នាវាចម្បាំងអាមេរិកចូលចតនៅកំពង់ផែស្វយ័តក្រុងព្រះសីហនុរបស់កម្ពុជា ក្រោយពីខកខានអស់រយៈពេល ៨ឆ្នាំ។ នាវាចម្បាំងអាមេរិកនេះ មានឈ្មោះ យូអេសអេស សាវាណាហ៍ (USS Savannah) ឬ LCS 28 ដែលមាននាវិកសរុបចំនួន ១០៣ នាក់។ ទស្សនកិច្ចដ៏កម្ររបស់នាវាចម្បាំងអាមេរិកនៅកម្ពុជានេះ គឺចាប់ពីថ្ងៃទី ១៦ ដល់ថ្ងៃទី ២០ ខែធ្នូ។
ក្រសួងការពារជាតិកម្ពុជាឱ្យដឹងក្នុងសេចក្ដីប្រកាសព័ត៌មាននៅថ្ងៃទី១៣ ធ្នូ ថា ការចូលចតរបស់នាវាចម្បាំងអាមេរិកនេះ គឺដើម្បីពង្រឹង និងពង្រីកចំណងមិត្តភាព ព្រមទាំងលើកកម្ពស់កិច្ចសហប្រតិបត្តិការទ្វេភាគីរវាងកម្ពុជា និងសហរដ្ឋអាមេរិក។ ក្រសួងបញ្ជាក់ទៀតថា សកម្មភាពដែលគ្រោងទុក រួមមានជំនួបរវាងគណៈប្រតិភូនាវាចម្បាំងអាមេរិកជាមួយមេបញ្ជាការមូលដ្ឋានសមុទ្ររាម និងជាមួយថ្នាក់ដឹកនាំរដ្ឋបាលខេត្តព្រះសីហនុ ព្រមទាំងកម្មវិធីប្រកួតកីឡាមិត្តភាពរវាងក្រុមនាវិកអាមេរិកជាមួយកងទ័ពជើងទឹកកម្ពុជា។
ចាប់តាំងពីឆ្នាំ២០០៧ មក នាវាចម្បាំងអាមេរិកចូលចតនៅកម្ពុជាចំនួន ២៧ គ្រឿង ហើយគម្រោងចូលចតរបស់នាវា (USS Savannah) ឬ LCS 28 នេះ ជាលើកដំបូងហើយសម្រាប់រយៈពេល ៨ ឆ្នាំចុងក្រោយនេះ ខណៈកម្ពុជាត្រូវបានគេសង្ស័យថា បានចុះកិច្ចព្រមព្រៀងសម្ងាត់ជាមួយចិន កាលពីឆ្នាំ២០១៩ ក្នុងការអនុញ្ញាតឱ្យចិនតាំងមូលដ្ឋានទ័ពនៅក្នុងកំពង់ផែទ័ពជើងទឹករាម។
ភាគីកម្ពុជា និងចិនធ្លាប់បដិសេធការចោទប្រកាន់នេះជាច្រើនដង ប៉ុន្តែមន្ទិលសង្ស័យជុំវិញរឿងនេះនៅតែមាន ដោយសារភាគីចិនជាអ្នកជួយរដ្ឋាភិបាលកម្ពុជាកម្ពុជាទាំងផ្នែកបច្ចេកទេស និងថវិកា ក្នុងការធ្វើទំនើបកម្មកំពង់ផែកងទ័ពជើងទឹករាម ដែលមានសន្ទុះខ្លាំងក្លានាពេលបច្ចុប្បន្ននេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។