រដ្ឋាភិបាលហ្វីលីពីនអះអាងថា កំពុងប្រើគ្រប់ មធ្យោបាយ ដើម្បីនាំយកស្ត្រីហ្វីលីពីន ចំនួន ១៣នាក់ ដែលបម្រើសេវាពពោះ ជំនួស នៅកម្ពុជាឱ្យត្រឡប់ទៅហ្វីលីពីនវិញ។ មន្រ្តីសង្គមស៊ីវិល ថា ការប្ដេជ្ញារបស់រដ្ឋាភិបាល ហ្វីលីពីននេះជាការបង្ហាញពីការយកចិត្តទុកដាក់ ចំពោះពលរដ្ឋខ្លួន នៅកម្ពុជា។
ក្រសួងបរទេសហ្វីលីពីនកាលពីថ្ងៃទី២៧ ខែធ្នូ ឱ្យដឹងថា រដ្ឋាភិបាលហ្វីលីពីន កំពុងប្រឹងប្រែងរកគ្រប់មធ្យោបាយ ដើម្បីអាចយកស្ត្រីហ្វីលីពីនចំនួន ១៣នាក់ ឱ្យវិលត្រឡប់ទៅប្រទេសហ្វីលីពីនវិញ ហើយស្ថានទូតហ្វីលីពីននៅភ្នំពេញ បន្ត សម្របសម្រួលជាមួយអាជ្ញាធរកម្ពុជាលើបញ្ហានេះ។
ក្រសួងការបរទេសហ្វីលីពីនបញ្ជាក់ថា «រដ្ឋាភិបាលហ្វីលីពីន ធ្វើគ្រប់យ៉ាងឱ្យអស់ពីលទ្ធភាព ជាការឆ្លើយតបនឹងរបាយការណ៍ អំពីការវិលត្រឡប់របស់ស្ត្រីពពោះជំនួសទាំង ១៣នាក់ ពីកម្ពុជាទៅកាន់ហ្វីលីពីន»។ ក្រសួងការបរទេសហ្វីលីពីនកត់សម្គាល់ថា រដ្ឋាភិបាលហ្វីលីពីន កំពុងអនុវត្តគ្រប់វិធីសាស្ត្រ ហើយភ្នាក់ងារផ្សេងៗ ក៏ចូលរួមនៅក្នុងកិច្ចខិតខំប្រឹងប្រែងនេះដែរ។
កិច្ចខិតខំប្រឹងប្រែងរបស់រដ្ឋាភិបាលហ្វីលីពីននេះ កើតឡើងក្រោយពីស្ត្រីហ្វីលីពីន ទាំង ១៣នាក់ កាលពីថ្ងៃទី០២ ខែធ្នូ ត្រូវបានតុលាការខេត្តកណ្ដាល កាត់ទោសឱ្យ ជាប់ពន្ធនាគាររយៈពេល ៤ឆ្នាំ ពីបទ «ប៉ុនប៉ងក្នុងអំពើលក់-ដូរមនុស្សសម្រាប់ នាំឆ្លងដែន» តែអនុវត្តទោសក្នុងពន្ធនាគារ ២ ឆ្នាំហើយទោសដែលនៅសល់ត្រូវព្យួរ។ សំណុំរឿងស្ត្រីហ្វីលីពីនទាំងនេះ គឺជាករណីទី១ ដែលតុលាការនៅកម្ពុជាបានកាត់ទោសស្ត្រីបរទេស ដោយសារ ពួកគេបម្រើសេវាកម្មពពោះជំនួស នៅប្រទេសកម្ពុជា។
ជុំវិញការប្ដេជ្ញារបស់រដ្ឋាភិបាលហ្វីលីពីននេះវិទ្យុអាស៊ីសេរីមិនអាចទាក់ទង អនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងនឹងអំពើជួញដូរមនុស្ស អ្នកស្រី ជូ ប៊ុនអេង បាននៅឡើយទេនៅថ្ងៃទី២៨ ខែធ្នូ ដោយទូរស័ព្ទចូលតែគ្មានអ្នកទទួល។
ទោះជាយ៉ាងណា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក ឃៀង សុណាឌីន ប្រាប់វិទ្យុអាស៊ីសេរីកាលពីថ្ងៃទី១៥ ខែធ្នូ ថា ទោះបីសាលាដំបូងខេត្តកណ្ដាលកាត់ទោសស្ត្រីជនជាតិហ្វីលីពីនទាំង ១៣នាក់ហើយក្ដី ប៉ុន្តែលោកថា សាលក្រមកាត់ទោសពួកគាត់ មិនទាន់ចូលជាស្ថាពរ ហើយក៏មិនទាន់មានដីកា បង្គាប់ឱ្យខាងពន្ធនាគារ ទទួលយកស្ត្រីទាំងនោះ មកឃុំនិងគ្រប់គ្រងនៅឡើយទេ។ បច្ចុប្បន្ន ពួកគេកំពុងស្នាក់នៅមន្ទីរពេទ្យ ១៦ ឧសភា ក្នុងរាជធានីភ្នំពេញ ដែលជាមន្ទីរពេទ្យរបស់នគរបាល។
ឯកអគ្គរដ្ឋទូតហ្វីលីពីនប្រចាំនៅកម្ពុជាអ្នកស្រី ហ្លែរីដា អ៊ែន កាមីល ម៉ាយ៉ូ (Flerida Ann Camille Mayo) មានប្រសាសន៍ថា ស្ត្រីទាំងនោះ ត្រូវបានជ្រើសរើសតាមអ៊ីនធឺណិត ដោយទីភ្នាក់ងារផ្ដល់សេវាពពោះជំនួស ដែលមានមូលដ្ឋាននៅប្រទេសហ្វីលីពីន។ អ្នកស្រីឯកអគ្គរដ្ឋទូតថា តាមរបាយការណ៍ភ្នាក់ងារជ្រើសរើស បានសន្យាផ្ដល់ប្រាក់ចំនួន ១ម៉ឺនដុល្លារ សម្រាប់សេវាកម្មពពោះរបស់ពួកគេ។
