អតីតអ្នកឧកញ៉ា និងជាអ្នកជំនួញរកស៊ីអចលនទ្រព្យ លោក ហេង សិទ្ធី បន្តជំរុញឱ្យអាជ្ញាធរពាក់ព័ន្ធទាំងអស់ស៊ើបអង្កេតលើករណីមន្ត្រីក្នុងជួររដ្ឋាភិបាល និងក្មួយប្រុសបង្កើតរបស់លោក ហ៊ុន សែន គឺលោក ហ៊ុន តូ ដែលលោក ហេង សិទ្ធី ចោទប្រកាន់ថា ជានៅពីក្រោយអំពើឧក្រិដ្ឋកម្មឆបោកតាមអនឡាញ និងប្រព្រឹត្តអំពើពុករលួយនៅក្នុងស្ថាប័នរដ្ឋ។ អ្នកជំនាញច្បាប់ និងអ្នកឃ្លាំមើលយល់ឃើញថា រដ្ឋាភិបាលជាពិសេសក្រសួងយុត្តិធម៌គួរតែស៊ើបអង្កេតលើករណីនេះ ពីព្រោះនេះអាចជាតម្រុយដែលនាំឱ្យរដ្ឋាភិបាលរកឃើញមេខ្លោងពាក់ព័ន្ធនឹងអំពើឆបោកតាមអនឡាញ។
អតីតអ្នកឧកញ៉ា លោក ហេង សិទ្ធី បានបន្តលើកឡើងលើបណ្ដាញសង្គមហ្វេសប៊ុករបស់ខ្លួនថា ប្រសិនបើរដ្ឋាភិបាលមិនដោះស្រាយករណីនេះ ក្រុមឧក្រិដ្ឋជនឆបោកតាមប្រព័ន្ធអនឡាយដែលជាប់ពាក់ព័ន្ធនឹងលោក ហ៊ុន តូ និងមន្ត្រីជាន់ខ្ពស់នៅក្នុងជួររដ្ឋាភិបាលទេ នោះកម្ពុជានឹងគ្មានអ្នកវិយោគមកបណ្ដាក់ទុនរកស៊ីនោះឡើយ។
លោក ហេង សិទ្ធី បានបង្ហោះសារជាសំឡេងនៅលើគណនីហ្វេសប៊ុករបស់ខ្លួននៅថ្ងៃទី១១ ខែមករា ដោយអះអាងថា ក្រុមឧក្រិដ្ឋជនរកស៊ីឆបោកតាមប្រព័ន្ធអនឡាញមានអ្នកមានអំណាចនៅចាំកាងការពារក្នុងនោះរួមមាន រដ្ឋមន្ត្រីក្រសួងមហាផ្ទៃ លោក ស សុខា និងរដ្ឋលេខាធិការក្រសួងមហាផ្ទៃលោក សុខ ផល និងលោក ហ៊ុន តូ ព្រមទាំងបក្ខពួកមួយចំនួនគប់គិតគ្នាប្រព្រឹត្តអំពើពុករលួយនៅតាមព្រំដែន និងការពារក្រុមឧក្រិដ្ឋជន។
លោក ហេង សិទ្ធី៖«ខ្ញុំបកអាក្រាតបុគ្គលណាដែលតិរច្ឆានបំផុត ចង្រៃបំផុតដែលនាំឱ្យប្រទេសជាតិយើងលិចលង់បាត់បង់វប្បធម៌ បាត់បង់នូវសិទ្ធិសេរីភាព បាត់បង់ការគិតនោះខ្ញុំនឹងបកអាក្រាត ហើយជាពិសេសគឺក្រសួងមហាផ្ទៃដែលជាអ្នកនៅពីក្រោយឧក្រិដ្ឋជន ហើយនេះជាទង្វើក្បត់ជាតិ ហើយខ្ញុំមិនអត់ឱនឱ្យអ្នកទាំងនោះទេ»។
