អ្នកឃ្លាំមើលជំរុញឱ្យរដ្ឋាភិបាលទប់ស្កាត់ឧក្រិដ្ឋកម្មជួញដូរមនុស្ស និងឆបោកទើបអាចស្ដារមុខមាត់ប្រទេសកម្ពុជា និងទាក់ទាញភ្ញៀវទេសចរបរទេសនៅលើពិភពលោកបាន។ ការលើកឡើងនេះ បន្ទាប់ពីលោកនាយករដ្ឋមន្ត្រី ហ៊ុន ម៉ាណែត បដិសេធការចុះផ្សាយរបស់បណ្ដាញព័ត៌មានអន្តរជាតិអំពីការរីករាលដាលនូវអំពើឧក្រិដ្ឋកម្មនៅកម្ពុជា ក្រោយពេលលោកអំពាវនាវដល់មន្ត្រីរបស់លោក និងអ្នកពាក់ព័ន្ធទាំងអស់ចូលរួមផ្សព្វផ្សាយរូបភាពវិជ្ជមានពីកម្ពុជាជំរុញឱ្យភ្ញៀវទេសចរមកលេងកម្ពុជា និងអភិវឌ្ឍវិស័យទេសចរណ៍ជាតិ។
អ្នកឃ្លាំមើលលើកឡើងថា បើសិនដ្ឋាភិបាលមិនដោះស្រាយរឿងឧក្រិដ្ឋកម្មជួញដូរមនុស្ស ការឆបោកតាមអនឡាយ និងបញ្ហារំលោភសិទ្ធិមនុស្សនៅក្នុងប្រទេសឱ្យមានប្រសិទ្ធភាព និងជឿទុកចិត្តបានទេនោះ កម្ពុជានឹងនៅតែមានឈ្មោះអាប់ឱនលើឆាកអន្តរជាតិ ហើយភ្ញៀវទេសចរ និងអ្នកវិនិយោគបរទេសនៅតែខ្លាចរអាដដែល ទោះបីជាលោក ហ៊ុន ម៉ាណែត ណែនាំឱ្យមន្ត្រីក្រោមឱវាទ ភាគីពាក់ព័ន្ធជួយផ្សព្វផ្សាយចំណុចវិជ្ជមានក្នុងការលើកកម្ពស់វិស័យទេសចរណ៍ យ៉ាងណាក៏ដោយ។
ប្រធានអង្គការលទ្ធិប្រជាធិបតេយ្យខ្មែរនៅប្រទេសអូស្ត្រាលី លោក ស៊ឹង សែនករុណា មើលឃើញថា បញ្ហាចាប់ជំរិត និងបង្ខាំងមនុស្សធ្វើទារុណកម្មជាដើមបានធ្វើឱ្យប៉ះពាល់ធ្ងន់ធ្ងរដល់វិស័យទេសចរណ៍ ខណៈរដ្ឋាភិបាលហាក់គ្មានឆន្ទៈដោះស្រាយរឿងឧក្រិដ្ឋកម្មទាំងនោះ។ លោកយល់ថាស្ថាប័នព័ត៌មាន និងសហគមន៍អន្តរជាតិដែលរាយការណ៍អំពីបញ្ហាជួញដូរមនុស្ស និងបទឧក្រិដ្ឋនៅកម្ពុជាកន្លងមក ដើម្បីជំរុញឱ្យអាជ្ញាធរចាត់វិធានការដោះស្រាយ ដោយពុំមានចេតនាបំផ្លាញមុខមាត់កម្ពុជាទេ។ លោក ស៊ឹង សែនករុណា ថា រដ្ឋាភិបាលត្រូវហ៊ានទទួលស្គាល់ការពិតចំពោះរឿងឧក្រិដ្ឋកម្ម ដែលកើតឡើងនៅកម្ពុជាបច្ចុប្បន្ន ហើយដាក់វិធានការក្នុងការបង្ក្រាបទីតាំងនៃអាជីវកម្មឧក្រិដ្ឋកម្មនៅក្នុងប្រទេសឱ្យមានប្រសិទ្ធភាព ដើម្បីកុំឱ្យប៉ះពាល់ធ្ងន់ធ្ងរដល់វិស័យសេដ្ឋកិច្ច និងទេសចរណ៍កម្ពុជា។
លោក ស៊ឹង សែនករុណា៖«អ្នកទេសចរសម័យនេះគេអាចរកព័ត៌មានពីកម្ពុជាបាន ដោយមិនបាច់ទៅផ្សព្វផ្សាយអ្វីទេ សំខាន់រដ្ឋាភិបាលធ្វើតែឱ្យល្អទៅ ចំពោះកិច្ចការងាររបស់ខ្លួនដឹកនាំឱ្យត្រឹមត្រូវ ចាត់វិធានការឱ្យគេមើលឃើញ ឱ្យគេជឿជាក់ទៅ អាហ្នឹងទើបភ្ញៀវទេសចរអាចកើនឡើងបាន»។
