བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་གྲགས་ཅན་གྱི་ཨ་རིའི་གྷརེམི་ཞེས་པའི་འཛམ་གླིང་གི་རོལ་དབྱངས་གཟེངས་རྟགས་ཆེ་ཤོས་དེ་འབུལ་བཞེས་མཛད་པ་དང་༧གོང་ས་མཆོག་གི་༧སྐུའི་གོ་སྟོན་ཏེ་བྱམས་བརྩེའི་ལོ་ཞེས་སྲུང་བརྩི་ཞུ་བའི་ལས་རིམ་གྱི་ཁྲོད་ཕྱི་ལོ་ ༢༠༢༦ ཟླ་ ༢ ཚེས་ ༢༥ ཉིན་ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་ལ་དྭགས་སྤྱི་ཁྱབ་ལས་ཁུངས་ཀྱིས་འགན་ཁུར་འོག་ལ་དྭགས་བྱང་ཐང་ནུ་མའི་གཞུང་གི་སྨན་ཁང་དུ་ས་གནས་ཀྱི་སྨན་པ་དང་ལས་བྱེད། འཛིན་སྐྱོང་གི་འགན་ཁུར་བ་རྣམས་ལ་ཐུགས་རྗེ་ཆེ་ཞུའི་ལས་རིམ་ཞིག་གོ་སྒྲིག་ཞུས་འདུག
ལ་དྭགས་སྤྱི་ཁྱབ་པ་བཀྲིས་དོན་གྲུབ་ལགས་ཀྱིས། བྱམས་བརྩེ་ཟེར་དུས་གཙོ་བོ་འཕྲོད་བསྟེན་ལས་རིགས་ཀྱི་སྨན་པ་དང་སྨན་ཞབས་པ་ཀུན་ནས་ཉིན་རེའི་འཚོ་བའི་ནང་ནད་པར་ལྟ་སྐྱོང་དང་སྨན་བཅོས་སོགས་དངོས་སུ་ལག་བསྟར་བྱེད་པ་དང་འབྲེལ་བ་ཡོད་དུས་ལ་སྤྱི་ལས་ཁུངས་ངོས་ནས་བྱམས་བརྩེའི་ལོ་དབུ་འཛུགས་གནང་སྐབས་ལ་དྭགས་རྒྱལ་ས་གླེ་ཡི་གཞུང་གི་སྨན་པ་དང་སྨན་ཞབས་པ་ཀུན་ལ་ཐུགས་རྗེ་ཆེ་ཞུའི་ལས་རིམ་ཞིག་གཉེར་པ་ཡོད་པ་མ་ཟད། ད་རེས་བྱང་ཐང་ཁུལ་དུ་འདི་ལྟར་མུ་མཐུད་ལས་རིམ་གོ་སྒྲིག་གནང་ཡིན་ཞེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
དེ་བཞིན་༧གོང་ས་༧སྐྱབས་མགོན་ཆེན་པོ་མཆོག་ལ་ཨ་རིའི་གྷརེ་མི་ཞེས་པའི་འཛམ་གླིང་གི་རོལ་དབྱངས་གཟེངས་རྟགས་གྲགས་ཆེ་ཤོས་འདི་འབུལ་ལམ་ཞུས་པར་དམིགས་བསལ་གྱི་སེམས་པ་དགའ་པོ་བྱུང་བ་དང་ཐུགས་རྗེ་ཆེ་ཞུའི་ལས་རིམ་གོ་སྒྲིག་གནང་པ་དེར་བྱང་ཐང་ནུ་མའི་སྨན་ཁང་གི་སྨན་པ་འཇིགས་མེད་ལགས་ཀྱིས་སྙིང་ཐག་པ་ནས་ཐུགས་རྗེ་ཆེ་ཞུ་གི་ཡོད་ཅེས་གསུངས་བྱུང་། ལ་དྭགས་གླེ་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཐེངས་ ༦ པའི་ནུ་མ་ལྗོངས་ཀྱི་འཐུས་མི་ཟུར་པ་ཡེ་ཤེས་དཔལ་བཟང་ལགས་ཀྱིས་ཁོང་ལ་བསྔགས་བརྗོད་ཀྱི་བྱ་དགའ་བསྩལ་བར་སེམས་པ་དགའ་པོ་བྱུང་པ་དང་། ས་གནས་འདིར་བོད་པ་དང་ལ་དྭགས་མི་མང་ཕན་ཚུན་མུ་མཐུད་མཐུན་སྒྲིལ་དང་ཆིག་སྒྲིལ་ངང་བཞུགས་རྒྱུ་གལ་ཆེ་ཡིན་པ་གསུངས་བྱུང་། ཡང་སྨན་ཁང་གི་སྨན་པ་དང་སྨན་ཞབས་པ་ཀུན་ལ་ཐུགས་རྗེ་ཆེ་ཞུའི་བསྟོད་བསྔགས་སོགས་བསྩལ་བར་ཁོང་རྣམས་ཀྱིས་ཕྱག་ལས་གནང་ཕྱོགས་ལ་སེམས་ཤུགས་སྐུལ་མ་གཏོང་བ་དང་འདེང་ཚོད་ཕར་མ་ཞིག་བྱུང་ཡོད་པ་སྨན་པ་བསྟན་འཛིན་བྱང་ཆུབ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
