ប្រជាពលរដ្ឋនៅស្រុកពេជ្រាដា ខេត្តមណ្ឌលគិរី ទាមទារឲ្យទាហានបើកបារ៉ាស់ផ្លូវ និងឲ្យអាជ្ញាធរលុបចោលគម្រោងធ្វើអាជីវកម្មរ៉ែមាសចេញពីក្នុងភូមិអន្ទ្រងសែនជ័យ ពីព្រោះគម្រោងនេះធ្វើឲ្យប៉ះពាល់ដល់ដីស្រែចម្ការ បរិស្ថាន និងសុខភាពរបស់ប្រជាពលរដ្ឋ កំពុងរស់នៅតំបន់នោះ។ ការលើកឡើងនេះ ធ្វើឡើងបន្ទាប់ពីអាជ្ញាធរខេត្តមណ្ឌលគិរី បានចេញលិខិតអះអាងថា អាងស្តុកទឹកអាស៊ីដរបស់ក្រុមហ៊ុន ដែលពលរដ្ឋលើកឡើងមិនធ្វើឲ្យប៉ះពាល់ដល់បរិស្ថាន និងសុខភាពរបស់ពលរដ្ឋនោះឡើយ។
ក្រោយពលរដ្ឋផ្សព្វផ្សាយថា អាងស្តុកទឹកអាស៊ីដរបស់ក្រុមហ៊ុនចិន ធ្វើអាជីវកម្មរ៉ែមាសខុសច្បាប់ បង្កផលប៉ះពាល់ដល់សុខភាពពលរដ្ឋ និងបរិស្ថានរួចមក អាជ្ញាធរខេត្តមណ្ឌលគិរី បានចុះទៅត្រួតពិនិត្យ និងអះអាងថា អាងស្តុកទឹកអាស៊ីដទាំងនោះមិនបង្កផលប៉ះពាល់ដល់ពលរដ្ឋនោះទេ។ ប៉ុន្តែពលរដ្ឋរស់នៅតំបន់នោះថា អាជ្ញាធរខេត្តមិនបានយកកាកសំណល់ដែលមានជាតិអាស៊ីដទៅត្រួតពិនិត្យនោះទេ ដោយសារតែក្រុមហ៊ុនបានកាយដីលុបអាងស្តុកទឹកអាស៊ីដ ដើម្បីបំបាត់ភស្តុតាងរួចហើយ មុនអាជ្ញាធរចុះទៅដល់។
ពលរដ្ឋថា អាជ្ញាធរជួយបិទបាំងនូវទង្វើអាក្រក់របស់ក្រុមហ៊ុន
តំណាងប្រជាពលរដ្ឋ លោក ច្រាន សុខឡេង ប្រាប់វិទ្យុអាស៊ីសេរី នៅថ្ងៃទី២ ខែមីនាថា អាជ្ញាធរខេត្តមណ្ឌលគិរី កំពុងតែជួយបិទបាំងនូវទង្វើអាក្រក់របស់ក្រុមហ៊ុនធ្វើអាជីវកម្មរ៉ែមាសខុសច្បាប់។ លោកថា ពលរដ្ឋជាង៣០០គ្រួសារ មិនឯកភាពចំពោះការលើកឡើងរបស់អាជ្ញាធរខេត្តមណ្ឌលគិរីឡើយ និងស្នើឲ្យរដ្ឋាភិបាលជួយរកដំណោះស្រាយដល់ប្រជាពលរដ្ឋរស់នៅតំបន់នោះ។
លោក ច្រាន សុខឡេង៖«គឺសំណូមពរដល់រដ្ឋាភិបាលដល់សម្ដេចបវរធិបតី ឱ្យជួយរកដំណោះស្រាយ ពីព្រោះបញ្ហានេះថ្នាក់ខេត្តឬនរណាមួយគឺដោះស្រាយមិនបានទេ ក្រៅពីសម្ដេចផ្ទាល់ព្រោះសុទ្ធតែខ្នងធំៗអស់ហើយសុទ្ធតែទាហានពីអគ្គតវ៉ាដល់ថ្នាក់ខេត្តមិចហ៊ានជាមួយអគ្គ»។
