នាយករដ្ឋមន្ត្រី លោក ហ៊ុន ម៉ាណែត វាយតម្លៃខ្ពស់ ចំពោះទំនាក់ទំនងដ៏ល្អរវាងកម្ពុជា-អាមេរិក ហើយលោកថា ប្រទេសទាំងពីរនឹងបន្តពង្រឹងនិងពង្រីកកិច្ចសហប្រតិបត្តិការវិស័យការពារជាតិឱ្យកាន់តែស៊ីជម្រៅ។ ប៉ុន្តែអ្នកវិភាគថា ដើម្បីឱ្យប្រទេសទាំងពីរមានទំនាក់ទំនងកាន់តែប្រសើរ លុះត្រាតែកម្ពុជាគោរពសិទ្ធិមនុស្ស និងស្ដារលទ្ធិប្រជាធិបតេយ្យឡើងវិញ។
លោកនាយករដ្ឋមន្ត្រី ហ៊ុន ម៉ាណែត លើកឡើងក្រោយមានជំនួបជាមួយមេបញ្ជាការនៃបញ្ជាការដ្ឋានឥណ្ឌូប៉ាស៊ីហ្វិក នៃសហរដ្ឋអាមេរិក នាយឧត្ដមនាវី ស៊ែមញូល ផាផារ៉ូ (Samuel J. Paparo) កាលពីរសៀលថ្ងៃទី១៨ ខែធ្នូ ថា កម្ពុជា-អាមេរិក នឹងបន្តពង្រឹងនិងពង្រីកកិច្ចសហប្រតិបត្តិការលើវិស័យការពារជាតិឱ្យកាន់តែស៊ីជម្រៅ។
លោក ហ៊ុន ម៉ាណែត សរសេរនៅលើទំព័រហ្វេសប៊ុកថា ក្នុងជំនួបនោះ លោក ស៊ែមញូល ផាផារ៉ូ បានប្រាប់លោកថា ដំណើរទស្សនកិច្ចរបស់រូបលោក និងគណៈប្រតិភូនាពេលនេះ គឺជាការបន្តកិច្ចប្រឹងប្រែងពង្រឹង និងពង្រីកទំនាក់ទំនងកម្ពុជា-អាមេរិក ជាពិសេស កិច្ចសហប្រតិបត្តិការក្នុងវិស័យការពារជាតិបន្ទាប់ពីដំណើរទស្សនកិច្ចរបស់រដ្ឋមន្ត្រីក្រសួងការពារជាតិសហរដ្ឋអាមេរិក លោក ឡូយដ៍ ជេម អូស្ទីន (Lloyd James Austin III) មកកាន់ប្រទេសកម្ពុជាក្នុងពេលកន្លងទៅ។
លោក ហ៊ុន ម៉ាណែត បានឆ្លើយតបនឹងលោក ស៊ែមញូល ផាផារ៉ូ ថា លោកពេញចិត្តនិងវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងកម្ពុជា-អាមេរិក ព្រមទាំងបានស្វាគមន៍ចំពោះដំណើរទស្សនកិច្ចរបស់គណៈប្រតិភូបញ្ជាការដ្ឋានឥណ្ឌូប៉ាស៊ីហ្វិក នៃសហរដ្ឋអាមេរិក។ លោកថា តាមរយៈដំណើរទស្សនកិច្ចរបស់គណៈប្រតិភូ និងការចូលចតរបស់នាវាចម្បាំងយូអេសអេស សាវាណាហ៍ (USS Savannah) របស់អាមេរិកនៅកំពង់ផែខេត្តព្រះសីហនុនាពេលនេះ កិច្ចសហប្រតិបត្តិការលើវិស័យការពារជាតិប្រទេសទាំងពីរនឹងកាន់តែត្រូវបានពង្រឹងនិងពង្រីកថែមទៀត។
ស្ថានទូតអាមេរិកប្រចាំនៅកម្ពុជា កាលពីថ្ងៃទី១៨ ខែធ្នូ លើកឡើងនៅលើទំព័រហ្វេសបុកថាមេបញ្ជាការនៃបញ្ជាការដ្ឋានឥណ្ឌូប៉ាស៊ីហ្វិក នៃសហរដ្ឋអាមេរិក នាយឧត្ដមនាវី សាមញ៉ល ផាផារ៉ូ បានជួបជាមួយ លោក ហ៊ុន ម៉ាណែត ដើម្បីពិភាក្សាអំពីប្រធានបទជាច្រើន ដូចជា ទស្សនកិច្ចនាពេលថ្មីៗនេះរបស់រដ្ឋមន្ត្រីការពារជាតិសហរដ្ឋអាមេរិកលោក ឡូយដ៍ ជេម អូស្ទីន ដែលបានប្ដេជ្ញាចិត្តចំពោះមជ្ឈភាពអាស៊ាន ការគាំទ្រប្រតិបត្តិការថែរក្សាសន្តិភាព និងការប្រកាន់ខ្ជាប់នូវសណ្ដាប់ធ្នាប់អន្តរជាតិដែលផ្អែកលើច្បាប់។
