អគ្គស្នងការនគរបាលជាតិលោក ស ថេត ប្រកាសថា នឹងទប់ស្កាត់ និងបង្ក្រាបបទល្មើសឧក្រិដ្ឋកម្មទាំងអស់ជាពិសេសបទល្មើសជួញដូរមនុស្ស និងអំពើឆបោកតាមអនឡាញ ដើម្បីរក្សាស្ថិរភាពសង្គម។ ទោះជាយ៉ាងណា អ្នកឃ្លាំមើលចាត់ទុកការប្រកាសរបស់លោក ស ថេត នេះថា គឺជាការសន្យាខ្យល់ដោយសារតែលោកគ្មានឥទ្ធិពល ដើម្បីបង្ក្រាបមេខ្លោងធំៗដែលកំពុងមានទំនាក់ទំនងជាមួយអ្នកមានអំណាចប្រតិបត្តិការអំពើឆបោកនៅកម្ពុជានោះទេ។
បញ្ហាជួញដូរមនុស្ស និងអំពើឆបោកតាមអនឡាញគឺជាប្រធានបទស្នូល ដែលអគ្គស្នងការនគរបាលជាតិ លោក ស ថេត បានលើកឡើងជជែកជាមួយស្នងការនគរបាលរាជធានីខេត្តទាំងអស់ក្នុងអង្គសន្និបាតចុងឆ្នាំ២០២៤ នេះ។
គេហទំព័រអគ្គស្នងការដ្ឋាននគរបាលជាតិឱ្យដឹងទៀតថា អគ្គស្នងការនគរបាលជាតិ លោក ស ថេត បានលើកឡើងអំពីការប្រយុទ្ធប្រឆាំងបទល្មើសបច្ចេកវិទ្យា ជាពិសេសបទល្មើសឆបោកតាមអនឡាញ (Scammed Online) ល្បែងអនឡាញ (Game Online) អំពើជួញដូរមនុស្ស ជួញដូរពលកម្ម អាជីវកម្មផ្លូវភេទ អំពើឆបោកគ្រប់ទម្រង់ ការដោះស្រាយបញ្ហាសណ្ដាប់ធ្នាប់សង្គម និងការកាត់បន្ថយគ្រោះថ្នាក់ចរាចរណ៍សម្រាប់ឆ្នាំ២០២៥ ខាងមុខ។ លោក ស ថេត ក៏លើកឡើងអំពីការងារប្រយុទ្ធប្រឆាំងបទល្មើសនៅចំពោះមុខស្នងការនគរបាលរាជធានីខេត្តទាំងអស់ ដើម្បីស្វែងរកចំណុចខ្លាំង ខ្សោយ បញ្ហាប្រឈម និងវិធានការដោះស្រាយសម្រាប់ឆ្នាំ២០២៥ លើការបង្ការ ទប់ស្កាត់ និងបង្ក្រាបបទល្មើសឧក្រិដ្ឋកម្មនានា។
អគ្គស្នងការនគរបាលជាតិលោក ស ថេត បានជជែកពាក់ព័ន្ធនឹងប្រធានបទទាំងនេះក្នុងអង្គសន្និបាតបូកសរុបសភាពការណ៍ និងលទ្ធផលកិច្ចប្រតិបត្តិការរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គមប្រចាំឆ្នាំ២០២៤ និងដាក់ចេញទិសដៅការងារឆ្នាំ២០២៥ របស់អគ្គស្នងការដ្ឋាននគរបាលជាតិនៅព្រឹកថ្ងៃទី៣០ ខែធ្នូ។ លោក ស ថេត បានអះអាងថា ការជជែកលើប្រធានបែបនេះ គឺដើម្បីប្រមូលនូវបទពិសោធន៍ល្អៗតាមរយៈការចែករំលែករបស់កម្លាំងជំនាញនៅរាជធានីភ្នំពេញ និងតាមបណ្ដាខេត្ត ដើម្បីជាវិធានការបង្ការ ទប់ស្កាត់ និងបង្ក្រាបបទល្មើសព្រហ្មទណ្ឌ បទល្មើសគ្រឿងញៀន ល្បែងស៊ីសងខុសច្បាប់ និងសកម្មភាពក្មេងទំនើង។
