កម្លាំងអគ្គស្នងការដ្ឋាននគរបាលជាតិបានបង្ក្រាបទីតាំងអគារឆបោកតាមអនឡាញ (Online) របស់ក្រុមឧក្រិដ្ឋជនស្ថិតក្នុងខេត្តមណ្ឌលគិរី និងបានឃាត់ខ្លួនជនបរទេសជិត ៣រយនាក់ (២៥៨នាក់)។ មន្ត្រីសិទ្ធិមនុស្ស និងអ្នកតាមដានបញ្ហាឆបោកតាមអនឡាញថា ក្រុមឧក្រិដ្ឋជនកំពុងពង្រីកបណ្ដាញ និងអគារឆបោកតាមអនឡាញនៅកម្ពុជាកាន់តែខ្លាំង។
ការបង្ក្រាបរបស់កម្លាំងអគ្គស្នងការដ្ឋាននគរបាលជាតិនៅទីតាំងអគារមេគង្គ៧៤ ស្ថិតក្នុងខេត្តមណ្ឌលគិរី ដោយឃាត់ខ្លួនជនបរទេសជិត ៣រយនាក់ពាក់ព័ន្ធនឹងអំពើឆបោកតាមអនឡាញ ត្រូវបានក្រុមមន្ត្រីសិទ្ធិមនុស្ស និងអ្នកឃ្លាំមើលវាយតម្លៃថា ក្រុមឧក្រិដ្ឋជនមិនបានខ្លាចញញើតនឹងច្បាប់ ឬការបង្ក្រាបរបស់សមត្ថកិច្ចទេ ហើយក្រុមឧក្រិដ្ឋជននឹងបន្តពង្រីកអគារឆបោកតាមអនឡាញជាច្រើនទៀតនៅកម្ពុជា។
ជនជាតិដែលត្រូវបានឃាត់ខ្លួនច្រើនជាងគេ គឺជនជាតិចិន
របាយការណ៍របស់អគ្គស្នងការដ្ឋាននគរបាលជាតិដែលត្រូវបាន ព័ត៌មានក្នុងស្រុកផ្សព្វផ្សាយឱ្យដឹងថា ការបង្ក្រាបអគារអនឡាញមេគង្គ៧៤ ក្នុងក្រុងសែនមនោរម្យ ខេត្តមណ្ឌលគិរី កាលពីថ្ងៃទី៦ ខែមីនា សមត្ថកិច្ចបានឃាត់ខ្លួនជនបរទេសសរុប ២៥៨នាក់ ក្នុងនោះមានជនជាតិចិន (Chinese) សរុប ២៤៧នាក់ ក្រៅពីនេះក៏ជនជាតិមីយ៉ាន់ម៉ា (Myanmar) ម៉ាឡេស៊ី (Malaysian) និងជនជាតិវៀតណាម (Vietnam)។ ប្រភពដដែលអះអាងថា ក្នុងចំណោមជនបរទេសទាំងនោះសមត្ថកិច្ចបានកំណត់អត្តសញ្ញាណជនជាតិចិន និងមីយ៉ាន់ម៉ាចំនួន ១៤នាក់គឺជាជនសង្ស័យប្រព្រឹត្តអំពើទារុណកម្ម និងបង្ខំឱ្យក្រុមជនបរទេសធ្វើការក្នុងអគារ និងបញ្ជូនទៅស្នងការដ្ឋាននគរបាលខេត្តមណ្ឌលគីរីដើម្បីសាកសួរ។ ចំណែក ជនបរទេសផ្សេងទៀតកម្លាំងជំនាញបានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីរៀបចំនីតិវិធីបណ្ដេញចេញទៅប្រទេសកំណើតពួកគេវិញ។
វិទ្យុអាស៊ីសេរីមិនអាចទាក់ទងអគ្គស្នងការនគរបាលជាតិលោក ស ថេត និងស្នងការនគរបាលខេត្តមណ្ឌលគិរីលោក ឡោ សុខា ដើម្បីសាកសួរបញ្ជាក់ជុំវិញរឿងនេះបានទេនៅថ្ងៃទី៩ ខែមីនា។