ជុំវិញរឿងនេះ អ្នកជំនាញខាងវិទ្យាសាស្ត្រនយោបាយ លោក ឯម សុណ្ណារ៉ា លើកឡើងថា ការបង្ហាញឆន្ទៈរបស់មេដឹកនាំកម្ពុជា ដើម្បីពង្រឹងទំនាក់ទំនងល្អជាមួយប្រទេសមហាអំណាចសហរដ្ឋអាមេរិក គឺជារឿងល្អសម្រាប់ប្រទេសជាតិ និងប្រជាពលរដ្ឋខ្មែរ។ ប៉ុន្តែលោកថា ដើម្បីឱ្យកម្ពុជាមានទំនាក់ទំនងជាមួយសហរដ្ឋអាមេរិកកាន់តែប្រសើរ លុះត្រាតែរដ្ឋាភិបាលកម្ពុជាបង្កើនការជជែកគ្នា និងបង្ហាញតម្លាភាពទៅកាន់សហរដ្ឋអាមេរិក ចំពោះមន្ទិលសង្ស័យពាក់ព័ន្ធនឹងសន្តិសុខក្នុងតំបន់។
បន្ថែមពីនេះ លោក ឯម សុណ្ណារ៉ា ថា រដ្ឋាភិបាលកម្ពុជាគួរគោរពសិទ្ធិមនុស្ស និងស្ដារលទ្ធិប្រជាធិបតេយ្យឱ្យស្របនឹងការប្ដេជ្ញាចិត្តរបស់កម្ពុជា ស្របតាមស្មារតី នៃកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១។
លោក ឯម សុណ្ណារ៉ា៖«ភាគីសហរដ្ឋអាមេរិកសង្ស័យ ឬក៏លើកឡើងយើងបង្ហាញតម្លាភាពរបស់កម្ពុជាយើងដែលតែងឈរអព្យាក្រឹត យើងបង្ហាញទៅទៅនេះជាកិច្ចការងារល្អ ហើយវិស័យពាណិជ្ជកម្មដែលកម្ពុជាយើងនាំ ជាពិសេស ទំនិញវាយនភណ្ឌទៅទីផ្សារសហរដ្ឋអាមេរិកជារឿងចាំបាច់ ពីព្រោះឡើងជិត ៩ពាន់លានជាងហើយ ហើយជាកិច្ចការមួយ ដែលកម្ពុជាគួរឆ្លើយតបទៅសហរដ្ឋអាមេរិកនូវលក្ខខណ្ឌសេរីភាព លំហនយោបាយ ប្រជាធិបតេយ្យហ្នឹង ដែលកម្ពុជាអាចធ្វើបាន»។
ក្រៅពីមានជំនួបជាមួយលោកនាយករដ្ឋមន្ត្រី ហ៊ុន ម៉ាណែត មេបញ្ជាការនៃបញ្ជាការដ្ឋានឥណ្ឌូប៉ាស៊ីហ្វិក នៃសហរដ្ឋអាមេរិកនាយឧត្ដមនាវី ស៊ែមញូល ផាផារ៉ូ ក៏បានជួបពិភាក្សាការងារជាមួយអគ្គមេបញ្ជាការ នៃកងយោធពលខេមរភូមិន្ទលោក វង្ស ពិសេន ដែរ។ នៅក្នុងជំនួបនោះ លោក វង្ស ពិសេន បានស្នើឱ្យសហរដ្ឋអាមេរិកពិនិត្យលទ្ធភាពរៀបចំសមយុទ្ធយោធា «ឆ្មាំអង្គរ» រួមគ្នារវាងកងទ័ពកម្ពុជា និងសហរដ្ឋអាមេរិកឡើងវិញ។ ប៉ុន្តែរហូតមកដល់ពេលនេះ គេនៅមិនទាន់ឃើញភាគីសហរដ្ឋអាមេរិកឆ្លើយតបចំពោះសំណើនេះនៅឡើយទេ។ រដ្ឋាភិបាលកម្ពុជាបានលុបចោលដោយខ្លួនឯងសមយុទ្ធ «ឆ្មាំអង្គរ»ជាមួយសហរដ្ឋអាមេរិក និងសមយុទ្ធ «ដនគោព្រៃ» ជាមួយកងទ័ពប្រទេសអូស្ត្រាលីតាំងពីឆ្នាំ២០១៧។ ប៉ុន្តែក្នុងពេលជាមួយគ្នា កម្ពុជាបែរជាទៅបង្កើនការធ្វើសមយុទ្ធ «នាគមាស» ជាមួយកងទ័ពចិនមានទ្រង់ទ្រាយកាន់តែធំឡើងៗ ដែលធ្វើឱ្យមានការរិះគន់ថា កម្ពុជាលំអៀងទៅកាន់ប្រទេសចិនកាន់តែខ្លាំង ស្របពេលដែលមានការចោទប្រកាន់ថា កម្ពុជាអនុញ្ញាតឱ្យចិនមានវត្តមានមូលដ្ឋានយោធានៅក្នុងប្រទេសកម្ពុជា ជាពិសេស នៅមូលដ្ឋានកងទ័ពជើងទឹករាមក្នុងខេត្តព្រះសីហនុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។