ប្រធានគណបក្សប្រជាជនកម្ពុជា លោក ហ៊ុន សែន ដាក់ទិសដៅការងារឆ្នាំ២០២៥ ខាងមុខនេះ ដោយត្រូវផ្ដល់ភាពកក់ក្ដៅដល់ពលរដ្ឋ ដោយលោកបញ្ជាក់ថា អ្វីកាន់តែពិសេសនោះគ្រប់គ្រងសមរភូមិសតិអារម្មណ៍ពលរដ្ឋ។ ទោះយ៉ាងណាក្ដី អ្នកវិភាគថា សាររបស់លោក ហ៊ុន សែន នឹងគ្មានប្រសិទ្ធភាពឡើយ ព្រោះបញ្ហាអសមត្ថភាពរបស់មន្ត្រីថ្នាក់ក្រោម និងពុករលួយ។
ប្រធានគណបក្សប្រជាជនកម្ពុជា និងជាឪនាយករដ្ឋមន្ត្រី ហ៊ុន សែន នៅតែលើកឡើងដដែលៗ ថា បក្សកាន់អំណាចត្រូវការពារសន្តិភាព ត្រូវរក្សាឱ្យបានដាច់ខាត ទោះលះបង់ក្នុងតម្លៃណាក៏ដោយ។ លោក ហ៊ុន សែន ក៏ណែនាំសមាជិកបក្សរបស់លោកឱ្យតាមដានសភាពការណ៍ជាតិ និងអន្តរជាតិ ដែលមានការវិវត្តកាន់តែស្មុគស្មាញ។ លោកក៏ជំរុញ បក្សកាន់អំណាចរបស់លោកឱ្យវាយតម្លៃជាប់លើមតិ ការយល់ឃើញរបស់មហាជន ទាំងលើប្រព័ន្ធបណ្ដាញសង្គម និងនៅតាមមូលដ្ឋានផ្ទាល់ លើការដឹកនាំរបស់រដ្ឋាភិបាល និងគណបក្ស។
លោក ហ៊ុន សែន លើកឡើងដូច្នេះ នៅក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំរបស់គណៈចលនាមហាជនគណបក្សប្រជាជនកម្ពុជា ថ្ងៃទី១៨ ខែធ្នូ។
ទាក់ទងនឹងការលើកឡើងនេះ អ្នកជំនាញផ្នែកច្បាប់ និងអភិបាលកិច្ចបែបប្រជាធិបតេយ្យ លោក វ៉ន ចាន់ឡូត យល់ថា បក្សកាន់អំណាច កំពុងខ្វល់នឹងពាក្យការពារសន្តិភាព ដោយមិនអើពើដោះស្រាយបញ្ហារបស់ពលរដ្ឋ និងការពារដែនអធិបតេយ្យភាពរបស់ខ្លួនឱ្យបានត្រឹមត្រូវឡើយ។ ចំពោះសាររបស់លោក ហ៊ុន សែន ដែលទាមទារគណបក្សនេះផ្ដល់ភាពកក់ក្ដៅដល់ពលរដ្ឋ លោក វន ចាន់ឡូត សង្កេតឃើញថា វត្តមានរបស់មន្ត្រីបក្សកាន់អំណាចនៅមូលដ្ឋានភាគច្រើន គឺធ្វើឱ្យពលរដ្ឋរងគ្រោះ និងភិតភ័យទៅវិញទេ។
លោក វ៉ន ចាន់ឡូត៖«នៅពេលចុះទៅពង្រឹងចុះទៅអភិវឌ្ឍន៍តំបន់ណា យើងឃើញថា តំបន់នោះតែងតែជួបទុក្ខ ដោយសារតែមានផ្នត់គំនិតពុករលួយ ហើយកើតចេញនូវសកម្មភាពនៃការកេងប្រវ័ញ្ចអំពីភាពរងគ្រោះរបស់ប្រជាពលរដ្ឋទៅវិញ»។
ស្រដៀងគ្នានេះដែរ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី សង្កេតឃើញថា សំដីលោក ហ៊ុន សែន ពីរោះស្ដាប់ ដែលលោក បង្ហាញពីការយកចិត្តទុកដាក់លើពលរដ្ឋ។ ទោះយ៉ាងណាក្ដី លោកថា ដោយសារអំពើពុករលួយ ការប្រកាន់បក្ខពួក និងការរំលោភអំណាចជាដើមនោះ មិនបានធ្វើមន្ត្រីបក្សកាន់អំណាចដោះស្រាយបញ្ហាពលរដ្ឋទទួលបានលទ្ធផលជាដុំកំភួនឡើយ។
លោក សេង វណ្ណលី៖«សារលើកឡើងជារឿងល្អ ប៉ុន្តែជាក់ស្ដែងការអនុវត្តវាអត់ចឹង ដោយសារកង្វះតុល្យភាពអំណាច ប្រព័ន្ធនីតិប្រតិបត្តិ ប្រព័ន្ធនីតិប្បញ្ញត្តិ ហើយនឹងស្ថាប័នតុលាការក្លាយជាស្ថាប័នតែមួយ ការអនុវត្តរបស់មន្ត្រីរាជការ ឬក៏ថ្នាក់ជាតិ ថ្នាក់ក្រោមជាតិ ឬក៏អំពើទុច្ចរិតផ្សេងៗ បក្ខពួកនិយមផ្សេងទៀត ដែលគេរកឃើញ ស្ថាប័នឯករាជ្យ ដូចជា ប្រព័ន្ធតុលាការចាត់វិធានការបានតែបុគ្គល ដែលអត់មានឥទ្ធិពលនៅក្នុងសង្គមទេ ឬក៏មានឥទ្ធិពលតិចតួច»។
ទាក់ទងការលើកឡើងនេះ វិទ្យុអាស៊ីសេរីមិនអាចការឆ្លើយតបពីអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅថ្ងៃទី១៨ ខែធ្នូ។
បក្សកាន់អំណាច ដឹកនាំប្រទេសដោយអវត្តមានគណបក្សប្រឆាំងនៅរដ្ឋសភា ជិត ១០ឆ្នាំមកនេះ ពលរដ្ឋកំពុងប្រឈមបញ្ហាជំពាក់បំណុល គ្មានការងារ ចំណាកស្រុក និងរងការបណ្ដេញចេញពីលំនៅឋានជាដើម។ ចំណែកបញ្ហាសិទ្ធិមនុស្ស និងប្រជាធិបតេយ្យវិញ ក៏កំពុងរួមតូច ដែលក្រុមប្រទេសលោក សេរី ទាមទាររដ្ឋាភិបាលត្រកូល ហ៊ុន ឱ្យដោះស្រាយបញ្ហានេះជាបន្ទាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។