មនុស្ស ៣នាក់នៅខេត្តកណ្ដាល ត្រូវគេសង្ស័យថាស្លាប់ បន្ទាប់ពីបាត់ខ្លួនអស់ជាច្រើនម៉ោង ដោយសារបាក់ច្រាំងទន្លេ។ ពលរដ្ឋដែលបាត់ខ្លួននោះ មានស្ត្រីម្នាក់ជាកម្មករឡឥដ្ឋ វ័យជិត ៤០ឆ្នាំ រួមទាំងកុមារាពីរនាក់ ដែលត្រូវជាកូន និងចៅ រស់នៅភូមិព្រះប្រសប់ ឃុំព្រះប្រសប់ ស្រុកខ្សាច់កណ្ដាល ខេត្តកណ្ដាល។
ក្រុមអាជ្ញាធរមានសមត្ថកិច្ច និងអ្នកជំនាញមុជទឹក កំពុងចុះរាវទឹកទន្លេ ដើម្បីស្វែងរកអ្នកដែលបាត់ខ្លួនក្នុងហេតុការណ៍បាក់ច្រាំងទន្លេ កាលពីយប់ថ្ងៃទី១៨ ខែកុម្ភៈ។ ក្រៅពីអ្នកបាត់ខ្លួន ក៏មានមនុស្សចំនួន ៣នាក់ផ្សេងទៀតបានរបួសផងដែរ។ ដីច្រាំងទន្លេនោះមានទំហំប្រមាណជាង ៤០០ម៉ែត្រក្រឡា ហើយទ្រលំនៅឋានចំនួន ៣ខ្នង របស់កម្មករឡឥដ្ឋជាង ១០នាក់។
សាក្សីនៅកន្លែងកើតហេតុឲ្យដឹងថា ច្រាំងទន្លេដែលបានបាក់នោះ មានស្នាមប្រេះតិចតួចប៉ុណ្ណោះមុនពេលកើតហេតុ។
ទន្ទឹមនឹងនោះ តំណាងម្ចាស់ឡឥដ្ឋ លោក លាប ឆេងសួយ ឲ្យដឹងថា លោកធ្លាប់គ្រប់គ្រងឡឥដ្ឋអស់រយៈពេលជាង ១០ឆ្នាំមកហើយ មុននឹងផ្ទេរឲ្យទៅប្អូនប្រុស។ លោកបន្តថា ដីច្រាំងទន្លេនេះមិនធ្លាប់ប្រេះ ឬបាក់នោះទេ ហើយក៏មិនសមថានឹងស្រុតចូលក្នុងទឹកទន្លេដូច្នេះទេ។ ប៉ុន្តែ ដីនៅតំបន់នេះធ្លាប់មានប្រវត្តិជាតំបន់បូមខ្សាច់យ៉ាងគគ្រឹកគគ្រេង កាលពី ៥ឆ្នាំមុន ហើយក៏ជាទីតាំងដែលទឹកហូរបុកខ្លាំងដែរ។ លោកបញ្ជាក់ថា ការងារចម្បងបំផុតពេលនេះ គឺម្ចាស់ឡឥដ្ឋ និងសមត្ថកិច្ច ត្រូវព្យាយាមរកអ្នកដែលបាត់ខ្លួនទាំង ៣នាក់នោះ។
«សំឡេង»
ចំណែកឯមេឃុំព្រះប្រសប់ លោក តោ យន្ត មានប្រសាសន៍ថា ការបាក់ដីនេះជាឧបទ្ទវហេតុធម្មជាតិ។ លោកបន្តថា អាជ្ញាធរមូលដ្ឋានធ្លាប់បានដាស់តឿនពីបញ្ហាប្រឈមនៃគ្រោះថ្នាក់បាក់ច្រាំងទន្លេនេះម្តងជាពីរដង ទៅកាន់អ្នកភូមិរួចហើយ ប៉ុន្តែមកពីមិនទាន់ឃើញគ្រោះថ្នាក់ ទើបអ្នកភូមិបន្តរស់នៅទីនោះ។ លោកបញ្ជាក់ថា នៅឃុំរបស់លោកមិនធ្លាប់មានការបូមខ្សាច់នោះឡើយ។
«សំឡេង»
ទោះជាយ៉ាងណាក្តី ពលរដ្ឋវ័យចំណាស់មួយចំនួនដែលវិទ្យុអាស៊ីសេរី ជួបសម្ភាស ប្រាប់ថា នៅក្នុងទន្លេផ្នែកខាងលើមានចម្ងាយប្រហែលពីរគីឡូម៉ែត្រ ពីទីតាំងបាក់ច្រាំងនោះ គឺជាការដ្ឋានបូមខ្សាច់ដ៏ធំមួយ ដែលមានសាឡង់ជាច្រើនគ្រឿងកំពុងបូមខ្សាច់ទាំងថ្ងៃទាំងយប់។ ពលរដ្ឋទាំងនោះបញ្ជាក់ថា ការដែលបូមខ្សាច់នៅភាគខាងលើនេះហើយ ទើបធ្វើឲ្យទឹកហូរបុកច្រាំងខ្លាំង ហើយមានរូងដីរហូតមានការបាក់ច្រាំងយ៉ាងដូច្នេះ។
ស្របពេលសមត្ថកិច្ច និងអ្នកកាសែតកំពុងបំពេញការងារនៅកន្លែងកើតហេតុ នៅក្នុងទន្លេឯណោះវិញ មានសាឡង់ជាច្រើនគ្រឿងកំពុងបើកបរទៅមក ដោយមានផ្ទុកខ្សាច់ពេញៗសាឡង់។
កាលពីឆ្នាំ២០១៣ លោកនាយករដ្ឋមន្ត្រី ហ៊ុន សែន ធ្លាប់បញ្ជាឲ្យផ្អាកសកម្មភាពបូមខ្សាច់ទាំងអស់ នៅតាមទន្លេមេគង្គ ដើម្បីទប់ស្កាត់ការបាក់ច្រាំងទន្លេ ហើយ លោក ហ៊ុន សែន មិនទាន់បានដកបទបញ្ជានេះនៅឡើយ។ ប៉ុន្តែ ឈ្មួញនៅតែបូមខ្សាច់នៅតាមដងទន្លេជាធម្មតា ហើយហាក់មិនខ្វល់ពីផលប៉ះពាល់នៃការបាក់ច្រាំងទន្លេ បណ្ដាលឲ្យខូចខាតដល់ផ្ទះសម្បែងប្រជាពលរដ្ឋនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។