ក្រុមហ៊ុនរថយន្តដឹកជញ្ជូនអ្នកដំណើរ កំពុងដំឡើងថ្លៃសេវាដឹកជញ្ជូនពីក្រុងប៉ោយប៉ែត ទៅទីក្រុងភ្នំពេញ ដោយពួកគេលក់សំបុត្រសម្រាប់មនុស្សម្នាក់ថ្លៃ ៣ម៉ឺន ៥ពាន់រៀល និងរថយន្តខ្លះទៀត លក់សំបុត្រលើសរហូតទៅដល់ ៦ម៉ឺនរៀល ខុសពីថ្ងៃធម្មតាដែលសំបុត្រមួយ គេលក់តែក្នុងតម្លៃ ៣ម៉ឺនរៀលតែប៉ុណ្ណោះ។
ការដំឡើងថ្លៃសេវាដឹកជញ្ជូននេះ បានចាប់ផ្ដើមឡើងតាំងពីថ្ងៃទី៩ ខែមេសា ឆ្នាំ២០១៣ ស្របពេលប្រជាពលរដ្ឋកំពុងនាំគ្នាសម្រុកធ្វើដំណើរទៅជួបជុំបងប្អូនកូនចៅក្រុមគ្រួសារនៅតាមស្រុកកំណើត នៅឱកាសបុណ្យចូលឆ្នាំខ្មែរដែលនឹងចូលមកដល់នៅថ្ងៃទី១៤-១៥ និង ១៦ ខាងមុខនេះ។
ប្រជាពលរដ្ឋឈ្មោះ ខៀវ បូរី រស់នៅក្រុងប៉ោយប៉ែត បានថ្លែងនៅថ្ងៃទី១២ ខែមេសា ថា បញ្ហានេះកំពុងបង្កការលំបាកដល់ប្រជាពលរដ្ឋ និងជាពិសេសសម្រាប់ប្រជាពលរដ្ឋខ្មែរដែលវិលត្រឡប់មកពីប្រទេសថៃ៖ «ក្រុមឈ្មួញក៏ដូចជាអ្នករកស៊ី បន់ឲ្យតែមានឱកាសបែបហ្នឹង គឺគាត់ឆ្លៀតឱកាសដំឡើងថ្លៃតាមអំពើចិត្ត ព្រោះអីអាជ្ញាធរក្រុងក៏បានធ្វើការហាមឃាត់ដែរ ប៉ុន្តែការហាមឃាត់ហ្នឹង វាប្រៀបដូចថា កោកៗសឹកមាត់តាដោក ឆ្អែតពោះក្របី វាអត់វាមានអីសំខាន់សម្រាប់ពួកខិលខូចហ្នឹងទេ។ ពួកគេគិតជាលុយបាត លក់ឲ្យអ្នកមកពីថៃ ៣៥០បាត មានតម្លៃជាង ៥ម៉ឺនប្រាក់រៀល»។
លោកកត់សម្គាល់ឃើញថា ជារៀងរាល់ឆ្នាំ នៅពេលមានពិធីបុណ្យទានធំម្ដងៗ ជាពិសេសនៅមុន និងនៅចំថ្ងៃបុណ្យចូលឆ្នាំ ម្ចាស់ក្រុមហ៊ុនដឹកជញ្ជូនតែងតែដំឡើងថ្លៃសំបុត្រ ហើយបញ្ហានេះគេពុំឃើញមានការទប់ស្កាត់ឲ្យមានប្រសិទ្ធភាពនោះទេ។
លោក មាន សារិទ្ធិ សមាជិកក្រុមប្រឹក្សាក្រុងប៉ោយប៉ែត ថ្លែងថា ប្រជាពលរដ្ឋនៅក្រុងប៉ោយប៉ែត កំពុងនាំគ្នារអ៊ូរទាំ ដោយសារសេវាដឹកជញ្ជូនឡើងថ្លៃ។ នៅថ្ងៃធម្មតា ការធ្វើដំណើរពីប៉ោយប៉ែត ទៅភ្នំពេញ គេលក់សំបុត្រសម្រាប់មនុស្សម្នាក់ថ្លៃ ៣ម៉ឺនរៀល ហើយបើអ្នកដំណើរណាចុះពាក់កណ្ដាលផ្លូវ ដូចជានៅខេត្តបាត់ដំបង ខេត្តពោធិ៍សាត់ និងខេត្តកំពង់ឆ្នាំង នោះ គេយកត្រឹមតែ ១៥.០០០រៀល ទៅ ២ម៉ឺនរៀល៖ «ប៉ុន្តែ ឡានឥឡូវគេមិនគិតពាក់កណ្ដាលផ្លូវទេ បើទិញសំបុត្រឡើងពីប៉ោយប៉ែត ទៅភ្នំពេញ ៣៥.០០០រៀល ខាងសាលាក្រុង និយាយថា ឡើងប៉ុណ្ណឹងតិចហើយ គេទប់ស្កាត់ជាប់តម្លៃនេះមិនតិចទេ ពីព្រោះការធ្វើដំណើរពីប៉ោយប៉ែត ទៅភ្នំពេញ គឺ ៣៥.០០០រៀលមែនពិត ប៉ុន្តែបើឡានផ្សេងខុសពីឡានក្រុង ឡើងដល់ ៤ម៉ឺន ទៅ ៦ម៉ឺនរៀល ដូចឡាន ១២បាំង»។
អធិការនគរបាលក្រុងប៉ោយប៉ែត លោក អ៊ុំ សុផល បញ្ជាក់ថា សាលាក្រុងប៉ោយប៉ែត កន្លងទៅនេះបានចេញសារាចរណែនាំដល់គ្រប់ក្រុមហ៊ុន និងបណ្ដារថយន្តដឹកជញ្ជូនទាំងអស់ ហាមមិនឲ្យឡើងថ្លៃសេវាដឹកជញ្ជូនអ្នកដំណើរនៅក្នុងឱកាសបុណ្យចូលឆ្នាំខ្មែរខាងមុខនេះ។ ប៉ុន្តែ មានម្ចាស់ក្រុមហ៊ុន និងម្ចាស់រថយន្តខ្លះ នៅតែបំពានលើសារាចរណែនាំរបស់សាលាក្រុង៖ «ព្រឹកមិញ ខ្ញុំចុះទៅ ខ្ញុំប៉ះមួយ ខ្ញុំហៅយកមកធ្វើកិច្ចសន្យា ហើយថតរូបគាត់យកលើសតម្លៃ ពីដើមយក ៣៥.០០០រៀល ឥឡូវគាត់យកដល់ ៦ម៉ឺន។ សាលាក្រុងបានចេញសារាចរណែនាំកំណត់ឲ្យយកតម្លៃពីមុនមកម៉េច នៅដដែល»។
ការដំឡើងថ្លៃសេវាដឹកជញ្ជូននេះ បានធ្វើឲ្យប៉ះពាល់ប្រជាពលរដ្ឋជាអ្នកក្រីក្រ ជាពិសេសនៅពេលពួកគេមានបំណងចង់ធ្វើដំណើរទៅស្រុកកំណើត ដើម្បីជួបជុំបងប្អូនក្រុមគ្រួសារក្នុងឱកាសបុណ្យចូលឆ្នាំខ្មែរ ហើយបញ្ហានេះ ពួកគាត់បានអំពាវនាវសុំឲ្យរដ្ឋាភិបាល គួរមានវិធានការទប់ស្កាត់ឲ្យមានប្រសិទ្ធភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។