ប្រជាសហគមន៍ការពារព្រៃឈើខេត្តកំពង់ស្ពឺស្នើឱ្យលោកនាយករដ្ឋមន្ត្រី ហ៊ុន ម៉ាណែត ជួយទប់ស្កាត់បទល្មើសព្រៃឈើក្នុងឧទ្យានជាតិជួរភ្នំក្រវាញកណ្ដាល នៅចំណុចខ្នងផ្សារ និងខ្នងក្រពើ ដែលជាកន្លែងទាក់ទាញភ្ញៀវទេសចរបោះតង់កម្សាន្ត និងថតរូបគយគន់ទេសភាព។
សំណើនេះធ្វើឡើង ក្រោយពីនាយករដ្ឋមន្ត្រីរូបនេះ ចុះទៅតំបន់នោះដើម្បីអភិវឌ្ឍន៍វិស័យទេសចរណ៍ធម្មជាតិ។
ប្រជាសហគមន៍ការពារព្រៃឈើរស់នៅឃុំតាសាល ស្រុកឱរ៉ាល់ សាទរដែលលោកនាយករដ្ឋមន្ត្រី ហ៊ុន ម៉ាណែត ដឹកនាំរដ្ឋមន្ត្រីចុះទៅតំបន់ឧទ្យានជាតិជួរភ្នំក្រវាញកណ្តាលចំណុចខ្នងផ្សារ ដើម្បីរៀបចំសហគមន៍អភិវឌ្ឍន៍នៅហ្នឹងកន្លែង មិនអនុញ្ញាតឱ្យមានក្រុមហ៊ុនវិនិយោគក្នុងតំបន់នោះទេ។ ប៉ុន្តែពួកគេបារម្ភថា ចំណាត់ការនេះនឹងមិនរលូនឡើយ ដរាបណាបទល្មើសព្រៃឈើនៅតែកើតមានច្រើន។
ស្ទើរជារៀងរាល់ថ្ងៃមានរណារយន្តអារឈើធំៗទ្រហឹងពេញព្រៃ
ប្រជាសហគមន៍ការពារព្រៃឈើខ្នងវាល លោក លី រ៉ាន់ ប្រាប់វិទ្យុអាស៊ីសេរីនៅថ្ងៃទី១១ មីនា ថា ស្ទើរជារៀងរាល់ថ្ងៃមានរណារយន្តអារឈើធំៗទ្រហឹងពេញព្រៃ ក្នុងតំបន់ឧទ្យានជាតិភ្នំក្រវាញកណ្តាល នៅចំណុចខាងមុខខ្នងផ្សារ និងនៅតាមជម្រាលភ្នំឆ្លងចូលទឹកដីខេត្តកោះកុង។
លោកថា ក្នុងពេលនាយករដ្ឋមន្ត្រី ហ៊ុន ម៉ាណែត ចុះទៅតំបន់នោះ សកម្មភាពកាប់ឈើធំៗស្ងាត់មួយរយៈខ្លី តែក្រោយពេលនាយករដ្ឋមន្ត្រីត្រឡប់ទៅវិញ សកម្មភាពអារឈើកម្រើកឡើងវិញដដែល។
លោក លី រ៉ាន់៖«ពេលមុនលោកនាយករដ្ឋមន្ត្រីចុះមកកាប់ដល់ពេលចុះមកផ្អាកទៅ ហើយដល់ពេលគាត់ទៅបាត់ទៀតក៏កាប់ទៀត។ បង្កើតតំបន់ទេសចរណ៍ធម្មជាតិមែន ប៉ុន្តែខាងមុខនោះសុទ្ធតែចាប់ឈើម្រេញ ឈើរាជកុលធំៗ កាប់ពេញតែហ្នឹង។ កុំអីភ្ញៀវមកដើរភាគច្រើនគឺវង្វេងតែម្ដុំកាប់ឈើហ្នឹង»។
