ពលរដ្ឋហួសចិត្តនឹងឧត្ដមក្រុមប្រឹក្សានៃអង្គចៅក្រម ដែលមិនបណ្ដេញប្រធានតុលាការខេត្តតាកែវ អ្នកស្រី ពេជ ម៉ារ៉ែន ចេញពីតំណែងពាក់ព័ន្ធនឹងករណីដោះលែងឧក្រិដ្ឋជនម្នាក់ឱ្យមានសេរីភាព ប៉ុន្តែបែរជាប្ដូរតួនាទីឱ្យទៅកាន់ជាអនុប្រធានតុលាការនៅខេត្តកំពង់ស្ពឺទៅវិញ។ ពួកគាត់ចាត់ទុកការសម្រេចនេះថា ជារំលោភលើច្បាប់រដ្ឋធម្មនុញ្ញ និងធ្វើឱ្យអំពើនិទ្ទណ្ឌភាពកើនឡើង។
ពលរដ្ឋរិះគន់ឧត្ដមក្រុមប្រឹក្សានៃអង្គចៅក្រមថា ធ្វើការគ្មានភាពឯករាជដោយបន្តឱ្យប្រធានតុលាការ ដែលឃុបឃិតជាមួយឧក្រិដ្ឋជន នៅតែអាចធ្វើការនៅក្នុងស្ថាប័នយុត្តិធម៌។
ពលរដ្ឋរស់នៅរាជធានីភ្នំពេញ កញ្ញា ខែម ស្រីមុំ ប្រាប់វិទ្យុអាស៊ីសេរី នៅថ្ងៃទី២២ ខែកុម្ភៈថា កញ្ញាមិនអាចទទួលយកបាន ចំពោះការសម្រេចរបស់ក្រុមប្រឹក្សាវិន័យនៃអង្គចៅក្រម ដោយគ្រាន់តែផ្ទេរតំណែង អ្នកស្រី ពេជ ម៉ារ៉ែន ឱ្យទៅកាន់តួនាទីជាអនុប្រធានសាលាដំបូងខេត្តកំពង់ស្ពឺឡើយ។ កញ្ញាបន្តថា ការផ្ទេរតំណែងអ្នកស្រី ពេជ ម៉ារ៉ែន នេះ នៅតែអាចធ្វើឱ្យអ្នកស្រី ប្រព្រឹត្តអំពើពុករលួយបន្តទៀត ហើយពលរដ្ឋ គឺជាអ្នករងគ្រោះ ដោយសារស្ថាប័នតុលាការសម្បូរទៅដោយមន្ត្រីស៊ីសំណូក។
កញ្ញា ខែម ស្រីមុំ៖«ចង់និយាយថា វាមិនអាចធ្វើអំពើអយុត្តិធម៌ ដែលធ្វើឱ្យពលរដ្ឋរស់នៅសុខដុមរមនា ភាពស្មើគ្នា ចំពោះមុខច្បាប់អីផ្សេងៗ គឺវាអត់មានទេ។ សម្រាប់ខ្ញុំ គឺត្រូវតែប្ដូរប្រព័ន្ធហ្នឹងចេញ ទើបអាចកែប្រែទៅកើត ប៉ុន្តែ ប្រព័ន្ធនៅតែអ៊ីចឹង វាបង្កវិនាសកម្ម បង្កមហន្តរាយដល់សង្គមជាតិ ដល់ពលរដ្ឋ អសន្តិសុខផ្សេងកើតឡើងកាន់តែច្រើនឡើងៗ ដូចសង្គមសត្វអ៊ីចឹង រស់នៅបែបហ្នឹង មិនមានប្រព័ន្ធចែកដាច់ពីអំណាចនីតិប្បញ្ញត្តិ នីតិប្រតិបត្តិធ្វើអីមិនចេញ»។
ដោយឡែក តំណាងសហគមន៍ឧត្ដមស្រែពស់ នៅខេត្តកំពង់ស្ពឺ លោក ឃន សារិទ្ធ ថ្លែងថា លោកសោកស្ដាយ ដែលប្រធានតុលាការប្រព្រឹត្តអំពើពុករលួយ ប៉ុន្តែ បែរជាគ្មានទោសទណ្ឌអ្វីទាល់តែសោះ ដែលទង្វើបែបនេះ លោកថា ប្រព័ន្ធយុត្តិធម៌នៅកម្ពុជា គឺមិនឈរលើគោលការណ៍ច្បាប់ទេ ហើយជួយបិទបាំងទង្វើអាក្រក់ឱ្យគ្នាទៅវិញទៅមក។ លោកបន្តថា ស្ថាប័នពាក់ព័ន្ធ ជាពិសេស ស្ថាប័នតុលាការគួរតែដកតំណែង អ្នកស្រី ពេជ ម៉ារ៉ែន និងបញ្ឈប់មិនធ្វើការនៅក្នុងស្ថាប័នរដ្ឋ ដើម្បីកុំឱ្យប្រធានតុលាការមួយចំនួនទៀតយកគំរូតាម។
