មេបញ្ជាការកងទ័ពជើងគោកសហរដ្ឋអាមេរិកប្រចាំតំបន់ប៉ាស៊ីហ្វិក ឬហៅកាត់ថា USARPAC នឹងមកបំពេញទស្សនកិច្ចនៅកម្ពុជា ដើម្បីស្វែងរកឱកាសស្ដារទំនាក់ទំនង និងពង្រឹងពង្រីកកិច្ចសហប្រតិបត្តិការទ្វេភាគី។ មន្ត្រីកំពូលអាមេរិកគ្រោងមកបំពេញទស្សនកិច្ចនៅកម្ពុជានាពេលនេះក៏ស្របពេលមានព័ត៌មានថា ចិន (China) បានបញ្ជូននាវា ២គ្រឿងបន្ថែមទៀតចូលចតនៅមូលដ្ឋានទ័ពជើងទឹករាម ដែលជាទីតាំងរងការចោទថា ជាមូលដ្ឋានឈរជើងសម្រាប់យោធាចិន។ អ្នកជំនាញថា ការណ៍ដែលកម្ពុជាផ្ដេកផ្ដួលទៅលើចិនកុម្មុយនិស្តតែម្ខាង និងមិនបានគិតគូរពីការរក្សាតុល្យភាពរវាងប្រទេសមហាអំណាច គឺជាឧបសគ្គក្នុងការស្ដារទំនាក់ទំនងជាមួយអាមេរិកឱ្យល្អប្រសើរឡើងវិញ។
មេបញ្ជាការកងទ័ពជើងគោកសហរដ្ឋអាមេរិកប្រចាំតំបន់ប៉ាស៊ីហ្វិក (USARPAC) នាយឧត្ដមសេនីយ៍ រ៉ូណាល់ ភី ខ្លាក (Ronald P. Clark) នឹងដឹកនាំមន្ត្រីជំនាញមកបំពេញ ទស្សនកិច្ចផ្លូវការនៅកម្ពុជា ចាប់ពីថ្ងៃទី២៤ ដល់ថ្ងៃទី២៥ ខែកុម្ភៈ។ ដំណើរទស្សនកិច្ចរបស់មន្ត្រីយោធាជាន់ខ្ពស់អាមេរិករូបនេះគឺជាការឆ្លើយតបតាមការអញ្ជើញរបស់អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក នាយឧត្ដមសេនីយ៍ ម៉ៅ សុផាន់។
កងទ័ពជើងគោកនៃកងយោធពលខេមរភូមិន្ទឱ្យដឹងថា លោក រ៉ូណាល់ ខ្លាក នឹងមានជំនួបទ្វេភាគីជាមួយលោក ម៉ៅ សុផាន់ ដើម្បីពិភាក្សាស៊ីជម្រៅក្នុងគោលបំណងពង្រឹងកិច្ចសហប្រតិបត្តិការយោធាទ្វេភាគី និងកសាងទំនុកចិត្ត និងការជឿជាក់ក្នុងវិស័យការពារជាតិរវាងប្រទេសទាំងពីរ។ ក្រៅពីនេះ លោក រ៉ូណាល់ ខ្លាក ក៏គ្រោងជួបជាមួយលោកនាយករដ្ឋមន្ត្រី ហ៊ុន ម៉ាណែត រដ្ឋមន្ត្រីក្រសួងការពារជាតិ លោក ទៀ សីហា និងអគ្គមេបញ្ជាការនៃកងយោធពលខេមរភូមិន្ទ លោក វង្ស ពិសេន ដើម្បីជំរុញកិច្ចសហប្រតិបត្តិការ និងស្វែងរកឱកាសក្នុងការស្ដារទំនាក់ទំនងលើវិស័យការពារឡើងវិញ។
អ្នកឃ្លាំមើលបញ្ហាកម្ពុជា វាយតម្លៃថា ដំណើរទស្សនកិច្ចរបស់មន្ត្រីយោធាជាន់ខ្ពស់ជើងគោកអាមេរិកនៅកម្ពុជា ទំនងជាអាមេរិកព្រួយបារម្ភខ្លាំងចំពោះស្ថានការណ៍កាន់តែតានតឹង និងការពង្រីកឥទ្ធិពលយោធាចិននៅកម្ពុជា និងក្នុងតំបន់។
