១. កុំគិតឈ្នះចាញ់ លះក្ដីកំណាញ់ ចេញពីចិន្ដា
បញ្ហាលោកនេះ រួមរិះពិចារ ដោះស្រាយបញ្ហា
ផុតការរួមរឹត។
២. រស់នៅក្នុងលោក គ្មានទេជ័យជោគ អស់មួយជីវិត
ជារឿងជាក់ច្បាស់ ក្មេងចាស់ត្រូវគិត ចេះប្រើគំនិត
ដឹងហេតុនិងផល។
៣. កុំគិតថាអញ ឈ្នះមិនដែលចាញ់ អញមានល្បិចកល
អ្នកណាឈឺចាប់ មិនស្ដាប់មិនខ្វល់ ទោះត្រូវដាច់ខ្យល់
មិនឆ្ងល់ឡើយណា។
៤. ស៊ីជុះស៊ីជុះ ធ្វើភ្លៀងធ្វើព្យុះ លុះនឹងតណ្ហា
គិតតែចង់ឈ្នះ ព្រលះកាប់អារ ពោលពាក្យមុសា
ស្រវាមិនឈប់។
៥. ថាហើយមិនធ្វើ មិនព្រមអើពើ មិនព្រមទល់ទប់
ពេញមួយជីវិត ងងឹតងុលងប់ ទាំងថ្ងៃទាំងយប់
ងុបនឹងកំណាញ់។
៦. បើយល់ដូច្នោះ អ្នកពិតជាខុស ដុះជាប់នឹងអញ
ប្រៀបដូចខ្មោចឆៅ រស់ក្រៅសំណាញ់ ដូចខ្ទះឥតខ្លាញ់
ខ្មួលខ្មាញ់ខ្លោចខ្មៅ។
៧. ចេះរួមសុខទុក្ខ កុំលបវាយលុក តាមរបៀបខ្លៅ
ទាំងក្មេងទាំងចាស់ ខ្លាចណាស់សោកសៅ ចង់ជុំកូនចៅ
មូលផៅសន្តាន៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។