ក្រសួងការងារថៃបានប្រកាសលើកលែងយកថ្លៃវាយត្រាលើឯកសារចេញក្រៅប្រទេស របស់ពលករបរទេស ចំនួនបីសញ្ជាតិ រួមមាន កម្ពុជា ឡាវ (Lao) និងមីយ៉ាន់ម៉ា (Myanmar) ក្នុងទេសកាលបុណ្យចូលឆ្នាំថ្មី ដើម្បីកាត់បន្ថយការចំណាយរបស់ពលករបរទេស។ តែយ៉ាងណា ពលករខ្មែរ នៅតែបារម្ភពីការយកថ្លៃលើឯកសាររបស់អាជ្ញាធរខ្មែរទៅវិញ និងការកកស្ទះនៅច្រកទ្វារព្រំដែន ដោយសារភាពយឺតយ៉ាវរបស់អាជ្ញាធរ ក្នុងការបំពេញឯកសារ។
នៅក្នុងកិច្ចប្រជុំគណៈកម្មាធិការគោលនយោបាយគ្រប់គ្រងពលករបរទេស (MPT) ថៃបានសម្រេចអនុញ្ញាតឱ្យពលករមាន ៣សញ្ជាតិ ដែលកំពុងធ្វើការនៅប្រទេសថៃ រួមមាន កម្ពុជា ឡាវ (Lao) និងមីយ៉ាន់ម៉ា(Myanmar) ត្រឡប់មកប្រទេសកំណើត ដើម្បីចូលរួមក្នុងពិធីបុណ្យចូលឆ្នាំថ្មី ដោយមិនអស់ថ្លៃលើឯកសារចេញចូលឡើយ។
សេចក្ដីប្រកាសព័ត៌មានរបស់ក្រសួងការងារថៃ កាលពីថ្ងៃទី១១ ខែមីនា ឱ្យដឹងថា ការអនុគ្រោះលើថ្លៃវាយត្រាចេញ (Re-Entry Permit) ១ខែកន្លះ គឺចាប់ពីថ្ងៃទី១ ខែមេសា រហូតដល់ថ្ងៃទី១៥ ខែឧសភា ឆ្នាំ២០២៥ ហើយការផ្ដល់ជូននេះ គឺសម្រាប់ពលករដែលធ្វើការស្របច្បាប់ ដោយពួកគេអាចធ្វើដំណើរចេញពីប្រទេសថៃបាន ដោយមិនចាំបាច់ស្នើសុំ វាយត្រាចេញទេ។
ថៃលើកទឹកចិត្តពលករបរទេស
រដ្ឋមន្ត្រីក្រសួងការងារថៃ លោក ភិផាត់ រ៉ាតឆាគីតប្រាកាន(Pipat Ratchakitprakarn) បានបញ្ជាក់ថា ការលើកលែងថ្លៃឯកសារ ចំពោះពលករនៃប្រទេសជិតខាងនេះ គឺដើម្បីរួមចំណែកកាត់បន្ថយបន្ទុកការចំណាយរបស់ពលករចំណាកស្រុក ដែលមានបំណងធ្វើដំណើរត្រឡប់ទៅលេងគ្រួសារ និងចូលរួមក្នុងពិធីបុណ្យចូលឆ្នាំថ្មី។ លោកបន្តថា ការលើកលែងនេះ គឺជាការផ្ដល់សិទ្ធិ និងអត្ថប្រយោជន៍សមស្រប សម្រាប់ពលករចំណាកស្រុក ដើម្បីឱ្យពួកគេមានកម្លាំងចិត្ត នៅពេលត្រឡប់មកធ្វើការនៅប្រទេសថៃវិញ ពីព្រោះពលករគឺជាកម្លាំងដ៏សំខាន់សម្រាប់សេដ្ឋកិច្ចថៃ។
យ៉ាងណាក៏ដោយ រដ្ឋមន្ត្រីក្រសួងការងារថៃរូបនេះ បានរម្លឹកឱ្យពលករបរទេស ត្រូវត្រឡប់ចូលមកក្នុងប្រទេសថៃវិញ ឱ្យបានមុនការកំណត់ បើមិនដូច្នេះទេ ពលករនឹងត្រូវបាត់បង់សិទ្ធិទទួលបានការលើកលែង ហើយត្រូវធ្វើឯកសារថ្មីឡើងវិញ។
