បីថ្ងៃក្រោយព្រឹទ្ធសភា ក្រោមការគ្រប់គ្រងរបស់លោក ហ៊ុន សែន នៅថ្ងៃទី២៦ ខែកុម្ភៈ ផ្ដល់ការយល់ស្របដោយគ្មានការជជែកសួរដេញដោលលើសេចក្ដីព្រាងច្បាប់ប្រឆាំងការមិនទទួលស្គាល់ឧក្រិដ្ឋកម្មក្នុងរបបខ្មែរក្រហម. ព្រះមហាក្សត្រ សម្ដេចព្រះបរមនាថ នរោត្ដម សីហមុនី បានឡាយព្រះហស្តលេខា ប្រកាសឱ្យប្រើច្បាប់នេះជាផ្លូវការនៅថ្ងៃទី១ ខែមីនា ចំថ្ងៃសៅរ៍ ជាថ្ងៃឈប់សម្រាក។
ពីរថ្ងៃក្រោយការប្រកាសឲ្យប្រើច្បាប់នេះ ព្រះមហាក្សត្រនៅថ្ងៃទី៣ ខែមីនា បាន យាងទៅពិនិត្យព្រះរាជសុខភាពនៅប្រទេសចិនជាមួយសម្ដេចម៉ែ ដែលការយាងចេញពីប្រទេសនេះ ត្រូវបានក្រុមអ្នកឃ្លាំមើលលើកឡើងថា ព្រះអង្គអាចមិនសប្បាយព្រះទ័យ នឹងច្បាប់ដែលមានស្មារតីដាក់ទណ្ឌកម្មលើសេរីភាពបញ្ចេញមតិ របស់ពលរដ្ឋអំពីបញ្ហាប្រវត្តិសាស្ត្រ។
ព្រះមហាក្សត្រឡាយព្រះហស្តលេខាលើច្បាប់នៅថ្ងៃសម្រាក
អ្នកជំនាញច្បាប់ និងអភិបាលកិច្ចបែបប្រជាធិបតេយ្យ លោក វ៉ន ចាន់ឡូត បានសរសេរលើហ្វេសប៊ុករបស់លោកថា ព្រះមហាក្សត្រឡាយព្រះហស្តលេខា នៅថ្ងៃសៅរ៍ទី១ ខែមីនា ដែលត្រូវនឹងថ្ងៃឈប់សម្រាកបែបនេះ អាចដោយសារតែលោក ហ៊ុន សែន មិនចង់ចុះហត្ថលេខា ក្នុងនាមជាប្រមុខរដ្ឋស្ដីទី បន្ទាប់ពីព្រះមហាក្សត្រយាងចេញពីកម្ពុជា។
ច្បាប់ប្រឆាំងអ្នកមិនទទួលស្គាល់ឧក្រិដ្ឋកម្មក្នុងរបបខ្មែរក្រហម មានចំនួន ៧មាត្រា ដោយផ្ដន្ទាទោសដាក់ពន្ធនាគារពី ១ឆ្នាំ ទៅ ៥ឆ្នាំ និងពិន័យជាប្រាក់ពី ១០លានរៀល ទៅ៥០លានរៀល រួមទាំងអាចបន្ថែមទណ្ឌកម្មផ្សេងទៀតដូចជា ការដកហូត សិទ្ធិខ្លះជាពលរដ្ឋ ការហាមឃាត់ការងារវិជ្ជាជីវៈ និងការផ្សាយសេចក្ដីសម្រេច ផ្ដន្ទាទោស ជាដើមទៅលើបុគ្គលដែលអាជ្ញាធររកឃើញថាបំពានច្បាប់នេះ។
រីឯនីតិបុគ្គលដូចជាក្រុមហ៊ុន សមាគម ឬក៏អង្គការក្រៅរដ្ឋាភិបាលជាដើមត្រូវផ្ដន្ទាទោសពិន័យជាប្រាក់ពី៥០លានរៀលទៅ៥០០លានរៀលហើយនឹងអាចមានទោសបន្ថែមមួយចំនួនទៀតដែលមានចែងនៅក្នុងមាត្រា ១៦៨នៃក្រមព្រហ្មទណ្ឌ។
កំណត់បទល្មើសប្រឆាំងការមិនទទួលស្គាល់ឧក្រិដ្ឋកម្មក្នុងរបបខ្មែរក្រហម
ចំពោះការកំណត់បទល្មើសវិញមាត្រា៣នៃច្បាប់នេះ ចែងថា គឺជាបទមិនទទួលស្គាល់ជាសាធារណៈនូវឧក្រិដ្ឋកម្ម ដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ កាលបើអំពើនេះ ត្រូវបានប្រព្រឹត្តជាសាធារណៈតាមមធ្យោបាយណាមួយដូចជា តាមសំដី ឬកាយវិការជាសាធារណៈតាមលិខិត ឬគំនូរជាសាធារណៈ និងតាមបណ្ដាញសង្គមឬគ្រប់មធ្យោបាយទូរគមនាគមន៍សោតទស្សន៍។
អត្ថបទដែលទាក់ទង៖
អ្នកឃ្លាំមើល និងមន្ត្រីសិទ្ធិមនុស្សរិះគន់ថា ច្បាប់ប្រឆាំងអ្នកមិនទទួលស្គាល់ឧក្រិដ្ឋកម្ម មានចរិតបំបែកបំបាក់ជាតិកម្ពុជា និងបំបិទមាត់ពលរដ្ឋខ្មែរ មិនឱ្យសម្ដែងមតិ ដែលប៉ះពាល់ប្រទេសវៀតណាម ដែលជាចៅហ្វាយរបស់លោក ហ៊ុន សែន។ ពួកគាត់ថា ច្បាប់នេះផ្ដល់ភាពត្រឹមត្រូវ លើការឈ្លានពានរបស់វៀតណាមតាំងពីអតីតកាល រហូតមកដល់ពេលបច្ចុប្បន្ន និងជាការបញ្ជាក់ថា គណបក្សប្រជាជនកម្ពុជានៅតែដឹងគុណវៀតណាមគ្រប់ជំនាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។