ក្រុមយុវជនរិះគន់លោក ហ៊ុន ម៉ានី រឿងរៀបចំព្រឹត្តិការណ៍អង្គរសង្រ្កាន្តនៅក្នុងឆ្នាំនេះជាថ្មីទៀតថា ជាការខ្ជះខ្ជាយលុយជាតិ ដើម្បីតែលើកមុខមាត់ក្រុមគ្រួសារត្រកូល«ហ៊ុន» និងបក្ខពួក ខណៈពលរដ្ឋមួយចំនួនក្រីក្រស្ទើរតែរកអង្ករច្រកឆ្នាំងគ្មាន។ ពួកគាត់ចាត់ទុកការព្យាយាមរៀបចំព្រឹត្តិការណ៍ធំៗរបស់ក្រុមគ្រួសារ ត្រកូល«ហ៊ុន»នេះជាការព្យាយាមបង្វែរស្ថានការណ៍ដើម្បីឱ្យពលរដ្ឋមើលមកថា ក្រោមការដឹកនាំរបស់គ្រួសារត្រកូល«ហ៊ុន»ពិតជាធ្វើឱ្យពលរដ្ឋរស់នៅសម្បូរសប្បាយ។
ស្របពេលដែលពលរដ្ឋកំពុងជំពាក់បំណុលធនាគារវ័ណ្ឌក កសិករគ្មានទឹកធ្វើស្រែ កសិផលគ្មានទីផ្សារ បញ្ហាពលរដ្ឋចំណាកស្រុក និងអំពើឧក្រិដ្ឋជនរកស៊ីឆបោកតាមអនឡាញ កំពុងកើតឡើងស្ទើរទូទាំងប្រទេសរដ្ឋាភិបាលដោះស្រាយមិនទាន់បាន រដ្ឋាភិបាលកំពុងរិះរកមធ្យោបាយបង្កើតកម្មវិធីសប្បាយៗដែលមើលទៅហាក់ជាការព្យាយាមបំភាន់ភ្នែកពលរដ្ឋឱ្យមើលឃើញពីភាពរីកចម្រើនរបស់កម្ពុជា ក្នុងនោះក៏មានការរៀបចំព្រឹត្តិការណ៍អង្គរសង្រ្កាន្តនៅខេត្តសៀមរាបនៅពេលខាងមុខនេះ ដែលដឹកនាំដោយកូនប្រុសពៅរបស់លោក ហ៊ុន សែន គឺ លោក ហ៊ុន ម៉ានី។
«កម្មវិធីអង្គរសង្រ្កាន្តជារឿងឥតប្រយោជន៍ និងជាការពង្វក់ខួរក្បាលយុវជន»
យុវជនរស់នៅប្រទេសកូរ៉េខាងត្បូង លោក ឃ្លោក លាភ ប្រាប់វិទ្យុអាស៊ីសេរីនៅថ្ងៃទី៩ ខែមីនា ថា ការរៀបចំកម្មវិធីអង្គរសង្រ្កាន្តរបស់លោក ហ៊ុន ម៉ានី គឺជារឿងឥតប្រយោជន៍ និងជាការពង្វក់ខួរក្បាលយុវជនឱ្យដឹងគុណការដឹកនាំរបស់ឪពុករបស់លោក ខណៈពលរដ្ឋកំពុងរស់នៅក្នុងស្ថានភាពក្រីក្រ។ លោកសង្កេតឃើញថា កូនប្រុសពៅរបស់លោក ហ៊ុន សែន គឺលោក ហ៊ុន ម៉ានី ដើរតួនាទីជាអ្នកកៀរគរយុវជនឱ្យងប់ងុលនឹងគណបក្សប្រជាជនកម្ពុជា ស្របពេលដែលឪពុករបស់លោកប្រើអំពើហិង្សា និងគំរាមកំហែងគ្រប់រូបភាពទៅលើអ្នកដែលហ៊ានរិះគន់ការដឹកនាំរបស់ក្រុមគ្រួសារហ៊ុន។
លោក ឃ្លោក លាភ៖«គេដើរដល់ណាហើយយើងបែរជាធ្វើអន្សមយក្សបង្អួតគេ ធ្វើជារូបបេះដូងបង្អួតគេហើយបំបែកឯកត្តកម្មថា ខ្មែរអស្ចារ្យមិនមែនអស្ចារ្យទេ ខ្មែរអស្ចារ្យគឺខ្មែរអ្នកសាងអង្គរយើងមើលពូជខ្មែរពូជអង្គរ។ បើខ្មែរអស្ចារ្យរឿងអន្សមយក្ស រឿងបេះដូងវាគួរឱ្យអាម៉ាស់ខ្មាសគេមែនទែន។ លោក ហ៊ុន ម៉ានី ធ្វើព្រឹត្តិការណ៍គ្រាន់តែបន្លប់ទេហើយបរាជ័យច្រើនណាស់គ្រាន់តែរឿងបង្កើតព្រឹត្តិការណ៍សាទរកម្ពុជាថា កម្ពុជាពិតជាអស្ចារ្យមហាលោតផ្លោះរហូតបណ្តែតបណ្តោយឱ្យឆេះរូបព្រះឆាយាល័ក្ខណ៍ព្រះមហាក្សត្រ»។
