អ្នកឃ្លាំមើលថា សកម្មភាពលេចធ្លោរបស់គណបក្សកម្លាំងជាតិដែលជាបក្សប្រឆាំងនាំមុខគេកំពុងក្លាយជាគោលដៅសម្រាប់គណបក្សកាន់អំណាចតាមធ្វើទុក្ខបុកម្នេញ។ មេដឹកនាំបក្សនេះអំពាវនាវឱ្យរដ្ឋាភិបាលបក្សកាន់អំណាចបញ្ឈប់ការធ្វើទុក្ខបុកម្នេញសំឡេងប្រឆាំង ហើយងាកទៅបើកលំហលទ្ធិប្រជាធិបតេយ្យ និងរៀបចំការបោះឆ្នោតដោយសេរី ត្រឹមត្រូវ និងយុត្តិធម៌។
គណបក្សកម្លាំងជាតិកំពុងចុះរៀបចំរចនាសម្ព័ន្ធ និងបង្កើនសកម្មភាពតស៊ូមតិយ៉ាងផុលផុសដែលធ្វើឱ្យមន្រ្តីគណបក្សប្រឆាំងមួយនេះក្លាយជាគោលដៅរបស់បក្សកាន់អំណាចតាមកម្ចាត់ឥតស្រាកស្រាន្ត។
ប្រធានអង្គការលទ្ធិប្រជាធិបតេយ្យខ្មែរនៅប្រទេសអូស្ត្រាលី(Australia) លោក ស៊ឹង សែនករុណា មើលឃើញថា សន្ទុះគណបក្សកម្លាំងជាតិដែលមានមន្រ្តីភាគច្រើនមកពីបក្សប្រឆាំងភ្លើងទៀន សង្គមស៊ីវិល និងមេសហជី តែងតែចេញមុខតតាំង ទាមទារយុត្តិធម៌នៅក្នុងសង្គមរហូតពួកគេទទួលបានសំឡេងគាំទ្រពីពលរដ្ឋច្រើន ដែលធ្វើឱ្យគណបក្សកាន់អំណាចប្រើល្បិចតាមកម្ចាត់ និងធ្វើទុក្ខបុកម្នេញជាបន្តបន្ទាប់។ យ៉ាងណា លោក ស៊ឹង សែនករុណា កោតសរសើរចំពោះការការប្តេជ្ញាចិត្តរបស់មន្រ្តីបក្សកម្លាំងជាតិដែលក្លាហាននៅប្រឈមឧបសគ្គដូចសព្វថ្ងៃ។ ម្យ៉ាងទៀតលោកផ្តល់យោបល់ដល់អ្នកនយោបាយគួររួមសាមគ្គីគ្នាដើម្បីពង្រឹងកម្លាំងអ្នកប្រជាធិបតេយ្យឱ្យកាន់តែរឹងមាំ ឆ្ពោះសម្រេចគោលដៅគឺការផ្លាស់ប្តូរជាវិជ្ជមាន។
លោក ស៊ឹង សែនករុណា៖«គណបក្សកាន់អំណាចទៀតសោតត្រូវតែបញ្ឈប់ការប្រើប្រាស់នយោបាយទុច្ចរិតធ្វើទុក្ខបុកម្នេញទៅលើគណបក្សជាគូប្រជែងទាំងអស់ហ្នឹង ត្រូវក្លាហានប្រកួតប្រជែងត្រឹមត្រូវ ដោយស្មោះត្រង់ ចំពោះប្រជាពលរដ្ឋ ចំពោះមុខអន្តរជាតិ ដោយបើកលំហនយោបាយ ដោយរៀបចំការបោះឆ្នោតសេរី ត្រឹមត្រូវ និងយុត្តិធម៌ឡើងវិញ»។
ការលើកឡើងនេះបន្ទាប់ពីមន្រ្តីគណបក្សកម្លាំងរងការធ្វើទុក្ខបុកម្នេញពីសំណាក់អាជ្ញាធរ និងប្រព័ន្ធតុលាការរបស់គណបក្សកាន់អំណាចកាន់តែខ្លាំង។ ជាឧទាហរណ៍ ប្រធានគណបក្សលោក ស៊ុន ចន្ធី ត្រូវបានតុលាការផ្តន្ទាទោសដាក់ពន្ធនាគារ២ឆ្នាំ និងបិទសិទ្ធិធ្វើនយោបាយអស់មួយជីវិត។ ចំណែកមន្រ្តីមួយចំនួនទៀតត្រូវរងបណ្តឹងនៅតុលាការ ខណៈខុទ្ទកាល័យ និងជាទីស្នាក់ការកណ្ដាលរបស់គណបក្សកម្លាំងជាតិស្ថិតក្នុងខណ្ឌមានជ័យ រាជធានីភ្នំពេញ ត្រូវបង្ខំចិត្តរើចេញ បន្ទាប់ពីម្ចាស់ផ្ទះរងនូវការគំរាមកំហែងពីអាជ្ញាធរមូលដ្ឋាន។