ប្រតិកម្មនេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន ម៉ាណែត ថ្លែងនៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងទេសចរណ៍ នៅរសៀលថ្ងៃទី២៧ ខែកុម្ភៈ លោកបានណែនាំឱ្យមន្ត្រីពាក់ព័ន្ធ និងមន្ត្រីស្ថានទូតកម្ពុជានៅបរទេសនាំគ្នាការពារកេរ្តិ៍ឈ្មោះកម្ពុជានៅលើឆាកអន្តរជាតិឱ្យបាន ដើម្បីទាក់ទាញភ្ញៀវទេសចរបរទេស។ លោក ហ៊ុន ម៉ាណែត ដែលឡើងកាន់តំណែងនាយករដ្ឋមន្ត្រីតពីឪពុករបស់លោក គឺលោក ហ៊ុន សែន អស់រយៈពេលជាង ១ឆ្នាំមកនេះ អះអាងសាជាថ្មីថា កម្ពុជាមិនមែនជាគោលដៅចាប់ជំរិត ឧក្រិដ្ឋកម្មអនឡាញ ជួញដូរមនុស្ស ដូចការផ្សព្វផ្សាយព័ត៌មានមួយចំនួនទេ។ លោកថា រាជរដ្ឋាភិបាលរបស់មានការប្រុងប្រយ័ត្នខ្ពស់ និងចាត់វិធានការទប់ស្កាត់ជាបន្តបន្ទាប់ ដោយមិនឱ្យកម្ពុជាក្លាយជាកន្លែងសម្រាប់ជនល្មើសធ្វើសកម្មភាពទាំងនោះឡើយ។
លោក ហ៊ុន ម៉ាណែត៖«ថាយើងអត់បានបញ្ហា តែយើងមានបញ្ហា យើងចាត់វិធានការជាបន្តបន្ទាប់ ប៉ុន្តែបើយើងផ្ដោតតែរឿងអវិជ្ជមាន គឺវាខ្មៅហើយ ចំណុចវិជ្ជមានយើងច្រើនណាស់ត្រូវផ្សព្វផ្សាយឱ្យច្រើន ហើយខ្ញុំជឿថា ទោះបីមានការផ្សព្វផ្សាយបង្កើតឱ្យមានការយល់ច្រឡំក្ដីមួយចំនួនក៏ដោយ ម៉ោងនេះ ទេសចររបស់យើង ជាពិសេស ពីអឺរ៉ុប អូស្ត្រាលីអី ហើយអូស្ត្រាលីនៅចាត់ទុកកម្ពុជានៅឆ្នាំ២០២៤ ជាគោលដៅទេសចរណ៍ខ្ពស់ជាងគេលេខ១ ហ្នឹង ខ្ញុំគិតថា សាររបស់យើង ដែលបង្ហាញពីសុវត្ថិភាព សុខសន្តិភាព ស្ថិរភាពនៅកម្ពុជាបានទៅដល់ហើយ ហើយយើងត្រូវបន្តធ្វើទៀត»។
ជាមួយគ្នានេះ លោក ហ៊ុន ម៉ាណែត ក៏អំពាវនាវឱ្យអ្នកផលិតមាតិកានៅលើបណ្ដាញសង្គម យុវជន អ្នកសារព័ត៌មាន និងប្រជាពលរដ្ឋទូទៅជួយផ្សព្វផ្សាយព័ត៌មានល្អៗ ពីកម្ពុជាសម្រាប់គោលដៅទេសចរបរទេសដែរ។
ថ្វីបើលោក ហ៊ុន ម៉ាណែត លើកឡើងបែបនេះក្ដី អ្នកឃ្លាំមើលសង្គមថា បទល្មើសជួញដូរមនុស្ស និងឆបោកតាមអនឡាញនៅកម្ពុជា នៅតែបន្តកើតមានឡើង និងហាក់កាន់តែមានស្ថានភាពធ្ងន់ធ្ងរ ដោយសារតែក្រុមជនល្មើសកាន់តែពង្រីកបណ្ដាញ និងប្រើមធ្យោបាយកាន់តែទំនើប ដើម្បីប្រតិបត្តិការក្នុងឧស្សាហកម្មឆបោកតាមអនឡាញ និងអំពើជួញដូរមនុស្សនៅកម្ពុជា។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ព្រួយបារម្ភចំពោះអំពើជួញដូរមនុស្ស និងការឆបោកតាមអនឡាញ ដែលកំពុងគំរាមកំហែងធ្ងន់ធ្ងរដល់សន្តិសុខ និងវិស័យទេសចរណ៍នៅកម្ពុជា។ លោកថា