អ្នកអត្ថាធិប្បាយនយោបាយលោក គឹម សុខ លើកឡើងថា កិច្ចចរចាក្នុងការស្វែងរកឱកាសស្ដារទំនាក់ទំនងយោធារវាងកម្ពុជា និងអាមេរិក គឺស្ថិតក្នុងកិច្ចចរចាការទូតតូចចង្អៀត ដោយសារតែរដ្ឋាភិបាលកម្ពុជារងសម្ពាធជាបន្តបន្ទាប់ពីរដ្ឋាភិបាលប្រទេសចិនដែលជាខ្នងបង្អែករបស់ខ្លួន។ លោក គឹម សុខ បន្ថែមទៀតថា ភាពគឃ្លើនរបស់រដ្ឋាភិបាលត្រកូល ហ៊ុន ដែលព្យាយាមបង្កើនសកម្មភាពយោធាជាមួយចិនគឺជាឧបសគ្គធំក្នុងការស្វែងរកឱកាសស្ដារទំនាក់ទំនងឱ្យល្អប្រសើរជាមួយអាមេរិកឡើងវិញ។
លោក គឹម សុខ៖«ប្រសិនបើរដ្ឋាភិបាលត្រកូល ហ៊ុន បង្ហាញភាពស៊ីជម្រៅកាន់តែខ្លាំងពេកជាមួយភាគីចិន នៅពេលមានការជជែកផ្ទាល់មាត់ជាមួយអាមេរិក ក្នុងលក្ខខណ្ឌណាមួយហើយពេលនោះសហរដ្ឋអាមេរិកអាចបញ្ជូនមន្ត្រីជំនាញយោធារបស់ពួកគេមករម្លឹករដ្ឋាភិបាលត្រកូលជាថ្មី ថា ប្រសិនបើហួសពីការព្រមព្រៀងគ្នាក្នុងក្របខ័ណ្ឌការទូតយោធាសម្ងាត់នោះសហរដ្ឋអាមេរិកអាចនឹងមានវិធានការផ្សេងៗអាចចាប់ផ្ដើមពីការសង្កត់ការទូត សេដ្ឋកិច្ចពាណិជ្ជកម្ម បន្ថែមទៀតលើរដ្ឋាភិបាលត្រកូល ហ៊ុន»។
ទោះយ៉ាងណា សេចក្តីប្រកាសព័ត៌មានរបស់កងទ័ពជើងគោកកម្ពុជា កាលពីថ្ងៃទី២១ ខែកុម្ភៈ ឱ្យដឹងថា ដំណើរទស្សនកិច្ចនេះ គឺស្របពេលខួបលើកទី៧៥ នៃទំនាក់ទំនងការទូតប្រទេសទាំងពីរ ហើយក៏ជាលើកទី២ដែរ ដែលមេបញ្ជាការកងទ័ពជើងគោកសហរដ្ឋអាមេរិកប្រចាំប៉ាស៊ីហ្វិក មកបំពេញទស្សនកិច្ចនៅកម្ពុជា។ លើកទី១ គឺដឹកនាំដោយនាយឧត្តមសេនីយ៍ វ៉ឺនសេន ប្រ៊ុក (Vincent Brooks) កាលពីឆ្នាំ២០១៤។
ស្របពេលដែលមានដំណើរទស្សនកិច្ចរបស់មេបញ្ជាការកងទ័ពជើងគោកសហអាមេរិកប្រចាំតំបន់ប៉ាស៊ីហ្វិក លោក រ៉ូណាល់ ខ្លាក មកកម្ពុជា រដ្ឋាភិបាលចិនទំនងជាបានបញ្ជូននាវាចម្បាំង ២គ្រឿងទៀតមកកាន់មូលដ្ឋានកងទ័ពជើងទឹករាម។ រូបភាពផ្កាយរណបដែលវិទ្យុអាស៊ីសេរីទទួលបានបង្ហាញថា នាវាចម្បាំងទាំង ២ គ្រឿងបន្ថែមទៀតត្រូវបានគេមើលឃើញកាលពីថ្ងៃទី១៧ ខែកុម្ភៈ។ នាវាទាំងពីរគ្រឿងនេះ បានចូលចតនៅកំពង់ផែថ្មីដែលចិនបានស្ថាបនាក្នុងមូលដ្ឋានទ័ពរាម នៅទល់មុខគ្នានឹងនាវាចម្បាំងចិនពីរគ្រឿងទៀតដែលបានចតនៅទីនោះតាំងពីចុងឆ្នាំ២០២៣។
