សាច់ញាតិជនជាប់ឃុំក្នុងពន្ធនាគារមួយចំនួនបារម្ភពីសុខភាពសាច់ញាតិរបស់ពួកគេ ខណៈអាកាសធាតុក្ដៅ នារដូវប្រាំង កំពុងឈានចូលមកដល់។ ពួកគាត់ ស្នើដល់មន្ត្រីពន្ធនាគារ ឲ្យស្វែងរកប្រភពទឹកបន្ថែម សម្រាប់ផ្គត់ផ្គង់ការប្រើប្រាស់ប្រចាំថ្ងៃ និងដាក់ចេញវិធានការការពារនានា ស្របពេលកម្ពុជាកំពុងរងការបំពុលខ្យល់។
ជំនោរខ្យល់ក្ដៅនាខែមាឃ ចាប់ផ្ដើមធ្លាក់នៅសប្ដាហ៍ចុងក្រោយ នៅចុងខែមករានេះ បណ្ដាលឲ្យអាកាសធាតុនាពេលព្រឹកឡើងកម្ដៅបន្តិច និងពេលថ្ងៃ និងរសៀល ប្រែទៅជាក្ដៅខ្លាំង ។ បម្រែបម្រួលនេះ បានបណ្ដាលឲ្យមនុស្សមួយចំនួន កើតជំងឺផ្ដាសាយ និងបែកញើសស្អុះស្អាប់ ។ បញ្ហានេះ ក៏ក្លាយជាក្ដីបារម្ភមួយរបស់សាច់ញាតិអ្នកជាប់ឃុំក្នុងពន្ធនាគារ ខណៈពន្ធនាគារមានភាពចង្អៀតណែន និងកង្វះអនាម័យស្រាប់ផងនោះ។
ប្រពន្ធមន្ត្រីគណបក្សសង្គ្រោះជាតិប្រចាំរាជធានីភ្នំពេញ លោក កាក់ កុម្ភារ គឺ លោកស្រី ព្រុំ ចាន់ថា ថ្លែងប្រាប់វិទ្យុអាស៊ីសេរីថា ស្ទើរតែជារៀងរាល់ឆ្នាំ ពន្ធនាគារតែងតែខ្វះទឹកស្អាតសម្រាប់ប្រើប្រាស់ បណ្ដាលឲ្យជនជាប់ឃុំទូទៅ រួមទាំងប្ដីរបស់លោកស្រី រស់នៅខ្វះអនាម័យ និងធ្វើឲ្យកើតជំងឺកមរមាស់។ «»
លោកស្រីឲ្យដឹងថា កាលពីថ្ងៃទី២៣ ខែមករា លោកស្រី បានទៅសួរសុខទុក្ខប្ដីក្នុងពន្ធនាគារ ហើយប្ដីលោកស្រី កំពុងកើតជំងឺកមរមាស់ជាថ្មីម្ដងទៀត ។ លោកស្រី ស្នើដល់មន្ត្រីពន្ធនាគារ ឲ្យជួយស្វែងរកប្រភពទឹកបន្ថែមសម្រាប់ឲ្យជនជាប់ឃុំ ប្រើប្រាស់ឲ្យគ្រប់គ្រាន់នៅរដូវប្រាំង ដើម្បីរក្សាអនាម័យ និងជៀសវាងជំងឺឆ្លងនានា។«»
កូនស្រីរបស់ប្រធានគណបក្សភ្លើងទៀនក្រុងប៉ោយប៉ែត លោក ចៅ វាសនា គឺ អ្នកស្រី ចៅ រតនៈ ប្រាប់អាស៊ីសេរីថា អ្នកស្រីក៏បារម្ភពីសុខភាពរបស់លោកឳពុកក្នុងពន្ធនាគារដែរ ខណៈរាជធានី - ខេត្តមួយចំនួន របស់កម្ពុជា កំពុងរងការបំពុលខ្យល់ ហើយពន្ធនាគារមានភាពចង្អៀតណែនស្រាប់។ «»
អតីតអ្នកជាប់ឃុំមួយចំនួន ឲ្យដឹងថា ក្នុងរដូវប្រាំង ពន្ធនាគារតែងតែខ្វះទឹកស្អាត សម្រាប់ប្រើប្រាស់ ហើយមន្ត្រីពន្ធនាគារ តែងបូមទឹកស្រះ ដែលគ្មានអនាម័យឲ្យអ្នកជាប់ឃុំប្រើប្រាស់។
សកម្មជនគណបក្សសង្គ្រោះជាតិនៅខេត្តបាត់ដំបង លោក លាស់ ឆេងឡាយ ដែលធ្លាប់ជាប់ពន្ធនាគារព្រៃស រយៈពេល១៨ខែ ប្រាប់វិទ្យុអាស៊ីសេរីថា នៅរដូវប្រាំង បន្ទប់នីមួយៗក្នុងពន្ធនាគារមានសភាពក្ដៅ ខណៈពន្ធនាគារមានភាពចង្អៀតណែន បណ្ដាលឲ្យមានភាពស្អុះស្អាប់ និងធំក្លិនមិនល្អ ។ លោកបន្ថែមថា បញ្ហាកង្វះទឹកស្អាតប្រើប្រាស់ ជាបញ្ហាចំបងមួយរបស់ជនជាប់ឃុំ ហើយកត្តានេះ បណ្ដាលឲ្យជនជាប់ឃុំជាច្រើននាក់កើតកមរមាស់។ «»