ពាក់ព័ន្ធនឹងការចោទប្រកាន់របស់លោក ហេង សិទ្ធី នេះ វិទ្យុអាស៊ីសេរីមិនអាចទាក់ទង អ្នកនាំពាក្យរងក្រសួងមហាផ្ទៃ លោក ទូច សុខៈ ដើម្បីសុំការឆ្លើយតប ជុំវិញការចោទប្រកាន់នេះបានទេនៅថ្ងៃទី១១ ខែមករា។ ចំណែកក្មួយប្រុសបង្កើតលោក ហ៊ុន សែន គឺលោក ហ៊ុន តូ ក៏វិទ្យុអាស៊ីសេរីមិនអាចទាក់ទងបានដែរ នៅថ្ងៃដដែលនេះ។ ប៉ុន្តែទោះជាយ៉ាងណា កាលពីថ្ងៃទី៨ ខែមករា លោក ហ៊ុន តូ បានចេញលិខិតបដិសេធចំពោះការចោទប្រកាន់របស់លោក ហេង សិទ្ធី ពាក់ព័ន្ធនឹងការផ្សព្វផ្សាយនៅតាមបណ្ដាញសង្គមដែលចោទថា លោកនៅពីក្រោយក្រុមឧក្រិដ្ឋជនឆបោកតាមអនឡាញ និងជាជនឆបោកលុយរាប់លានដុល្លារពីអ្នកជំនួញជនជាតិចិន។ លោក ហ៊ុន តូ ក៏ព្រមានប្តឹងមកលើលោក ហេង សិទ្ធី វិញផងដែរ ដោយលោកអះអាងថា លោក ហេង សិទ្ធី បានគំរាមសម្លាប់លោក។
ក្រោយមានរឿងចម្រូងចម្រាសរវាងលោក ហេង សិទ្ធី និងលោក ហ៊ុន តូ ពាក់ព័ន្ធនឹងចោទប្រកាន់គ្នាទៅវិញទៅមករឿងរកស៊ីឆបោកតាមប្រព័ន្ធអនឡាញ សម្រាប់តែកាលពីថ្ងៃទី១០ ខែមករា លេចចេញនូវវត្តមានអ្នកឧកញ៉ា ឡេង ណាវ៉ាត្រា ដែលជាប់ឈ្មោះជាអ្នកឧកញ៉ា លក់ផ្ទះខ្យល់ឱ្យអតិថិជននោះ បានដឹកនាំបក្ខពួកប្រមាណ ២០នាក់ទៅប្រទេសសិង្ហបុរី ដើម្បីសុំជួបជាមួយ លោក ហេង សិទ្ធី រកភាពស្អាតស្នំជូនលោក ហ៊ុន តូ វិញ។ ប៉ុន្តែ លោក ឡេង ណាវ៉ាត្រា មិនជួបជាមួយលោក ហេង សិទ្ធី ប៉ុន្តែបែរជារងការរិះគន់ថា មិនព្រមដោះស្រាយបញ្ហារឿងអតិថិជនទិញផ្ទះមិនបានផ្ទះ តែបែរជាចំណាយលុយខ្ជះខ្ជាយឥតប្រយោជន៍។
លោក ហេង សិទ្ធី បានបង្ហោះសារលើគណនីហ្វេសប៊ុករបស់លោកថា លោកបានដាក់ពាក្យបណ្តឹងទៅក្រសួងយុត្តិធម៌ អង្គភាពប្រឆាំងអំពើពុករលួយ ក្រសួងមហាផ្ទៃ អគ្គស្នងការដ្ឋាននគរបាលជាតិជាដើម ដើម្បីឱ្យអាជ្ញាធរស៊ើបអង្កេតលើករណីរឿង លោក ហ៊ុន តូ ជាអ្នកនៅពីក្រោយអំពើឆបោកតាមអនឡាយ ប៉ុន្តែមកទល់ពេលនេះក្រសួងទាំងនោះ ពុំមានចំណាត់ការច្បាប់ទៅបុគ្គលទាំងនោះឡើយ។