លោក ឃន សារិទ្ធ៖«ចង់ឃើញថា ពេលដែលគាត់ប្រព្រឹត្តខុសហើយ គួរតែដកតំណែងគាត់ ឈប់ឱ្យគាត់ធ្វើតួនាទីដដែលហ្នឹងទៀត ពីព្រោះបើគាត់ខុសហើយ បើយើងនៅតែទុកឱកាស បើគាត់មិនកែ វាធ្វើឱ្យមានភាពអយុត្តិធម៌ដល់ពលរដ្ឋក្រោយទៀត»។
ប្រតិកម្មរបស់ពលរដ្ឋទាំងនេះ ធ្វើឡើងបន្ទាប់ពីឧត្ដមក្រុមប្រឹក្សា នៃអង្គចៅក្រម កាលពីថ្ងៃទី២០ ខែកុម្ភៈបានដាក់ទណ្ឌកម្មលើប្រធានសាលាដំបូងខេត្តតាកែវ អ្នកស្រី ពេជ ម៉ារ៉ែន ដោយផ្លាស់តួនាទីពីប្រធានសាលាដំបូងខេត្តតាកែវ ឱ្យទៅកាន់តំណែងជាអនុប្រធានសាលាដំបូងខេត្តកំពង់ស្ពឺវិញ។ ការផ្លាស់ប្ដូរនេះ គឺក្រោយពេលឧត្ដមក្រុមប្រឹក្សា នៃអង្គចៅក្រមរកឃើញថា អ្នកស្រី ពេជ ម៉ារ៉ែន បានចេញដីកាដោះលែងអ្នកទោសម្នាក់ ដែលកំពុងជាប់ពន្ធនាគារចំនួន ១១ឆ្នាំ អំពីបទ «ឃាតកម្ម» ឱ្យមានសេរីភាព ដោយអ្នកទោសរូបនោះ នៅមិនទាន់អនុវត្តទោសចប់នៅឡើយ ដែលបញ្ហានេះបង្កឱ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងជាការរំលោភលើនីតិវិធីច្បាប់ក្រមព្រហ្មទណ្ឌ ហើយថែមទាំងបង្កើតទោសកំហុសធ្ងន់ធ្ងរក្នុងការអនុវត្តវិជ្ជាជីវៈចៅក្រម។
ក្រោយប្ដូរអ្នកស្រី ពេជ ម៉ារ៉ែន ឱ្យទៅកាន់តួនាទីជាអនុប្រធានសាលាដំបូងខេត្តកំពង់ស្ពឺ នៅថ្ងៃទី២១ ខែកុម្ភៈព្រះមហាក្សត្របានតែងតាំង លោក ធាម ច័ន្ទពិសិដ្ឋ ឱ្យធ្វើជាប្រធានសាលាដំបូងខេត្តតាកែវជំនួសអ្នកស្រី ពេជ ម៉ារ៉ែន តាមការស្នើសុំរបស់រដ្ឋមន្ត្រីក្រសួងយុត្តិធម៌ គឺលោក កើត រិទ្ធ។
ឧត្ដមក្រុមប្រឹក្សា នៃអង្គចៅក្រមបច្ចុប្បន្ននេះ ត្រូវបានគេមើលឃើញថា ធ្វើការគ្មានភាពឯករាជ និងគ្មានតម្លាភាពនោះទេ ពីព្រោះសមាជិកភាគច្រើន នៃឧត្ដមក្រុមប្រឹក្សា នៃអង្គចៅក្រម សុទ្ធសឹងតែជាមន្ត្រីជាន់ខ្ពស់ ដែលមកពីស្ថាប័នយុត្តិធម៌ ដូច្នេះ រដ្ឋមន្ត្រីក្រសួងយុត្តិធម៌មានអំណាចលើសលប់លើស្ថាប័នមួយនេះ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា ប្រសិនបើប្រធានតុលាការ ឬព្រះរាជអាជ្ញាណាបានប្រព្រឹត្តទោសកំហុស ឬប្រព្រឹត្តអំពើពុករលួយដោយចេតនានោះឧត្ដមក្រុមប្រឹក្សា នៃអង្គចៅក្រម មិនអាចដាក់ទោសបែបរដ្ឋបាល ដោយគ្រាន់តែផ្លាស់ប្ដូរតួនាទីពីកន្លែងមួយទៅកន្លែងនោះទេ ប៉ុន្តែ ត្រូវតែដាក់ទោសតាមផ្លូវច្បាប់។ លោកបន្តថា នៅពេលដែលមន្ត្រីជាន់ខ្ពស់ក្នុងជួររដ្ឋាភិបាលប្រព្រឹត្តទោសកំហុស ហើយស្ថាប័នពាក់ព័ន្ធមិនបានដាក់ទោស នោះជាការរំលោភលើនីតិរដ្ឋធ្ងន់ធ្ងរ។
