គណបក្សប្រឆាំងហៅលទ្ធផលនៃការបោះឆ្នោតអសកលអាណត្តិទី៤ កាលពីថ្ងៃទី២៦ ខែឧសភាថា មិនទាន់មានភាពសេរី ត្រឹមត្រូវ និងយុត្តិធម៌ឡើយ ពីព្រោះថ្នាក់ដឹកនាំនិងសកម្មជនមួយចំនួនរបស់បក្សប្រឆាំងត្រូវបានចាប់ខ្លួន និងខ្លះរងការបំភិតបំភ័យ ខណៈដែលគណបក្សប្រជាជនកម្ពុជាទទួលយកលទ្ធផលបោះឆ្នោតដែលប្រកាសដោយគណៈកម្មាធិការជាតិរៀបចំការបោះឆ្នោត។
គណបក្សប្រឆាំងលើកឡើងថាការបោះឆ្នោតប្រកបដោយភាពត្រឹមត្រូវ និងយុត្តិធម៌ លុះត្រាតែបរិយាកាសនយោបាយទាំងមុនដំណើរការនិងអំឡុងពេលបោះឆ្នោតគ្មានការចាប់ខ្លួនការគំរាមកំហែងលើថ្នាក់ដឹកនាំ និងសកម្មជនបក្សប្រឆាំង។
ការលើកឡើងនេះធ្វើឡើងបន្ទាប់ពីគណបក្សប្រជាជនកម្ពុជាចេញសេចក្ដីថ្លែងការណ៍គាំទ្រនិងទទួលយកលទ្ធផលបោះឆ្នោតដែលប្រកាសដោយគណៈកម្មាធិការជាតិរៀបចំការបោះឆ្នោត។
គណបក្សប្រជាជនកម្ពុជាលើកឡើងនៅក្នុងសេចក្តីថ្លែងការណ៍នៅថ្ងៃទី០៤ខែមិថុនា ថាបរិយាកាសនយោបាយគឺល្អទាំងមុនពេលបោះឆ្នោតពេលបោះឆ្នោតនិងក្រោយពេលបោះឆ្នោតដោយសារតែការយកចិត្តទុកដាក់របស់រាជរដ្ឋាភិបាល គណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោតនិងអាជ្ញាធរមានសមត្ថកិច្ចគ្រប់លំដាប់ថ្នាក់ដែលបានជួយគាំទ្រយ៉ាងសកម្មដល់ដំណើរការរៀបចំការបោះឆ្នោតឱ្យប្រព្រឹត្តទៅយ៉ាងរលូនប្រកបដោយជោគជ័យ។
ផ្ទុយពីការលើកឡើងនេះអនុប្រធានគណបក្សឆន្ទៈខ្មែរលោក សុន ឆ័យ ប្រាប់វិទ្យុអាស៊ីសេរីនៅថ្ងៃទី៥ ខែមិថុនា ថា មុនការបោះឆ្នោតមានភាពមិនប្រក្រតីមួយ ចំនួន ដូចជាការមិនអនុញ្ញាតឱ្យផ្លាស់ប្ដូរសមាជិកដែលមិនស្មោះត្រង់ជាមួយគណបក្សហើយទៅទទួលយកលុយនិងបោះឆ្នោតឱ្យគណបក្សដទៃជាដើម។
លោកថា ទោះបីលទ្ធផលនេះ មិនទទួលបានដូចការរំពឹងទុកក៏ដោយ ប៉ុន្តែលោកយល់ថា ការមានតំណាងរបស់បក្សប្រឆាំងនៅតាមរាជធានី ខេត្ត កុ្រង ស្រុក ខណ្ឌ បន្ថែមលើតំណាងនៅឃុំ-សង្កាត់ គឺជាកត្កាមួយដែលជំរុញឱ្យគណបក្សប្រឆាំង មានលទ្ធភាពបំពេញការងារ ច្រើនជាងមុន និងអាចទាក់ទាញអ្នកគាំទ្របានច្រើន នៅពេលបោះឆ្នោតសកលនៅពេលខាងមុខ។