លោក មេធាវី សឺន ជុំជួន យល់ឃើញថា លោក ហេង សិទ្ធី គួរតែរកមេធាវីដើម្បីការពារក្តី និងរៀបចំពាក្យបណ្តឹងដើម្បីដាក់ទៅក្រសួងពាក់ព័ន្ធ ជាពិសេសស្ថាប័នតុលាការ។ លោកមេធាវី បន្ថែមថា សំណុំរឿងនេះគឺជាតម្រុយដែលអាជ្ញាធរគួរតែស៊ើបអង្កេតឱ្យបានច្បាស់លាស់ប្រសិនបើ ប៉ះពាល់ដល់ប្រយោជន៍សាធារណៈ។
លោកមេធាវី សឺន ជុំជួន៖ «ប្រសិនណាគាត់ត្រូវការមេធាវីអាហ្នឹងគឺជារឿងសំខាន់សម្រាប់គាត់។ ការរៀបចំឯកសារផ្សេងៗវាពិបាកដែលអ៊ីចឹងក្នុងនាមជាជនរងគ្រោះ ឬក្នុងនាមជាបុគ្គលដែលត្រូវបានគេឆបោកជាដើម។ យល់ល្អគួរតែស្វែងរកមេធាវីប្រសើរជាងដើរក្តីដោយខ្លួនឯង»។
លោក ហេង សិទ្ធី គឺជាប្រធានក្រុមហ៊ុន ម៉ារី ថាមគ្រុប (Maritime Group) និងធ្លាប់មានងារជាអ្នកឧកញ៉ា ហើយលោកក៏ធ្លាប់បរិច្ចាគលុយចំនួន ១លានដុល្លារជូនរដ្ឋាភិបាលដល់លោក ហ៊ុន សែន កាលពីផ្ទុះជំងឺកូវីដ-១៩ (Covid-19) និងបានបរិច្ចាគលុយចំនួន ១០ម៉ឺនដុល្លារ ជូនប្រធានកាកបាទក្រហមកម្ពុជារបស់អ្នកស្រី ប៊ុនរ៉ានី កាលពីឆ្នាំ២០២២ ផងដែរ។ បច្ចុប្បន្ននេះ លោក ហេង សិទ្ធី កំពុងភៀសខ្លួននៅប្រទេសអូស្ត្រាលី។ លោកត្រូវបានព្រះមហាក្សត្រដកគោរមងារអ្នកឧកញ៉ា កាលពីថ្ងៃទី២ ខែធ្នូ ឆ្នាំ២០២៤ តាមសំណើរបស់លោកនាយករដ្ឋមន្ត្រី ហ៊ុន ម៉ាណែត ក្រោយពេលលោកបានទម្លាយរឿងអ្នកជំនួញជនជាតិសិង្ហបុរី (Singapore) មានសញ្ជាតិខ្មែរម្នាក់ឈ្មោះ ភួ ហ្គេច សេង (Phua Gek Seng) ហៅតាក់ (Tak) បានប្រើប្រាស់ទឹកដីកម្ពុជា ដើម្បីប្រតិបត្តិការឧស្សាហកម្មឆបោកតាមអនឡាញ។
ក្រោយលោក ហ៊ុន ម៉ាណែត បានដកគោរមងារអ្នកឧកញ៉ាពីលោក ហេង សិទ្ធី មកលោក ហេង សិទ្ធី បានបន្តទម្លាយរឿងអាស្រូវពាក់ព័ន្ធអំពើពុករលួយរបស់មន្ត្រីគ្រាក់ៗក្នុងស្ថាប័នរដ្ឋជាបន្តបន្ទាប់។
