ក្រោមការដឹកនាំរបស់ត្រកូល «ហ៊ុនសែន» អស់រយៈពេលជិត៤០ឆ្នាំមកនេះ សមិទ្ធផលនានានៅកម្ពុជា រាប់ចាប់តាំងពី សួនច្បារសាធារណៈ សាលារៀន មន្ទីរពេទ្យ ផ្លូវថ្នល់ ស្ពាន ពហុកីឡដ្ឋាន ព្រលានយន្តហោះ និងហេដ្ឋារចនាសម្ព័ន្ធផ្សេងៗទៀត បន្តិចម្តងៗ ត្រូវបានគេកែប្រែ ឬប្តូរឈ្មោះ ដោយដាក់ឈ្មោះ «ហ៊ុនសែន» ឬ «តេជោ» ភ្ជាប់ជាមួយនឹងឈ្មោះដើម។ ទំនោរនៃការយកឈ្មោះមេដឹកនាំដែលជាអតីតកម្មាភិបាលខ្មែរក្រហមរូបនេះ ទៅភ្ជាប់ជាមួយនឹងឈ្មោះទីតាំងសំខាន់ៗ បាននាំឱ្យមានមតិរិះគន់ជារួមថា មេដឹកនាំរូបនេះកំពុងព្យាយាមកែប្រែប្រវត្តិសាស្ត្រ និងឈ្មោះទីកន្លែងដើមនៅកម្ពុជា ឱ្យក្លាយទៅជាសមិទ្ធផល ឬកម្មសិទ្ធិរបស់ខ្លួនឯង ដើម្បីឱ្យមនុស្សជំនាន់ក្រោយយល់ច្រឡំថាជាស្នាដៃរបស់ខ្លួនខំកសាងឡើង បើទោះបីជាទីកន្លែងទាំងនោះជារបស់រដ្ឋ ហើយប្រើប្រាស់ថវិកាជាតិដើម្បីសាងសង់ ឬកែលម្អយ៉ាងណាក៏ដោយ។ លើសពីនេះទៀត សមិទ្ធផលមួយចំនួនក៏រងនូវការរិះគន់ថា អាចជាប់ពាក់ព័ន្ធនឹងការប្រព្រឹត្តអំពើពុករលួយ កិបកេង លួចលុយជាតិ ដែលបានមកពីការខ្ចីបុលបរទេសក្នុងទំហំទឹកប្រាក់វាល់លានដុល្លារ។
ករណីចង់លប់ដានប្រវត្តិសាស្ត្រពីសំណាក់អាជ្ញាធរខេត្តសៀមរាប ដែលចង់ដាក់ឈ្មោះ «សួនតេជោសន្តិភាព» នៅបរិវេណ «សួនព្រះរាជដំណាក់» កាលពីពេលថ្មីៗ បាននាំឱ្យអ្នកសៀមរាប និងសាធារណជនទូទៅផ្ទុះការរិះគន់ព្រោងព្រាតនៅលើបណ្តាញសង្គម។ ក្រុមអ្នកប្រើប្រាស់បណ្តាញសង្គមមួយចំនួន រិះគន់បែបចំអកឡកឡឺយថា នៅសល់តែឈ្មោះ ប្រាសាទអង្គរវត្ត ឈ្មោះប្រទេសកម្ពុជា ឬឈ្មោះភូមិមួយចំនួន ដូចជា «ភូមិក្បាលខ្មោច» និងឈាបនដ្ឋានទេ ដែលលោក ហ៊ុន សែន និងមន្ត្រីរបស់លោក មិនទាន់ហ៊ានប្តូរឈ្មោះនៅឡើយ។ ក្រោយផ្ទុះការរិះគន់នេះ លោក ហ៊ុន សែន បានបញ្ជាឱ្យរដ្ឋបាលខេត្តសៀមរាប រកទីតាំងថ្មី ដើម្បីកសាង «សួនតេជោសន្តិភាព» នេះ ដាច់ដោយឡែកពីបរិវេណជុំវិញ «សួនព្រះរាជដំណាក់»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។