ក្រុមមន្ត្រីសិទ្ធិមនុស្ស និងអ្នកឃ្លាំមើលបញ្ហាឆបោកតាមអនឡាញលើកឡើងថា ការពង្រីកអគារឆបោកតាមអនឡាញរបស់ក្រុមឧក្រិដ្ឋជនមកកាន់ទឹកដីភូមិភាគឦសាននៃប្រទេសកម្ពុជានេះ ឆ្លុះបញ្ចាំងថា ការទប់ស្កាត់ និងបង្ក្រាបបញ្ហាឆបោកតាមអនឡាញរបស់សមត្ថកិច្ចគ្មានប្រសិទ្ធភាពឡើយ ហើយពួកគេក៏ព្រួយបារម្ភចំពោះការកើតឡើងនៃបទល្មើស និងបញ្ហាអសន្តិសុខសង្គមកាន់តែច្រើនបន្ថែមទៀត។
លំហូរជនជាតិចិនមកខេត្តមណ្ឌលគិរីមានចំនួនច្រើនឡើង
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ប្រចាំខេត្តមណ្ឌលគិរីលោក ប៊ី វ៉ាន់នី ប្រាប់វិទ្យុអាស៊ីសេរីនៅថ្ងៃទី៩ ខែមីនា ថា លំហូរជនជាតិចិនមកកាន់ខេត្តមណ្ឌលគិរីចាប់ផ្ដើមមានចំនួនច្រើនឡើងចាប់តាំងពីអំឡុងចុងឆ្នាំ២០២៤ មក។ លោកបញ្ជាក់ថា ក្រុមជនជាតិចិនដែលចូលមកទឹកដីក្នុងខេត្តភាគឦសានភាគច្រើនគឺពួកគេជួលអគារ សណ្ឋាគារ រីស៊ត ស្នាក់នៅជាក្រុមៗផ្ដាច់មុខ ហើយលោកកត់សម្គាល់ថា នៅខាងមុខនៃអគារពួកគេស្នាក់នៅក៏មានក្រុមកងសន្តិសុខយាមកាមតឹងរ៉ឹងដែរ។
លោក ប៊ី វ៉ាន់នី៖«ការឆបោកតាមអនឡាញភាគច្រើនយើងឃើញហើយថា អ្នកដែលជាថៅកែដែលជាឧក្រិដ្ឋជនអនឡាញភាគច្រើនគាត់គឺជាជនជាតិចិន។ អ្នកដែលបានមកជួលផ្ទះ ឬកន្លែងស្នាក់នៅបង្កើតកន្លែងឆបោកតាមអនឡាញហ្នឹងខ្ញុំគិតថា រឿងដែលបានកើតមានឡើងហ្នឹងវាហាក់ដូចជាភាពងាយស្រួលពេកសម្រាប់ជនជាតិបរទេស ឬជនជាតិចិន ឬឧក្រិដ្ឋជនឆបោកគាត់មកធ្វើសកម្មភាពនៅលើទឹកដីកម្ពុជាវាដូចជាមានភាពងាយស្រួល វាជះឥទ្ធិពលទៅដល់ប្រជាពលរដ្ឋនៅទូទាំងប្រទេសដែលធ្វើឱ្យមានការភ័យខ្លាចចំពោះសកម្មភាពឆបោកតាមអនឡាញ»។
ក្រុមឧក្រិដ្ឋជនបានពង្រីកបណ្ដាញនៃក្រុមឆបោកតាមអនឡាញនៅកម្ពុជាក្នុងរយៈពេលប៉ុន្មានឆ្នាំចុងក្រោយនេះ ដែលធ្វើឱ្យប្រទេសក្រីក្រមួយនេះជួបផលលំបាកផ្នែកវិស័យទេសចរណ៍ ប៉ះពាល់ការវិនិយោគ និងសេដ្ឋកិច្ច រួមទាំងទាញឱ្យកម្ពុជាទាំងមូលមានកេរ្តិ៍ឈ្មោះមិនល្អលើឆាកអន្តរជាតិផងដែរ។ រដ្ឋាភិបាលត្រកូល ហ៊ុន បានរងការរិះគន់ និងចោទប្រកាន់ថា គ្មានសមត្ថភាពដោះស្រាយអំពើឆបោកតាមអនឡាញឡើយ ពីព្រោះតែគ្មានឆន្ទៈបង្ក្រាបក្រុមមេខ្លោងធំៗ និងចាប់ខ្លួនពួកគេយកមកអនុវត្តទោសតាមផ្លូវច្បាប់។