ករណីចុងក្រោយគឺ លោក ហេង សិទ្ធី បានប្ដឹងលោក ហ៊ុន តូ ថា បានបោកលុយ និងយកដីរបស់លោកសរុបជាលុយប្រមាណ ២៥០លានដុល្លារ ដែលលុយទាំងនោះគឺមានភាគហ៊ុនជាដៃគូរកស៊ីរបស់លោកផ្សេងទៀតបានបណ្ដាក់ទុន។ លើសពីនេះក៏មានជនជាតិម្នាក់ឈ្មោះ ស៊ុន រ៉ួយហ្វឹង (Sun ruifeng) ក៏បានដាក់ពាក្យប្តឹងលោក ហ៊ុន តូ ទៅរដ្ឋមន្ត្រីក្រសួងយុត្តិធម៌ លោក កើត រិទ្ធ ថា លោក ហ៊ុន តូ បានបោកលុយលោកអស់ចំនួន ៩លានដុល្លារ (៩.០០០.០០០) ផងដែរ។
ជុំវិញការចោទប្រកាន់មកលើមន្ត្រីក្នុងជួររដ្ឋាភិបាលទាំងនេះ វិទ្យុអាស៊ីសេរីមិនអាចទាក់ទងលោក ហេង សិទ្ធី ដើម្បីសុំការបញ្ជាក់បន្ថែមជុំវិញរឿងនេះបានទេគិតត្រឹមម៉ោងផ្សាយនេះ។
ពាក់ព័ន្ធនឹងក្មួយប្រុសបង្កើតរបស់លោក ហ៊ុន សែន គឺលោក ហ៊ុន តូ នេះគឺលោក ធ្លាប់ត្រូវបាននគរបាលអូស្ត្រាលីស៊ើបអង្កេតពាក់ព័ន្ធនឹងការជួញដូរ ហេរ៉ូអ៊ីន និងសួរនាំអំពីរឿងរ៉ាវគំរាមសម្លាប់ក្រុមគ្រួសារបណ្ឌិត កែម ឡី និងតំណាងសហគមន៍ខ្មែរនៅទីនោះ។ លោកក៏ត្រូវបានសារព័ត៌មាន អាល់ ហ្សាហ្ស៊ីរ៉ា (AlJazeera) និងកាសែត ឌឹ អូស្ត្រាលៀន (The Australian) ភ្ជាប់ទៅនឹងអំពើជួញដូរមនុស្សអំពើឆបោកតាមអនឡាញ និងរត់ពន្ធគ្រឿងញៀន។
ចុងក្រោយកាលពីថ្ងៃទី១០ ខែកក្កដា ឆ្នាំ២០២៤ ក្រុមហ៊ុនវិភាគទិន្នន័យប្រតិបត្តិការកុំព្យូទ័រតាមប្រព័ន្ធបច្ចេកវិទ្យា Blockchainឈ្មោះ «អេលីបទីក» (Elliptic) បានរកឃើញថា លោក ហ៊ុន តូ គឺជាម្ចាស់ភាគហ៊ុនមួយរបស់ក្រុមហ៊ុនប្រតិបត្តិការអាជីវកម្មទូទាត់ និងប្តូរប្រាក់ឈ្មោះ«ហួយវ័ន ផេ» (Huione Pay) ដែលជាផ្នែកមួយនៃសម្ព័ន្ធក្រុមហ៊ុន «ហួយវ័ន គ្រុប»។ កម្មវិធីទីផ្សារអនឡាញងងឹតឈ្មោះ «ហួយវ័ន ហ្គារេនធី» (Huione Guarantee) របស់ក្រុមហ៊ុននេះ ត្រូវបានប្រើប្រាស់យ៉ាង ទូលំទូលាយក្នុងចំណោមក្រុមអ្នករកស៊ីឆបោកតាមអនឡាញនៅតំបន់អាស៊ីអាគ្នេយ៍។ យ៉ាងហោចណាស់ ទឹកប្រាក់ជាង ១១ពាន់លានដុល្លារ ត្រូវគេសង្ស័យថា ត្រូវបានគេលាងលុយតាមរយៈកម្មវិធីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។