈ្នួលក៏មិនត្រូវបើកឲ្យដែរ ប៉ុន្តែជំហរនេះ គឺមិនអាចបន្ធូរបន្ថយភាពតានតឹងបានឡើយ។ លោកថា និយោជកគួរតែដោះស្រាយតាមការយោគយល់គ្នា និងដោះដូរឲ្យគ្នាទៅវិញទៅមក ដើម្បីបញ្ចប់បញ្ហា៖ «សុំឲ្យរោងចក្រយោគយល់ថា កម្មករឈប់ប៉ុន្មានថ្ងៃនេះ ត្រូវដោះដូរជាដំណាច់ឆ្នាំវិញ អត្ថប្រយោជន៍ផ្សេងៗសូមឲ្យរោងចក្ររក្សាធម្មតា»។
ដោយឡែកព័ត៌មានលេចឮថា មានរោងចក្រមួយចំនួនដំឡើងប្រាក់ឈ្នួលបន្ថែម ២០ដុល្លារនៅពេលដំណាច់ឆ្នាំនោះ គឺត្រូវបានក្រសួងការងារ ចេញលិខិតច្រានចោល ដោយបញ្ជាក់ថា ជាពាក្យចចាមអារ៉ាម គ្មានឯកសារយោង និងគ្មានតំណាងពិតប្រាកដ រហូតបង្កឲ្យមានរបួសស្នាម ជ្រួលច្របល់ សកម្មភាពហិង្សា ជាដើម។ ក្រសួងការងារ វាយតម្លៃថា កូដកម្មកន្លងមកនេះ គឺខុសនឹងច្បាប់ និងស្របពេលអ្នកបញ្ជាទិញកំពុងធ្វើការប្រៀបធៀបកម្ពុជា ជាមួយបណ្ដាប្រទេសផ្សេងទៀត។ ដូច្នេះ សកម្មភាពហិង្សានេះ នឹងអាចធ្វើឲ្យអ្នកបញ្ជាទិញ បាត់បង់ជំនឿក្នុងការវិនិយោគ និងដកខ្លួនចេញពីកម្ពុជា ទៀតផង។ ទន្ទឹមនេះ ក្រសួងការងារ អំពាវនាវឲ្យកម្មកររក្សាភាពនឹងន ហើយរាល់ការតវ៉ា ត្រូវចាត់តំណាងពិតប្រាកដដើម្បីស្នើឲ្យក្រសួងការងារ និងបណ្តុះបណ្តាលវិជ្ជាជីវៈ ជួយអន្តរាគមន៍។
ក្រុមកម្មករជាង ៣ម៉ឺននាក់នៅក្រុងបាវិត ខេត្តស្វាយរៀង បានធ្វើកូដកម្មមិនចូលធ្វើការតាំងពីថ្ងៃទី១៦ ខែធ្នូ ដើម្បីទាមទារប្រាក់ខែគោលយ៉ាងហោច ១៥០ដុល្លារ នៅបន្ទាប់ពីពួកគេយល់ថា ប្រាក់ឈ្នួលដែលរាជរដ្ឋាភិបាលសម្រេចប្រគល់ឲ្យ ១៤០ដុល្លារនៅក្នុងឆ្នាំ២០១៦ មិនអាចធានាឲ្យពួកគាត់រស់នៅសមរម្យបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។