មន្ត្រីប៉ូលិសជាន់ខ្ពស់ហ្វីលីពីន (Philippines) បន្តព្រមានដល់ពលរដ្ឋរបស់ខ្លួនបង្កើនការប្រុងប្រយ័ត្នឱ្យបានខ្ពស់មុនចូលមកស្វែងរកការងារនៅកម្ពុជាដោយសារតែអាចក្លាយជាជនរងគ្រោះក្នុងការងារជាអ្នកឆបោកតាមអនឡាញ (Online)។ អាជ្ញាធរកម្ពុជាចាត់ទុកការអំពាវនាវរបស់ភាគីហ្វីលីពីននេះថា ជាវិធានការមួយដើម្បីទប់ស្កាត់ឧក្រិដ្ឋកម្មឆ្លងដែន។
អាជ្ញាធរហ្វីលីពីនអំពាវនាវឱ្យពលរដ្ឋរបស់ខ្លួនប្រយ័ត្នប្រយែងរឿងចូលមកបម្រើការងារនៅកម្ពុជា គឺបន្ទាប់ពីក្រុមសមត្ថកិច្ចហ្វីលីពីនបានអន្តរាគមន៍ជួយសង្គ្រោះជនជាតិរបស់ខ្លួនម្នាក់ អាយុជាង ៣០ឆ្នាំ ដែលអះអាងថា បានបម្រើការងារក្នុងមជ្ឈមណ្ឌលឆបោកតាមអនឡាញនៅកម្ពុជា ក្នុងពេលបុរសរូបនេះកំពុងត្រៀមធ្វើដំណើរចាកចេញពីព្រលានយន្តហោះអន្តរជាតិក្នុងទីក្រុងម៉ានីល (Manila) មកកាន់ប្រទេសកម្ពុជា។
ស្នងការការិយាល័យអន្តោប្រវេសន៍ហ្វីលីពីន (BI) លោក ចូអែល អេនតូនី វីយ៉ាដូ (Joel Anthony Viado) ត្រូវបានប្រព័ន្ធផ្សព្វផ្សាយហ្វីលីពីនឈ្មោះ អាបូហ្គាដូ (Abogado) ស្រង់សម្ដីចុះផ្សាយនៅថ្ងៃទី១២ មករា ដោយលោកព្រមានថា ក្រុមឆបោកតាមអនឡាញកំពុងវាយលុកលើប្រជាជនហ្វីលីពីនដោយគ្មានការសង្ស័យ និងទាក់ទាញពួកគេឱ្យបំពេញការងារខុសច្បាប់ជាមួយនឹងការសន្យាផ្ដល់ប្រាក់ខែខ្ពស់។ លោកអំពាវនាវឱ្យជនជាតិហ្វីលីពីន ផ្ទៀងផ្ទាត់ភាពស្របច្បាប់ការងារតាមរយៈនាយកដ្ឋានពលករចំណាកស្រុក។
ឆ្លើយតបនឹងរឿងនេះ អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង ប្រាប់វិទ្យុអាស៊ីសេរីនៅថ្ងៃទី១២ ខែមករាថា អាជ្ញាធរហ្វីលីពីនព្រមានពលរដ្ឋរបស់ខ្លួនបែបនេះគឺជាវិធានការទប់ស្កាត់ឧក្រិដ្ឋកម្មឆ្លងដែន។ អ្នកស្រីបញ្ជាក់ថា កម្ពុជាក៏គ្មានការព្រួយបារម្ភចំពោះរដ្ឋាភិបាលអន្តរជាតិមួយចំនួនដែលតែងតែអំពាវនាវឱ្យពលរដ្ឋពួកគេប្រុងប្រយ័ត្នខ្ពស់មុនចូលមកបម្រើការងារនៅកម្ពុជាថា ធ្វើឱ្យប៉ះពាល់ដល់វិស័យទេសចរណ៍ និងការវិនិយោគនៅកម្ពុជានោះទេ។
ទោះជាយ៉ាងណា អ្នកស្រី ជូ ប៊ុនអេង ហាក់ខឹងសម្បានឹងប្រព័ន្ធផ្សព្វផ្សាយ និងរដ្ឋាភិបាលអន្តរជាតិមួយចំនួនដែលនិយាយពីកម្ពុជាទាក់ទងនឹងបញ្ហាជួញដូរមនុស្ស និងអំពើឆបោកតាមអនឡាញ ហើយក៏ទទួលស្គាល់ថា បញ្ហាឧក្រិដ្ឋកម្មទាំងនេះពិតជាកើតមាននៅកម្ពុជា។
