គ្រូបង្រៀន និងពលរដ្ឋមួយចំនួន ចង់ឃើញក្រសួងអប់រំ យុវជន និងកីឡា រៀបចំការប្រឡងសិស្សពូកែទូទាំងប្រទេស ក្រោយពីក្រសួងសម្រេចផ្អាករៀបចំការប្រឡងនេះ សម្រាប់ឆ្នាំ២០២៥ ដោយមិនបានបញ្ជាក់អំពីមូលហេតុ ឲ្យបានច្បាស់លាស់។
គ្រូបង្រៀន និងពលរដ្ឋមួយចំនួនយល់ឃើញថា ការរៀបចំប្រឡងសិស្សពូកែថ្នាក់ជាតិ មានសារៈសំខាន់ សម្រាប់ឲ្យសិស្សានុសិស្សប្រកួតប្រជែងសមត្ថភាពចំណេះដឹង និងពង្រឹងគុណភាពវិស័យអប់រំ។
អតីតគ្រូបង្រៀនគណិតវិទ្យា នៃវិទ្យាល័យ ហ៊ុន សែន ស្អាង ខេត្តកណ្ដាល និងជាទីប្រឹក្សាសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ថ្លែងប្រាប់វិទ្យុអាស៊ីសេរី នៅថ្ងៃទី២៨ ខែមករាថា ក្រសួងអប់រំយុវជន ពុំគួរផ្អាកការរៀបចំប្រឡងសិស្សពូកែទូទៅប្រទេសសម្រាប់ឆ្នាំ២០២៥ ឡើយ ។ លោក បន្តថា ការផ្អាកការរៀបចំនេះ អាចប៉ះពាល់ដល់ទឹកចិត្តរបស់សិស្សានុសិស្ស ដែលបានចំណាយពេលត្រៀមខ្លួន ដើម្បីការប្រឡងសិស្សពូកែតាំងពីកុមារភាព។
លោក រ៉ុង ឈុន៖«ជាការពិតនៅពេលប្អូនសិស្សានុសិស្ស ដែលមានបំណងចង់ប្រកួតប្រជែងប្រឡងសិស្សពូកែថ្នាក់ជាតិ មុខវិជ្ជាគណិតវិទ្យា មុខវិជ្ជាភាសាខ្មែរ និងមុខវិជ្ជារូបវិទ្យា ហើយក្រសួងប្រកាសលុបចោលបែបនេះ ធ្វើឲ្យការប៉ងប្រាថ្នា ដូចជាការត្រៀមខ្លួនទុក ដែលគាត់ខិតខំតាំងពីថ្នាក់ក្រោម ខំសម្រួច ដោយឆ្លៀតទៅរៀនសាលាគួរ ឬរៀនពិសេស ដើម្បីត្រៀមក្នុងការប្រកួតប្រជែងសិស្សពូកែ នៅពេល ដែលក្រសួងលុប ដោយមិនមានហេតុផល ធ្វើឲ្យពួកគាត់ខកចិត្ត និងខកបំណងរបស់គាត់ ដែលខំសម្រួលជាយូរមកហើយ»។
ចំណែកអ្នកប្រើប្រាស់បណ្ដាញសង្គមហ្វេសប៊ុក (Facebook) ជាច្រើនទៀត នាំគ្នាប្រតិកម្ម ចំពោះការផ្អាករៀបចំប្រឡងសិស្សពូកែទូទាំងប្រទេស សម្រាប់ឆ្នាំ២០២៥ នេះដែរ ដោយអ្នកខ្លះលើកឡើងថា ការផ្អាកការប្រឡងនេះ ខាតបង់ប្រយោជន៍ធ្ងន់ធ្ងរ សម្រាប់សិស្ស ដែលបានលះបង់ពេលវេលា និងថវិកា ដើម្បីត្រៀមចូលរួមការប្រកួតប្រជែងចំណេះដឹងថ្នាក់ជាតិ និងជាការដើរថយក្រោយ នៃវិស័យអប់រំនៅកម្ពុជា។
