អ្វីខ្លះដែលប្រិយមិត្តគួរដឹង ទាក់ទងនឹងរឿងរ៉ាវដែលត្រកូល«ហ៊ុន»ជាប់ពាក់ព័ន្ធនឹងសម្ព័ន្ធក្រុមហ៊ុនចិនមួយឈ្មោះ «ហួយវ័ន គ្រុប» (Huione Group) ដែលរកស៊ីខាងផលិតកម្មវិធីទីផ្សារឈ្មោះ «ហួយវ័ន ហ្គារេនធី» (Huione Guarantee) សម្រាប់អតិថិជនឆបោកតាមអនឡាញប្រើប្រាស់ដើម្បីលាងលុយកខ្វក់ក្នុងទំហំទឹកប្រាក់រហូតដល់ទៅរាប់ពានលានដុល្លារ?
១) ក្រុមហ៊ុនវិភាគទិន្នន័យប្រតិបត្តិការកុំព្យូទ័រតាមប្រព័ន្ធបច្ចេកវិទ្យា Blockchain ឈ្មោះ «អេលីបទីក» (Elliptic) ដែលមានមូលដ្ឋាននៅទីក្រុងឡុងដ៍ (London) ចក្រភពអង់គ្លេស (UK) រកឃើញថា កម្មវិធីទីផ្សារអនឡាញឈ្មោះ «ហួយវ័ន ហ្គារេនធី» (Huione Guarantee) បង្កើតឡើងដោយសម្ព័ន្ធក្រុមហ៊ុនចិននៅកម្ពុជាឈ្មោះ «ហួយវ័ន គ្រុប» កំពុងត្រូវបានក្រុមអ្នករកស៊ីឆបោកតាមអនឡាញ ប្រើប្រាស់យ៉ាងទូលំទូលាយក្នុងតំបន់អាស៊ីអាគ្នេយ៍ រួមទាំងកម្ពុជាផង។ កម្មវិធីនេះ អនុញ្ញាតឱ្យក្រុមអ្នករកស៊ីឆបោកតាមអនឡាញ ប្រើប្រាស់នូវទិន្នន័យ បច្ចេកវិទ្យា និងសេវាកម្មលាងលុយកខ្វក់។ យ៉ាងហោចណាស់ ទឹកប្រាក់ជាង ១១ពាន់លានដុល្លារ ត្រូវបានគេចរាចរតាមរយៈកម្មវិធីនេះ។
២) បើតាមក្រុមហ៊ុន «អេលីបទីក» កម្មវិធីទីផ្សារអនឡាញឈ្មោះ «ហួយវ័ន ហ្គារេនធី» (Huione Guarantee) គឺជាផ្នែកមួយរបស់សម្ព័ន្ធក្រុមហ៊ុនចិនឈ្មោះ «ហួយវ័ន គ្រុប» ដែលក្រុមហ៊ុននេះ មានជាប់ពាក់ព័ន្ធនឹងត្រកូល«ហ៊ុន»។ ក្រុមហ៊ុន «ហួយវ័ន គ្រុប» ប្រតិបត្តិការអាជីវកម្មទូទាត់ និងប្តូរប្រាក់ឈ្មោះ «ហួយវ័ន ផេ» (Huione Pay) និងមានផលប្រយោជន៍អាជីវកម្មក្នុងវិស័យធានារ៉ាប់រង អាកាសចរណ៍ និងអចលនទ្រព្យ។ បងប្អូនជីដូនមួយរបស់លោកនាយករដ្ឋមន្ត្រី ហ៊ុន ម៉ាណែត គឺលោក ហ៊ុន តូ គឺជានាយកមួយរូបនៃក្រុមហ៊ុន ហួយវ័ន ផេ។ លោក ហ៊ុន តូ ធ្លាប់ត្រូវបានគេរាយការណ៍ថាជាជនសង្ស័យជួញដូរអាភៀន និងលាងលុយកខ្វក់នៅប្រទេសអូស្ត្រាលី ជាប់ពាក់ព័ន្ធនឹងក្រុមឧក្រិដ្ឋជនចិន និងទីតាំងប្រព្រឹត្តអំពើឆបោកតាមអនឡាញមួយកន្លែង។
៣) ការស្រាវជ្រាវរបស់ក្រុមហ៊ុន អេលីបទីក ក៏រកឃើញដែរថា អាជីវកម្មមួយទៀតរបស់ក្រុមហ៊ុន «ហួយវ័ន» ពាក់ព័ន្ធយ៉ាងសកម្មនឹងប្រាក់ចំណេញបានមកពីអំពើលាងលុយកខ្វក់ពីការឆបោកតាមអនឡាញនៅជុំវិញពិភពលោក។
៤) ក្រុមអ្នកឆបោកតាមអនឡាញ បង្កើតទំនាក់ទំនងក្លែងក្លាយជាមួយជនរងគ្រោះ ដោយអូសទាញពួកគេឱ្យដាក់លុយវិនិយោគក្នុងគម្រោងវិនិយោគក្លែងក្លាយ បង្កើតទំនាក់ទំនងជិតស្និទ្ធជាមួយក្រុមគ្រួសារជនរងគ្រោះ ស្នេហាបោកប្រាស់ និងជម្រិតយកប្រាក់តាមរូបភាពគំរាមកំហែងផ្លូវភេទជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។