អ្នកស្រី ជូ ប៊ុនអេង៖«មិនមែនទូទាំងប្រទេសសុទ្ធតែជាកន្លែងគួរឱ្យព្រួយបារម្ភទេ អារឿងចោទប្រកាន់ជាទូទៅហើយ ចំណែកការផ្សព្វផ្សាយបានត្រឹមតែបន្ទោសបង្អាប់គ្នាទៅវិញទៅមកទេ តែសួរថា ស្អីទៅជាផលចំណេញ?អ្វីដែលយើងបានធ្វើជាមួយប្រទេសជិតខាងគឺយើងបានគោរពសិទ្ធិគ្នាទៅវិញទៅមក ហើយយើងក៏ចង់ឱ្យមានកិច្ចសហការក្នុងការបង្ការទប់ស្កាត់ ឬប្រយុទ្ធប្រឆាំងបទល្មើសជាមួយគ្នា។ ប្រទេសណាក៏ដោយឧទាហរណ៍ថា ឥណ្ឌាក៏ដោយ ថៃក៏ដោយផ្សាយមិនតិចទេពីកម្ពុជាប៉ុន្តែយើងគ្រាន់តែចង់ប្រាប់ថា ការពិតនៅតែជាការពិត»។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា បញ្ហាជួញដូរមនុស្ស និងអំពើឆបោកតាមអនឡាញនៅតែជាបញ្ហាក្ដៅដែលទាមទារឱ្យរដ្ឋាភិបាលត្រូវគិតគូរ និងចាត់វិធានការបង្ក្រាបឧក្រិដ្ឋកម្មទាំងនេះឱ្យមានប្រសិទ្ធភាព។ លោកយល់ថា ការរិះគន់របស់បណ្ដាប្រទេសក្នុងតំបន់ស្ដីពីបញ្ហាជួញដូរមនុស្សនៅកម្ពុជា និងការណែនាំឱ្យពលរដ្ឋពួកគេប្រុងប្រយ័ត្នមុនចូលទឹកដីកម្ពុជានោះគឺបានជះឥទ្ធិពលមិនល្អសម្រាប់វិស័យទេសចរណ៍អន្តរជាតិ និងការវិនិយោគនៅកម្ពុជា។
លោក អំ សំអាត៖«មានប្រទេសឥណ្ឌា និងប្រទេសផ្សេងទៀតក៏បានប្រកាសព័ត៌មានសម្រាប់ប្រជាពលរដ្ឋគេឱ្យមានការប្រុងប្រយ័ត្នក្នុងការធ្វើដំណើរមកកម្ពុជាកុំឱ្យធ្លាក់ទៅក្នុងការឆបោកតាមប្រព័ន្ធអនឡាញជាពិសេសការស្វែងរកការងារធ្វើវាជារឿងមួយដែលធ្វើឱ្យប៉ះពាល់មុខមាត់កម្ពុជាយើងផងដែរទៅលើការប្រកាសព័ត៌មាន ឬព័ត៌មានអន្តរជាតិផ្សេងៗដែលទាក់ទងការឆបោកតាមប្រព័ន្ធអនឡាញនៅកម្ពុជាយើង»។
មិនមែនមានតែរដ្ឋាភិបាលហ្វីលីពីននោះទេ ដែលណែនាំឱ្យពលរដ្ឋប្រុងប្រយ័ត្នមុនចូលមកធ្វើការនៅកម្ពុជា រដ្ឋាភិបាលឥណ្ឌា (India) ម៉ាឡេស៊ី (Malaysia) ថៃ (Thailand) ឥណ្ឌូណេស៊ី (Indonesia) និងប៉ាគីស្ថាន (Pakistan) ជាដើម តាមរយៈស្ថានទូតប្រចាំនៅទីក្រុងភ្នំពេញតែងតែប្រកាសដោយព្រមានពលរដ្ឋពួកគេឱ្យប្រុងប្រយ័ត្នខ្ពស់ និងសិក្សាឱ្យច្បាស់លាស់មុនចូលមកទឹកដីកម្ពុជាស្វែងរកការងារធ្វើ ព្រោះអាចក្លាយជាជនរងគ្រោះបម្រើការងារឱ្យក្រុមឧក្រិដ្ឋជនប្រតិបត្តិការលើឧស្សាហកម្មឆបោកតាមអនឡាញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។