སྲིད་སྐྱོང་མཆོག་གི་ལོ་གསར་འཚམས་འདྲི།

སྲིད་སྐྱོང་མཆོག་གི་ལོ་གསར་འཚམས་འདྲི། བོད་རྒྱལ་ལོ་ ༢༡༤༩ རབ་གནས་ཆུ་སྟག་ལོའི་གནམ་ལོ་གསར་དུ་བཞད་པར་བོད་ཕྱི་ནང་དུ་བཞུགས་པའི་བོད་མི་དང་། ལྷག་པར་ཨེ་ཤེ་ཡ་རང་དབང་རླུང་འཕྲིན་གསན་གཟིགས་གནང་མཁན་ཚང་མར་བཀའ་ཤག་སྐབས་བཅུ་དྲུག་པའི་ངོས་ནས་འཚམས་འདྲིའི་བཀྲ་ཤིས་བདེ་ལེགས་ཞེས་ཞུ་རྒྱུ་ཡིན། དེ་དང་མཉམ་དུ་རྣམ་པ་ཚོར་ཞུ་རྒྱུའི་གནད་དོན་གལ་ཆེ་བ་གཅིག་ནི། བར་སྐབས་སྤྱི་ཚོགས་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་གཟུགས་འཕྲོད་བཞེས་སྐོར་དང་འབྲེལ་བའི་ཐོག་འགའ་ཞིག་གིས་གླེང་སློང་ཆེད་མངགས་བཟོས་ནས་གནས་ཚུལ་དེ་ལྟར་ཡོང་གི་ཡོད། དེ་རིང་ཞུ་རྒྱུ་དེ་གང་ཡིན་ཞེ་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཁམས་བདེ་ཐག་ཆོད་དང་། སྐུ་གཟུགས་འཕྲོད་བཞེས་ཡག་ཐག་ཆོད་ཐོག་ཕོ་བྲང་དུ་སྐུ་ལྷོད་ངང་བཞུགས་འཇགས་གནང་བཞིན་ཡོད་ཅེས་སྙན་གསེང་ཞུ་རྒྱུ་དང་། དེ་དང་མཉམ་དུ་བཀའ་ཤག་སྐབས་བཅུ་དྲུག་པའི་ལས་འགན་དེ་བཞིན་ཕྱི་ལོ་ ༢༠༢༡ ཟླ་བ་ ༥ ཚེས་ ༢༧ ནས་ཁྱེར་ནས་ད་བར་ཟླ་བ་དགུ་ཙམ་འགྲོ་བཞིན་ཡོད། ཟླ་ངོ་དགུའི་དུས་ཡུན་དེ་དག་ནང་བཀའ་ཤག་གིས་ལས་དོན་གང་ཞིག་བྱས་པ་དེ་དག་འཐུས་ཤོར་མེད་པ་དང་། ཚགས་ཚུད་པོ། འཕྲལ་ཕུགས་གཉིས་ཀར་བསམ་བློ་བཏང་ནས་ལས་དོན་བྱེད་བཞིན་ཡོད། དེར་བརྟེན་མི་དམངས་ཚང་མ་ཐུགས་གཡེང་རྩ་བ་ནས་གནང་མི་དགོས། ང་ཚོས་དཀའ་ལས་རྒྱག་རྒྱུར་ཁྱེད་རྣམས་ནས་སེམས་འཁྲལ་གཏན་ནས་གནང་མི་དགོས། འོན་ཀྱང་ལས་དོན་བྱེད་ཕྱོགས་ཀྱི་ཐོག་ཏུ་ལེགས་བཅོས་བྱེད་དགོས་པའི་དགོངས་ཚུལ་གྱི་རིགས་ཡོད་ན་ག་དུས་གསུངས་ཀྱང་འགྲིགས་ཞེས་སྔར་ནས་ཞུས་པ་དང་ད་ལྟ་ཞུས་པ་གཉིས་ལ་ཁྱད་པར་གང་ཡང་མེད། དགོངས་ཚུལ་གྱི་རིགས་ཡོད་ན་བཀའ་གནང་རོགས་ཞེས་ཞུ་རྒྱུ་དང་། ཡང་དངོས་ཡོད་ཀྱི་ཐོག་ནས་ལས་དོན་མ་འགྲིག་པའི་རིགས་ཡོད་ན་མི་མང་ལ་གསུང་རྒྱུའི་ལས་འགན་ཡོད་པས། དེ་རིགས་གསུང་རོགས་གནང་ཞུ་རྒྱུ་དང་། དོན་མེད་ཀྱི་གཞི་རྩ་གཏན་ནས་མེད་པར་སྤྱི་ཚོགས་ནང་དཀྲོག་གཏམ་སྤེལ་བའི་རིགས་གཏན་ནས་མ་གནང་རོགས་ཞེས་ཞུ་རྒྱུ་དང་། དེ་ནི་སྒེར་ལ་ཕན་ཐོགས་མེད་ལ། སྤྱི་པ་ལའང་ཕན་ཐོགས་མེད། སྤྱི་ཚོགས་ཐོག་དཀྲོག་གཏམ་སྤེལ་རྒྱུའི་དོན་དུ་དུས་ཚོད་མང་པོ་གཏོང་བ་དང། པར་རིས་མང་པོ་བཟོས་པ་སོགས་བྱེད་པའི་ནུས་པ་དེ་དག་ཁ་གཏད་རྒྱ་ནག་ལ་ནུས་པ་བསྒྲིལ་ནས་བྱས་ན་དེ་ལ་དཔགས་པའི་ནུས་པ་ཞིག་ཐོན་ངེས་ཡིན། སྐབས་རེ་ང་ཚོའི་སྤྱི་ཚོགས་ཀྱི་གནང་སྟངས་དེ་དག་ང་ཚོ་ནང་ཁུལ་སྡང་ཟུག་ཆེན་པོ་ཡོད་པ་ལྟ་བུ་ཤུགས་ཆེན་པོ་མིན་ནའང་། བར་ལམ་འོས་བསྡུ་ཚར་བ་ནས་བཟུང་སྤྱི་ཚོགས་ནང་གང་འཚམ་ཉུང་དུ་ཕྱིན་ཡོད་པའི་གནས་སྟངས་གོ་གི་འདུག་པ་ཧ་ཅང་ཡག་པོ་རེད། དེ་དག་ཐོག་ཐུགས་སྣང་གནང་རོགས་གནང་ཞེས་ཞུ་རྒྱུ་ཡིན། གལ་གནད་ཆེ་བ་ནི། མ་འོངས་པར་ང་ཚོའི་ལས་དོན་བྱེད་ཕྱོགས་དེ་རེད། བོད་རྒྱའི་དཀའ་རྙོག་སེལ་རྒྱུ་གཙོ་བོར་གྱུར་པའི་བཙན་བྱོལ་བོད་མིའི་བདེ་དོན་ལྟ་རྟོག་བྱ་རྒྱུའི་ལས་གཞི་སོགས་ཀྱི་ཐོག་ཏུ་འཛིན་སྐྱོང་བཀའ་ཤག་གི་ངོས་ནས་བྱེད་དགོས་པ་རྣམས་བྱེད་ངེས་ཡིན། ལས་དོན་དེ་དག་སྒྲུབ་པར་བྱེད་པ་ལ་འགན་འཁུར་བྱེད་པོ་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། ཪང་དབང་ཅན་གྱི་སྡེ་ཚན་གྱི་འགན་འཛིན་རྣམ་པ་བཅས་ཕན་ཚུན་འབྲེལ་བ་ཡག་པོ་ཡོང་བར་བཀའ་ཤག་གི་ངོས་ནས་འབད་བརྩོན་ཆ་ཚང་བྱེད་བཞིན་ཡོད། དེ་བཞིན་སྒྲིག་འཛུགས་གཞན་ནས་ཀྱང་གནང་བཞིན་ཡོད། རིམ་བཞིན་ཚང་མས་ཁ་ཕྱོགས་གཅིག་གི་ཐོག་ཏུ་འགྲོ་ཐུབ་པའི་རེ་བ་ཞུ་བཞིན་ཡོད། དེ་ནི་མཛད་གཙོ་གཅིག་པུ་མིན་པར་མི་མང་གི་ནང་དུའང་དེ་བཞིན་འཆམ་མཐུན་བྱེད་དགོས་པ་དང་། བོད་སྤྱི་པའི་རྩ་དོན་རང་ལ་བསམ་བློ་བཏང་ནས་ལས་ཀ་བྱེད་དགོས་པ་དེ་ཧ་ཅང་གལ་འགངས་ཆེན་པོ་རེད། སླར་ཡང་བོད་ཕྱི་ནང་གཉིས་ཀྱི་བོད་མི་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། ལྷག་པར་བོད་ནང་ཡོད་པའི་བོད་མི་རྣམས་ནས་ད་བར་བོད་པའི་འཐབ་རྩོད་མུ་མཐུད་གནས་རྒྱུར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་འོག་དཔུང་འདེགས་ཞུས་ཏེ་རང་ཉིད་ཀྱི་ལུས་སྲོག་ལོངས་སྤྱོད་ཡན་ཆད་བློས་བཏང་སྟེ་དཀའ་ལས་བརྒྱབ་པ་དེ་དག་ལ་ཡང་ཡང་བསྔགས་བརྗོད་དང་། བཙན་བྱོལ་ནང་ཡོད་པ་ཁག་གཅིག་གིས་ཧུར་ཐག་འབད་ཐག་གནང་བཞིན་བཞུགས་ཡོད། རེ་ཟུང་གིས་མ་འགྲིག་དེ་དག་ལ་འགྲིག་པ་ཇི་ལྟར་བཟོ་དགོས་མིན་དང་། བོད་མིའི་སྒྲིག་འཛུགས་ཀྱི་འཛིན་སྐྱོང་གི་འགན་འཁུར་བ་རྣམ་པ་ཡིན་ནའང་ཁྲིམས་དང་སྒྲིག་གཞི་གཞིར་བཟུང་མང་གཙོའི་ལམ་སྲོལ་ནང་ཁྲིམས་དང་སྒྲིག་གཞི་ཡོད་པ་ནང་བཞིན་ལས་དོན་རྣམས་སྲ་ཐག་ཐག་ཅིག་བྱས་ན། ནོར་འཁྲུལ་རྩ་བ་ནས་ཡོང་གི་མ་རེད་ཅེས་ཞུ་མི་ཐུབ་ཀྱང་། ནོར་འཁྲུལ་ཉུང་བ་ཡོང་བའི་རེ་བ་ཡོད་པས། ཚང་མས་དེ་ལྟར་འབད་བརྩོན་གནང་རོགས་གནང་ཞེས་ཞུ་རྒྱུ་ཡིན། ཐུགས་རྗེ་ཆེ།