ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានឲ្យដឹងនៅថ្ងៃពុធ ទី៨ ខែមករា ថា មានសាលាចន្លោះពី ១០ ទៅ ២០សាលាទេនៅទូទាំងប្រទេស មានគ្រូបង្រៀនហ៊ានចេញមុខធ្វើកូដកម្មមិនចូលបង្រៀន ឬលើកបដាទាមទារដំឡើងប្រាក់ខែ ១លានរៀល។
លោកបានអំពាវនាវដល់រដ្ឋាភិបាល ឬស្ថាប័នពាក់ព័ន្ធ ត្រូវពិចារណាដំឡើងប្រាក់ខែជូនគ្រូបង្រៀនឲ្យបានសមរម្យ ដើម្បីកុំឲ្យប៉ះពាល់ដល់សតិអារម្មណ៍គ្រូបង្រៀន និងការសិក្សារបស់សិស្ស៖ «យើងស្នើឲ្យរដ្ឋាភិបាល ក៏ដូចជាក្រសួង ត្រូវតែយកចិត្តទុកដាក់ផ្តល់ដំណោះស្រាយទៅតាមការទាមទាររបស់លោកគ្រូអ្នកគ្រូឲ្យបាន ១លានរៀលក្នុង១ខែជូនពួកគាត់។ យើងដឹងហើយនៅឆ្នាំ២០១៤ នេះ រដ្ឋាភិបាលមិនទាន់បានដំឡើងទេជុំវិញប្រាក់ខែរបស់ពួកគាត់»។
ក្រុមគ្រូបង្រៀនដែលបានបន្តចេញមុខតវ៉ា ឬលើកបដានៅតាមសាលានានា ដើម្បីទាមទារប្រាក់ខែ ១លានរៀល នៅថ្ងៃពុធ ទី៨ ខែមករា បានអះអាងដូចៗគ្នាថា ពួកគាត់ត្រូវនាយកសាលា ឬប្រធានមន្ទីរអប់រំ និងប៉ូលិសនៅតាមរាជធានី-ខេត្តនីមួយៗ ព្រមានដកចេញពីក្របខណ្ឌគ្រូបង្រៀន ឬគំរាមដាក់ពិន័យផ្សេងៗ។
គ្រូបង្រៀនឈ្មោះ ទៀប កែវភិរម្យ បង្រៀននៅវិទ្យាល័យ ជា ស៊ីម ចំរើនរដ្ឋ មានទីតាំងក្នុងសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ស្ថិតក្នុងចំណោមគ្រូបង្រៀនតាមសាលាផ្សេងទៀត ដែលតវ៉ាដំឡើងប្រាក់ខែ ១លានរៀល។ លោកបានឲ្យដឹងថា សកម្មភាពតវ៉ាលើកបដាទាមទារដំឡើងប្រាក់ខែរបស់គ្រូបង្រៀននៅក្នុងសាលានេះ បានរងការគំរាមពីនាយករបស់ខ្លួន។
លោក កែវភិរម្យ ថ្លែងថា សកម្មភាពតាមទាមទារដំឡើងប្រាក់ខែរបស់ក្រុមគ្រូបង្រៀន គឺមិនបានប៉ះពាល់ដល់សណ្ដាប់ធ្នាប់សង្គមទេ និងស្របតាមច្បាប់រដ្ឋធម្មនុញ្ញកម្ពុជា។ ដូច្នេះ មិនគួរមានការគំរាមកំហែងពីផ្នែកពាក់ព័ន្ធណាមួយឡើយ៖ «ព្រឹកមិញខ្ញុំមកសាលា ហើយខ្ញុំរៀបចំសរសេរបដាលើក ហើយត្រូវនាយកគាត់ឃាត់។ នាយកនិយាយថា អត់ឲ្យធ្វើទេ បើហ៊ានធ្វើហៅប៉ូលិសមកឥឡូវ។ ហើយខ្ញុំក៏និយាយថា ការធ្វើនេះជាសិទ្ធិ និងសេរីភាពរបស់ខ្ញុំទេ។ ក្រោយមក ឃើញប៉ូលិសបង្ហាញវត្តមានម្នាក់ ហើយនាយកមកហាមមិនឲ្យធ្វើជាដាច់ខាត បើចង់ធ្វើទៅធ្វើនៅឲ្យឆ្ងាយ។ ខ្ញុំថា នៅក្នុងសាលាក៏គេមានសិទ្ធិលើកបដាទាមទារនេះដែរ។ ហើយខ្ញុំមានគ្នាចន្លោះពី ៤ ទៅ ៥នាក់ ក៏បានបន្តសរសេរបដាទាមទារដំឡើងប្រាក់ខែ ១លានរៀល។ ហើយពេលនេះ នាយកសាលាគាត់ក៏មកឆក់បដាចេញពីខ្ញុំ»។