វិទ្យុអាស៊ីសេរី នៅមិនទាន់អាចទាក់ទងអ្នកនាំពាក្យអគ្គនាយកដ្ឋានពន្ធនាគារលោក ឃៀង សុណាឌីន ដើម្បីសុំការឆ្លើយតបជុំវិញ បញ្ហានេះ បាននៅឡើយទេ នៅថ្ងៃទី២៦ ខែមករា។
កន្លងទៅជនជាប់ឃុំមួយចំនួន ឲ្យដឹងថា ពួកគាត់បានបែងចែកការប្រើប្រាស់ទឹកជាពីរ គឺទឹកស្អាត សម្រាប់បរិភោគ និងទឹកស្រះសម្រាប់ដុសលាងសម្អាតបន្ទប់ និងងូតជាដើម។
ជុំវិញ បញ្ហានេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្ស លីកាដូ (LICADHO) លោក អំ សំអាត សង្កេតឃើញថា អគ្គនាយកដ្ឋានពន្ធនាគារ តែងដាក់ចេញវិធានការនៅរៀងរាល់ពេលមានការប្រែប្រួលអាកាសធាតុ។ ទោះជាយ៉ាងណាលោកថា ពន្ធនាគារ គួរតែពង្រឹងការអនុវត្តវិធានការការពារសុខភាពរបស់ជនជាប់ឃុំឲ្យបានត្រឹមត្រូវ ស្របពេលក្រសួងមួយចំនួន បានណែនាំអំពីការប្រែប្រួលអាកាសធាតុនេះ។ «»
របាយការណ៍របស់អគ្គនាយកដ្ឋានពន្ធនាគារ ឲ្យដឹងថា បច្ចុប្បន្ននេះ ចំនួនអ្នកជាប់ឃុំ នៅទូទាំងប្រទេស មានប្រមាណជាង ៥ ម៉ឺននាក់។ អគ្គនាយកដ្ឋានពន្ធនាគារព្យាករថា ចំនួនអ្នកជាប់ឃុំអាចកើនឡើងដល់ ៦ម៉ឺននាក់ នាពេលខាងមុខ ខណៈពន្ធនាគារ កំពុងប្រឈមភាពចង្អៀតណែនណាន់តាន់តាប់លើសពីសមត្ថភាពពន្ធនាគារផ្ទុកបាន។ ការកើនឡើងនៃចំនួនជនជាប់ឃុំនេះ ត្រូវបានគេមើលឃើញថា ជាបរាជ័យ នៃការដោះស្រាយសំណុំរឿងកក់ស្ទះរបស់ក្រសួងយុត្តិធម៌ និងដោយសារតែបញ្ហាគ្រឿងញៀន និងក្មេងទំនើងនៅតែកើតមានឡើងច្រើន ។ លើសពីនេះទៀត អាជ្ញាធររដ្ឋាភិបាល លោក ហ៊ុន ម៉ាណែត ត្រូវគេមើលឃើញថា នៅតែបន្តបើកយុទ្ធនាការចាប់ខ្លួនក្រុមអ្នករិះគន់ ដាក់គុកឥតស្រាកស្រាន្ត ដោយប្រើប្រាស់ប្រព័ន្ធតុលាការធ្វើជាអាវុធ ដើម្បីកម្ចាត់ក្រុមអ្នកប្រឆាំង។
សាច់ញាតិជនជាប់ឃុំ ស្នើដល់អគ្គនាយកដ្ឋានពន្ធនាគារ បំបែកអ្នកជាប់ឃុំកុំឱ្យរស់នៅចង្អៀតណែនជាមួយគ្នាក្នុងបន្ទប់តូចចង្អៀត ផ្តល់ឱកាសឱ្យពួកគាត់បានចេញទៅខាងក្រៅហាត់ប្រាណ និងស្រូបយកកំដៅថ្ងៃឱ្យច្រើន ព្រមទាំងផ្គត់ផ្គង់ទឹកស្អាត និងផ្តល់គ្រឿងបរិក្ខារដូចជា កង្ហារឲ្យបានគ្រប់គ្រាន់ ដើម្បីរួមចំណែកការពារសុខភាពរបស់អ្នកជាប់ឃុំ កុំឱ្យកាន់តែទ្រុឌទ្រោម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។