គ្រួសារ និងមេធាវីបារម្ភចំពោះស្ថានភាពជំងឺរបស់អ្នកស្រី ហ៊ូ រុនអេង ដែលកំពុងជាប់ឃុំ ដោយសារការបញ្ចេញមតិរឿងជនជាតិវៀតណាមនៅលើហ្វេសប៊ុកលោក ហ៊ុន សែន។ ពួកគាត់ស្នើឱ្យតុលាការដោះលែងអ្នកស្រីឱ្យមានសេរីភាពដើម្បីទទួលការព្យាបាលពីគ្រូពេទ្យជំនាញ និងមើលថែពីក្រុមគ្រួសារ។ សំណើនេះធ្វើឡើងបន្ទាប់ពីអ្នកស្រី ហ៊ូ រុនអេង ត្រូវបានមន្រ្តីពន្ធនាគារបញ្ជូនទៅឃុំនៅពន្ធនាគារម២វិញ ក្រោយគ្រូពេទ្យនៅមន្ទីរពេទ្យខាងក្រៅពន្ធនាគារវះកាត់សង្គ្រោះបន្ទាន់ពីជំងឺធ្លាយពោះវៀនខ្នែង។
មេធាវីលើកឡើងថា ប្រសិនបើអ្នកស្រី ហ៊ូ រុនអេង នៅបន្តជាប់ឃុំក្នុងពន្ធនាគារនោះ ស្ថានភាពជំងឺរបស់អ្នកស្រី ហ៊ូ រុនអេង នឹងអាចបង្កគ្រោះថ្នាក់ដល់អាយុជីវិត។
មេធាវីការពារក្តីឱ្យអ្នកស្រី ហ៊ូ រុនអេង គឺលោកបណ្ឌិត សឺន ជុំជួន ប្រាប់វិទ្យុអាស៊ីសេរីនៅថ្ងៃទី៩ ខែមីនា ថា កាលពីថ្ងៃទី២៥ ខែកុម្ភៈ មន្រ្តីពន្ធនាគារបានបញ្ជូនកូនក្តីរបស់លោកយកមកសង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀត ហើយភ្លាមៗនោះគ្រូពេទ្យបានធ្វើការវះកាត់ បណ្តាលមកអ្នកជំងឺធ្លាយពោះវៀនខ្នែង រហូតរលាកស្រោមពោះបង្កជាមេរោគ។ លោកថា ជំងឺពោះវៀនខ្នែងដែលទុករហូតដល់ដំណាក់កាលចុងក្រោយ និងបណ្តាលឱ្យកូនក្តីរបស់លោក គឺអ្នកស្រី ហ៊ូ រុនអេង សឹងតែបាត់បង់ជីវិតនៅពេលនោះ ដោយសារមន្រ្តីពន្ធនាគារយឺតយ៉ាវក្នុងការបញ្ជូនអ្នកជំងទៅព្យាបាលនៅមន្ទីរពេទ្យខាងក្រៅពន្ធនាគារ។
បណ្ឌិត សឺន ជុំជួន៖«ទាក់ទងហ្នឹងស្ថានភាពជាក់ស្តែង គ្រួសារបានបញ្ជាក់គឺស្ថានភាពជំងឺរបស់អ្នកស្រី ហ៊ូ រុនអេង មិនទាន់បានធូរស្បើយ ដូចអ្វីដែលជាការបញ្ជាក់របស់ពេទ្យនោះទេ គឺថាគាត់មិនអាចធ្វើចលនារាងកាយបានទេ ដូចជាដើរ បន្ទោរបង់ជាដើមហ្នឹង គាត់មិនអាចធ្វើចលនាដោយខ្លួនឯងបានទេ ដោយត្រូវការគ្រួសារ សាច់ញាតិរបស់គាត់ជាអ្នកជួយថែទាំ»។
សាច់ញាតិមិនពេញចិត្តនឹងការយកអ្នកស្រី ហ៊ូ រុនអេង ទៅពន្ធនាគារវិញ
លោកបណ្ឌិត សឺន ជុំជួន ឱ្យដឹងថា ក្រោយអ្នកស្រី ហ៊ូ រុនអេង សម្រាកព្យាបាលនៅមន្ទីរពេទ្យរយៈ១២ថ្ងៃមក គឺនៅថ្ងៃទី៨ ខែមីនា គ្រូពេទ្យផ្នែកវះកាត់នៅមន្ទីរមិត្តភាពខ្មែរ-សូវៀត បានអនុញ្ញាតឱ្យមន្រ្តីពន្ធនាគារបញ្ជូនកូនក្តីរបស់លោកទៅឃុំនៅពន្ធនាគារម២វិញ។ ទោះយ៉ាងណា លោករួមជាមួយគ្រួសារជនជាប់ឃុំមិនពេញចិត្តនឹងការសម្រេចនេះទេ ពីព្រោះពួកលោកព្រួយបារម្ភខ្លាចអ្នកស្រី ហ៊ូ រុនអេង មិនទទួលបានការថែទាំ ឬអាចឆ្លងមេរោគនៅក្នុងពន្ធនាគារ ស្របពេលស្ថានភាពជាក់ស្តែង អ្នកជំងឺមិនទាន់ធូរស្បើយ ចំណែកមុខរបួសនៅឈឺចាប់ ហើមដៃជើង និងមិនអាចធ្វើចលនាដោយខ្លួនឯង គួរផ្សំនឹងអ្នកជំងឺមានជំងឺមហារីកប្រចាំកាយថែមទៀតនោះ។