སྤྱིར་ལ་དྭགས་བསོད་ནམས་གླིང་བོད་མིའི་གཞིས་ཆགས་ནང་གི་བོད་མི་ཕལ་ཆེ་བ་ལ་དྭགས་རྒྱལ་ས་གླེ་རུ་བཞུགས་ཀྱི་ཡོད་པ་ཡིན་ན་ཡང་། ལ་དྭགས་བྱང་ཐང་ཁུལ་དུ་བོད་མི་མང་པོ་ཞིག་འབྲོག་པ་དང་ས་མ་འབྲོག་གི་འཚོ་བ་སྐྱེལ་ནས་བཞུགས་མཁན་མང་པོ་ཡོད་པ་ཚོར་འཕྲོད་བསྟེན་གྱི་ཛ་དྲག་དཀའ་ངལ་འཕྲད་ཚེ་བྱང་ཐང་ནུ་མའི་སྨན་ཁང་དེ་ཁོང་རྣམས་ཀྱི་རེ་བ་བཅོལ་ས་གཙོ་བ་ཞིག་ཆགས་ཡོད་འདུག
དུས་རྒྱུན་དུ་བྱང་ཐང་ནུ་མར་འཕྲོད་བསྟེན་དང་། ཡང་སྐྱིད་སྡུག་འདྲ་མིན་སྐབས་གཞུང་འབྲེལ་གྱི་ཡིག་ཆ་རིགས་བཟོ་དགོས་ཀྱི་ཡོད་པ་ཁག་སྒྲིག་ཁྲིམས་དང་མཐུན་པའི་བརྒྱུད་རིམ་མང་དག་ཅིག་འགྲིམ་དགོས་པ་ཡིན་དུས་ཐུགས་རྗེ་ཆེ་ཞུའི་ལས་རིམ་དེ་རིགས་གལ་ཆེན་ཡིན་པ་ལ་དྭགས་བྱང་ཐང་ཀོ་ཡུལ་ནས་ཡིན་པ་ཚེ་རིང་དོན་གྲུབ་ལགས་ཀྱིས་གསུངས་བྱུང་།
དེ་བཞིན་ལ་དྭགས་བྱང་ཐང་བཀག་གཞུང་ནས་ཡིན་པ་ཀརྨ་འཛིན་པ་ལགས་ཀྱིས་དེ་སྔོན་ཁོང་གི་བུ་མོ་དང་ཚྭ་བོ་གཉིས་ལ་འཕྲོད་བསྟེན་གྱི་ཛ་དྲག་དཀའ་ངལ་འཕྲད་པའི་སྐབས་བྱང་ཐང་ནུ་མ་གཞུང་གི་སྨན་ཁང་གིས་རོགས་སྐྱོར་ཆེན་པོ་གནང་ཡོད་པ་གསུངས་བྱུང་། ལ་དྭགས་བྱང་ཐང་ནུ་མ་དེ་བཞིན་བྱང་ཐང་ས་གནས་ཁག་གི་ནང་ནས་གཙོ་བོ་ཞིག་ཆགས་ཡོད་ཅིང་། དེའི་ནང་གི་སྨན་ཁང་དང་། དེ་མིན་ལས་བྱེད་ཚང་མ་བཀའ་དྲིན་ཆེན་པོ་ཡིན་དུས་ལས་རིམ་འདི་འདྲ་བ་གལ་ཆེན་ཡིན་པ་བྱང་ཐང་གསུམ་མདོ་ནས་ཡིན་པ་ཀརྨ་རབ་འབྱོར་ལགས་ཀྱི་གསུང་གི་འདུག
༧གོང་ས་༧སྐྱབས་མགོན་ཆེན་པོ་མཆོག་གི་༧སྐུའི་གོ་སྟོན་ལ་སྲུང་བརྩི་ཞུ་རྒྱུ་འདི་༧སྐྱབས་རྗེ་མཆོད་མགོན་རིན་པོ་ཆེ་མཆོག་གིས་ལམ་སྟོན་གནང་པ་བཞིན་ཚགས་ཚུད་བྱུང་ཡོད་པ་བྱང་ཐང་ཁུལ་གྱི་གོ་སྟོན་གོ་སྒྲིག་ཚོགས་ཆུང་གི་ཚོགས་མི་མཁྱེན་རབ་རྡོ་རྗེ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་ལ། ད་རེས་བཀའ་དྲིན་རྗེས་དྲན་གྱི་འདུ་འཛོམས་དེའི་སར་ལ་དྭགས་བྱང་ཐང་གི་ས་ཁག་དགུའི་བོད་པའི་འགོ་པ་རྣམས་ཀྱང་ཚང་འཛོམས་གནང་ཡོད་འདུག།