គណៈរដ្ឋមន្ត្រីថ្មីរបស់
នាយករដ្ឋមន្ត្រី
ហ៊ុន ម៉ាណែត ពោរពេញទៅដោយបណ្ដាញបក្ខពួកនិយមចាក់ស្រេះ

ក្រុមប្រឹក្សាភិបាលនៃក្រុមហ៊ុនបុត្រសម្ព័ន្ធរបស់ក្រុមហ៊ុន ភាពីម៉ិច គ្រុប សុទ្ធតែជាឥស្សរជននៅភ្នំពេញ។ អ្នកស្រី ជឹង សុភាព គឺជាប្រធានក្រុមហ៊ុន ភាពីម៉ិច គ្រុប នេះ។ អ្នកស្រីគឺជាមនុស្សជំនិតម្នាក់របស់អតីតនាយករដ្ឋមន្ត្រី ហ៊ុន សែន និងប្រពន្ធរបស់លោក គឺអ្នកស្រី ប៊ុន រ៉ានី។ ប្តីរបស់អ្នកស្រី ជឹង សុភាព គឹលោក ឡាវ ម៉េងឃីន។ លោកគឺជាអ្នកធានាដើមទុននយោបាយរបស់ពួកគេនៅក្នុងស្ថាប័នព្រឹទ្ធសភា។

កូនស្រីអ្នកស្រី ជឹង សុភាព គឺអ្នកស្រី ជឹង សុគន្ធាវី បានរៀបការជាមួយកូនប្រុសលោក ឡាវ ម៉េងឃីន គឺលោក ឡាវ វ៉ាន់ ដែលជាឧត្ដមសេនីយ៍មួយរូបនៅកម្ពុជា។ ថ្មីៗនេះ កូនស្រីរបស់ពួកគេគឺអ្នកស្រី ឡាវ ជៀជីន បានពង្រឹងសម្ពន្ធភាពអាជីវកម្មដ៏យូរអង្វែងរបស់គ្រួសារមួយនេះជាមួយឧបនាយករដ្ឋមន្ត្រី អូន ព័ន្ធមុនីរ័ត្ន តាមរយៈការរៀបការជាមួយកូនប្រុសរបស់លោក អូន ព័ន្ធមុនីរ័ត្ន គឺលោក អូន ព័ន្ធមុនីរាជ។

ចាប់តាំងពីឆ្នាំ២០១៣មក ឈ្មោះរបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានលេចត្រដែតឡើងសម្រាប់តំណែងអនាគត
នាយករដ្ឋមន្ត្រីរបស់បក្សកាន់អំណាច។ ប៉ុន្តែ ក្រោយមក លោកត្រូវបានគេផ្តល់ឱ្យនូវមុខតំណែងជាឧបនាយករដ្ឋមន្ត្រីវិញ នៅពេលដែលលោក
ហ៊ុន ម៉ាណែត ទទួលបានតំណែងកំពូលរបស់ប្រទេសនេះ។ ប្រពន្ធលោក អូន ព័ន្ធមុនីរ័ត្ន គឺអ្នកស្រី
អ៊ឹម ប៉ូលីកា គឺជាម្ចាស់ភាគហ៊ុនម្នាក់រួមជាមួយសមាជិកគ្រួសារត្រកូលដែលគ្រប់គ្រងក្រុមហ៊ុន ភាពីម៉ិច គ្រុប នៅក្នុងគម្រោងអភិវឌ្ឍន៍សណ្ឋាគារមួយនៅប្រទេសស៊ីប (Cyprus) ដែលជាផ្នែកមួយនៃគម្រោងវិនិយោគដើម្បីទទួលបានសញ្ជាតិរបស់ប្រទេសនេះ។ គម្រោងអភិវឌ្ឍន៍របស់ពួកគេបានទាក់ទាញចំណាប់អារម្មណ៍ពីនគរបាលនៃប្រទេសស៊ីបចាប់តាំងពីពេលនោះមក។

