មេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា សម្រេចផ្អាកមុខងារបណ្ដោះអាសន្នកងរាជអាវុធហត្ថខេត្តត្បូងឃ្មុំ និងព្រៃវែង ចំនួន ៦នាក់ ដើម្បីដោះស្រាយតាមផ្លូវតុលាការ ពាក់ព័ន្ធទៅនឹងការផ្ទុះអាវុធ និងប្រើប្រាស់ហិង្សាលើពលរដ្ឋដឹកស្រូវក្នុងខេត្តព្រៃវែង កាលពីខែមីនា។
ការសម្រេចនេះ ត្រូវបានមន្ត្រីកងរាជអាវុធហត្ថ ប្រកាសឲ្យដឹងនៅក្នុងសន្និសីទកាសែតនៅព្រឹកថ្ងៃទី១០ ខែមេសា នាបញ្ជាការដ្ឋានកងរាជអាវុធហត្ថលើប្រទេសក្នុងខណ្ឌទួលគោក។
ការសម្រេចរបស់ លោក សៅ សុខា បែបនេះ ធ្វើឡើងបន្ទាប់ពីគណៈកម្មការចំពោះកិច្ច ចុះស្រាវជ្រាវករណីបាញ់បោះ និងការប្រើប្រាស់ហិង្សាលើពលរដ្ឋដឹកស្រូវនៅខេត្តព្រៃវែង រកឃើញថា កម្លាំងកងរាជអាវុធហត្ថមកពីពីរខេត្តនេះ ពិតជាបានប្រព្រឹត្តកំហុសឆ្គង និងបំពានលើច្បាប់ក្នុងពេលអនុវត្តការងាររបស់ខ្លួន។
កងរាជអាវុធហត្ថទាំង ៦នាក់នោះ មាន ៣នាក់មកពីខេត្តត្បូងឃ្មុំ និង ៣នាក់ទៀតមកពីខេត្តព្រៃវែង ក្នុងនោះក៏រួមមានមេបញ្ជាការមូលដ្ឋានកងរាជអាវុធហត្ថស្រុកអូររាំងឪ ខេត្តត្បូងឃ្មុំ លោក វ៉ន ពឿន និងប្រធានស្នាក់ការសន្តិសុខ៨០៨ ខេត្តព្រៃវែង លោក យិន ឡុង ផងដែរ។
មេបញ្ជាការរងកងរាជអាវុធហត្ថលើផ្ទៃប្រទេស និងជាប្រធានគណៈកម្មការចំពោះកិច្ច ចុះស្រាវជ្រាវ លោក ស៊ិន សុផាន្នី មានប្រសាសន៍នៅក្នុងសន្និសីទកាសែតថា សមត្ថកិច្ចដែលពាក់ព័ន្ធនៅក្នុងហេតុការណ៍ផ្ទុះអាវុធ និងប្រើប្រាស់ហិង្សាលើពលរដ្ឋមានទាំងអស់ ១២នាក់ ប៉ុន្តែក្នុងនោះ ៦នាក់ត្រូវបានរកឃើញថា បានប្រព្រឹត្តផ្ទុយទៅនឹងច្បាប់ស្ដីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទ អនុក្រឹត្យស្ដីពីបទវិន័យទូទៅសម្រាប់កងយោធពលខេមរភូមិន្ទ និងបទបញ្ជាផ្ទៃក្នុងកងរាជអាវុធហត្ថ។
លោកបញ្ជាក់ថា កងរាជអាវុធហត្ថទាំង ៦នាក់នោះ បានប្រព្រឹត្តកំហុសឆ្គងដូចជា បានរាយការណ៍មិនតាមឋានានុក្រម ភូតកុហកក្នុងពេលរាយការណ៍ ធ្វើឲ្យផ្ទុះអាវុធដោយគ្មានបញ្ជា ការបាញ់គំរាម ការបាញ់លើរថយន្តជនរងគ្រោះ ហើយខ្លះទៀតបានក្រេបគ្រឿងស្រវឹងមុនពេលប្រតិបត្តិការទៀតផង។ លោកថា ទង្វើរបស់មន្ត្រីទាំងនេះជាការបំពានច្បាប់ ដែលកងរាជអាវុធហត្ថចាំបាច់ត្រូវចាត់វិធានការផ្លូវច្បាប់ចំពោះពួកគេ។ លោកបញ្ជាក់ដែរថា កងអាវុធហត្ថពាក់ព័ន្ធទាំងអស់សុទ្ធតែបានទទួលស្គាល់ថា ពិតជាមានការបាញ់បោះមែន ប៉ុន្តែគ្មានអ្នកណាម្នាក់ទទួលស្គាល់ថាមានការវាយដំ និងចាប់ចងពលរដ្ឋរងគ្រោះនោះទេ។
