ក្រសួងការងារ និងបណ្តុះបណ្តាលវិជ្ជាជីវៈ សម្រេចផ្តល់ប្រាក់ឈ្នួលអប្បបរមាដល់កម្មករក្នុងវិស័យកាត់ដេរចំនួន ១២៨ដុល្លារ នៅឆ្នាំ២០១៥។ នេះជាការសម្រេចឯកតោភាគី បន្ទាប់ពីគណៈកម្មការប្រឹក្សាការងារ (LAC) សម្រេចផ្តល់ប្រាក់ឈ្នួលឲ្យកម្មករត្រឹម ១២៣ដុល្លារ។
ខាងសហជីពតំណាងឲ្យកម្មករ មិនពេញចិត្តចំពោះការសម្រេចនោះទេ ហើយគិតថា កម្មករនឹងធ្វើការតវ៉ាប្រឆាំងចំពោះការសម្រេចរបស់ក្រសួង។
ក្រសួងការងារ បានបន្ថែមទឹកប្រាក់ចំនួន ៥ដុល្លារទៀតលើការសម្រេចរបស់គណៈកម្មការប្រឹក្សាការងារចំនួន ១២៣ដុល្លារក្នុងមួយខែ ដែលទើបតែបោះឆ្នោតសម្រេចដោយត្រីភាគីនៅថ្ងៃទី១២ វិច្ឆិកា។
ប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈ ដែលមានចំនួន ៦ប្រការ ចុះហត្ថលេខាដោយ លោក អ៊ិត សំហេង ជារដ្ឋមន្ត្រីបញ្ជាក់ថា កម្មករនិយោជិតសាកល្បងទទួលបានប្រាក់ឈ្នួល ១២៣ដុល្លារ។ ក្រោយបញ្ចប់ការងារសាកល្បង ពួកគេនឹងទទួលបាន ១២៨ដុល្លារ ហើយប្រាក់ឈ្នួលថ្មីនេះនឹងត្រូវអនុវត្តចាប់ពីថ្ងៃទី១ ខែមករា ឆ្នាំ២០១៥ តទៅ។ ប្រកាសនេះចេញប៉ុន្មានម៉ោងប៉ុណ្ណោះ ក្រោយពីក្រុមសហជីពធំៗចំនួន១២ បានចេញសេចក្តីថ្លែងការណ៍ជាបន្តបន្ទាប់ សម្ដែងការមិនពេញចិត្តចំពោះការសម្រេចរបស់គណៈកម្មការប្រឹក្សាការងារ ដែលផ្តល់ប្រាក់ឈ្នួលអប្បបរមាដល់កម្មករ ១២៣ដុល្លារសម្រាប់ឆ្នាំ២០១៥។ ការដំឡើង ៥ដុល្លាររបស់ក្រសួងការងារ នៅពេលនេះ ត្រូវបានសហជីពខ្លះគិតថាជាការរងាប់កំសួលកំហឹងរបស់ក្រុមសហជីព។
លោក អាត់ ធន់ ប្រធានសម្ព័ន្ធសហជីពស៊ីខៅឌូ (CCAWDU) ដែលបានបោះឆ្នោតគាំទ្រឲ្យមានការដំឡើងប្រាក់ឲ្យកម្មករ ១៤០ដុល្លារនោះ បញ្ជាក់ថា ទោះបីជាក្រសួងដំឡើងប្រាក់ឲ្យកម្មករដល់ ១២៨ដុល្លារ លើសពីក្រុមប្រឹក្សាការងារក៏ដោយចុះ ក៏ចំនួននេះនៅតែតិចតួចមិនអាចបង្គ្រប់ជីវភាពរស់នៅសមរម្យរបស់កម្មករបាននាពេលបច្ចុប្បន្ន៖ «យើងអត់ពេញចិត្តទេ ព្រោះវាជាចំនួនតិចពេក បានន័យថា វាអត់ស្របទៅនឹងការរស់នៅរបស់កម្មករនាពេលបច្ចុប្បន្ន។ អ្វីដែលយើងចង់បាន យើងចង់បានឲ្យប្រាក់ឈ្នួលពេលហ្នឹងដល់កម្រិតមួយរស់នៅសមរម្យ បន្ទាប់មកឡើងជារៀងរាល់ឆ្នាំតាមអតិផរណាក៏បានដែរ។ យើងអត់ចង់មានបញ្ហាទាមទាររាល់ឆ្នាំទេ ឥឡូវវាឡើងដល់កម្រិតដែលយើងចង់បានទេ»។
សព្វថ្ងៃនេះ ប្រាក់ឈ្នួលគោលរបស់កម្មករក្នុងវិស័យកាត់ដេរ ទទួលបានប្រាក់ ១០០ដុល្លារក្នុងមួយខែ។ បើរាប់គិតទាំងប្រាក់អត្ថប្រយោជន៍ផ្សេងៗចំនួន ១០ដុល្លារ និងប្រាក់ធ្វើដំណើរ ៧ដុល្លារ និងប្រាក់ខែគោល ១២៨ដុល្លារ នោះកម្មករអាចទទួលបានប្រាក់ ១៤៥ដុល្លារក្នុងមួយខែ។ ចំនួននេះនៅតែតិចជាងការរកឃើញរបស់រដ្ឋាភិបាលកាលពីឆ្នាំ២០១២ ដែលរកឃើញថា ប្រាក់ខែដែលកម្មករអាចរស់នៅបានសមរម្យនោះ គឺនៅក្នុងកម្រិត ១៥៧ដុល្លារ ទៅ ១៧៧ដុល្លារក្នុងមួយខែ។