គណបក្សកម្លាំងជាតិបានបង្កើតឡើងដោយអតីតមន្ត្រីជាន់ខ្ពស់គណបក្សភ្លើងទៀន កាលពីខែវិច្ឆិកាឆ្នាំ២០២៣ បន្ទាប់ពីអតីតរដ្ឋាភិបាលលោក ហ៊ុន សែន មិនឲ្យបក្សភ្លើងទៀនចូលរួមការបោះឆ្នោត។
កន្លងមកមន្រ្តី និងសកម្មជនគណបក្សកម្លាំងជាតិនៅតែជំនេះប្រមូលផ្តុំសកម្មជន អ្នកគាំទ្រចេញធ្វើបាតុកម្ម និងតស៊ូមតិទៅតាមរូបភាពផ្សេងៗ ដើម្បីទាមទារឱ្យរដ្ឋាភិបាលបើកលំហសេរីភាពពលរដ្ឋ ស្តារប្រជាធិបតេយ្យ និងដោះលែងអ្នកទោសនយោបាយជាដើម។
ទោះយ៉ាងបីជួបបញ្ហាបែបនេះក្តី មេដឹកនាំបក្សកម្លាំងជាតិនៅតែបន្តសកម្មភាពមោះមុតសំដៅឆ្ពោះទៅរកការបោះឆ្នោតនៅឆ្នាំ២០២៧ និង២០២៨ ខាងមុខ។ ជាក់ស្តែងថ្នាក់ដឹកនាំ និងសកម្មជនគណបក្សកម្លាំងជាតិជាង៧០០នាក់ បានជួបជុំគ្នារៀបចំពិធីសំណេះសំណាល និងសម្ពាធទីស្នាក់ការគណបក្សប្រចាំខេត្តបាត់ដំបង ស្ថិតនៅសង្កាត់អូរចារ នៅថ្ងៃទី២៩ ខែធ្នូ។
ទីប្រឹក្សាគណបក្សកម្លាំងជាតិលោក រ៉ុង ឈុន ថ្លែងទៅកាន់អ្នកគាំទ្រថា គណបក្សកម្លាំងជាតិបានរងការធ្វើទុក្ខបុកម្នេញឥតឈប់ គឺបង្ហាញឱ្យឃើញគណបក្សនេះកំពុងដើរលើបន្ទត់នយោបាយត្រូវ និងជាក្តីសង្ឃឹមរបស់ពលរដ្ឋខ្មែរសម្រាប់ការបោះឆ្នោតនៅពេលខាងមុខ។ លោកបញ្ជាក់ថា លោក និងថ្នាក់ដឹកនាំនៅជាមួយពលរដ្ឋស្លូតត្រង់ ហើយបន្តនិយាយការពិតក្នុងការធ្វើសកម្មភាពទាមទារយុត្តិធម៌ និងប្រជាធិបតេយ្យពិតប្រាកដ។
លោក រ៉ុង ឈុន៖«គណបក្សកម្លាំងជាតិអត់មានទឹកលុយទេ តែមានទឹកចិត្ត មានឧត្តមគិត មានមនសិការ នេះជាមូលដ្ឋានឆ្ពោះទៅភាពជោគជ័យនៅឆ្នាំ២០២៧ និង២០២៨ ខាងមុខ ជយោគណបក្សកម្លាំងជាតិ!»។
ចំណែកចៅសង្កាត់រងទី២នៅសង្កត់អូរចារ ក្រុងបាត់ដំបង គឺអ្នកស្រី ស៊ិន ចាន់ពៅរ៉ូហ្សេត លើកឡើងថា មូលហេតុដែលអ្នកស្រី និងប្រជាពលរដ្ឋនាំគ្នាចេញមុខគាំទ្រគណបក្សកម្លាំងជាតិចំណាយកម្លាំងកាយចិត្ត និងការប្តេជ្ញាចិត្តខ្ពស់ គឺកើតចេញពីទឹកចិត្តស្មោះត្រង់ និងចង់ឱ្យសង្គមមានយុត្តិធម៌។ អ្នកស្រីបញ្ជាក់ថា ទោះបីជា កន្លងទៅអ្នកប្រជាធិបតេយ្យរងគ្រោះយ៉ាងណាក្តី ក៏អ្នកប្រជាធិបតេយ្យដែលគោរពឆន្ទៈពលរដ្ឋមិនសាបសូន្យពីឆាកនយោបាយកម្ពុជានោះឡើយ។ អ្នកស្រី ស៊ិន ចាន់ពៅរ៉ូហ្សេត អំពាវនាវដល់ពលរដ្ឋទាំងក្នុង និងក្រៅប្រទេស ចូលរួមគាំទ្រគណបក្សកម្លាំងជាតិឱ្យបានកាន់តែច្រើនថែមទៀត។