ទោះជាយ៉ាងណា ប្រធានចលនាខ្មែរដើម្បីប្រជាធិបតេយ្យ អ្នកស្រី មូរ សុខហួរ ប្រាប់វិទ្យុអាស៊ីសេរីថា តួនាទីលោក ស ថេត ជាអគ្គស្នងការនគរបាលជាតិនោះគ្មានឥទ្ធិពលបង្ក្រាបមេខ្លោង និងមន្ត្រីឧកញ៉ាឈ្មួញគ្រាក់ៗដែលពាក់ព័ន្ធនឹងបញ្ហាជួញដូរមនុស្ស និងអំពើឆបោកតាមអនឡាញនៅកម្ពុជាទេ ព្រោះអ្នកស្រីថា ឈ្មួញដែលរកស៊ីលើរបរបែបឧក្រិដ្ឋទាំងនេះពួកគេទទួលបានការកាងការពារពីប្រធានព្រឹទ្ធសភាលោក ហ៊ុន សែន។ អ្នកស្រីបន្ថែមទៀតថា ទោះមានការដាក់ទណ្ឌកម្មដោយសហរដ្ឋអាមេរិកលើប្រធានសមាគមឧកញ៉ាកម្ពុជាគឺលោក លី យ៉ុងផាត់ កន្លងមកពាក់ព័ន្ធនឹងអំពើជួញដូរមនុស្សនេះ ក៏គ្មានស្ថាប័នពាក់ព័ន្ធហ៊ានបើកស៊ើបអង្កេតឡើយ។
អ្នកស្រីថា ករណីនេះឆ្លុះបញ្ចាំងឱ្យឃើញថា ប្រទេសជាតិកំពុងជួបគ្រោះថ្នាក់ ដោយសារតែមនុស្សជំនិតៗលោក ហ៊ុន សែន ដែលរកស៊ីលើមុខរបរពាក់ព័ន្ធនឹងបទល្មើសឧក្រិដ្ឋនេះ នៅតែមាននៅក្រៅប្រព័ន្ធច្បាប់ និងអាចដំណើរការអាជីវកម្មពួកគេ ដើម្បីប្រមូលផ្ដល់ឱ្យគណបក្សប្រជាជនកម្ពុជា។
អ្នកស្រី មូរ សុខហួរ៖«ទោះបីជាលោក ស ថេត ឬអ្នកណាក៏ដោយធ្វើបទបញ្ជាអ្វីក៏ដោយ ប្ដេជ្ញាអ្វីក៏ដោយក៏មិនមានប្រសិទ្ធភាពទេ លុះត្រាតែ លោក ហ៊ុន ម៉ាណែត គាត់មានភាពក្លាហានទៅនិយាយជាមួយឪពុកគាត់ឱ្យឈប់យកម៉ាហ្វីយ៉ា(Mafia)ចិនធ្វើជាប្រឹក្សាពិសេស។ ក្រុមម៉ាហ្វីយ៉ាចិនហ្នឹងគឺពាក់ព័ន្ធច្បាស់ណាស់ជាមួយការឆបោកតាមអនឡាញ»។
វិទ្យុអាស៊ីសេរីមិនអាចទាក់ទងអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹម ខឿន និងអ្នកនាំពាក្យរងក្រសួងមហាផ្ទៃលោក ទូច សុឃៈ ដើម្បីអត្ថាធិប្បាយជុំវិញរឿងនេះបានទេនៅថ្ងៃទី៣០ ខែធ្នូ។
ទោះបីជារដ្ឋាភិបាលតាំងពីជំនាន់លោក ហ៊ុន សែន រហូតដល់កូនគឺលោក ហ៊ុន ម៉ាណែត តែងតែប្រកាសអំពីការប្ដេជ្ញា និងយុទ្ធសាស្ត្រតាមរយៈការពង្រឹងសមត្ថភាពកម្លាំងជំនាញ ដើម្បីប្រយុទ្ធប្រឆាំងអំពើជួញដូរមនុស្ស និងអំពើឆបោកតាមអនឡាញក៏បទល្មើសឧក្រិដ្ឋទាំងនេះហាក់កាន់តែរីករាលដាលនៅកម្ពុជា និងធ្វើឱ្យរដ្ឋាភិបាលនៃប្រទេសក្នុងតំបន់មួយចំនួនដូចជា ថៃ (Thailand) វៀតណាម (Vietnam) ហ្វីលីពីន (Philippines) និងឥណ្ឌា (India) ជាដើមតែងតែលើកឡើងក្ដីកង្វល់ និងព្រមានពលរដ្ឋពួកគេឱ្យប្រុងប្រយ័ត្នខ្ពស់មុននឹងសម្រេចចិត្តចូលមកស្វែងរកការងារនៅកម្ពុជា។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា