ព្រះមហាក្សត្រ ព្រះបាទ នរោត្តម សីហមុនី និងសម្ដេចម៉ែ យាងទៅទីក្រុងប៉េកាំង ប្រទេសចិន ចាប់ពីថ្ងៃ១២ ខែកុម្ភៈ ដើម្បីពិនិត្យនិងព្យាបាលព្រះរាជសុខភាពតាមវេជ្ជបញ្ជារបស់គ្រូពេទ្យចិន។ ដំណើរយាងទៅពិនិត្យព្រះរាជសុខភាពនេះមិនទាន់កំណត់ពេលនៃការយាងត្រឡប់មកកម្ពុជាវិញនៅឡើយ។
មេដឹកនាំរដ្ឋាភិបាលក្រុងភ្នំពេញ ប្រធានព្រឹទ្ធសភាលោក សាយ ឈុំ និងប្រធានរដ្ឋសភាលោក ហេង សំរិន បានជូនព្រះរាជដំណើរទ្រង់នៅព្រលានយន្តហោះអន្តរជាតិភ្នំពេញ។ ព្រះមហាក្សត្រទ្រង់បានផ្ទេរភារកិច្ច ឱ្យប្រធានព្រឹទ្ធសភា សាយ ឈុំ ត្រូវឡើងជាប្រមុខរដ្ឋស្ដីទីកាន់កិច្ចការជំនួសព្រះអង្គ អំឡុងពេលព្រះអវត្តមានទ្រង់។
ព្រះមហាក្សត្របរមនាថ នរោត្តម សីហមុនី ទ្រង់យាងទៅពិនិត្យព្រះរាជសុខភាពនៅប្រទេសចិនជាទៀងទាត់ ក៏ប៉ុន្តែជួនកាលទ្រង់ក៏យាងទៅមុនពេលកំណត់ដែរ នៅពេលនាយករដ្ឋមន្ត្រី លោក ហ៊ុន សែន ធ្វើច្បាប់ណាមួយដែលប្រាសចាកពីស្មារតីនៃរដ្ឋធម្មនុញ្ញ។ ជាក់ស្ដែង កាលពីដើមខែមីនា ឆ្នាំ២០២១ ទ្រង់បានយាងគង់នៅប្រទេសចិនជាច្រើនសប្ដាហ៍ ស្របពេលរបបក្រុងភ្នំពេញ កំពុងបង្កើតច្បាប់ ស្ដីពី វិធានការទប់ស្កាត់ការឆ្លងរីករាលដាលនៃជំងឺកូវីដ-១៩ ការយាងទៅលើកនោះ គឺព្រះមហាក្សត្រយាងទាំងប្រថុយនឹងគ្រោះថ្នាក់។ ហើយកាលពីពាក់កណ្ដាលឆ្នាំ២០២០ ព្រះអង្គ ក៏ទ្រង់យាងទៅទីក្រុងប៉េកាំងដែរ ខណៈពេលលោក ហ៊ុន សែន ចាប់ផ្ដើមធ្វើច្បាប់គ្រប់គ្រងប្រទេសក្នុងភាពអាសន្ន ដែលអ្នកឃ្លាំមើលយល់ថា ច្បាប់នេះ លោក ហ៊ុន សែន ទុកប្រើប្រាស់ក្នុងពេលផ្ទេរអំណាចឱ្យកូនប្រុសច្បង របស់លោកគឺ លោក ហ៊ុន ម៉ាណែត នៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។