ចំណែកអ្នកប្រើប្រាស់បណ្ដាញសង្គមជាច្រើននាំគ្នាបង្ហោះសារ និងចែករំលែកសារ និងវីដេអូព្រោងព្រាតនៅលើបណ្ដាញសង្គម ដោយបង្ហាញការសោកស្ដាយ ខកចិត្ត និងរិះគន់ចំពោះសាលក្រមកាត់ក្ដីសកម្មជនបរិស្ថានឲ្យមានទោសជាប់ពន្ធនាគារពី៦ ទៅ ៨ឆ្នាំ កាលពីថ្ងៃទី២ កក្កដា។
ពួកគាត់ចាត់ទុកខែកក្កដា គឺជាខែដែលបំផ្លាញធនធានមនុស្សកម្ពុជា និងចាត់ទុកថា ការចាប់ខ្លួនសកម្មជនបរិស្ថានទាំង ៥ នាក់នោះ ថា ជាការបាត់បង់ សេរីភាព នៅថ្ងៃ២ កក្កដា ២០២៤ នេះ តែមិនបាត់បង់ឧត្តមគតិ នៅថ្ងៃខាងមុខនោះឡើយ។
អ្នកប្រើប្រាស់បណ្ដាញសង្គមភាគច្រើនមើលឃើញថា ការចាប់ខ្លួនសកម្មជនបរិស្ថាន៥នាក់ រួមមាន លោក ថុន រដ្ឋា លោក លី ចាន់ដារ៉ាវុធ កញ្ញា ភួន កែវ រស្មី កញ្ញា ឡុង គន្ធា នោះ គឺជារឿងសងសឹកផ្នែកនយោបាយ។
ពួកគេថា ផ្ទុយទៅវិញ រដ្ឋាភិបាលគួរតែលើកទឹកចិត្តការពារយុវជន ដែលខ្វល់ខ្វាយលើកិច្ចការសង្គម និងការពារធនធានធម្មជាតិ ដែលជាទ្រព្យសម្បត្តិដ៏សំខាន់របស់ជាតិ។
ម្ចាស់គណនីហ្វេសប៊ុកមួយ ដែលដាក់ឈ្មោះថា ប៉ុល កន្តំ បានបញ្ចេញមតិ និងងឿងឆ្ងល់ ដោយប្រើពាក្យមិនសូវពីរោះថា ៖ «តុលាការ...ម៉ាក់វា(...ម៉ែវា...)គ្រាន់តែការពារព្រៃឈើ ការពារបរិស្ថានមានទោសម្នាក់ៗជិត ១០ឆ្នាំ ចំណែកអាអ្នកសម្លាប់មនុស្សម្តង២/៣ នាក់ជាប់ទោស១០/១៥ឆ្នាំ..»?
ចំណែក ម្ចាស់គណនីហ្វេសប៊ុកមួយផ្សេងទៀត ដែលមានឈ្មោះថា នុត ទីប៊ី (Nuth TiBee) បានបញ្ចេញទស្សនៈដែរថា « អ្នកកាប់បំផ្លាញព្រៃឈើឡើងឧកញ៉ា អ្នកការពារ បែរជាជាប់គុកទាំងអយុត្តិធម៌ ...»។
ស្រដៀងគ្នានេះដែរ ម្ចាស់ គណនីហ្វេសប៊ុកផ្សេងទៀត មានឈ្មោះថា ថៃលៀប អ អិន (Taileap RN) ឧកញ៉ាសម្លាប់មនុស្ស២នាក់ មិនហ៊ានសូម្បីតែចាប់ដៃគេឡើងឡាន ឯអ្នកស្រលាញ់ជាតិ ត្រូវគេចាប់យ៉ាងឃោរឃៅដូចសត្វធាតុ។
ទាក់ទងនឹងករណីចាប់ខ្លួនដោយហិង្សាលើសកម្មជនបរិស្ថាននេះដែរ ម្ចាស់គណនីហ្វេសប៊ុកឈ្មោះ សាយ ពេជ្រពន្លឺ (Say Pechpunleu) បញ្ចេញទស្សនៈដោយចោទសួរថា៖ លោកបងៗ សមត្ថកិច្ច មានដែលខ្មាសក្មេងទាំងអស់នោះទេ? ដែលពួកគេលះបង់គ្រប់យ៉ាងដើម្បីធនធានធម្មជាតិ !! តើទ្រព្យសម្បត្តិធម្មជាតិទាំងនោះ ជារបស់ក្រុមពួកគេឬ? ពួកគេខំដើម្បីទាំងអស់គ្នា តែអស់លោកវិញដើម្បីតែបុណ្យស័ក្ដិបន្តិចបន្តួច និង អាហារ ៣ពេល ក្បត់កូនចៅជំនាន់ក្រោយខ្លួនឯង!! តើបុណ្យស័ក្តិទាំងអស់នេះ គង់វង្សដល់២-៣ជំនាន់ដែរឬទេ? អ្វីដែលអស់លោកធ្វើគ្រាន់តែបំរើថ្នាក់លើសម្រេចមហិច្ឆតារបស់ពួកគេតែប៉ុណ្ណោះ ហើយទីបញ្ចប់កូនរបស់ពួកគេ ក្លាយជាមហាសេដ្ឋីគ្រប់ជំនាន់ តែកូនចៅរបស់អស់លោកត្រូវរស់យ៉ាងវេទនា លើប្រទេស១ដែលសល់តែសំបក១នេះទៅវិញ? ណ្ហើយ !និយាយច្រើនក៏គ្មានប្រយោជន៍អ្វីដែរ បើអស់លោកគ្មានជាតិនិយមផងនោះ ពិតជាគួរឱ្យអៀនខ្មាសដល់ដូនតាខ្មែរណាស់ ដែលមានកូនចៅអកតញ្ញូរបៀបនេះ...។