លោក សុន ឆ័យ៖«ខ្ញុំគ្រាន់តែចង់បានការប្រកួតប្រជែងដោយស្មើភាពគ្នា ទោះបីជាការបោះឆ្នោតសកលក្ដី អសកលក្ដី ហើយសង្ឃឹមថា នឹងមិនមានជាឧបសគ្គអីទៀត ទេ សម្រាប់គណបក្សក្រៅរដ្ឋាភិបាលក្នុងការចូលរួមយ៉ាងសកម្ម ដើម្បីបោះឆ្នោតទៅថ្ងៃអនាគតទៀត កុំឱ្យមានព្រឹត្តិការណ៍ដូចគណបក្សភ្លើងទៀន មិនអាចរដ្ឋសភាកន្លងទៅនេះ នៅក្នុងប្រទេសកម្ពុជាតទៅទៀត»។
រីឯទីប្រឹក្សាគណបក្សកម្លាំងជាតិ លោក រ៉ុង ឈុន ប្រាប់វិទ្យុអាស៊ីសេរីនៅថ្ងៃទី៥ ខែមិថុនាថា ការបោះឆ្នោតកាលពីថ្ងៃទី២៦ខែឧសភាកន្លងទៅមិនទាន់សេរីនិងយុត្តិធម៌នោះទេដោយសារតែមុនការបោះឆ្នោតថ្នាក់ដឹកនាំគណបក្សកម្លាំងជាតិលោក ស៊ុន ចន្ធី និងសកម្មជនគណបក្សនេះព្រមទាំងអង្គបោះឆ្នោតរបស់គណបក្សភ្លើងទៀនត្រូវបានសមត្ថកិច្ចចាប់ខ្លួននិងមានការទិញដូរសន្លឹកផងដែរ។
ជាងនេះទៅទៀត លោកថា នៅមុនការបោះឆ្នោតនេះសកម្មជនសង្គមនិងសហជីព ដែលចូលរួមចំណែកលើកកម្ពស់ប្រជាធិបតេយ្យក៏ត្រូវបានចាប់ខ្លួន។
លោក រ៉ុង ឈុន ថា ការបោះឆ្នោតអាចប្រព្រឹត្តទៅដោយសេរី ត្រឹមត្រូវ និងយុត្តិធម៌បាន លុះត្រាតែមានការបើកលំហសេរីភាពផ្នែកនយោបាយ ដោយឱ្យគណបក្សប្រឆាំងមាន សិទ្ធិពេញលេញក្នុងការចូលរួមធ្វើសកម្មភាពនយោបាយហើយបញ្ឈប់ការធ្វើទុក្ខបុកម្នេញ បំភិតបំភ័យ ព្រមទាំងការគំរាមកំហែងគ្រប់រូបភាព។
លោក រ៉ុង ឈុ៖«អ៊ីចឹងបើយើងសរុបអំពីលទ្ធផលចំពោះគណបក្សកម្លាំងជាតិ វាពិបាកទទួលយកចំពោះលទ្ធផលហ្នឹង។ បាទ!មានការចាប់ខ្លួនលោក ស៊ុន ចន្ធី និងថ្នាក់ដឹកនាំបន្តបន្ទាប់»។
ឆ្លើយតបនឹងរឿងនេះ អ្នកនាំពាក្យគណបក្សប្រជាជន កម្ពុជាលោក សុខ ឥសាន ប្រាប់វិទ្យុអាស៊ីសេរីនៅថ្ងៃទី៥ ខែមិថុនា ថា វិធានការរបស់សមត្ថកិច្ច គឺពង្រឹង សន្តិសុខ សណ្ដាប់ធ្នាប់សង្គម ដើម្បីធានាស្ថិរភាពដំណើរការបោះឆ្នោត ឱ្យប្រព្រឹត្តទៅដោយរលូនសេរី និងត្រឹមត្រូវ។
