ស្ត្រីជនជាតិហ្វីលីពីនចំនួន ១៣នាក់ ដែលតុលាការកម្ពុជាកាត់ឱ្យមានទោសក្នុងសំណុំរឿងផ្ដល់សេវាពពោះជំនួសបានត្រឡប់ទៅប្រទេសកំណើតវិញហើយ ក្រោយទទួលបានការលើកលែងទោសពីព្រះមហាក្សត្រ។
សេចក្តីថ្លែងការណ៍របស់ក្រសួងការបរទេសហ្វីលីពីនបញ្ជាក់នៅថ្ងៃទី២៩ ខែធ្នូថា ស្ត្រីទាំង ១៣នាក់បានចាកចេញពីទីក្រុងភ្នំពេញ និងមកដល់ទីក្រុងម៉ានីលដោយសុវត្ថិភាពហើយ។
ប្រភពដដែលឱ្យដឹងទៀតថា ព្រះករុណាព្រះបាទសម្តេចព្រះបរមនាថ នរោត្តម សីហមុនី បានព្រះរាជទានលើកលែងទោសដល់ពួកគេ កាលពីថ្ងៃទី២៦ ខែធ្នូ ។ កាលពីថ្ងៃទី២ ខែធ្នូ តុលាការខេត្តកណ្ដាលបានកាត់ទោសស្ត្រីហ្វីលីពីនមានផ្ទៃពោះចំនួន ១៣នាក់ឱ្យជាប់ពន្ធនាគាររយៈពេល ៤ឆ្នាំ ពីបទ «ប៉ុនប៉ងក្នុងអំពើលក់ដូរមនុស្សសម្រាប់នាំឆ្លងដែន» តែអនុវត្តទោសក្នុងពន្ធនាគារ ២ឆ្នាំ ហើយទោស ដែលនៅសល់ត្រូវព្យួរ។
បើទោះជាយ៉ាងណាពួកគេមិនត្រូវបានអាជ្ញាធរកម្ពុជាឃុំខ្លួននៅពន្ធនាគារទេ គឺពួកគេសម្រាកនៅមន្ទីរពេទ្យ ១៦ ឧសភា ចាប់តាំងពីពេលឃាត់ខ្លួន កាលពីខែកញ្ញា រហូតដល់ពេលត្រូវបញ្ជូនទៅប្រទេសកំណើតវិញនេះ។
សំណុំរឿងស្ត្រីហ្វីលីពីនទាំងនេះ គឺជាករណីទី១ ដែលតុលាការនៅកម្ពុជាបានកាត់ទោសស្ត្រីបរទេសដោយសារពួកគេបម្រើសេវាកម្មពពោះជំនួស ដែលខុសច្បាប់នៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។