អ្នកនាំទំនិញចេញពីកម្ពុជា បានអោយដឹងថា សមត្ថភាពផ្ទុកទំនិញនាំចេញនៅតាមកំពង់ផែនានានៅមានកម្រិតនៅឡើយ ជាពិសេសលើការនាំចេញអង្ករមួយលានតោននៅឆ្នាំ២០១៥។
ការកើនឡើងនូវសកម្មភាពវិនិយោគនៅក្នុងប្រទេស និងពាណិជ្ជកម្មអន្តរជាតិ ធ្វើឲ្យតម្រូវការនាំចូលទំនិញឆ្លងកាត់កំពង់ផែកើនឡើង។
ការនាំទំនិញចេញចូលឆ្លងកាត់កំពង់ផែស្វយ័តព្រះសីហនុ បានកើនឡើងនៅត្រីមាសទីមួយនាឆ្នាំ២០១៣។ កត្តានេះក៏ជំរុញកំណើនសេដ្ឋកិច្ចដែរ។ របាយការណ៍របស់កំពង់ផែស្វយ័តព្រះសីហនុ បានឲ្យដឹងថា ចំនួនទំនិញឆ្លងកាត់ផែកើនឡើងចំនួន ១៥% នៅក្នុងត្រីមាសទីមួយឆ្នាំ២០១៣ បើធៀបនឹងរយៈពេលដូចគ្នាកាលពីឆ្នាំមុន។
ទំនិញដែលនាំចូលមកកម្ពុជា រួមមាន គ្រឿងម៉ាស៊ីន ប្រេងឥន្ធនៈ ស៊ីម៉ង់ និងដែកជាដើម ដែលមានចំនួនជិត ៦សែនតោន។ ការនាំចេញរបស់កម្ពុជា វិញ មានកសិផល និងផលិតផលរោងចក្រកាត់ដេរ ដែលមានចំនួនជិត ២សែនតោន។ ការនាំចូលបរិមាណទំនិញដែលឆ្លងកាត់កំពង់ផែ បានបង្ហាញពីសន្ទុះនៃការអភិវឌ្ឍខ្លាំងទាក់ទងនឹងការសាងសង់រោងចក្រ ឬអគារនានានៅប្រទេសកម្ពុជា។
ពាណិជ្ជករ និងមន្ត្រីនៅកំពង់ផែ បានអះអាងថា តួនាទីរបស់កំពង់ផែមានសារសំខាន់នៅក្នុងវិស័យពាណិជ្ជកម្ម និងកាត់បន្ថយការនាំចេញទំនិញដោយខុសច្បាប់ទៅប្រទេសជិតខាង។
អគ្គនាយករងនៃកំពង់ផែស្វយ័តព្រះសីហនុ លោក ម៉ា ស៊ុនហួត មានប្រសាសន៍ថា កំពង់ផែបានចែកជាបីផ្នែកផ្សេងគ្នា ដូចជាកំពង់ផែសម្រាប់ទំនិញទូទៅ សម្រាប់កុងតឺន័រ និងសម្រាប់ទេសចរណ៍។ លោកបញ្ជាក់ទៀតថា កំពង់ផែនេះអាចផ្ទុកទំនិញសម្រាប់នាំចេញនាំចូលខ្ពស់ជាងទំហំទំនិញដែលបានឆ្លងកាត់ ឬចរាចរនាពេលនេះ។
តែអ្នកនាំទំនិញចេញបានបង្ហាញថា សមត្ថភាពផ្ទុកទំនិញនៅកំពង់ផែ ជាបញ្ហាប្រឈមចំពោះការនាំចេញទៅតាមការចង់បានរបស់អ្នកបញ្ចាទិញអន្តរជាតិនៅពេលអនាគត។ វិស័យកាត់ដេរ និងការកែច្នៃនាំចេញអង្ករ មានបរិមាណច្រើនលើសលប់ ដែលកំពង់ផែបច្ចុប្បន្ននេះមិនអាចផ្ទុកបាន។
កម្ពុជា គ្រោងនឹងនាំអង្ករចេញមួយលានតោននៅឆ្នាំ២០១៥ ដែលស្មើនឹងប្រមាណ ៤ម៉ឺនកុងតឺន័រ។