ការឆ្លើយតបរបស់លោក ហ៊ុន ម៉ាណែត ចំពោះការទាក់ទាញភ្ញៀវទេសចរបរទេស គឺជាវិធានការខ្វះការទទួលខុសត្រូវ កាន់តែធ្វើឱ្យកម្ពុជាខាតបង់ ពីព្រោះសារព័ត៌មានអន្តរជាតិដែលចុះផ្សាយពីការឆបោកតាមអនឡាញ និងការជួញដូរមនុស្សនៅកម្ពុជារីកដូចផ្សិតជារឿងពិត ស្របពេលឧកញ៉ា និងគ្រួសារអ្នកកាន់អំណាចមួយចំនួន ដែលជាប់ពាក់ព័ន្ធឧក្រិដ្ឋទាំងនោះបន្តនៅក្រៅសំណាញ់ច្បាប់។
លោក ម៉ែន ណាត៖«អំពើឆបោកតាមអនឡាយ ចាប់ជំរិត គឺកម្ពុជាល្បីល្បាញខ្លាំងណាស់នៅលើឆាកអន្តរជាតិ អ្នកទេសចរអន្តរជាតិគេទៅលេងស្រុកណា ដែលមានសុខសុវត្ថិភាពដល់គេ ហើយកាលណាប្រទេសអត់បានសុវត្ថិភាពម៉េចគេទៅលេង អ៊ីចឹងរដ្ឋាភិបាលចង់ស្ដារមុខមាត់ដើម្បីទាក់ទាញភ្ញៀវទេសចរមកលេងកម្ពុជានោះវាពិបាកហើយ គឺច្រកចង្អៀតណាស់សម្រាប់អ្នកទេសចរទៅលេងកម្ពុជា»។
ថ្មីៗនេះ ក្រសួងមហាផ្ទៃតៃវ៉ាន់ (Taiwan) បានដាក់ប្រទេសចំនួន៥ នៅអាស៊ីអាគ្នេយ៍ ក្នុងបញ្ជីប្រទេសគោលដៅ ដែលងាយនឹងមានគ្រោះថ្នាក់សម្រាប់អ្នកដំណើរ ក្នុងនោះ ក៏មានកម្ពុជាដែរ។ ក្រសួងមហាផ្ទៃតៃវ៉ាន់ដដែលបញ្ជាក់ថា នៅប៉ុន្មានឆ្នាំចុងក្រោយនេះ មានហេតុការណ៍អាក្រក់ពាក់ព័ន្ធនឹងជនជាតិតៃវ៉ាន់ជាច្រើន ដែលត្រូវគេអូសទាញឱ្យចូលទៅក្នុងការងារឆបោកតាមអនឡាញនៅកម្ពុជា ឬនៅប្រទេសមីយ៉ាន់ម៉ា។
មិនមែនមានតែតៃវ៉ាន់នោះទេ ដែលណែនាំឱ្យពលរដ្ឋប្រុងប្រយ័ត្នមុនចូលមកធ្វើការនៅកម្ពុជានោះ រដ្ឋាភិបាលហ្វីលីពីន (Philippines) ឥណ្ឌា (India) ម៉ាឡេស៊ី (Malaysia) ថៃ (Thailand) ឥណ្ឌូនេស៊ី(Indonesia) និងប៉ាគីស្ថាន (Pakistan) ជាដើម តាមរយៈស្ថានទូតប្រចាំនៅទីក្រុងភ្នំពេញតែងតែប្រកាសដោយព្រមានពលរដ្ឋពួកគេឱ្យប្រុងប្រយ័ត្នខ្ពស់ និងសិក្សាឱ្យច្បាស់លាស់មុនចូលមកទឹកដីកម្ពុជាស្វែងរកការងារធ្វើ ព្រោះអាចក្លាយជាជនរងគ្រោះបម្រើការងារឱ្យក្រុមឧក្រិដ្ឋជនប្រតិបត្តិការ លើឧស្សាហកម្មឆបោកតាមអនឡាញ។
អ្នកឃ្លាំមើលលើកឡើងថាកម្ពុជាមានធនធានធម្មជាតិ និងប្រាង្គប្រាសាទដ៏សម្បូរបែប ប៉ុន្តែដើម្បីស្ដារវិស័យទេសចរណ៍កម្ពុជា គឺទាល់តែរដ្ឋាភិបាល ត្រកូល ហ៊ុន ហ៊ានដាក់ចេញកំណែទម្រង់ ស្ដារប្រជាធិបតេយ្យ និងរួមគ្នាកម្ចាត់ឧក្រិដ្ឋកម្មឱ្យធានាបានសន្តិសុខ និងយុត្តិធម៌សង្គមក្នុងគោលដៅស្ដារមុខមាត់កម្ពុជា នៅលើឆាកអន្តរជាតិឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។