បណ្ឌិត សឺន ជុំជួន៖«វាជាការព្រួយបារម្ភផងដែរ ពីព្រោះជំងឺរបស់គាត់អាចក្លាយ(មុខរបួស)ឬរើឡើងវិញ ទៅតាមអ្វីដែលជាការណែនាំរបស់គ្រូពេទ្យថាគាត់ទាល់តែហូបអាហារឱ្យបានគ្រប់គ្រាន់ បំប៉នចំណីអាហារ ជៀសវាងកុំឱ្យប៉ះពាល់ដល់ជំងឺហ្នឹង ជាពិសេសរបួសរបស់គាត់អាចក្លាយទៅជាអាការៈផ្សេងៗ ខ្ញុំជាមេធាវី និងគ្រួសារមានក្តីព្រួយបារម្ភ»។
លោកបណ្ឌិត សឺន ជុំជួន ស្នើតុលាការពិចារណាឱ្យកូនក្ដីរបស់លោកបាននៅក្រៅឃុំបណ្ដោះអាសន្ន ដើម្បីក្រុមគ្រួសារមើលថែទាំអ្នកជំងឺឱ្យបានដិតដល់ និងបញ្ចៀសហានិភ័យផ្សេងៗដែលគំរាមកំហែងដល់អាយុវីវិត។ លោកបន្តថា នៅថ្ងៃទី១០ ខែមីនា លោកនឹងដាក់លិខិតស្នើទៅតុលាការដោះលែងកូនក្ដីរបស់លោកឱ្យនៅក្រៅឃុំដើម្បីទទួលការព្យាបាលជំងឺតាមការណែនាំរបស់គ្រូពេទ្យ។
ជុំវិញរឿងនេះ អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក ឃៀង សុណាឌីន មិនបញ្ជាក់ជុំវិញស្ថានភាពជំងឺអ្នកស្រី ហ៊ូ រុនអេង នៅក្នុងពន្ធនាគារនោះទេ ប៉ុន្តែលោកប្រាប់វិទ្យុអាស៊ីសេរីតាមប្រព័ន្ធតេឡេក្រាមថា ពាក់ព័ន្ធសុខភាពជនជាប់ឃុំណាម្នាក់ លោកស្នើឲ្យក្រុមគ្រួសារទំនាក់ទំនងទៅមន្រ្តីពន្ធនាគារដោយផ្ទាល់។
លោក ឃៀង សុណាឌីន បញ្ជាក់ថា គ្រប់ពន្ធនាគារមានមន្ត្រីពេទ្យពន្ធនាគារផ្តល់សេវាថែទាំព្យាបាលជំងឺ ដល់ជនជាប់ឃុំដែលមានបញ្ហាសុខភាព ត្រឹមកម្រិតប៉ុស្តិ៍សុខភាពពន្ធនាគារ ហើយករណីលើសពីកម្រិតផ្តល់ដោយប៉ុស្តិ៍សុខភាពពន្ធនាគារនោះមន្រ្តីពន្ធនាគារស្នើសុំគោលការណ៍អនុញ្ញាតពីព្រះរាជអាជ្ញាដែនដី ដើម្បីបញ្ជូនទៅរកសេវាសុខាភិបាល នៅមន្ទីរពេទ្យរដ្ឋខាងក្រៅពន្ធនាគារ។
អត្ថបទដែលទាក់ទង៖
អ្នកជាប់ឃុំបាត់តែសិទ្ធិដើរហើរទេ តែការថែសុខភាពដូចពលរដ្ឋធម្មតា