លោក នី សុខា៖«ប្រសិនជាឧត្ដមក្រុមប្រឹក្សា នៃអង្គចៅក្រមមានភាពរឹងមាំ មានការដាក់ទោសទណ្ឌលើចៅក្រម ឬព្រះរាជអាជ្ញាណា ដែលបានប្រព្រឹត្តខុសមិនលើកលែងនោះ ខ្ញុំគិតថា ចៅក្រម ព្រះរាជអាជ្ញាលោកនឹងមានការបារម្ភដែរ ចំពោះបញ្ហាហ្នឹង ហើយនឹងមានការកែលំអ។ ទាក់ទងរឿងហ្នឹងរឿង ដែលប្រព័ន្ធ ដូចជា ខាងក្រសួងយុត្តិធម៌ ក៏គួរតែត្រួតពិនិត្យឱ្យបានត្រឹមត្រូវ អំពីការអនុវត្តនីតិវិធីព្រះរាជអាជ្ញាទាំងអស់ហ្នឹងនៅទូទាំងប្រទេស»។
កាលពីថ្ងៃទី៩ ខែសីហា ឆ្នាំ២០២៤ ឧត្ដមក្រុមប្រឹក្សា នៃអង្គចៅក្រមបានបណ្ដេញព្រះរាជអាជ្ញារងម្នាក់ នៅខេត្តព្រះវិហារ គឺលោក គឹម សំលេង ចេញពីក្របខ័ណ្ឌក្រោយរកឃើញថា ព្រះរាជអាជ្ញារូបនោះបានប្រព្រឹត្តល្មើសផ្ទុយពីវិជ្ជាជីវៈ។ លើសពីនេះ កាលពីថ្ងៃទី១៩ ខែកុម្ភៈ ឧត្ដមក្រុមប្រឹក្សា នៃអង្គចៅក្រមក៏បានដាក់វិន័យទៅលើចៅក្រម និងព្រះរាជអាជ្ញាចំនួន ២៣ករណី ក្នុងនោះស្ដីបន្ទោសផ្ទាល់មាត់ និងព្រមានជាលិខិត ១៥ករណី ផ្អាកមិនឱ្យចុះឈ្មោះក្នុងតារាងដំឡើងថ្នាក់ ឬឋានន្តរសក្ដិមួយរយៈ ៣ករណី និងករណីមួយចំនួនទៀត ព្យួរពីការងារមិនឱ្យមានបៀវត្សរ៍ ក្នុងរយៈពេល ៦ខែ។
ពលរដ្ឋសង្កេតឃើញថា ឧត្ដមក្រុមប្រឹក្សា នៃអង្គចៅក្រមអនុវត្តច្បាប់ស្តង់ដារពីរទៅលើតុលាការ និងចៅក្រម ដែលប្រព្រឹត្តអំពើពុករលួយ និងបក្ខពួកនិយម ដែលបញ្ហានេះបង្កឱ្យស្ថាប័ន ដែលបង្កើតឡើង ដើម្បីជួយដល់ព្រះមហាក្សត្រក្នុងការធានាឯករាជ្យ នៃអំណាចតុលាការ ស្របតាមរដ្ឋធម្មនុញ្ញមិនអាចអនុវត្តដោយឈរលើគោលការណ៍ឯករាជ្យបានឡើយ ហើយពលរដ្ឋ សកម្មជនសង្គម និងសកម្មជននយោបាយ ដែលរងគ្រោះដោយសារតែប្រព័ន្ធតុលាការកាត់ក្ដីលំអៀង គ្មានភាពអព្យាក្រឹត ក៏នៅតែបន្តរងគ្រោះ ពីព្រោះឧត្ដមក្រុមប្រឹក្សា នៃអង្គចៅក្រមមិនបានចាប់មន្ត្រីតុលាការ ដែលបានប្រព្រឹត្តល្មើសច្បាប់យកមកផ្ដន្ទាទោស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។