ត្រង់ចំណុចនេះ លោក រ៉ុង ឈុន បានអំពាវនាវដល់ថ្នាក់ដឹកនាំស្ថាប័នពាក់ព័ន្ធ ពិសេសរដ្ឋាភិបាល គួរពិចារណាដំឡើងប្រាក់ខែជូនគ្រូបង្រៀនឲ្យបានសមរម្យ ជាជាងប្រើប្រព័ន្ធតុលាការ ឬការគំរាមកំហែងផ្សេងៗ ទៅបុគ្គលិកគ្រូបង្រៀនដែលចេញមុខតវ៉ាទាមទារប្រាក់ខែសមរម្យ៖ «យើងឃើញមានសម្ពាធធ្ងន់មកលើលោកគ្រូអ្នកគ្រូ។ ប៉ុន្តែទោះបីជាមានសម្ពាធបែបនេះក្តី ក៏ប៉ុន្តែនៅក្នុងចិត្តលោកគ្រូអ្នកគ្រូ ក៏នៅតែនាំគ្នាធ្វើការទាមទារ។ ថ្វីត្បិតតែគាត់ចូលថ្នាក់មែន តែសាលាខ្លះក៏គាត់មិនបានបង្រៀនទេ»។
លោក រ៉ុង ឈុន ឲ្យដឹងថា មានតំណាងសមាគមគ្រូបង្រៀនម្នាក់នៅខេត្តកំពង់ឆ្នាំង ត្រូវបានស្នងការនគរបាលខេត្តនេះកោះហៅទៅសួរនាំ ជុំវិញសកម្មភាពធ្វើកូដកម្មទាមទារដំឡើងប្រាក់ខែ ១លានរៀល នៅថ្ងៃពុធ ទី៨ ខែមករា។ លោកចាត់ទុកទង្វើនេះថាជាការគំរាមកំហែងដល់សិទ្ធិមនុស្សសម្ដែងមតិ ដែលការពារដោយច្បាប់។
ចំណែកគ្រូបង្រៀននៅវិទ្យាល័យ ទួលស្វាយព្រៃ រាជធានីភ្នំពេញ ក៏បានឲ្យដឹងថា មានគ្រូបង្រៀនប្រមាណ ៧០% បានលើកបដាតវ៉ាទាមទារឲ្យរដ្ឋាភិបាលដំឡើងប្រាក់ខែ ១លានរៀល នៅព្រឹកថ្ងៃពុធ ទី៨ ខែមករា។ ប៉ុន្តែគ្រូបង្រៀនទាំងនោះមានការព្រួយបារម្ភពីសុវត្ថិភាព និងការគំរាមផ្សេងៗពីសំណាក់ថ្នាក់ដឹកនាំស្ថាប័នអប់រំ និងប៉ូលិស ដែលបានតាមឃ្លាំមើលសកម្មភាពពួកគាត់។
អគ្គនាយកនៃអគ្គនាយកដ្ឋានអប់រំនៃក្រសួងអប់រំ យុវជន និងកីឡា លោក សំ សេរីរ័ត្ន និងមន្ត្រីរដ្ឋាភិបាលខ្លះ មិនធ្វើអត្ថាធិប្បាយឡើយចំពោះការទាមទារដំឡើងប្រាក់ខែរបស់គ្រូបង្រៀននេះ។
សមាគមគ្រូបង្រៀន បានឲ្យដឹងថា គ្រូបង្រៀននៅទូទាំងប្រទេសសរុបមានប្រមាណ ១១ម៉ឺននាក់។ ហើយថា ក្រុមគ្រូបង្រៀនមួយចំនួនបានចាប់ផ្ដើមធ្វើកូដកម្ម ឬមិនចូលបង្រៀនសិស្ស និងលើកបដា ដើម្បីទាមទារដំឡើងប្រាក់ខែ ១លានរៀល បានចាប់ផ្ដើមកាលពីថ្ងៃច័ន្ទ ទី៦ ខែមករា។ ប៉ុន្តែមានគ្រូបង្រៀនភាគតិចទេដែលហ៊ានចេញមុខតវ៉ា ឬហ៊ានលើកបដាទាមទារដំឡើងប្រាក់ខែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។