ជនភៀសខ្លួនខ្មែរដែលសមត្ថកិច្ចថៃចាប់បញ្ជូនឱ្យអាជ្ញាធរកម្ពុជាស្នើឱ្យតុលាការដោះលែងពួកគាត់ឱ្យមានសេរីភាពវិញ ដោយឥតលក្ខខ័ណ្ឌ ព្រោះពួកគាត់មិនបានប្រព្រឹត្តខុសច្បាប់ដូចការចោទប្រកាន់ឡើយ។ មន្ត្រីសិទ្ធិមនុស្សអំពាវនាវឱ្យរដ្ឋាភិបាលដោះលែងសកម្មជននយោបាយនិងសង្គមទាំងអស់ ដើម្បីបើកលំហសេរីភាពពលរដ្ឋ និងស្ដារប្រជាធិបតេយ្យនៅកម្ពុជាឡើងវិញ។
មេធាវីឱ្យដឹងថា ជនភៀសខ្លួននយោបាយ ៦នាក់ដែលសមត្ថកិច្ចថៃចាប់បញ្ជូនឱ្យអាជ្ញាធរកម្ពុជា យកទៅដាក់ពន្ធនាគារកន្លងមកនោះ គឺពួកគាត់ត្រូវបានតុលាការក្រុងភ្នំពេញ ចោទប្រកាន់ពីបទ«រួមគំនិតក្បត់» ពាក់ព័ន្ធសកម្មភាពប្រឆាំងកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម(CLV-DTA) កាលពីថ្ងៃទី១៨ ខែសីហា។
មេធាវីការពារក្ដីឱ្យសកម្មជន ៣នាក់ក្នុងចំណោមសកម្មជន៦នាក់ លោក សឺន ជុំជួន ប្រាប់វិទ្យុអាស៊ីសេរីនៅថ្ងៃទី៦ ខែមករាថា ជនជាប់ឃុំទាំងនោះ តែងតែបញ្ជាក់ជំហរថា ពួកគាត់គ្មានកំហុស ដោយមិនបានធ្វើសកម្មភាពខុសច្បាប់ដូចការចោទប្រកាន់របស់តុលាការឡើយ។ លោកឱ្យដឹងថា សំណុំរឿងព្រហ្មទណ្ឌនេះកំពុងស្ថិតនៅក្នុងដំណាក់កាលចៅក្រមស៊ើបសួរនៅឡើយ ចំណែកមេធាវីកំពុងសិក្សាបញ្ហាពាក់ព័ន្ធក្តីក្តាំនេះ ដើម្បីដាក់ឯកសារប្តឹងទៅតុលាការស្នើសុំនៅក្រៅឃុំបណ្ដោះអាសន្ន ឬស្នើឱ្យដោះលែងពួកគាត់នៅពេលឆាប់ៗនេះ។
លោក សឺន ជុំជួន៖ «ជំហររបស់គាត់បញ្ជាក់ហើយបញ្ជាក់ទៀតថា គាត់មិនបានប្រព្រឹត្តដូចការចោទប្រកាន់ពីតុលាការនោះទេ។ អ៊ីចឹងខ្ញុំកំពុងពិនិត្យមើលលើសំណុំរឿង ហើយសិក្សាលទ្ធភាពទៅលើផ្លូវច្បាប់ ដើម្បីស្នើសុំឱ្យមានការដោះលែងពួកគាត់ជាដើមបាទ»។
ចំណែក កូនស្រីរបស់សកម្មជនបក្សប្រឆាំងលោកស្រី ហុង អាន គឺលោកស្រី សៀន ស៊ីនួន ប្រាប់វិទ្យុអាស៊ីសេរី ក្រោយចូលសួរសុខទុក្ខម្តាយ នៅក្នុងពន្ធនាគារម២ថា ម្តាយលោកស្រី និងសកម្មជនផ្សេងទៀត គឺជាអ្នកស្នេហាជាតិ និយាយការពិតការពារទឹកដី និងយុត្តិធម៌សង្គម ប៉ុន្តែបែរជាតុលាការចាប់ឃុំខ្លួនទាំងអយុត្តិធម៌។ លោកស្រីបញ្ជាក់ថាពួកគាត់នៅតែប្ដេជ្ញាការតស៊ូលះបង់សេចក្តីសុខផ្ទាល់ខ្លួនបន្តទៀត បើទោះបីជា តុលាការចាប់ដាក់ពន្ធនាគារក៏ដោយ។
កូនស្រីសកម្មជនបក្សជំទាស់រូបនេះទាមទារឱ្យតុលាការ និងរដ្ឋាភិបាលដោះលែងម្តាយ និងសកម្មជនជាប់ឃុំដោយសាររឿងនយោបាយទាំងអស់ឱ្យមានសេរីភាពវិញ។
លោកស្រី សៀន ស៊ីនួន៖ «គាត់ធ្វើ(សកម្មភាពតស៊ូ)កន្លងមក គឺដើម្បីសង្គម ប្រទេសជាតិ ខ្មែរទាំងអស់គ្នាហ្នឹង គាត់មិនដែលគិតពីផលប្រយោជន៍ផ្ទាល់ខ្លួនទេ។ អ៊ីចឹងគ្រានតែគាត់បញ្ចេញមតិតវ៉ានៅតាមបណ្ដាញសង្គមសោះ ក៏ចាប់គាត់ដាក់គុកដែរ។ ខ្ញុំស្នើសុំដល់រដ្ឋាភិបាល និងតុលាការសូមដោះលែងអ្នកទោសមនសិការទាំងអស់ទៅ ពីព្រោះពួកគាត់អត់មានទោសកំហុសអ្វីទេ»។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ និងប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា ដើម្បីសុំការឆ្លើយតបជុំវិញរឿងនេះបានទេនៅថ្ងៃទី៦ ខែមករា។