បញ្ហាឆបោកតាមអនឡាញក្នុងប្រទេសកម្ពុជា នៅតែជារឿងចម្រូងចម្រាសដែលទាមទារឱ្យរដ្ឋាភិបាលបង្ហាញឆន្ទៈខ្ពស់ដើម្បីបង្ក្រាប។ ម្យ៉ាងវិញទៀតលោកព្រមានថា ការណ៍ដែលរដ្ឋាភិបាលនៃប្រទេសក្នុងតំបន់មួយចំនួននៅតែបន្តលើកឡើងជាកង្វល់ចំពោះស្ថានភាពនៅកម្ពុជាថា ជាកន្លែងសម្បុកឧក្រិដ្ឋជនឆបោកតាមអនឡាញនេះគឺបានជះឥទ្ធិពលមិនល្អដល់វិស័យសេដ្ឋកិច្ច ការវិនិយោគ និងភ្ញៀវទេសចរអន្តរជាតិកាន់តែខ្លាំង។
លោក អំ សំអាត៖«ទន្ទឹមនឹងមានការប្ដេជ្ញាចិត្តទាំងក្រសួងស្ថាប័ន ទាំងអគ្គស្នងការនគរបាលជាតិទល់តែទី១ ត្រូវតែមានឆន្ទៈខ្ពស់ក្នុងការបង្ក្រាប និងការទប់ស្កាត់ បើសិនជាការបង្ក្រាបទៅប៉ះចំសាច់ស្អុយត្រូវតែចៀរចោល ទី២ សមត្ថកិច្ចពាក់ព័ន្ធក្នុងការបង្ក្រាបទប់ស្កាត់ក៏ត្រូវតែមានការហ្វឹកហ្វឺនជំនាញវិជ្ជាជីវៈបន្ថែមព្រោះបទល្មើសឆបោកតាមប្រព័ន្ធអនឡាញនេះជាបទល្មើសទំនើបកម្ម។ លុបបំបាត់រាល់អំពើពុករលួយទាក់ទងនឹងបញ្ហាឆបោកតាមអនឡាញ ត្រូវមានកិច្ចសហប្រតិបត្តិការល្អរវាងអាជ្ញាធរប្រទេសជិតខាង និងប្រទេសក្នុងតំបន់ និងសហគមន៍អន្តរជាតិ»។
ក្នុងរយៈពេល ៦ខែ ដើមឆ្នាំ២០២៤ សមត្ថកិច្ចបង្ក្រាបបានអំពើជួញដូរមនុស្ស និងអាជីវកម្មផ្លូវភេទជាង ១រយករណី (១០៤ករណី) និងឃាត់ខ្លួនជនសង្ស័យចំនួនជាង ១រយនាក់ (១៣៤នាក់)។ ជាមួយគ្នានេះ សមត្ថកិច្ចបានជួយសង្គ្រោះជនរងគ្រោះជិត ៣រយនាក់ (២៩០នាក់)។ ក្នុងចំណោមជនរងគ្រោះទាំងនោះ មានមនុស្សជាង ១រយនាក់ (១៣៤នាក់) រងការជួញដូរមនុស្ស និងកេងប្រវ័ញ្ចផ្លូវភេទគឺជាអនីតិជនអាយុក្រោម ១៨ឆ្នាំ។
រយៈពេល ៣ឆ្នាំចុងក្រោយនេះកម្ពុជាបន្តជាប់ក្នុងចំណាត់ថ្នាក់លេខ ៣ដែលមានន័យថា ស្ថានភាពនៃអំពើជួញដូរមនុស្សនៅកម្ពុជានៅតែមានស្ថានភាពអាក្រក់ ក្នុងរបាយការណ៍ប្រចាំឆ្នាំស្ដីពីការប្រយុទ្ធប្រឆាំងអំពើជួញដូរមនុស្សរបស់ក្រសួងការបរទេសអាមេរិក។ អាមេរិករកឃើញថា អំពើពុករលួយ កង្វះនៃការអនុវត្តច្បាប់ និងការឃុបឃិតរវាងមន្ត្រីក្នុងជួររដ្ឋាភិបាលកម្ពុជាមួយចំនួនជាមួយក្រុមជនល្មើស គឺជាហេតុធ្វើឱ្យអំពើជួញដូរមនុស្សនៅតែកើតមាន និងរីករាលដាលក្នុងសង្គមកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។