ប្រភពមួយចំនួនបានប្រាប់វិទ្យុអាស៊ីសេរីកាលពីឆ្នាំមុនថា ចិននឹងប្រគល់គ្រឿងបរិក្ខារថ្មីៗជាច្រើននៅឯមូលដ្ឋានទ័ពរាម បូករួមទាំងកំពង់ផែ និងនាវាចម្បាំង ២ គ្រឿង ដល់កម្ពុជា។ ដោយឡែក ការមកដល់នៃនាវាចម្បាំងចិនពីរគ្រឿងទៀតនៅពេលនេះគេអាចបញ្ជាក់ថា ការផ្ទេរនាវាចម្បាំងពីរគ្រឿងផ្ដល់ឱ្យកម្ពុជានឹងជិតមកដល់ហើយ។
អត្ថបទដែលទាក់ទង៖
[ ចិនបញ្ជូននាវាចម្បាំងពីរគ្រឿងទៀតមកកាន់មូលដ្ឋានទ័ពរាមOpens in new window ]
[ នាវាចម្បាំងអាមេរិកចូលចតនៅកម្ពុជា ក្រោយខកខាន ៨ ឆ្នាំOpens in new window ]
វិទ្យុអាស៊ីសេរីបានព្យាយាមទាក់ទងអ្នកនាំពាក្យក្រសួងការពារជាតិលោក ឈុំ សុជាត ដើម្បីសាកសួរអំពីរឿងនេះ ប៉ុន្តែគ្មានការឆ្លើយតបនៅឡើយគិតត្រឹមម៉ោងផ្សាយនេះ។
កាលពីចុងឆ្នាំ២០២៤ អាមេរិកបានបញ្ជូននាវាចម្បាំងកងទ័ពជើងទឹកអាមេរិក យូអេសអេស សាវាណាហ៍ (USS Savannah) ឬ (LCS-28) ដែលមានកងនាវិកចំនួន ១០៣នាក់ មកបំពេញទស្សនកិច្ចនៅកម្ពុជា ប៉ុន្តែមិនត្រូវបានអនុញ្ញាតឱ្យចូលចតនៅកំពង់ផែមូលដ្ឋានកងទ័ពជើងទឹករាមឡើយ។ ជំនួបក្នុងការចរចារវាងក្រុមមន្ត្រីយោធាកំពូលៗអាមេរិកជាមួយរដ្ឋាភិបាល លោក ហ៊ុន ម៉ាណែត បានកើតឡើងជាបន្តបន្ទាប់ក្នុងរយៈពេលចុងក្រោយនេះបន្ទាប់ពីដំណើរទស្សនកិច្ចរបស់អតីតរដ្ឋមន្ត្រីការពារជាតិអាមេរិកលោក ឡយ អូស្ទីន (Lloyd Austin) មកកម្ពុជាកាលពីខែមិថុនា ឆ្នាំ២០២៤ ផ្ដួចផ្ដើមឱ្យមានកិច្ចចរចាការទូត ដើម្បីស្វែងរកឱកាសស្ដារទំនាក់ទំនងយោធាឡើងវិញ។
ក្រោយនាវាចម្បាំងកងទ័ពជើងទឹកអាមេរិក យូអេសអេស សាវាណាហ៍ បានចាកចេញពីកម្ពុជា ក្នុងជំនួបរវាងអគ្គមេបញ្ជាការនៃកងយោធពលខេមរភូមិន្ទលោក វង្ស ពិសេន ជាមួយនាយការិយាល័យអនុព័ន្ធយោធាថ្មីនៃកងទ័ពរំដោះប្រជាជនចិន (PLA) ប្រចាំកម្ពុជាលោក ស៊ឹង តាជឺ (SHENG DAZHI) កាលពីខែមករា ភាគីកម្ពុជាបានស្នើឱ្យចិនជំរុញបន្ថែមលើកិច្ចសហប្រតិបត្តិការយោធា និងប្រុងប្រៀបរៀបចំផែនការធ្វើសមយុទ្ធនាគមាសឆ្នាំ២០២៥ ឱ្យមានទំហំកាន់តែធំ មានខ្លឹមសារកាន់តែស៊ីជម្រៅ ចំនួនយោធិន និងគ្រឿងសព្វាវុធចូលរួមកាន់តែច្រើន និងទំនើបជាងឆ្នាំមុនៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។