អាជ្ញាធរថៃបានចាប់បញ្ជូនជនភៀសខ្លួននយោបាយចំនួន ៦នាក់ឱ្យអាជ្ញាធររដ្ឋាភិបាលលោក ហ៊ុន ម៉ាណែត កាលពីនៅថ្ងៃទី២៥ ខែវិច្ឆិកា រួមមាន លោក ប៉ែន ច័ន្ទសង្គ្រាម លោកស្រី ហុង អាន លោក មាន ចាន់ថុន ព្រមទាំងពលរដ្ឋខ្មែរក្រោម គឺលោកស្រី ស៊ឹង គន្ធា លោកស្រី យ៉ិន ចន្ធូ និងកញ្ញា វ៉ន ច័ន្ទរចនា។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (Adhoc)លោក យិន ម៉េងលី មើលឃើញថា សង្គមប្រជាធិបតេយ្យចាត់ទុកអ្នកដែលបញ្ចេញមតិឈឺឆ្អាលពីរឿងសង្គម បញ្ហាបូរណភាពទឹកដី គឺជាការអនុវត្តសិទ្ធិសេរីភាព ដោយមិនមែនជាបទល្មើសនោះទេ។ លោកយល់ថា តុលាការគួរតែដោះលែងសកម្មជន និងពលរដ្ឋដែលពាក់ព័ន្ធការអនុវត្តសិទ្ធិឱ្យមានសេរីភាពវិញ ដោយសាររដ្ឋាភិបាលបានសម្រេចលុបកិច្ចសហប្រតិបត្តិការតំបន់ត្រីកោណអភិវឌ្ឍន៍(CLV-DTA) តាមការទាមទាររបស់ពលរដ្ឋរួចហើយ។
លោក យិន ម៉េងលី៖ «ដើម្បីឱ្យខ្មែរឈ្នះទាំងអស់គ្នា ខ្មែររួបរួមគ្នា ខ្មែរខ្លាំងទល់តែដោះលែងពួកគាត់ឱ្យមានសេរីភាពមក ហើយបញ្ចប់បញ្ហាថាមានការជាប់ពន្ធនាគារ ដោយសារតែការបញ្ចេញមតិ ដោយសាររឿងCLVនេះ យើងដោះលែងពួកគាត់ទាំងអស់ទៅ ដើម្បីបើកលំហសេរីភាព យើងឃើញទេវាមានសារៈសំខាន់ណាស់ចំពោះសេរីភាពបញ្ចេញមតិហ្នឹង ដែលធ្វើឱ្យរដ្ឋាភិបាលបានទទួលព័ត៌មានគ្រប់ទិសទីទាំងក្នុងនិងក្រៅប្រទេស»។
រដ្ឋាភិបាលឪពុកកូន គឺលោក ហ៊ុន សែន និងលោក ហ៊ុន ម៉ាណែត បានបើកយុទ្ធនាការបង្ក្រាបលើសំឡេងប្រឆាំង និងប្រជាពលរដ្ឋដែលចេញមុខប្រឆាំងកិច្ចសហប្រតិបត្តិការតំបន់ត្រីកោណអភិវឌ្ឍន៍CLV-DTA ជាបន្តបន្ទាប់។ ប៉ុន្តែរដ្ឋាភិបាលបានសម្រេចលុបកិច្ចព្រមព្រៀងមួយនេះវិញ កាលពីខែវិច្ឆិកា ឆ្នាំ២០២៤ បន្ទាប់ពី ប្រជាពលរដ្ឋខ្មែរនៅគ្រប់មជ្ឈដ្ឋានបានផ្ទុះការរិះគន់ និងចេញធ្វើបាតុកម្មទ្រង់ទ្រាយធំ ប្រឆាំងគម្រោង CLV ដែលពួកគាត់បារម្ភថាប៉ះពាល់ដល់បូរណភាពទឹកដីកម្ពុជា។ ថ្វីបើកម្ពុជាលុបចោលគម្រោងនេះ តែរដ្ឋាភិបាលត្រកូលហ៊ុនមិនព្រមដោះលែងអ្នកជាប់ឃុំ ដែលត្រូវបានចាប់ខ្លួនដោយសារការបញ្ចេញមតិរឿង CLV ឡើយ។
មន្ត្រីសិទ្ធិមនុស្ស និងគណបក្សប្រឆាំង ព្រមទាំងគ្រួសារជនជាប់ឃុំទាមទារឱ្យរដ្ឋាភិបាលលោក ហ៊ុន ម៉ាណែត បើកលំហសេរីភាពពលរដ្ឋ ដោះលែងអ្នកជាប់ឃុំក្រោមហេតុផលនយោបាយទាំងអស់ ព្រមទាំងកែទម្រង់ប្រព័ន្ធតុលាការឱ្យប្រសើរឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។