អនុប្រធានគណៈកម្មការប្រឹក្សាការងារ និងជាតំណាងនិយោជក លោក ណាង សុធី បញ្ជាក់ថា ខាងនិយោជកទទួលយល់ព្រមដំឡើងប្រាក់ឈ្នួលឲ្យកម្មករទាំងទើសទាល់ ខណៈដែលខាងនិយោជកមានលទ្ធភាពដំឡើងឲ្យត្រឹម ១១០ដុល្លារក្នុងមួយខែ។ លោកគិតថា ការដំឡើងប្រាក់ឈ្នួលឲ្យកម្មករនោះ គឺហួសហេតុដែលពិបាកនឹងទទួលយក ប៉ុន្តែខាងក្រុមហ៊ុននៅតែគោរព និងអនុវត្តតាមការសម្រេចរបស់រដ្ឋាភិបាលដដែល។ លោកប៉ាន់ប្រមាណថា នៅពេលដែលប្រាក់ឈ្នួលឡើងថ្លៃ មានរោងចក្រពី ៣០ ទៅ ៥០រោងចក្រ អាចនឹងបិទទ្វារមិនដំណើរការ និងធ្វើឲ្យកម្មករយ៉ាងតិច ៥ម៉ឺននាក់គ្មានការងារធ្វើនៅឆ្នាំក្រោយ។ យ៉ាងណា លោកមានផែនការស្នើសុំឲ្យក្រសួងការងារ ជួយអន្តរាគមន៍ និងសម្រួលបញ្ចុះតម្លៃពន្ធដារ ថ្លៃដឹកជញ្ជូន ថ្លៃទឹកថ្លៃភ្លើង រួមទាំងការចំណាយក្រៅផ្លូវការមួយចំនួន ដើម្បីអាចទប់ស្កាត់ការដួលរលំរបស់រោងចក្រមួយចំនួន៖ «យើងបានត្រៀមរួចហើយ យើងនឹងធ្វើសំណើសុំដល់ឯកឧត្តមរដ្ឋមន្ត្រីជួបប្រជុំការងារក្រុមទី៨ ដើម្បីទទួលនូវសំណូមពរហានិភ័យដែលនឹងកើតឡើង ប្រសិនបើមានការបិទរោងចក្រ»។
ប្រទេសវៀតណាម ត្រូវបាន លោក ណាង សុធី បញ្ជាក់ថា ជាប្រទេសមួយដែលអាចទាក់ទាញអ្នកវិនិយោគឲ្យទៅធ្វើជំនួញនៅទីនោះ បន្ទាប់ពីមិនអាចទ្រទ្រង់លើការចំណាយប្រាក់ឈ្នួលខ្ពស់របស់រោងចក្រឲ្យកម្មករនៅឆ្នាំក្រោយ។
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បញ្ជាក់ថា តួលេខដែលកំណត់ដោយរដ្ឋាភិបាល ១២៨ដុល្លារនោះ គឺជាតួលេខសមហេតុសមផល ដែលអាចកែប្រែជីវភាពរបស់កម្មករបានខ្លះ។ លោកក៏ជឿដែរថា ខាងរោងចក្រក៏មានលទ្ធភាពគ្រប់គ្រាន់សម្រាប់ផ្តល់ប្រាក់ឈ្នួលឲ្យកម្មករដែរ៖ «យើងបានគិតគូរនូវគ្រប់ទិដ្ឋភាពទាំងអស់ ហើយខ្ញុំក៏ជឿថា បងប្អូនកម្មករបានកែសម្រួលជីវភាពរបស់ខ្លួនប្រសើរជាងឆ្នាំចាស់ ហើយរោងចក្រក៏មានលទ្ធភាពក្នុងការធានាផ្គត់ផ្គង់ប្រាក់ឈ្នួលនេះ។ ផលិតភាពនឹងមានការកើនឡើង ទន្ទឹមនេះខ្ញុំក៏ជឿថា មតិអន្តរជាតិដែលកំពុងតាមដាន លោកនឹងមានការចាប់អារម្មណ៍ ហើយការបញ្ជាទិញនានានឹងហូរចូលមកកម្ពុជា នឹងអាចបង្កើតឱកាសការងារការវិនិយោគកាន់តែច្រើនថែមទៀត»។
យ៉ាងណា ក្រុមសហជីពធំៗចំនួន៨ ក្នុងចំណោមសហជីព១២ ដែលចេញសេចក្តីថ្លែងការណ៍មិនពេញចិត្តចំពោះការដំឡើងប្រាក់ឈ្នួលនោះ គ្រោងនឹងប្រជុំពិភាក្សាគ្នាមួយនៅចុងសប្ដាហ៍នេះ ដើម្បីរៀបចំគម្រោងថានឹងត្រូវតវ៉ារបៀបណាខ្លះ ដើម្បីទាមទារសុំដំឡើងប្រាក់ឈ្នួលអប្បបរមាឲ្យកម្មករបាន ១៤០ដុល្លារក្នុងមួយខែ ដើម្បីធានាពីជីវភាពរស់នៅសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។