សហមេធាវីការពារក្តីឱ្យលោក កឹម សុខា ទទូចឱ្យសាលាឧទ្ធរណ៍ភ្នំពេញកំណត់ថ្ងៃបន្តនីតិវិធី ឱ្យបានឆាប់ក្រោយពីសាលាឧទ្ធរណ៍បានពន្យារពេលប្រមាណ៤ ខែមកហើយ។ សហមេធាវីលើកឡើងថា ពួកគាត់បានធ្វើសេចក្ដីស្នើទៅសាលាឧទ្ធរណ៍ចំនួន ២ដងហើយ ប៉ុន្តែតុលាការគ្រាន់តែឆ្លើយតបថា នឹងធ្វើនៅពេលឆាប់ៗ។ មន្ត្រីសិទ្ធិមនុស្សថា ការពន្យារពេលនេះ ប៉ះពាល់ដល់សិទ្ធិរបស់លោក កឹម សុខា ដែលទន្ទឹងរង់ចាំយុត្តិធម៌។
ចាប់តាំងពីសាលាឧទ្ធរណ៍ភ្នំពេញ សម្រេចលើកពេលសវនាការសំណុំរឿងប្រធានគណបក្សសង្គ្រោះជាតិលោក កឹម សុខា កាលពីថ្ងៃទី១៩ ខែកញ្ញា ឆ្នាំ២០២៤ គិតមកដល់ពេលនេះ មានរយៈពេលប្រមាណ ៤ខែហើយ ដែលសាលាឧទ្ធរណ៍ភ្នំពេញ នៅមិនទាន់កំណត់ថ្ងៃសវនាការជាថ្មីទៀតនៅឡើយទេ។
សហមេធាវីការពារក្ដីលោក កឹម សុខា គឺលោក ផែង ហេង ប្រាប់វិទ្យុអាស៊ីសេរី នៅថ្ងៃទី២៤ ខែមករា ថា ក្រុមមេធាវីបានតស៊ូ និងព្យាយាមធ្វើកិច្ចការជួយកូនក្ដីអស់លទ្ធភាពហើយ ទាំងបានរំឭកផ្ទាល់មាត់ផង និងធ្វើសេចក្ដីស្នើដាក់ជូន តុលាការផង ដើម្បីជំរុញឱ្យតុលាការពន្លឿនសំណុំរឿងលោក កឹម សុខា។ ប៉ុន្តែ លោកមេធាវីថា សាលាឧទ្ធរណ៍ពុំទាន់កំណត់ថ្ងៃបន្តនីតិវិធី ឱ្យបានច្បាស់ឡើយ ដោយគ្រាន់តែប្រាប់ថា នៅពេលឆាប់ៗប៉ុណ្ណោះ។
លោក ផែង ហេង ថា ការពន្យារពេលនៃការស្វែងរកយុត្តិធម៌ជូនជនណាម្នាក់ គឺស្មើនឹងការបដិសេធការផ្ដល់យុត្តិធម៌ដល់ជននោះ។ ដូច្នេះ លោកថា មេធាវីតែងតែស្នើទៅចៅក្រមជាបន្តបន្ទាប់ ដើម្បីកុំឱ្យមានការខុសឆ្គងតាមផ្លូវច្បាប់ ជាពិសេសសិទ្ធិ របស់ជនត្រូវចោទ ឬអ្នកត្រូវយកមកជំនុំជម្រះក្ដី។ លោកបញ្ជាក់ថា ការយឺតយ៉ាវ ក្នុងការរកយុត្តិធម៌ ធ្វើឱ្យប៉ះពាល់សិទ្ធិទទួលបានយុត្តិធម៌ ដោយឆាប់រហ័ស។
លោក ផែង ហេង៖ «យើងឃើញថ្មីៗនេះ ក្រសួងយុត្តិធម៌មានការលើកទឹកចិត្តដល់តុលាការដែលបានពន្លឿននីតិវិធី ដោះស្រាយសំណុំរឿងបានច្រើនរហូតដល់បានជូនរង្វាន់ ប៉ុន្តែយើងឃើញសំណុំរឿងឯកឧត្ដម កឹម សុខា ហាក់ដូចជានៅទ្រឹងហាក់ដូចជាមិននៅក្នុងអាទិភាពនៃសំណុំរឿង ដែលក្រសួងដាក់ផែនការឱ្យតុលាការការជម្រះក្ដី»។
វិទ្យុអាស៊ីសេរីមិនទាន់អាចសុំការបំភ្លឺ ពីអ្នកនាំពាក្យសាលាឧទ្ធរណ៍លោក ឃុន លាងម៉េង បានទេ នៅថ្ងៃទី២៥ ខែមករា ជុំវិញដំណើរការសំណុំរឿងលោក កឹម សុខា។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ (Licadho) លោក អំ សំអាត ប្រាប់វិទ្យុអាស៊ីសេរីនៅថ្ងៃទី២៥ ខែមករា ថា ភាពស្មុគស្មាញនៃសវនាការ សំណុំរឿងលោក កឹម សុខា នៅសាលាឧទ្ធរណ៍ ចប់សព្វគ្រប់ហើយ និងនៅតែ រង់ចាំសវនាការធ្វើសេចក្ដីសន្និដ្ឋាន។ ហេតុនេះ លោកថា អ្វីដែលសំខាន់ គឺទាក់ទងនឹង ចេតនារបស់តុលាការ ថាតើតុលាការចង់ប្រកាសសាលដីកាសម្រេចសេចក្ដី លោក កឹម សុខា ឱ្យបានឆាប់ ឬយ៉ាងណា?