ក្រសួងយុត្តិធម៌ហ្វីលីពីន ក៏ធ្លាប់បានកំណត់អត្តសញ្ញាណទីភ្នាក់ងារមួយ នៅក្នុង ប្រទេសហ្វីលីពីន ដែលបានជ្រើសរើសស្ត្រីឱ្យធ្វើការជាអ្នកពពោះជំនួស។ យ៉ាងណា ក្រុមមន្ត្រីហ្វីលីពីន មិនបានបញ្ចេញឈ្មោះទីភ្នាក់ងារនេះនោះទេ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ (Licadho) លោក អំ សំអាត ប្រាប់វិទ្យុអាស៊ីសេរីនៅថ្ងៃទី២៨ ខែធ្នូថា ការប្ដេជ្ញារបស់រដ្ឋាភិបាលហ្វីលីពីន បង្ហាញពីការយកចិត្តទុកដាក់ ចំពោះពលរដ្ឋរបស់ខ្លួន។ លោកថា ការប្ដេជ្ញាចិត្ត របស់ហ្វីលីពីន ជារឿងមួយ ប៉ុន្តែកត្តាសំខាន់ត្រូវផ្អែកលើកិច្ចសហប្រតិបត្តិការ រវាងប្រទេសទាំងពីរ
លោក អំ សំអាត៖ «ជាធម្មតាប្រទេសនីមួយៗ ទី១ គឺកិច្ចសហប្រតិបត្តិការ ទី២ គឺអនុស្សរណៈរួមដូចជា កម្ពុជា-ថៃ កម្ពុជា-វៀតណាមអីកន្លងមក ហើយកម្ពុជានិងប្រទេសផ្សេងៗ ក៏ធ្លាប់មានកិច្ចសហប្រតិបត្តិការផ្ទេរ ជនជាប់ឃុំអីមកជាប់ឃុំនៅប្រទេសកម្ពុជាវិញ ឬពីប្រទេសកម្ពុជាទៅប្រទេសគេវិញអ៊ីចឹងដែរ។ វាអាស្រ័យអនុស្សរណៈរួម និងកិច្ចសហប្រតិបត្តិការល្អ រវាងប្រទេសហ្វីលីពីនជាមួយនឹងប្រទេសកម្ពុជា»។
ស្ត្រីហ្វីលីពីនទាំង ១៣នាក់ ត្រូវបាននគរបាលកម្ពុជាជួយសង្គ្រោះពីក្នុងផ្ទះ វីឡាមួយកន្លែង នៃបុរីវិមានភ្នំពេញ នៅស្រុកមុខកំពូល ខេត្តកណ្ដាល កាលពីថ្ងៃទី២៣ ខែកញ្ញា។ រដ្ឋាភិបាលហ្វីលីពីនចាត់ទុកពួកគេ គឺជាជនរងគ្រោះ ហើយតែងតែស្នើឱ្យភាគីកម្ពុជា ដោះលែងពួកគេឱ្យមានសេរីភាព។ ភាគីហ្វីលីពីន ក៏ចាត់ទុកទារកដែលកើតពីស្ត្រីពពោះជំនួសទាំងនោះ ជាពលរដ្ឋហ្វីលីពីនដែរ។
កម្ពុជា គឺជាមជ្ឈមណ្ឌលសម្រាប់ជំនួញពាណិជ្ជកម្មពពោះជំនួសរយៈពេលខ្លី បន្ទាប់ ពីប្រទេសថៃ ហាមឃាត់អាជីវកម្មបែបនេះ កាលពីឆ្នាំ២០១៥។ មួយឆ្នាំបន្ទាប់មក រដ្ឋាភិបាលកម្ពុជា ក៏ហាមឃាត់ជំនួញរបៀបនេះដែរ ហើយមានវិធានការចាប់ខ្លួន ស្ត្រីពពោះជំនួសនិងអ្នកជំនាញវេជ្ជសាស្ត្រពាក់ព័ន្ធនឹងរឿងនេះផង។
ក្នុងខែកក្កដា ឆ្នាំ២០១៨ ស្ត្រីខ្មែរចំនួន ៣៣នាក់ ត្រូវបានចាប់ខ្លួនពីបទពពោះ ជំនួសម្ដាយជនជាតិចិន ប៉ុន្តែពួកគេត្រូវបានដោះលែង បន្ទាប់ពីពួកគេយល់ព្រម ចិញ្ចឹមកូន។ នៅក្នុងខែវិច្ឆិកា ឆ្នាំ២០១៨ដដែល ស្ត្រីខ្មែរពពោះជំនួសចំនួន ១១នាក់ផ្សេងទៀត ក៏ត្រូវបានចាប់ខ្លួន ហើយក្រោយមកត្រូវបានដោះលែងវិញ ដោយហេតុផលយល់ព្រមចិញ្ចឹមកូនដូចគ្នា។
អ្នកឃ្លាំមើលលើកឡើងថា ស្ត្រីជនជាតិហ្វីលីពីនទាំង ១៣នាក់ គួរតែត្រូវដោះលែង ឱ្យមានសេរីភាព ដូចករណីមុនៗដែរ ដោយលើកហេតុផលថា ពួកគាត់សុទ្ធតែជាជនរងគ្រោះពីអំពើបោកប្រាស់ស្រដៀងៗគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។