ការលើកឡើងនេះ ធ្វើឡើងបន្ទាប់ពីរដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន កាលពីថ្ងៃទី២៧ ខែមករា ក្រសួងសម្រេចផ្អាកការរៀបចំការប្រឡងសិស្សពូកែទូទាំងប្រទេស សម្រាប់ឆ្នាំ ២០២៤-២០២៥ និងលើកទឹកចិត្តដល់ប្រធានមន្ទីរអប់រំ នៅតាមរាជធានី-ខេត្ត ឲ្យរៀបចំការប្រឡងសិស្សពូកែប្រចាំរាជធានី-ខេត្ត រៀងៗខ្លួន លើមុខវិជ្ជា អក្សរសាស្ត្រខ្មែរ គណិតវិទ្យា និងរូបវិទ្យា ។
ទោះជាយ៉ាងណាក្ដី លោក ហង់ជួន ណារ៉ុន ពុំបានបញ្ជាក់អំពីមូលហេតុច្បាស់លាស់ នៃការផ្អាកការប្រឡងនេះ ឡើយ។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងអប់រំ អ្នកស្រី ឃួន វិច្ឆិកា ដើម្បីសុំការអត្ថាធិប្បាយជុំវិញបញ្ហានេះ បាននៅឡើយទេ នៅថ្ងៃទី២៨ ខែមករា។
ទោះជាយ៉ាងនេះក្ដី អ្នកស្រី ឃួន វិច្ឆិកា ប្រាប់វិទ្យុបារាំងអន្តរជាតិថា មូលហេតុ នៃការផ្អាកការប្រឡងជ្រើសរើសសិស្សពូកែទូទាំងប្រទេស គឺក្រសួងកំពុងផ្ដោតលើការងារលើកកម្ពស់សាលារៀនគ្រប់កម្រិត ឲ្យក្លាយទៅជាស្តង់ដារសាលាគំរូ និងលើកកម្ពស់គុណភាពអប់រំ និងការអនុវត្តកម្មវិធីក្រៅម៉ោងសិក្សាជាដើម។
រីឯលោក រ៉ុង ឈុន មានប្រសាសន៍ថា ក្រសួងអប់រំ គួរតែបញ្ជាក់អំពីមូលហេតុឲ្យបានច្បាស់លាស់ និងអាចទទួលយកបាន ចំពោះការផ្អាកការរៀបចំប្រឡងសិស្សពូកែថ្នាក់ជាតិនៅពេលនេះ។
លោក រ៉ុង ឈុន៖«ជាការយល់ឃើញរបស់ខ្ញុំ ដូចជាការបង្រៀនមុខវិជ្ជាគណិតវិទ្យា ហើយធ្វើការនៅសមាគមគ្រូបង្រៀនមកជាយូរមកហើយ បច្ចុប្បន្ននៅតែជាទីប្រឹក្សាសមាគមគ្រូបង្រៀន យើងមើលឃើញថា ត្រូវតែមានកម្មវិធីប្រកួតប្រជែងសិស្សពូកែប្រចាំថ្នាក់ជាតិបន្តទៀត មិនត្រូវលុបចោលនោះទេ។ បើលុបចោលក៏ត្រូវបញ្ជាក់អំពីមូលហេតុច្បាស់លាស់ផងដែរ ដើម្បីឲ្យអាណាព្យាបាល និងសិស្សានុសិស្ស បានជ្រាបព័ត៌មាននេះឲ្យបានច្បាស់លាស់»។
កាលពីឆ្នាំ២០២៤ ក្រសួងអប់រំ បានរៀបចំការប្រឡងជ្រើសរើសសិស្សពូកែទូទាំងប្រទេស ផ្នែកភាសាខ្មែរ គណិតវិទ្យា និងរូបវិទ្យា ថ្នាក់ទី៩ និងទី១២ ដែលមានបេក្ខជនចូលរួមចំនួន ៤៨០នាក់ ។ ការប្រឡងនេះ ជ្រើសរើសសិស្សជ័យលាភី ចំនួន ១០នាក់ មកពីគ្រប់មុខវិជ្ជា ដើម្បីទទួលបានរបស់អនុស្សាវរីយ៍ ដូចជាពានរង្វាន់ លិខិតសរសើរ និងថវិកាអមមួយចំនួនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។