ចំណែកឯសកម្មជនបរិស្ថាន និងជាអ្នកតាមដានស្ថានការណ៍សង្គមអ្នកនាង លឹម គឹមស័រ ថ្លែងថា ព្រឹត្តិការណ៍ដែលក្រុមសហភាពសហព័ន្ធយុវជនកម្ពុជា ឬក្រុមយុវជន ស.ស.យ.ក របស់លោក ហ៊ុន ម៉ានី បង្កើតនេះគឺជាការបង្ហាញថា កម្ពុជាមានសុខសន្តិភាព ប៉ុន្តែរូបភាពនេះមិនអាចលាក់បាំងបញ្ហាអសន្តិសុខដែលកំពុងកើតមានបាននោះទេ។ អ្នកនាងបន្តថា ស្ថាប័នស.ស.យ.ក នេះហាក់កំពុងដើរតួនាទីជំនួសឱ្យក្រសួងពាក់ព័ន្ធផ្សេងៗទៀតក្នុងស្ថាប័នរដ្ឋ ដែលធ្វើឱ្យក្រសួងមួយចំនួនមិនអាចបំពេញតួនាទីរបស់ខ្លួនបាន។
អ្នកនាង លឹម គឹមស័រ៖«ចំណាយលុយច្រើនទៅលើព្រឹត្តិការណ៍អ្វីមួយប៉ុន្តែពលរដ្ឋនៅតែជំពាក់បំណុលធនាគារអ៊ីចឹងប្រជាជនត្រូវសិក្សារឿងហ្នឹងត្រូវហ៊ានបញ្ចេញមតិ ហ៊ានសម្ដែងមតិឱ្យរដ្ឋាភិបាលក៏ដូចជាក្រសួងដែលពាក់ព័ន្ធហ្នឹងជួយទៅដល់ពួកគាត់ផងអ៊ីចឹងលុយដែលចំណាយទៅលើការរៀបចំហ្នឹងគឺជាលុយមួយផ្នែកប៉ុន្តែគួរតែសម្រួលទៅដល់ប្រជាជនដែលគាត់កំពុងតែរងគ្រោះដោយសារតែបញ្ហាជាប់បំណុល ដោយសារការបោកប្រាស់តាមប្រព័ន្ធអនឡាញ»។
ការរិះគន់របស់ក្រុមយុវជនទាំងនេះ ធ្វើឡើងក្រោយរដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជាគឺលោក ហ៊ុន ម៉ានី នៅថ្ងៃទី៩ ខែមីនា បានធ្វើសន្និសីទសារព័ត៌មានស្ដីពីការរៀបចំព្រឹត្តិការណ៍អង្គរសង្រ្កាន្តឆ្នាំ២០២៥ នៅខេត្តសៀមរាប ក្រោមប្រធានបទ«ញញឹមសាទរសង្រ្កាន្តឆ្នាំថ្មី» និងធ្វើពិធីក្រុងពាលីដើម្បីរៀបចំសាងសង់រោងនានានៅក្នុងប្រាសាទអង្គរវត្ត។ លោក ហ៊ុន ម៉ានី អះអាងថា ការធ្វើអង្គរសង្រ្កាន្ត នេះគឺដើម្បីលើកយកនូវកេរដំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមកតាំងបង្ហាញចាប់ពីថ្ងៃទី ១៤ ដល់ថ្ងៃទី១៦ ខែមេសា។
លោក ហ៊ុន ម៉ានី ចំណាយលុយដ៏ច្រើនសន្ធឹកសន្ធាប់
