មន្ត្រីទំនាក់ទំនងព្រំដែនកម្ពុជា-ថៃ ប្រចាំច្រកអូរស្មាច់ ខេត្តឧត្តរមានជ័យ បានឱ្យដឹងថា ទាហានការពារព្រំដែនថៃ នៃស្រុកកាប់ជើង ខេត្តសុរិន្ទ បានបញ្ជូនសាកសពបុរសខ្មែរម្នាក់ដែលពួកគេបាញ់សម្លាប់មកឱ្យក្រុមគ្រួសារវិញ កាលពីថ្ងៃទី២០ ខែមេសា កន្លងទៅ។
ប្រធានក្រុមការងារទំនាក់ទំនងព្រំដែនកម្ពុជា-ថៃ នៃច្រកអូរស្មាច់ ក្រុងសំរោង គឺលោក រៀល ណារ៉ា។ លោកបានមានប្រសាសន៍កាលពីរសៀលថ្ងៃច័ន្ទ ទី២២ ខែមេសា ថា បុរសអ្នកភូមិខ្មែរម្នាក់នោះ ត្រូវទាហានថៃ បាញ់សម្លាប់នៅពេលឆ្លងដែនទៅក្នុងទឹកដីថៃ នៃស្រុកកាប់ជើង មិនជ្រៅប៉ុន្មានពីបន្ទាត់ព្រំដែនកម្ពុជា-ថៃ ទេ៖ «បើតាមការជូនដំណឹងមក គឺការចូលក្នុងទឹកដីថៃ កាប់ឈើ។ នៅជាប់ព្រំដែនហ្នឹង មានគ្រាប់បែកផង អ៊ីចឹងគេបាញ់។ មានតែប៉ុណ្ណឹងទេ»។
ប្រភពពីប្រជាពលរដ្ឋខ្មែរនៅភូមិអូរស្មាច់ លើខ្នងភ្នំដងរែក បានឱ្យដឹងថា បុរសខ្មែរដែលទាហានថៃ បាញ់ស្លាប់នោះ ឈ្មោះ វេត អាយុប្រមាណជាង ៣០ឆ្នាំ ដែលមានកូនតូចៗចំនួន ៤នាក់នៅក្នុងបន្ទុក។ គេដឹងថា បុរសខ្មែរម្នាក់នោះត្រូវទាហានការពារព្រំដែនថៃ បាញ់ស្លាប់នៅម្តុំចំណុចថ្មដា បង្គោលឡាក់លេខ ១៣ នៃព្រំដែនកម្ពុជា-ថៃ៖ «ស្រុកកំណើតនៅកំពង់ធំ ដល់ពេលនេះបានមកនៅភូមិអូរពក។ ផុតពីនៅអូរពក បានមកនៅចាំចម្ការឱ្យគេនៅថ្មដា ភូមិអូរស្មាច់។ សាកសពនោះ កងកម្លាំងថៃ គេបានបញ្ជូនមកឱ្យវត្តមេត្តា នៅភូមិអូរពក នោះឯង»។
កាលពីរាត្រីថ្ងៃទី១០ ខែមីនា កន្លងទៅ សមត្ថកិច្ចកម្ពុជា បានអះអាងថា ទាហានថៃ ខេត្តស៊ីសាកេត បានបាញ់សម្លាប់ប្រជាពលរដ្ឋខ្មែរចំនួន ២នាក់ នៅទល់មុខភូមិសាស្ត្រស្រុកត្រពាំងប្រាសាទ ខេត្តឧត្តរមានជ័យ ហើយកាលពីថ្ងៃទី៨ ខែមីនា ទាហានថៃ បានចាប់ខ្លួនស្ត្រីខ្មែរ ៣នាក់ទៀត ដោយសារតែឆ្លងដែនទៅកាប់ឈើគ្រញូងក្នុងទឹកដីថៃ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន បានមានប្រសាសន៍ថា ទាហានថៃ នៃខេត្តសុរិន្ទ និងខេត្តស៊ីសាកេត នៅតែបន្តបាញ់សម្លាប់ ប្រជាពលរដ្ឋខ្មែរដែលឆ្លងដែនទៅកាប់ឈើគ្រញូងខុសច្បាប់ក្នុងទឹកដីថៃ។ លោក ស្រី ណារ៉េន បានបញ្ជាក់ថា ចាប់តាំងពីខែមករា រហូតដល់ខែមេសា នេះ តាមតួលេខត្រួសៗ គឺទាហានថៃ បានបាញ់សម្លាប់ប្រជាពលរដ្ឋខ្មែរចំនួន ៨នាក់។
កន្លងទៅរដ្ឋាភិបាលខ្មែរធ្លាប់បញ្ចេញប្រតិកម្មចំពោះការបាញ់សម្លាប់នេះ ដោយអំពាវនាវ និងផ្ញើកំណត់ការទូតជាហូរហែទៅរដ្ឋាភិបាលថៃ ឱ្យអនុវត្តតាមច្បាប់កុំបាញ់សម្លាប់ពលរដ្ឋខ្មែរតទៅទៀត ប៉ុន្តែភាគីថៃ មិនបានឆ្លើយតបជាផ្លូវការណាមួយទេ អំពីការបាញ់សម្លាប់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។