ទោះជាបែបនេះក្ដី ពលករខ្មែរធ្វើការនៅថៃ លោក សុខ គឹមឡាង ប្រាប់វិទ្យុអាស៊ីសេរី នៅថ្ងៃទី១២ ខែមីនា ថា ការលើកលែងយកថ្លៃធ្វើឯកសារចេញពីប្រទេសថៃ របស់អាជ្ញាធរថៃ គឺជាការសម្រាលបន្ទុកមួយរបស់ពលករ ប៉ុន្តែលោកអះអាងថា ពលករខ្មែរនៅតែត្រូវចំណាយច្រើន ដោយសារមន្ត្រីខ្មែរ នៅច្រកទ្វារព្រំដែន ទារថ្លៃឯកសារផ្សេងៗ និងចំណាយទៅលើការដឹកជញ្ជូនឥវ៉ាន់តាមរថយន្ត ដែលពលករអះអាងថា ជាភ្នាក់ងាររបស់មន្ត្រីច្រកព្រំដែន ដែលមានតម្លៃថ្លៃជាងកម្មករអូសរទេះ។
លោក សុខ គឹមឡាង៖«តាំងពីលើកមុន នៅពេលយើងចុះទៅ(ព្រំដែន)គឺធម្មតា ប៉ុន្តែនៅពេលយើងឡើងមកវិញ គឺគេ(មន្ត្រីច្រកទ្វារ)មានវិធានការរបស់គេ ដើម្បីគាបស៊ីលុយយើងដូចតែគ្នាទេ។ អ៊ីចឹងរូបភាពហ្នឹង គឺនៅតែ ដដែលៗ មើលទៅគ្មានអ្វីផ្លាស់ប្ដូរផង។ ដូចនៅតែដូច»។
វិទ្យុអាស៊ីសេរី មិនអាចទាក់ទង អ្នកនាំពាក្យក្រសួងការងារកម្ពុជា លោក កត្តា អ៊ន និងប្រធានអនុព័ន្ធការងារអមស្ថានទូតកម្ពុជាប្រចាំប្រទេសថៃ លោក ឈឹម វិបុល ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី១២ ខែមីនា។
រដ្ឋាភិបាលថៃបានលើកលែងថ្លៃឯកសារចេញក្រៅប្រទេស របស់ពលករនៃប្រទេសជិតខាងនេះ អស់រយៈពេល ២ឆ្នាំជាប់គ្នាមកហើយ។ ចំពោះការលើកលែងនេះ រដ្ឋាភិបាលកម្ពុជា តាមរយៈក្រសួងការងារ បានអះអាងថា គឺដោយសារមេដឹកនាំកម្ពុជា បានស្នើសុំពីរដ្ឋាភិបាលថៃ។ ក៏ប៉ុន្តែ តាមការប្រកាសរបស់រដ្ឋាភិបាលថៃ បញ្ជាក់ថា ការលើកលែងនេះ គឺដើម្បីសម្រាលបន្ទុកការចំណាយ និងជាកាដូ លើកទឹកចិត្ត សម្រាប់ពលករបរទេស ដែលមានថ្ងៃបុណ្យចូលឆ្នាំថ្មី ដូចគ្នានឹងប្រទេសថៃ។
មន្ត្រីសង្គមស៊ីវិលស្នើឱ្យមន្រ្តីប្រចាំការនៅតាមច្រកទ្វារព្រំដែនសម្រួលឯកសារដល់ពលករឱ្យបានលឿន
ជុំវិញរឿងនេះ មន្ត្រីផ្នែកការពារសិទ្ធិពលករចំណាកស្រុក នៃអង្គការសង់ត្រាល់ (CENTRAL) ប្រចាំនៅប្រទេសថៃ លោក លឹង សុផុន ស្នើឱ្យក្រសួងការងារ និងមន្រ្តីប្រចាំការនៅតាមច្រកទ្វារព្រំដែន ជួយសម្រួលលើការចេញឯកសារដល់ពលករឱ្យបានលឿន និងទម្លាក់តម្លៃថ្លៃដឹកជញ្ជូនឥវ៉ាន់ឆ្លងកាត់ច្រកទ្វារ ដើម្បីសម្រួលដល់ការចំណាយរបស់ពលករ និងបង្ការកុំឱ្យកកស្ទះ។