អ្នកស្រី អ៊ឹម ប៉ូលីកា ក៏មានចំណែកផលប្រយោជន៍អាជីវកម្មនៅប្រទេសសិង្ហបុរី (Singapore) និងនៅកម្ពុជា ជាមួយអ្នកស្រី វូ សុភៈទេវី ដែលជាប្រពន្ធរបស់ឧបនាយករដ្ឋមន្ត្រីមួយរូបទៀត គឺលោក វង្សី វិស្សុត។ កូនប្រុសរបស់ពួកគេ គឺលោក វង្សី ពុទ្ធិសេដ្ឋ មានភាគហ៊ុននៅក្នុងក្រុមហ៊ុន Cam F & B Services Co. Ltd. ដែលមានអ្នកស្រី ស៊ុន សុត្ថា ជាសហកម្មសិទ្ធិ។ អ្នកស្រី ស៊ុន សុត្ថា គឺជាប្រពន្ធរបស់ឧបនាយករដ្ឋមន្ត្រីម្នាក់ទៀត គឺលោក ស៊ុន ចាន់ថុល។

ឧបនាយករដ្ឋមន្ត្រី ស៊ុន ចាន់ថុល មានសញ្ជាតិអាមេរិកាំង។ លោកជាអតីតនាយកគ្រប់គ្រងមួយរូបនៅក្រុមហ៊ុនផលិតរថយន្តអន្តរជាតិ General Motors។ លោក ស៊ុន ចាន់ថុល ក៏ជាអតីតរដ្ឋមន្ត្រីក្រសួងពាណិជ្ជកម្មចាប់ពីឆ្នាំ២០១៣ ដល់ឆ្នាំ២០១៦ ហើយក្រោយមកបានក្លាយជារដ្ឋមន្ត្រីក្រសួងសាធារណការ និងដឹកជញ្ជូន។ ប្អូនថ្លៃរបស់លោកដែលឥឡូវនេះបានបែកបាក់គ្នា គឺលោក ខូវ ផល្លាបុត្រ បានរៀបការជាមួយកូនស្រីលោក ជា ស៊ីម។ លោក ជា ស៊ីម បានកាន់តំណែងជាប្រធានព្រឹទ្ធសភារហូតទាល់តែដល់ពេលលោកស្លាប់នៅឆ្នាំ២០១៥។

ប្អូនថ្លៃស្រីលោក ជា ស៊ីម គឺអ្នកស្រី ញ៉ែម សាខន គឺជាប្រពន្ធរបស់អតីតឧបនាយករដ្ឋមន្ត្រី និងជាអតីតរដ្ឋមន្ត្រីក្រសួងមហាផ្ទៃ លោក ស ខេង។ កូនប្រុសរបស់ពួកគេ គឺលោក ស សុខា ស្នងតំណែងទាំងពីរនេះចាប់តាំងពីមានការផ្ទេរអំណាចកាលពីខែសីហាមក។

ទីប្រឹក្សាលោក ស ខេង គឺលោក ឡាវ កាង គឺជាម្ចាស់ភាគហ៊ុនម្នាក់នៃក្រុមហ៊ុន Sokimex Investment Group Co. Ltd. ដែលធ្លាប់ត្រូវបានមេដឹកនាំគណបក្សប្រឆាំងលោក សម រង្ស៊ី ពណ៌នាម្តងថាជា «អ្នករកលុយឱ្យគណបក្សប្រជាជនកម្ពុជា»។ ទិន្នន័យចុះបញ្ជីពាណិជ្ជកម្មឆ្នាំ២០១៩របស់ក្រុមហ៊ុននេះ បញ្ជាក់ពីការពិតនៃការអះអាងរបស់មេបក្សប្រឆាំងបែបនេះ។ ក្នុងនោះ គេឃើញមានសមាជិកគ្រួសារលោក ហ៊ុន ម៉ាណែត និងគ្រួសាររបស់អតីតឧបនាយករដ្ឋមន្ត្រី លោក យឹម ឆៃលី និងលោក
ទៀ បាញ់ និងគ្រួសារដទៃទៀត។

