អតីតកម្មាភិបាលខ្មែរក្រហម លោក ហ៊ុន សែន ដែលបច្ចុប្បន្នជាប្រធានគណបក្សជាប់កម្អែលកុម្មុយនិស្តឆ្អិនឆ្អៅប្តូរឈ្មោះជា «គណបក្សប្រជាជនកម្ពុជា» នោះ កាលពីចុងខែកុម្ភៈ បានបង្ហាញឱ្យពិភពលោកឃើញពីសន្តានពិតនៃបក្សរបស់ខ្លួន។ នោះគឺលោកបានសណ្ដោងកូនប្រុសជានាយករដ្ឋមន្ត្រី គឺលោក ហ៊ុន ម៉ាណែត និងមន្ត្រីគ្រាក់ៗក្រោមឱវាទ ទៅពពាក់ពពូនបន្តកន្ទុយគ្នាជួបជាមួយអតីតចៅហ្វាយនាយចាស់របស់ខ្លួនគឺក្រុមមេដឹកនាំនៃប្រទេសវៀតណាម នៅក្នុងកិច្ចប្រជុំកំពូលប្រចាំឆ្នាំជាមួយគណបក្សកុម្មុយនិស្តវៀតណាម (CPV) និងគណបក្សប្រជាជនបដិវត្តន៍ឡាវ ដែលបានប្រព្រឹត្តទៅនៅទីក្រុងព្រៃនគរ ដែលវៀតណាមដាក់ឈ្មោះថា ទីក្រុងហូជីមិញ (Ho Chi Minh City)។
ក្នុងជំនួបនោះ ប្រទេសអតីតចៅហ្វាយនាយ និងកូនជឹង ដែលជាអតីតមិត្តរួមអាវុធទាំង៣នេះ បានប្ដេជ្ញាស្រាវជ្រាវបង្កើតយន្តការសហប្រតិបត្តិការថ្មីជាលក្ខណៈត្រីភាគី ដើម្បីជាស្ពាន «តភ្ជាប់យុវជន តភ្ជាប់ជំនាន់ និងតភ្ជាប់ភាពជាអ្នកដឹកនាំ»។ ក្រុមមេដឹកនាំវៀតណាមមិនភ្លេចរំឭកក្រុមមេដឹកនាំកម្ពុជា និងឡាវ ឱ្យធានាឱ្យបាននូវទំនុកចិត្តផ្នែកនយោបាយ ការបន្តជំរុញការធ្វើសមាហរណកម្មផ្នែកសេដ្ឋកិច្ច និងសង្គម-វប្បធម៌ ព្រមទាំងកិច្ចសហប្រតិបត្តិការលើគ្រប់វិស័យ ជាពិសេសវិស័យសន្តិសុខ និងការពារជាតិ។ អ្នកឃ្លាំមើលបញ្ហាកម្ពុជាមួយចំនួន យល់ថា នៅទន្ទឹមនឹងកិច្ចប្រជុំកំពូលនេះ លោក ហ៊ុន សែន ទំនងជាអាចស្នើសុំឱ្យមេដឹកនាំវៀតណាមជួយគាំទ្រកូនប្រុសរបស់លោក គឺលោក ហ៊ុន ម៉ាណែត ធ្វើជាប្រធានគណបក្សប្រជាជនកម្ពុជា បន្តពីលោកនាពេលអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។