ដោយឡែកម្ចាស់គណនីហ្វេសប៊ុក មានឈ្មោះថា សុភាព មានទស្សនៈដែរថា៖ «ខែកក្កដា ជាខែដែលបំផ្លាញធនធានមនុស្សកម្ពុជា។ ពួកគាត់ទាំង ៥នាក់ បាត់បង់ សេរីភាព នៅថ្ងៃទី២ កក្កដា ២០២៤ នេះហើយ តែមិនបាត់បង់ឧត្តមគតិ នៅថ្ងៃមុខឡើយ» ។
រីឯម្ចាស់គណនីហ្វេសប៊ុកមួយចំនួនផ្សេងៗទៀត ក៏បានចូលរួមបញ្ចេញមតិយ៉ាងផុលផុសដែរដោយសំដែងការសោកស្តាយ និងថ្កោលទោសរដ្ឋាភិបាល លោក ហ៊ុន ម៉ាណែត ដែលធ្វើទង្វើបែបនេះទៅលើក្រុមយុវជនដែលជួយកិច្ចការសង្គម និងបរិស្ថាន។
ម្ចាស់គណនីហ្វេសប៊ុក ដែលមានឈ្មោះថា វណ្ណារ៉េត ហ (Vannareth Hor)៖ «មើលឃើញទង្វើរបស់រដ្ឋាភិបាលសព្វថ្ងៃនេះថា៖ម្ង៉ៃគិតតែរកវិធីធ្វើបាបតែខ្មែរគ្នាឯង គ្មានចេះរកមធ្យោបាយជួយសេដ្ឋកិច្ចប្រជាពលរដ្ឋទេ...!!»។
ម្ចាស់គណនីហ្វេសប៊ុកមួយទៀត ដែលមានឈ្មោះថា ភិក្ខុ កណ្តាល (Bhikkhu Kandaal) ៖ បានផុសអត្ថបទជាពាក្យកាព្យ ទាក់ទងនឹងស្ថានភាពសង្គមបច្ចុប្បន្ននេះថា៖ «ចោរឡើងឧកញ៉ា អាចារ្យចេញលួច បណ្ឌិតលាក់ខ្នួចក្របួចទ្រព្យជាតិ រាស្ត្រទឹកភ្នែក រែកបំណុលព្រាត មេធំចោលម្សៀត ឆ្លៀតតែរឿងអួត ...»។
ចំណែកម្ចាស់គណនីហ្វេសប៊ុក ឈ្មោះ ឡៃ ដានីតា (Lay Danita) វិញ ក៏បានសរសេរ សារបញ្ចេញមតិដឺដងជុំវិញរឿងនេះដែរថា៖ «បរទេសគេគួរឱ្យពាន ប្រទេសឯងឱ្យគុកច្រវាក់?សូមផ្ដល់សេរីភាពជូនពួកគាត់វិញ ពួកគាត់ជាជនស្នេហាជាតិ មិនមែនជាជនក្បត់ជាតិទេ»។
រីឯម្ចាស់គណនីហ្វេសប៊ុក ឈ្មោះ វណ្ណៈ ហៃ (Vannak Hay) មានទស្សនៈ ថា វាល្មមដល់ពេលដែលខ្មែរគ្រប់រូប ត្រូវតែរើបម្រាស់ចេញពីរបបផ្ដាច់ការសព្វថ្ងៃនេះហើយ បើយើងម្នាក់ៗនៅតែសម្ងំយកសុខនោះ បញ្ហាទាំងនេះ នឹងធ្លាក់មកលើយើងនៅថ្ងៃណាមួយមិនខាន។
ចំណែកម្ចាស់គណនីហ្វេសប៊ុក ឈ្មោះ តឿប ទេវរេវ បានផ្ញើសារគោរពឲ្យតម្លៃដល់សេចក្តីក្លាហាន និងការស៊ូលះបង់គ្រប់បែបយ៉ាងរបស់សកម្មជនបរិស្ថានទាំង៥រូបនោះ ដើម្បីសង្គមជាតិ។
គាត់សរសេរថា៖ វីរភាពរបស់បងៗពិតជាមានតម្លៃខ្លាំងណាស់សម្រាប់សង្គមមួយនេះ។ ការលះបង់របស់បង មានមនុស្សជាច្រើនបានចងចាំ និងបន្តធ្វើវា។
ខ្ញុំជឿថា ដរាបណាមានការតស៊ូ រួបរួមសាមគ្គីគ្នា យុត្តិធម៌នឹងអាចកើតមាន។ ដោយក្ដីគោរព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។