កាលពីខែសីហា លោក ទៀ បាញ់ ក៏បានផ្ទេរតួនាទីជារដ្ឋមន្ត្រីការពារជាតិ និងឧបនាយករដ្ឋមន្ត្រីឱ្យទៅកូនប្រុសរបស់លោក គឺលោក ទៀ សីហា ដែលពីមុនជាឧត្ដមសេនីយ៍ និងជាអភិបាលខេត្តសៀមរាប។ ចាប់តាំងពីឆ្នាំ២០០៦មក លោក ទៀ សីហា គឺជាម្ចាស់កម្មសិទ្ធិកាន់កាប់ភាគហ៊ុនចំនួន ១៥% នៃក្រុមហ៊ុន (Cambodia) Power Transmission Lines Co., Ltd. (CPTL) ដែលសាងសង់ និងប្រតិបត្តិការអនុស្ថានីយផ្គត់ផ្គង់អគ្គិសនីនៅភាគពាយ័ព្យនៃប្រទេសកម្ពុជា។ ទេសាភិបាលដទៃទៀតនៃក្រុមហ៊ុននេះ មានដូចជា លោក គិត ច័ន្ទគ្រឹស្នា ដែលជាទីប្រឹក្សាដ៏យូររបស់ឧបនាយករដ្ឋមន្ត្រី សាយ សំអាល់។ ប្អូនថ្លៃរបស់លោក សាយ សំអាល់ គឺលោក ឌិត ទីណា គឺជារដ្ឋមន្ត្រីក្រសួងកសិកម្ម។

ទេសាភិបាលក្រុមហ៊ុន CPTL ទីបី និងចុងក្រោយ គឺ លោក Se Thma Pich។ លោកគឺជាដៃគូអាជីវកម្មរបស់លោក សារិន បារាំង ដែលប្រកបអាជីវកម្មជាមួយអ្នកស្រី ហុក ចិន្តាវី ប្រពន្ធរបស់ប្អូនប្រុសលោក ហ៊ុន ម៉ាណែត គឺលោក ហ៊ុន ម៉ានិត ដែលជាអគ្គនាយកនៃអគ្គនាយកដ្ឋានស្រាវជ្រាវចារកិច្ចនៃក្រសួងការពារជាតិ។

រីឯ បងជីដូនមួយរបស់លោក ហ៊ុន ម៉ាណែត គឺអ្នកស្រី ហ៊ុន គឹមឡេង ឯណោះវិញ អ្នកស្រីបានរៀបការជាមួយឧបនាយករដ្ឋមន្ត្រី នេត សាវឿន។ កូនស្រីពីរនាក់ក្នុងចំណោមកូនស្រីបីនាក់របស់ពួកគេ គឺអ្នកនាង នេត ធីតាច័ន្ទធីម៉ា និងអ្នកស្រី នេត ធីតាវិឈុណា ទទួលបានតួនាទីនៅក្នុងក្រសួងការបរទេសក្នុងអំឡុងពេលដែលមានការផ្ទេរអំណាចមកឱ្យរដ្ឋាភិបាលថ្មី។ ថ្មីៗនេះ អ្នកស្រី នេត ធីតាវិឈុណា បានរៀបការជាមួយលោក ហែម សុវត្ថិ ដែលជានាយកប្រតិបត្តិមួយរូបនៃក្រុមហ៊ុន រ៉ូយ៉ាល់ គ្រុប (Royal Group) របស់លោក គិត ម៉េង។ លោក គិត ម៉េង គឺជាទីប្រឹក្សាដ៏យូររបស់លោក ហ៊ុន សែន។

ក្រៅពីឧបនាយករដ្ឋមន្ត្រីទាំង៧នាក់នេះ ឧបនាយករដ្ឋមន្ត្រីបីនាក់ទៀត មិនជាប់ក្នុងបណ្តាញទំនាក់ទំនងនេះដោយផ្ទាល់ទេ បើទោះបីជាពួកគេភាគច្រើនមានសម្ពន្ធភាពគ្រួសាររបស់ពួកគេតែរៀងៗខ្លួនក៏ដោយ។ លោក កើត រិទ្ធ អតីតសាស្ត្រាចារ្យច្បាប់ដែលទទួលបានការអប់រំនៅប្រទេសបារាំង បានចូលបម្រើការងារក្នុងក្រសួងយុត្តិធម៌ រហូតឡើងក្លាយជារដ្ឋមន្ត្រីនៃក្រសួងនេះកាលពីឆ្នាំ២០២០។