អត្ថបទដែលទាក់ទង៖
ប្រធានផ្នែកប្រយុទ្ធប្រឆាំងការជួញដូរមនុស្ស និងទេសន្តរប្រវេសក៍នៃអង្គការសង់ត្រាល់ (CENTRAL) លោក ឌី ថេហូយ៉ា ព្រមានថា ការមិនបង្ក្រាបទីតាំងសំខាន់ៗនៃជម្រកក្រុមឧក្រិដ្ឋជនឆបោកតាមអនឡាញ និងចាប់មេខ្លោងដែលនៅពីក្រោយប្រតិបត្តិការអំពើឧក្រិដ្ឋទាំងនេះ ក្រុមឧក្រិដ្ឋជននឹងពង្រីកបណ្ដាញ និងទីតាំងអគារបម្រើឧស្សាហកម្មឆបោកតាមអនឡាញរបស់ពួកគេនៅកម្ពុជាកាន់តែច្រើន។ លោកមើលឃើញថា ការបង្ក្រាបរបស់សមត្ថកិច្ចនៅទីតាំងអគារឆបោកតាមអនឡាញសមត្ថកិច្ចហាក់បង្ក្រាបទៅលើទីតាំងណាដែលចង់បង្ក្រាប ហើយទីតាំងដែលជាជម្រកនៃក្រុមឧក្រិដ្ឋជនធំៗបែរជាមើលរំលង។
លោក ឌី ថេហូយ៉ា៖«ការបង្ក្រាបនេះក៏មិនទាន់បានគ្របដណ្ដប់លើតំបន់[មានអំពើឆបោកតាមអនឡាញ]ធំៗដែរ អ៊ីចឹងមានន័យថា ការបង្ក្រាបនេះគឺជាការបង្ក្រាបដោយករណីជ្រើសរើស(Selection case)មិនមែនជាឆន្ទៈនៃការលុបបំបាត់ចោលលក្ខណៈទ្រង់ទ្រាយធំនៅឡើយទេ។ ជាពិសេសគឺនៅតំបន់ប៉ោយប៉ែត តំបន់ក្រុងព្រះសីហនុ តំបន់ជាយដែនដូចជាក្រុងបាវិតអីជាដើម ក៏ដូចជានៅរាជធានីភ្នំពេញដែរ»។
ជនរងគ្រោះក្នុងអំពើឆបោកតាមអនឡាញដែលសមត្ថកិច្ចកម្ពុជា រួមទាំងស្ថាប័នអន្តរជាតិជាច្រើនបានរាយការណ៍កន្លងមកនោះភាគច្រើនគឺជាជនជាតិបរទេសចម្រុះជាតិសាសន៍ដែលពួកគេរងការវាយដំ ធ្វើទារុណកម្មដោយឆក់ខ្សែភ្លើង និងលោតសម្លាប់ខ្លួនពីលើអគារជាដើម។ ទោះជាយ៉ាងណា ការរងគ្រោះរបស់ជនជាតិខ្មែរ ដោយការបាត់បង់ជីវិតពាក់ព័ន្ធនឹងអំពើឆបោកតាមអនឡាញនេះក៏ចាប់ផ្ដើមកើតមានដែរ។ ជាក់ស្ដែង នៅក្នុងដើមខែមីនានេះ ជនជាតិចិន ៣នាក់ ត្រូវបានសមត្ថកិច្ចចាប់ខ្លួន ជាប់ចោទក្នុងបទឃាតកម្មលើនារីខ្មែរវ័យជំទង់ម្នាក់ឈ្មោះ ហេង សៀវលី ដើម្បីបំបិទមាត់ និងភស្តុតាងពាក់ព័ន្ធនឹងសកម្មភាពអំពើឆបោកតាមអនឡាញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។