លោក សុខ ឥសាន៖«ការចាប់ខ្លួនល្មើសច្បាប់អត់មានផ្អាកទេ ទោះបីជាក្នុងពេលយុទ្ធនាការឃោសនាបោះឆ្នោត ក្នុងពេលបោះឆ្នោតក៏ដោយពីព្រោះប្រទេសណាដូចប្រទេសណាអ៊ីចឹង។ ផ្ទុយទៅវិញរដ្ឋអំណាចគេកាន់តែពង្រឹងការថែរក្សាសន្តិសុខ សន្តិភាព សណ្ដាប់ធ្នាប់សង្គម ដើម្បីធានាដំណើរការបោះឆ្នោតឱ្យប្រព្រឹត្តទៅដោយរលូន មិនមែនឱ្យតែការបោះឆ្នោតហើយ អ្នកប្រព្រឹត្តល្មើសច្បាប់ហើយ ច្បាប់ផ្អាកសិនទេ អត់មានទេ»។
យោងតាមលទ្ធផលដែលប្រកាសដោយគណៈកម្មាធិការជាតិរៀបចំការបោះឆ្នោតគណបក្សប្រជាជនកម្ពុជាទទួលបានអាសនៈក្រុមប្រឹក្សារាជធានីខេត្តចំនួន ៥០៤ អាសនៈ ក្នុងចំណោមអាសនៈសរុប ៥៥៩ ខណៈគណបក្សឆន្ទៈខ្មែរទទួលបាន ៤៧ អាសនៈ និងបក្សកម្លាំងជាតិទទួលបាន៨អាសនៈ។
ដោយឡែកអាសនៈក្រុមប្រឹក្សាក្រុងស្រុក ខណ្ឌ វិញ គណបក្សប្រជាជនកម្ពុជា ទទួលបាន ៣.២៥៧ ក្នុងចំណោមសរុប ៣.៦៤១ អាសនៈ ខណៈបក្សឆន្ទៈខ្មែរ ទទួលបាន ៣១២ អាសនៈ បក្សកម្លាំងជាតិបាន ៦៩ អាសនៈ គណបក្សហ៊្វុនស៊ិនប៉ិច បាន ២ អាសនៈ និងបក្សខ្មែររួបរួមជាតិបាន ១អាសនៈ។
ការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខ័ណ្ឌ ឬហៅម្យ៉ាងទៀតថាការបោះឆ្នោតក្រុមប្រឹក្សាប្រព្រឹត្តទៅកាលពីថ្ងៃទី២៦ ឧសភា ដោយមានគណបក្ស ៥ ចូលរួម ក្នុងនោះមានគណបក្សប្រជាជនកម្ពុជាគណបក្សឆន្ទៈខ្មែរតំណាងឱ្យគណបក្សភ្លើងទៀនគណបក្សកម្លាំងជាតិគណបក្សហ៊្វុនស៊ិនប៉ិចនិងគណបក្សខ្មែររួបរួមជាតិ។
តែយ៉ាងណាការបោះឆ្នោតអសកលមួយនេះប្រព្រឹត្តទៅក្នុងបរិយាកាសមិនសេរីនិងយុត្តិធម៌ឡើយដោយអង្គបោះឆ្នោតមកពីបក្សប្រឆាំងអះអាងថាពួកគេបានរងការគាបសង្កត់និងការបំភិតបំភ័យគ្រប់រូបភាពពីសំណាក់អាជ្ញាធរដែលស្ថិតនៅក្រោមការដឹកនាំដោយបក្សកាន់អំណាច ដើម្បីដាក់សម្ពាធពួកគេបោះឆ្នោតគាំទ្រគណបក្សប្រជាជនកម្ពុជា។ ជាងនេះទៅទៀត អង្គបោះឆ្នោតមួយចំនួនទៀត ត្រូវសមត្ថកិច្ចចាប់ខ្លួន ហើយខ្លះទៀតបានរត់ភៀសខ្លួន នៅមុនពេលដំណើរការបោះឆ្នោត កាលពីថ្ងៃទី២៦ ខែឧសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។