ទាក់ទងរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICAHDO) លោក អំ សំអាត មានប្រសាសន៍ថាអ្នកស្រី ហ៊ុ រុនអេង និងអ្នកជាប់ឃុំផ្សេងទៀតបាត់បង់តែសិទ្ធិដើរហើរ ដែលត្រូវបានតុលាការដកហូត ប៉ុន្តែពួកគាត់មានសិទ្ធិទទួលបានសេវាព្យាបាល និងថែទាំសុខភាពដូចពលរដ្ឋដទៃទៀតដែរ។ លោកថា ថ្វីត្បិតគ្រូពេទ្យអនុញ្ញាតឱ្យបញ្ជូនអ្នកជំងឺដែលទើបវះកាត់ហើយ ទៅពន្ធនាគារវិញក្តី មន្ត្រីពន្ធនាគារគួរយកចិត្តទុកដាក់បន្ថែមអំពីស្ថានភាពជំងឺរបស់អ្នកស្រី ហ៊ូ រុនអេង ដូចជាផ្តល់កន្លែងសម្រាកនៅក្នុងបន្ទប់ក្នុងប៉ុស្តិ៍សុខភាពពន្ធនាគារ ផ្តល់ការថែទាំព្យាបាលតាមការណែនាំរបស់គ្រូពេទ្យ ហើយបើសិនស្ថានភាពអ្នកជំងឺហួសលទ្ធភាពប៉ុស្តិ៍សុខភាពនោះ គួរបញ្ជូនគាត់ទៅមន្ទីរពេទ្យខាងក្រៅពន្ធនាគារ ដើម្បីកុំឱ្យស្ថានភាពជំងឺនេះកាន់តែវិវត្តន៍ទៅធ្ងន់ធ្ងរ។ លោក អំ សំអាត យល់ថា រដ្ឋាភិបាល និងរដ្ឋសភាបានបញ្ចប់កិច្ចសហប្រតិបត្តិការប្រតំបន់ត្រីកោណអភិវឌ្ឍន៍រួចហើយ ដូច្នេះគួរដោះលែងអ្នកស្រី ហ៊ូ រុនអេង ដែលត្រូវបានចោទប្រកាន់និងចាប់ខ្លួនក្នុងសំណុំរឿងនេះឱ្យមានសេរីភាពវិញ។
លោក អំ សំអាត៖«មេធាវី បើសិនមើលឃើញថាកូនក្តីអាចនឹងរងហានិភ័យ ឬអាចគ្រោះថ្នាក់ដោយសារជំងឺ ទីមួយគឺមេធាវីមានសិទ្ធិស្នើសុំឱ្យបញ្ជូនគាត់ទៅព្យាបាលនៅមន្ទីរពេទ្យវិញ ទីពីររឿងស្នើសុំនៅក្រៅឃុំ នេះជាសិទ្ធិតាមផ្លូវច្បាប់ និងជាសិទ្ធិរបស់ជនជាប់ឃុំផងដែរ»។
អ្នកស្រី ហ៊ូ រុនអេងជាគ្រូបង្រៀនរយៈពេលជាង៣០ឆ្នាំ រស់នៅភូមិព្រែកដើមចាន់ សង្កាត់សំបួរមាស ក្រុងកំពង់ចាម ខេត្តកំពង់ចាម។ អ្នកស្រីត្រូវបានសមត្ថកិច្ចចាប់ខ្លួនកាលពីដើមខែកញ្ញា ឆ្នាំ២០២៤។ តុលាការក្រុងភ្នំពេញបានចោទប្រកាន់អ្នកស្រី ពីបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» បន្ទាប់ពីអ្នកស្រី បានចូលទៅសរសេរបញ្ចេញមតិ លើបណ្ដាញសង្គម ហ្វេសប៊ុករបស់លោក ហ៊ុន សែន ពីបញ្ហាជនជាតិវៀតណាមនៅប្រទេសកម្ពុជាដែលធ្វើឱ្យលោក ហ៊ុន សែន ខឹងសម្បារ។
មកទល់ពេលនេះអ្នកស្រី ហ៊ូ រុនអេង បានជាប់ឃុំបណ្តោះអាសន្នជាង៦ខែមកហើយ ប៉ុន្តែសាលាដំបូងរាជធានីភ្នំពេញមិនទាន់ជំនុំជម្រះសំណុំរឿងនេះនៅឡើយទេ។
មន្ត្រីសិទ្ធិមនុស្សថា ការបញ្ចេញមតិរបស់អ្នកស្រី ហ៊ូ រុនអេង នៅលើហ្វេសប៊ុកលោក ហ៊ុន សែន ពីបញ្ហាជនជាតិវៀតណាមនៅកម្ពុជា គឺជាការប្រើប្រាស់សិទ្ធិពលរដ្ឋ ដែលមានចែងក្នុងច្បាប់ជាតិនិងអន្តរជាតិ។ ពួកគាត់ថា រដ្ឋាភិបាលកម្ពុជាគួរដោះលែងអ្នកស្រី ហ៊ូ រុនអេង និងអ្នកផ្សេងទៀតឱ្យមានសេរីភាពឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។