ឧបនាយករដ្ឋមន្ត្រី សុខ ចិន្តាសោភា បានចាប់ផ្ដើមអាជីពជាមន្ត្រីរាជការក្នុងក្រសួងទេសចរណ៍កាលពីឆ្នាំ១៩៩៣។ បីឆ្នាំក្រោយមក លោកបានរៀបការជាមួយកូនស្រីអតីតអភិបាលខេត្តសៀមរាប និងជាអតីតអនុរដ្ឋមន្ត្រីក្រសួងមហាផ្ទៃ គឺលោក ទន់ ចាយ។ ខុសពីឧបនាយករដ្ឋមន្ត្រីពីររូបនេះ សម្រាប់ឧបនាយករដ្ឋមន្ត្រី ហង់ជួន ណារ៉ុន វិញ លោកហាក់ឡើងតំណែងតាមបែបតពូជច្បាស់ជាងនេះ។ ឪពុករបស់លោក គឺលោក ហង់ ជួន គឺជាអតីតរដ្ឋមន្ត្រីក្រសួងវប្បធម៌កាលពីដើមទសវត្សរ៍ទី៩០ ហើយក្រោយមកជាសមាជិកព្រឹទ្ធសភា។ កូនស្រីរបស់លោក ហង់ជួន ណារ៉ុន បច្ចុប្បន្នកំពុងបម្រើការងារក្នុងក្រសួងសេដ្ឋកិច្ច។

បើទោះបីជាពួកគេមិននៅក្នុងបន្ទាត់ខ្សែក្រហមនេះក៏ដោយ ក៏ក្រុមនេះរួមមានមនុស្សដ៏មានអំណាចបំផុតនៅកម្ពុជា។ សូមចុចលើប៊ូតុងខាងក្រោមដើម្បីបង្ហាញសមាជិកនៃត្រកូលនីមួយៗនៅក្នុងក្រាហ្វិកនេះ។

កាលពីឆ្នាំ២០១៦ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បាននិយាយវាយបកទៅក្រុមអ្នករិះគន់លោកដោយលោកជំរុញឱ្យពួកគេស្វែងរកនរណាម្នាក់ដែលមានសមត្ថភាពប្រសើរជាងកូនៗរបស់លោក ក្រោយពេលលោកតែងតាំងកូនប្រុសទាំងពីរនាក់របស់លោកឱ្យទៅកាន់តំណែងខ្ពស់ក្នុងអង្គភាពរបស់លោក។ ក្រុមអ្នកការពារឈាមថ្មីនៃតំណែងឧបនាយករដ្ឋមន្ត្រីទាំង១០រូបរបស់លោក ហ៊ុន ម៉ាណែត អាចផ្តល់អំណះអំណាងស្រដៀងគ្នាដែរថា ឧបនាយករដ្ឋមន្ត្រីទាំង១០រូបនេះសុទ្ធតែជាមនុស្សល្អបំផុតហើយដែលត្រូវបានគេជ្រើសរើសសម្រាប់បម្រើការងារអស់ទាំងនេះ។ ក៏ប៉ុន្តែ នៅក្នុងប្រទេសមួយដែលមានប្រជាជនសរុបប្រមាណ១៧លាននាក់ បើវាមិនមែនជាអំពើបក្ខពួកនិយមទេនោះ ទើបវាជារឿងចម្លែកមែនទែនដែលឧបនាយករដ្ឋមន្ត្រីទាំង៧រូបដែលមានសមត្ថភាពខ្ពស់ កំពុងរីករាយនឹងចំណងសម្ពន្ធភាព និងទំនាក់ទំនងស្និទ្ធស្នាលដ៏យូរអង្វែងរបស់ពួកគេបែបនេះ៕