ប្រធានសហព័ន្ធអ្នកនាំអង្ករចេញនៅកម្ពុជា និងជាប្រធានក្រុមហ៊ុននាំចេញអង្ករខ្មែរហ្វូត (Khmer Food) លោកឧកញ៉ា គឹម សាវុធ មានប្រសាសន៍ថា កំពង់ផែព្រះសីហនុ ក្នុងពេលនេះអាចផ្ទុកអង្ករបានចំនួនប្រមាណ ២០ម៉ឺនតោនប៉ុណ្ណោះ។ លោកបញ្ជាក់ថា បើគ្មានការអភិវឌ្ឍសាងសង់កំពង់ផែនោះទេ ការនាំចេញអង្ករនឹងស្ទះនៅពេលអនាគត។
លោកបន្ថែមថា ឧបសគ្គចំពោះការនាំចេញអង្ករ គឺបញ្ហាដឹកទំនិញពីរោងចក្រទៅកាន់កំពង់ផែ និងការលើកដាក់កប៉ាល់។
បន្ថែមលើនេះ អគ្គនាយកក្រុមហ៊ុននាំអង្ករចេញឡូរ៉ង់ លោកឧកញ៉ា លឹម ប៊ុនហេង មានប្រសាសន៍ថា ការនាំទំនិញចេញនៅកំពង់ផែស្វយ័តព្រះសីហនុ នាពេលនេះមានភាពងាយស្រួលជាងមុន ព្រោះត្រូវការរយៈពេលប្រមាណ ៣ថ្ងៃប៉ុណ្ណោះ។
ទោះជាយ៉ាងណាក៏ដោយ លោកក៏នៅតែចង់ឲ្យកំពង់ផែនេះបង្កើនពេលវេលាលើកដាក់ទំនិញនាំចេញឲ្យបានឆាប់ជាងនេះទៀត ដើម្បីជៀសវាងការកកស្ទះនៅពេលដែលទំនិញឆ្លងកាត់កំពង់ផែកើនឡើងខ្លាំង។
ប៉ុន្តែ អគ្គនាយករងនៃកំពង់ផែស្វយ័តព្រះសីហនុ លោក ម៉ា ស៊ុនហួត មានប្រសាសន៍ផ្ទុយថា គោលដៅនាំចេញអង្ករចំនួន ១លានតោននៅឆ្នាំ២០១៥ ដែលរដ្ឋាភិបាលគ្រោង គឺអាចធ្វើទៅបាន ដោយសារតែបច្ចុប្បន្ន សមត្ថភាពនៃកំពង់ផែអាចនាំចេញបានចំនួន ១០ម៉ឺនកុងតឺន័រក្នុងមួយឆ្នាំ។ ម៉្យាងវិញទៀត កំពង់ផែស្វយ័តព្រះសីហនុ ក៏គ្រោងនឹងសាងសង់ពង្រីកបន្ថែម ដែលនឹងចំណាយទឹកប្រាក់ប្រមាណ ៨០លានដុល្លារ ដែលអាចបង្កើនសមត្ថភាពផ្ទុក និងនាំចេញបានច្រើន នៅរយៈពេលដ៏ខ្លីខាងមុខនេះ។
លោកបញ្ជាក់ទៀតថា កំពង់ផែថ្មីនេះអាចអោយកប៉ាល់ធំចូលចតបាន និងអាចផ្ទុក និងដឹកទំនិញលើសកំពង់ផែបច្ចុប្បន្នប្រមាណ ៤ដង។
ការសាងសង់កំពង់ផែនៅខេត្តព្រះសីហនុ មានការគាំទ្រពីដៃគូអភិវឌ្ឍន៍ គឺប្រទេសចិន វៀតណាម និងជប៉ុន។
លោក ម៉ា ស៊ុនហួត បន្ថែមថា ការសាងសង់កំពង់ផែចុងក្រោយដែលមានមុខ ឬកន្លែងចូលចតច្រើន មានការគាំទ្រហិរញ្ញវត្ថុពីប្រទេសជប៉ុន នឹងចាប់ផ្ដើមនៅឆ្នាំ២០១៤ ហើយបញ្ចប់នៅឆ្នាំ២០១៦។
នៅពេលសាងសង់ហើយ កំពង់ផែថ្មីនេះអាចនាំចេញផលិតផលផ្សេងៗទៀត រួមមានចំណាំងឈើ ដើមអាកាស្យា និងកសិផលផ្សេងៗទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។