លោក លឹង សុផុន៖«ច្រកព្រំដែនដីគោកហ្នឹង វាមានច្រើន។ ប្រសិនជាមានការសម្រួលជួយដល់ពួកគាត់ ខ្ញុំគិតថា មិនជាពិបាក ឬកកស្ទះនោះទេ។ ប៉ុន្តែបើយើងមិនយកចិត្តទុកដាក់នោះទេ ធ្វើឱ្យគាត់កកស្ទះ និងរង់ចាំយូរ ធ្វើឱ្យគាត់មានភាពស្មុគស្មាញក្នុងការចេញចូល។ នេះហើយដែលជាបញ្ហា។ ហើយប្រសិនបើគ្មានការដោះស្រាយទេ ខ្ញុំជឿថានៅតែមានការកកស្ទះដូចពេលកន្លងទៅអ៊ីចឹង»។
អត្ថបទដែលទាក់ទង៖
ពលករខ្មែរអះអាងថា កន្លងទៅ មន្ត្រីច្រកព្រំដែនរបស់កម្ពុជា បានយកលុយពីពួកគាត់ ក្នុងម្នាក់ ៥០០បាត ឬជាង ១០ដុល្លារ នៅពេលឆ្លងដែនចូលទៅថៃ ក្រោយពិធីបុណ្យចូលឆ្នាំថ្មី ខណៈមន្ត្រីអន្តោប្រវេសន៍មិនបានពិនិត្យ និងវាយត្រាលើឯកសាររបស់ពលករនោះទេ ដែលធ្វើឱ្យវីសារបស់ពួកគាត់ ត្រូវខូចសុពលភាព និងត្រូវធ្វើវីសា ឬទិដ្ឋាការថ្មីម្ដងទៀត ដោយចំណាយប្រាក់ ២ម៉ឺន ៥ពាន់បាត ឬជិត ៧០០ដុល្លារ។ បញ្ហាមួយទៀតនោះ មានពលករខ្មែរជាច្រើននាក់ បានកកស្ទះ នៅច្រកទ្វារព្រំដែន ដោយសារមន្ត្រីអន្តោប្រវេសន៍ថៃបំពេញទិដ្ឋាការចេញចូល(Re-entry Visa) ដែលធ្វើឱ្យពលករ ជាប់នៅកន្លែងបំពេញឯកសាររយៈពេលមួយថ្ងៃ និងខ្លះទៀតជាប់ពីរថ្ងៃ រហូតធ្វើឱ្យពួកគាត់សម្រាកនៅកន្លែងតម្រង់ជួរ និងនៅកន្លែងបំពេញទិដ្ឋាការចេញចូលនោះតែម្ដង។
របាយការណ៍របស់ក្រសួងការងារកម្ពុជា ឱ្យដឹងថា គិតត្រឹមដំណាច់ឆ្នាំ២០២៤ ពលករខ្មែរ ដែលកំពុងបម្រើការងារនៅក្រៅប្រទេសមានចំនួនជាង ១លាន ៣សែននាក់ (១,៣៨លាននាក់) រួមមាន នៅប្រទេសថៃ(Thailand) កូរ៉េខាងត្បូង (South Korea) ជប៉ុន(Japan) ម៉ាឡេស៊ី (Malaysia) និងសិង្ហបុរី (Singapore) ជាដើម។ ក៏ប៉ុន្តែ មន្ត្រីអង្គការសង់ត្រាល់ (CENTRAL) ប្រចាំនៅប្រទេសថៃ លោក លឹង សុផុន លើកឡើងថា ចំនួនពលករខ្មែរ ដែលកំពុងធ្វើការនៅប្រទេសថៃ មានសរុបជិត ៣លាននាក់ ក្នុងនោះ មានជាង ២លាននាក់ កំពុងកាន់វីសាការងារ ដែលអស់សុពលភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។