លោក អំ សំអាត ថា ការពន្យារពេលដំណើរការក្ដីនេះ ពិតជាប៉ះពាល់ដល់សិទ្ធិរបស់ លោក កឹម សុខា ដែលទន្ទឹងរង់ចាំយុត្តិធម៌។ យ៉ាងណា លោកថា ដំណោះស្រាយ ដែលអាចផ្ដល់សេរីភាព និងសិទ្ធិនយោបាយរបស់លោក កឹម សុខា វិញបាន មានតែតាមច្រកផ្លូវវប្បធម៌សន្ទនានយោបាយ ឬ ការចរចានយោបាយប៉ុណ្ណោះ។
លោក អំ សំអាត៖ «វប្បធម៌ល្អ គឺវប្បធម៌នៃការសន្ទនា ការយោគយល់គ្នា ហើយគិតអំពីឧត្ដមប្រយោជន៍ជាតិ ឧត្ដមប្រយោជន៍ប្រជាពលរដ្ឋជាធំ ហើយមានការចរចាផ្នែកនយោបាយ អាហ្នឹងវាជារឿងមួយល្អ។ ប៉ុន្តែបើខ្ញុំមើលទៅករណីលោក កឹម សុខា បើគ្មានការចរចាផ្នែកនយោបាយកើតឡើងទេ អាហ្នឹងខ្ញុំមើលឃើញថា ការដែលគាត់ អាចវិលមកឆាកនយោបាយវិញ ដូចជានៅឆ្ងាយណាស់»។
សំណុំរឿងលោក កឹម សុខា មានរយៈពេលជាង ៧ឆ្នាំហើយ ចាប់តាំងពីសមត្ថកិច្ច បានចាប់ខ្លួនលោកទាំងកណ្ដាលអធ្រាត្រកាលពីថ្ងៃទី២ ចូលថ្ងៃទី៣ ខែកញ្ញា ឆ្នាំ២០១៧។ សាលាដំបូងរាជធានីភ្នំពេញកាលពីថ្ងៃទី០៣ ខែមីនា ឆ្នាំ២០២៣ បានផ្ដន្ទាទោសលោក កឹម សុខា វ័យ៧០ឆ្នាំ ដាក់ឱ្យជាប់ឃុំក្នុងផ្ទះរយៈពេល ២៧ឆ្នាំ ពីបទសន្ទិដ្ឋភាពជាមួយបរទេស ឬឃុបឃិតត្រូវរ៉ូវគ្នាជាមួយបរទេស ដែលត្រូវបានចោទប្រកាន់តាំងពីឆ្នាំ២០១៧។ តុលាការបានដាក់បម្រាមមិនឱ្យលោក កឹម សុខា ធ្វើនយោបាយ មិនឱ្យចេញពីផ្ទះ មិនអនុញ្ញាតឱ្យជួបភ្ញៀវបរទេស លើកលែងតែមានការអនុញ្ញាតពីតុលាការ។
លោក កឹម សុខា តាមរយៈក្រុមមេធាវីរបស់លោក បានបន្តប្ដឹងទៅសាលាឧទ្ធរណ៍ភ្នំពេញ ជំទាស់នឹងសាលក្រមសាលាដំបូងរាជធានីភ្នំពេញ។ សាលាឧទ្ធរណ៍បានបើកសវនាការជាង១០លើក ដោយចាប់ផ្ដើមនៅថ្ងៃទី៣០ ខែមករា ឆ្នាំ២០២៤។ លុះដល់វគ្គធ្វើសេចក្ដីសន្និដ្ឋាននៅថ្ងៃទី១៩ ខែកញ្ញា សាលាឧទ្ធរណ៍ បានសម្រេច ផ្អាករហូតមកដល់ពេលនេះ។ សាលាឧទ្ធរណ៍ មិនទាន់ពន្យល់មូលហេតុច្បាស់នៅឡើយទេ ចំពោះការផ្អាកសវនាការជាច្រើនខែមកនេះ។
ទោះបីជាយ៉ាងណា សហគមន៍ជាតិ និងអន្តរជាតិចាត់ទុកថា សំណុំរឿងប្រធានគណបក្សសង្គ្រោះជាតិ លោក កឹម សុខា ជារឿងនយោបាយ និងទាមទារឱ្យ តុលាការទម្លាក់ចោលការចោទប្រកាន់ និងប្រគល់សេរីភាពពេញលេញ ជូនមេបក្ស ប្រឆាំងរូបនេះវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។