អ្នកស្រី ស៊ិន ចាន់ពៅរ៉ូហ្សេត៖«ទៅកន្លែងណាក៏ដោយឱ្យតែជាពន្លឺយុត្តិធម៌ យើងគាំទ្រជានិច្ច មែនទេបងប្អូន អ៊ីចឹងកុំឆ្ងល់ឱ្យតែរ៉ូហ្សេតនៅស្មោះត្រង់នឹងពលរដ្ឋនៅសង្កាត់អូរចារ ឱ្យតែគណបក្សកម្លាំងជាតិនៅស្មោះត្រង់នឹងជាតិ ស្មោះត្រង់នឹងប្រជាពលរដ្ឋខ្មែរគាំទ្រទៅគឺអត់ខុសបំណងទេពូមីង ទោះបីដំណើរតស៊ូយើងយឺតយូរយ៉ាងណាក្តី កុំអស់សង្ឃឹម ចាប់ដៃគ្នា សាមគ្គីគ្នាឆ្ពោះទៅមុខ ដើម្បីក្មេងជំនាន់ក្រោយ និងដើម្បីជាតិមាតុភូមិរបស់យើង»។
ទាក់ទងរឿងនេះ អ្នកនាំពាក្យគណបក្សកាន់អំណាចលោក សុខ ឥសាន លើកឡើងថាបក្សរបស់លោកគ្មានអ្វីត្រូវបារម្ភចំពោះសកម្មភាពរបស់គណបក្សកម្លាំងជាតិដែលជាបក្សទើបបង្កើតថ្មីនោះទេ។ ជាមួយគ្នានេះ លោក សុខ ឥសាន បានច្រានចោលចំពោះការចោទថា ការចាប់ខ្លួនមេបក្សកម្លាំងជាតិដាក់ពន្ធនាគារកន្លងមកជាការគំរាមកំហែងលើគូប្រជែង។
លោក សុខ ឥសាន៖«កុំនិយាយថាគេ(បក្សកាន់អំណាច)គំរាមកំហែង គេភ័យខ្លាចនោះ អាភ័យខ្លាចនេះជារូបមន្ត ជាទ្រឹស្តីរបស់បក្សប្រឆាំងតើ មេបក្សប្រឆាំងដែលខ្លាំងបំផុត គឺរត់ទៅដេកនៅស្រុកបារាំងហើយ ហើយថាអ្នកនៅក្នុងស្រុកភ័យ ចុះខ្លួនឯងរត់ហ្នឹងអត់ថាភ័យខ្លាចទេ»។
អ្នកឃ្លាំមើល និងមន្ត្រីសិទ្ធិមនុស្សថាការរឹតត្បិតសិទ្ធិសេរីភាពផ្នែកនយោបាយ ការចាប់អ្នកនយោបាយដាក់ពន្ធនាគារកន្លងមកមិនមែនជាការអនុវត្តច្បាប់នោះទេ ប៉ុន្តែអ្នកកាន់អំណាចប្រើប្រព័ន្ធតុលាការធ្វើទុក្ខបុកម្នេញលើសំឡេងប្រឆាំង និងបំបិទមាត់អ្នករិះគន់រដ្ឋាភិបាល។
អ្នកឃ្លាំមើលលើកឡើងថា ការណ៍ដែលរដ្ឋាភិបាលត្រកូលហ៊ុន តាមធ្វើទុក្ខបុកម្នេញ និងបញ្ចប់ជីវិតនយោបាយរបស់មេដឹកនាំបក្សប្រឆាំងដែលជាដៃគូប្រកួតប្រជែងនោះ គឺជាយុទ្ធសាស្រ្តនយោបាយស្មោគគ្រោក ដើម្បីវែកផ្លូវឱ្យលោក ហ៊ុន ម៉ាណែត បន្តកាន់អំណាចដោយគ្មានគូប្រជែង។ ពួកគាត់ចង់ឃើញអ្នកនយោបាយបក្សប្រឆាំងបង្កើតការប្តេជ្ញាចិត្ត និងរួបរួមគ្នាយកឈ្នះគណបក្សកាន់អំណាច ទើបកម្ពុជាស្គាល់នូវប្រជាធិបតេយ្យ និងការអភិវឌ្ឍប្រទេសពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។