ពលរដ្ឋម្នាក់ទៀត សុំមិនបញ្ចេញឈ្មោះ ដោយបារម្ភពីសុវត្ថិភាព ឲ្យដឹងថា នៅមុនពេលអាជ្ញាធរចុះមកយកកាកសំណល់ទៅត្រួតពិនិត្យ ក្រុមទាហាន និងក្រុមហ៊ុន បាននាំគ្នាកាយដីលុបអាងស្តុកទឹកអាស៊ីដទាំងនោះ ដើម្បីបំបាត់ភស្តុតាងរួចហើយ។ លោកស្រីចាត់ទុក ការបំភ្លឺរបស់អាជ្ញាធរខេត្តមណ្ឌលគិរី មិនឆ្លុះបញ្ចាំងពីការពិត។
ពលរដ្ឋលាក់ឈ្មោះ៖«មិនដឹងម៉េចដែរមិនឱ្យប្រជាពលរដ្ឋដឹងឲ្យច្បាស់ការណ៍លាក់ភស្តុតាងថា មិនប៉ះពាល់ ហើយប្រជាពលរដ្ឋម៉េចសុខចិត្តគ្រាន់តែវាហូរជ្រាបតាមដី ទៅលើស្មៅ គោស៊ីស្មៅក៏ងាប់គោដែរ គីមីនឹងគឺ គីមីត្រាំមាសហើយប្រសិនបើទឹកអូរភ្លៀងផុលដីហូរទៅចូលអូរប្រជាពលរដ្ឋដែរប្រើទឹកអូរ គឺងាប់ទាំងអស់ធ្វើឈប់វាយគីមីក្រោយសាលាត្រូវរុះក្រុមហ៊ុននឹងចេញអត់មានឆ្លើយតបប្រជាពលរដ្ឋទេ អត់មានឆ្លើយតបទាំងអស់ ហើយបីទីតាំង បួនទីតាំងក្រោយសាលានឹង ក្មេងៗសិស្សសាលាទៅរៀនគឺឈឺរហូត»។
ជុំវិញរឿងនេះ វិទ្យុអាស៊ីសេរី មិនអាចទាក់ទងអភិបាលខេត្តមណ្ឌលគិរី លោក ថង សាវុន និងប្រធានមន្ទីររ៉ែ និងថាមពល ខេត្តមណ្ឌលគិរី លោក ទី សុផល ដើម្បីសុំការអត្ថាធិប្បាយបានទេនៅថ្ងៃទី២ ខែមីនា ដោយទូរស័ព្ទចូលតែគ្មានអ្នកទទួល។ ចំណែកអ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា ក៏វិទ្យុអាស៊ីសេរី មិនអាចទាក់ទងបានដែរនៅថ្ងៃដដែលនេះ។
ទោះជាយ៉ាងណា កាលពីថ្ងៃទី០១ ខែមីនា អាជ្ញាធរខេត្តមណ្ឌលគិរី បានចេញសេចក្ដីបំភ្លឺព័ត៌មានមួយ ដោយទទួលស្គាល់ថា ពិតជាមានរណ្ដៅផ្ទុកជាតិពុលពីការធ្វើអាជីវកម្មរ៉ែមាសប្រាកដមែន ប៉ុន្តែមិនបានបង្កផលប៉ះពាល់ដល់ប្រជាពលរដ្ឋនៅតំបន់នេះនោះទេ។ អាជ្ញាធរបញ្ជាក់ថា ទីតាំងរណ្ដៅផ្ទុកជាតិគីមីទាំងនោះគឺជាទីតាំងដែលក្រសួងរ៉ែ និងថាមពល បានអនុញ្ញាតឲ្យក្រុមហ៊ុន អន្ទ្រង មេធល រុករករ៉ែមាស ហើយបច្ចុប្បន្នក្រុមហ៊ុនបានបញ្ចប់សកម្មភាពក្នុងការរុករករ៉ែមាសនៅតំបន់នោះរួចហើយ ប៉ុន្តែអាជ្ញាធរខេត្តមណ្ឌលគិរី មិនបានបញ្ជាក់ថា ក្រុមហ៊ុនមួយនេះ ទទួលបានសិទ្ធិធ្វើអាជីវកម្មរ៉ែមាសនៅតំបន់នេះឡើយ។ ចំណែកផ្លូវដែលទាហានដាក់បារ៉ាស់បិទនោះ គឺជាការការពារមិនឲ្យជនឆ្លៀតឱកាសចូលធ្វើអាជីវកម្មរ៉ែបែបអនាធិបតេយ្យដោយខុសច្បាប់នៅទីនោះ។