ក្នុងពិធីអង្គរសង្រ្កាន្តនាឆ្នាំកន្លងៗទៅ លោក ហ៊ុន ម៉ានី ធ្លាប់បានកៀរគរយុវជនសហភាពសហព័ន្ធយុវជនកម្ពុជាធ្វើនំអន្សមយក្សធំជាងគេលើពិភពលោក ធ្វើទូកងប្រវែងវែងជាងគេ ត្បាញក្រមាវែងជាងគេក្នុងលោក និងបំបែកកំណត់ត្រាឯតទគ្គកម្មពិភពលោកខាងបត់បេះដូងក្រដាសដ៏ច្រើនបំផុតរហូតដល់ទៅជិត៤លាន ដែលនេះគឺជាការចំណាយលុយដ៏ច្រើនសន្ធឹកសន្ធាប់។ លើសពីនេះ លោក ហ៊ុន ម៉ានី ផ្ដល់តួនាទី និងលាភសក្ការៈ ដល់យុវជនដើម្បីទាក់ទាញចិត្តឱ្យពួកគេព្រមចូលបំរើគណបក្សប្រជាជនកម្ពុជា។
អត្ថបទដែលទាក់ទង៖
[ ទិដ្ឋភាពទូទៅ នៃពិធីបុណ្យចូលឆ្នាំខ្មែរ ក្នុងតំបន់អង្គរខេត្តសៀមរាបOpens in new window ]
ជុំវិញរឿងនេះ អ្នកអត្ថាធិប្បាយនយោបាយលោក គឹម សុខ មានប្រសាសន៍ថា ការណ៍ដែលកូនប្រុសរបស់លោក ហ៊ុន សែន គឺលោក ហ៊ុន ម៉ានី ប្រើយុទ្ធសាស្ត្ររៀបចំព្រឹត្តិការណ៍ធំៗនៅក្នុងសង្គម គឺដើម្បីលុបបញ្ហានយោបាយ និងវិបត្តិសង្គមដែលបង្កឡើងដោយក្រុមគ្រួសារត្រកូល«ហ៊ុន»។ លោកបន្តថា គ្រួសារត្រកូល «ហ៊ុន» គួរតែយកលុយដែលចំណាយឥតប្រយោជន៍ទៅដោះស្រាយបញ្ហាឱ្យពលរដ្ឋដើម្បីសម្រួលដល់ជីវភាពរបស់ពួកគាត់ប្រសើរជាងយកលុយជាតិមកចំណាយខ្ជះខ្ជាយ។
លោក គឹម សុខ៖«ការរៀបចំព្រឹត្តិការណ៍ធំៗទាំងអស់ហ្នឹងគឺគ្រាន់តែបញ្ជោតភ្នែកពលរដ្ឋមួយគ្រាៗតែប៉ុណ្ណោះមិនអាចបិទបាំងការពារពិតនៃការដឹកនាំច្របូកច្របល់ធ្វើឱ្យជាតិក្រហល់ក្រហាយក្រីក្រលំបាកនោះទេ ហើយមែនទែនពលរដ្ឋដឹងទាំងអស់គ្រាន់តែងរង់ចាំពេលវេលាផ្លាស់ប្ដូររដ្ឋាភិបាលត្រកូល«ហ៊ុន»ហ្នឹងវិញដើម្បីស្ថាបនាជាតិឡើងវិញ»។
ជារឿយៗលោក ហ៊ុន ម៉ានី តែងសរសេរពីការដឹកនាំរបស់ឪពុកថា បានលះបង់សាច់ស្រស់ឈាមស្រស់ដើម្បីបុព្វហេតុជាតិ ហើយក្រុមយុវជនស.ស.យ.ក មួយចំនួនធំដែលនៅតាមហែហម និងបម្រើការងារឱ្យលោក ហ៊ុន ម៉ានី ក៏បង្ហាញការ ប្ដេជ្ញាចិត្តការពារអ្វីមួយដែលលោកហៅថា សន្តិភាពផងដែរ។ ក៏ប៉ុន្តែការពិតនៅពីក្រោយ «សន្តិភាព» ក្រោមការដឹកនាំរបស់គ្រួសារត្រកូល«ហ៊ុន»គឺពោរពេញទៅដោយអំពើហិង្សា ការគំរាមសម្លាប់ ការចាប់ដាក់គុក ការធ្វើទុក្ខបុកម្នេញផ្នែកនយោបាយរាប់មិនអស់ទៅលើក្រុមអ្នករិះគន់ អ្នកនយោបាយប្រឆាំង សង្គមស៊ីវិល និងប្រព័ន្ធផ្សព្វផ្សាយឯករាជ្យជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។