ទោះយ៉ាងណា លោក ស៊ិន សុផាន្នី អះអាងថា ពួកគេ ៦នាក់ត្រូវបានសមត្ថកិច្ចឃាត់ខ្លួនរួចហើយនៅព្រឹកថ្ងៃទី១០ មេសា ហើយសំណុំរឿងពួកគេ ក៏ត្រូវបានគេបញ្ជូនទៅព្រះរាជអាជ្ញាអមសាលាដំបូងខេត្តព្រៃវែង រួចហើយដែរក្នុងថ្ងៃតែមួយ៖ «ទោះបីជាគាត់មិនសារភាពក៏ដោយ ប៉ុន្តែអង្គហេតុនេះយើងជឿទេថា នៅពេលដែលចាប់ចឹង ហើយគាត់បដិសេធមិនបានវាយមិនបានចងយ៉ាងម៉េចនោះ វាជាសិទ្ធិរបស់គាត់ ប៉ុន្តែអង្គហេតុនេះ អំពើនេះជាទម្រង់នៃភាពឃោរឃៅដែលយើងមិនអាចទទួលយកបានទេ។ អ៊ីចឹងក្នុងនាមជាមេបញ្ជាការកងរាជអាវុធហត្ថលើផ្ទៃប្រទេស ត្រូវតែចាត់វិធានការម៉ឺងម៉ាត់បញ្ជូនទៅតុលាការ ដើម្បីឲ្យតុលាការវិនិច្ឆ័យ»។
លោក សៅ សុខា កាលពីថ្ងៃទី២២ មីនា បានបង្កើតគណៈកម្មការចំពោះកិច្ចមួយ ដើម្បីចុះស៊ើបអង្កេតពីករណីបាញ់បោះ និងវាយដំទៅលើប្រជាពលរដ្ឋដឹកស្រូវដោយកម្លាំងកងរាជអាវុធហត្ថ។ ករណីបាញ់បោះនោះ បានកើតឡើងកាលពីយប់ថ្ងៃទី១៩ ខែមីនា នៅលើទឹកដីនៃខេត្តព្រៃវែង ប៉ុន្តែដោយមានការពាក់ព័ន្ធនឹងកម្លាំងកងរាជអាវុធហត្ថមកពីខេត្តត្បូងឃ្មុំ ផងដែរ។
ក្រោយព្រឹត្តិការណ៍នោះ បុរស ២នាក់នៅលើរថយន្ត ត្រូវបានសមត្ថកិច្ចចាប់ខ្លួន និងធ្វើទារុណកម្មយ៉ាងដំណំ។ រូបភាពនៃការចាប់ឃាត់ខ្លួន និងធ្វើទារុណកម្មទៅលើអ្នកបើកបររថយន្តដឹកស្រូវ ត្រូវបានពលរដ្ឋបង្ហោះ និងចែកចាយតៗគ្នានៅលើបណ្ដាញសង្គមហ្វេសប៊ុក (Facebook)។ រូបភាពបង្ហាញពីបុរស ២នាក់ដោះអាវ ខ្លួន និងមុខប្រឡាក់ឈាម ហើយបុរសម្នាក់ត្រូវបានសមត្ថកិច្ចចងស្លាបសេកឲ្យដេកផ្កាប់មុខលើថ្នល់ រួចយកជើងជាន់ពីលើក្បាល។
ចំពោះវិធានការរបស់ លោក សៅ សុខា នៅពេលនេះ ត្រូវបានប្រធានគ្រប់គ្រងបច្ចេកទេសនៃអង្គការលីកាដូ (Licadho) លោក អំ សំអាត សម្ដែងការគាំទ្រ។ លោក អំ សំអាត កត់សម្គាល់ថា ការដាក់ពិន័យរដ្ឋបាលតាមរយៈការបញ្ឈរ ឬផ្អាកមុខងារបណ្ដោះអាសន្ន ដើម្បីរង់ចាំការស៊ើបអង្កេតរបស់តុលាការ វាជារឿងត្រឹមត្រូវ។ លោកថា ប្រសិនបើតុលាការរកឃើញថា កងរាជអាវុធហត្ថបានប្រព្រឹត្តបទល្មើស ពួកគេត្រូវទទួលទោសតាមច្បាប់៖ «ខ្ញុំថាវាជាសញ្ញាវិជ្ជមានមួយសម្រាប់ឲ្យមន្ត្រីសមត្ថកិច្ចផ្សេងៗទៀត ធ្វើការយកចិត្តទុកដាក់ ហើយអនុវត្តភារកិច្ចរបស់ខ្លួន ក៏ដូចជាការអនុវត្តច្បាប់ដោយមិនមានការអាងថាខ្លួនជាសមត្ថកិច្ច ធ្វើអ្វីតាមតែអំពើចិត្ត»។
បើទោះជាមានវិធានការច្បាប់ចំពោះកងរាជអាវុធហត្ថក៏ដោយ គណៈកម្មការចំពោះកិច្ច ក៏បានរកឃើញដែរថា ពលរដ្ឋដឹកស្រូវ ២នាក់ ក៏បានប្រព្រឹត្តកំហុសឆ្គងផងដែរ។ លោក ស៊ិន សុផាន្នី បញ្ជាក់ថា ពលរដ្ឋដឹកស្រូវទាំងនោះមានចេតនាបើកគេចពីក្រុមថ្លឹងជញ្ជីងចល័ត ដោយហេតុថា រថយន្តពួកគេដឹកលើសទម្ងន់។ ពួកគេបានបង្កគ្រោះថ្នាក់ចរាចរណ៍ និងមិនព្រមឈប់រថយន្តតាមការចង់បានរបស់សមត្ថកិច្ច។
យ៉ាងណា លោកថា ពួកគេមិនត្រូវបានសមត្ថកិច្ចចាប់ខ្លួនទេនៅពេលនេះ ប៉ុន្តែលោកថា នីតិវិធីបន្តសម្រាប់ពួកគេ នឹងទៅជាយ៉ាងណានោះ វាអាស្រ័យលើការចាត់ការរបស់តុលាការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។