វិទ្យុអាស៊ីសេរីមិនអាចទាក់ទងតំណាងក្រុមហ៊ុន អន្ទ្រង មេធល (Antrong Metals) បានទេ នៅថ្ងៃទី២ ខែមីនា។
មន្ត្រីសិទ្ធិមនុស្សថា រដ្ឋាភិបាលត្រូវតែត្រួតពិនិត្យឡើងវិញ ចំពោះក្រុមហ៊ុនរុករករ៉ែខុសច្បាប់
ទាក់ទិននឹងបញ្ហានេះ មន្ត្រីសម្របសម្រួលសមាគមអាដហុក (Adhoc) ប្រចាំខេត្តមណ្ឌលគិរី លោក ប៊ី វ៉ាន់នី យល់ឃើញថា រដ្ឋាភិបាលត្រូវតែត្រួតពិនិត្យឡើងវិញ ចំពោះក្រុមហ៊ុនរុករករ៉ែនៅតំបន់នោះ ហើយប្រសិនបើអាជ្ញាធររកឃើញថា ក្រុមហ៊ុននេះ មិនបានគោរពតាមកិច្ចព្រមព្រៀងរវាងក្រុមហ៊ុន និងរដ្ឋាភិបាលនោះទេ រដ្ឋាភិបាលត្រូវតែអនុវត្តតាមច្បាប់ ហើយត្រូវស្វែងរកឲ្យឃើញអ្នកជាប់ពាក់ព័ន្ធ ដែលអនុញ្ញាតឲ្យមានអាជីវកម្មរ៉ែមាសនេះកើតឡើង នឹងត្រូវទទួលទោសតាមច្បាប់។
លោក ប៊ី វ៉ាន់នី៖«ប្រសិនបានជាយើងរកឃើញហើយយើងមិនឲ្យគាត់ទទួលខុសត្រូវចំពោះច្បាប់ទេ អ៊ីចឹងការអនុវត្តច្បាប់ និងគោលនយោបាយរដ្ឋាភិបាលវាអត់មានប្រសិទ្ធភាពទេ អ៊ីចឹងដើម្បីឲ្យមានប្រសិទ្ធភាពក្នុងការអនុវត្តគោលនយោបាយក៏ដូចជាច្បាប់របស់ប្រទេសឲ្យក្លាយជាប្រទេសនីតិរដ្ឋ ត្រូវឲ្យច្បាប់ជាធំ ត្រូវយកគោលនយោបាយ និងច្បាប់រដ្ឋាភិបាលដើរជាមួយគ្នា ហើយអនុវត្តគ្រប់ជនណាទាំងអស់ មិនថាមន្ត្រីមិនថាអ្នកមាន»។
ពលរដ្ឋអះអាងថា ទាហាន និងក្រុមហ៊ុន បានគប់គិតគ្នាធ្វើអាជីវកម្មរ៉ែមាសខុសច្បាប់ បង្កឲ្យមានផលប៉ះពាល់ដល់ដីស្រែចម្ការរបស់ប្រជាពលរដ្ឋ និង បរិស្ថាននៅជុំវិញតំបន់នោះ ដោយមិនបានសិក្សាវាយតម្លៃអំពីផលប៉ះពាល់បរិស្ថាន និងសង្គម និងមិនបានពិគ្រោះយោបល់ជាមួយពលរដ្ឋនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។