តំណាងសហព័ន្ធខ្មែរកម្ពុជាក្រោម បានចូលរួមកិច្ចប្រជុំស្ដីពីការបង្កើនការចូលរួមរបស់ជនជាតិដើមនៅក្នុងកិច្ចប្រជុំរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី១៧ និង ១៨ តុលា។ កិច្ចប្រជុំនេះ មានគោលបំណងពង្រឹងសំឡេងជនជាតិដើម ក្នុងការពិភាក្សាអំពីសិទ្ធិមនុស្សជាសកល និងជាការឆ្លើយតបទៅនឹងតម្រូវការសម្រាប់ការចូលរួមកាន់តែច្រើន និងប្រកបដោយអត្ថន័យពីសហគមន៍ជនជាតិដើម ក្នុងការបង្កើតគោលនយោបាយសិទ្ធិមនុស្សអន្តរជាតិ។
តំណាងសហព័ន្ធដែលបានចូលរួមកិច្ចប្រជុំនេះ គឺអ្នកនាង គឹម ពុទ្ធានី ស្នើដល់ក្រុមប្រឹក្សាសិទ្ធិមនុស្សអង្គការសហប្រជាជាតិ ឱ្យបង្កើតយន្តការមួយ ដើម្បីនាំជនជាតិដើមចូលរួមកិច្ចប្រជុំដោយផ្ទាល់ជាជាងតំណាងរបស់ពួកគេ។
អ្នកនាង គឹម ពុទ្ធានី៖«សំខាន់ខ្ញុំពន្យល់ថា សំឡេងជនជាតិដើមអត់មានហ្មង។ មានតែអ្នកចេះនិយាយភាសាអង់គ្លេស ដូច្នោះខ្ញុំពន្យល់ថា ត្រូវរៀបចំឲ្យមានជនជាតិដើម»។
ទោះបីជាយ៉ាងណាក្ដី អ្នកនាងបញ្ជាក់ថា សារៈសំខាន់នៃវត្តមានរបស់សហព័ន្ធខ្មែរកម្ពុជាក្រោមក្នុងកិច្ចប្រជុំទាំងនេះ គឺការនាំសំឡេងរបស់ជនជាតិដើមមកប្រាប់ដល់តំណាងរដ្ឋាភិបាលប្រទេសមួយចំនួនដែលបានចូលរួមកិច្ចប្រជុំនេះ។
អ្នកនាង គឹម ពុទ្ធានី សង្ឃឹមថា កិច្ចប្រជុំនេះ នឹងនាំផលវិជ្ជមានជួយដល់ជនជាតិដើមខ្មែរក្រោម។
អ្នកនាង គឹម ពុទ្ធានី៖«ខ្ញុំសង្ឃឹមថា ប្រទេសជាសមាជិក មាន អូស្ត្រាលី និងអាមេរិក។ ពួកគាត់លឺថា ពួកខ្ញុំចង់បានអីគេ។ ដូច្នោះគាត់ឲ្យតម្លៃឲ្យយើង។
បច្ចុប្បន្ន វៀតណាមបានចាប់ខ្លួនព្រះសង្ឃខ្មែរក្រោម ៥អង្គ និងសកម្មជន ៨នាក់ ដាក់ពន្ធនាគារដោយសារតែពួកគេទាមទារសិទ្ធិជនជាតិដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។