លោក លី រ៉ាន់ បន្ថែមថា កន្លងទៅឧទ្យានជួរភ្នំក្រវាញកណ្តាលចំណុចខ្នងវាលដែលពួកលោកអភិរក្ស ក៏មានសកម្មភាពកាប់បំផ្លាញឈើធំៗដែរ ក៏ប៉ុន្តែបច្ចុប្បន្នបទល្មើសព្រៃឈើថយចុះច្រើន ដោយសារសហគមន៍ជិត ១០០គ្រួសារ បាន សាមគ្គីគ្នាចងក្រងបណ្ដាញ ដាក់វេនគ្នាចុះល្បាតទប់ស្កាត់បទល្មើសព្រៃឈើនៅហ្នឹងកន្លែង។
ប្រជាសហគមន៍ថា ប្រភេទឈើដែលក្រុមជនល្មើសកាប់រំលំ នៅតំបន់ខ្នងផ្សាររួមមានដើមម្រេញ ឬរាជកុល ឈើទាល គគីរ និង ផ្ចឹកជាដើម មុខកាត់ ៣តឹកឡើងទៅ ដុះតាមជ្រលងភ្នំខ្ពង់រាប ខ្នងភ្នំ ចង្កេះភ្នំ និង ឈើខ្លះទៀត ដុះតាមជម្រាលភ្នំ។
នាយករដ្ឋមន្ត្រីចុះដល់ឧទ្យានជាតិជួរភ្នំក្រវាញកណ្តាលផ្ទាល់
កាលពីថ្ងៃទី៨ មីនា លោកនាយករដ្ឋមន្ត្រី ហ៊ុន ម៉ាណែត ដឹកនាំរដ្ឋមន្ត្រីក្រសួងទេសចរណ៍ លោក ហួត ហាត់ និងរដ្ឋមន្ត្រីក្រសួងបរិស្ថាន លោក អ៊ាង សុផល្លែត បានចុះទៅឧទ្យានជាតិជួរភ្នំក្រវាញកណ្តាលចំណុចខ្នងផ្សារ ដើម្បីស្វែងយល់ពីជីវភាពរបស់សហគមន៍។
លោក ហ៊ុន ម៉ាណែត បានបញ្ជាឱ្យរដ្ឋមន្ត្រីទាំងពីរនេះ ព្រមទាំងអភិបាលខេត្តកំពង់ស្ពឺ លោក ជាម ច័ន្ទសោភ័ណ្ឌ សហការអភិរក្ស តំបន់ទេសចរណ៍ខ្នងផ្សារ ខ្នងសំពៅ នៃឧទ្យានជាតិភ្នំក្រវាញកណ្តាលឱ្យល្អ។
បន្ថែមពីនេះត្រូវរៀបចំហេដ្ឋារចនាសម្ព័ន្ធចូលទៅតំបន់នោះ ហើយត្រូវសិក្សាប្រព័ន្ធផ្គត់ផ្គង់ទឹកលើភ្នំខ្នងផ្សារ ជាពិសេសត្រូវបង្កើនសមត្ថភាពរបស់សហគមន៍ផ្ដល់សេវាកម្មទេសចរណ៍ឱ្យល្អ ដើម្បីលើកកម្ពស់ជីវភាពពួកគាត់។
លោក ហ៊ុន ម៉ាណែត៖«ឥឡូវប្រាប់សហគមន៍ទៅ នាយករដ្ឋមន្ត្រីលោកឱ្យកន្លែងនេះទុកសម្រាប់ឱ្យធ្វើដំណើររាល់ថ្ងៃទៅណាទៅណីទៅ។ សហគមន៍ត្រូវទទួលខុសត្រូវ ថែទាំ ផ្ដល់សេវាកុំឱ្យមានភាពរញ៉េរញ៉ៃពេលភ្ញៀវមកឱ្យគាត់សប្បាយចិត្ត ហើយយើងកំណត់តម្លៃកុំកៀរគរពេលហ្នឹង»។
ទោះជាយ៉ាងណា លោក លី រ៉ាន់ បន្ថែមថា ប្រជាសហគមន៍មួយចំនួនរស់នៅតំបន់ខ្នងផ្សារមិនសូវចាប់អារម្មណ៍ទប់ស្កាត់បទល្មើសព្រៃឈើ និងដោះអន្ទាក់ចាប់សត្វព្រៃនោះទេ។ លោកថា សកម្មភាពកាប់ឈើមិនត្រឹមតែប៉ះពាល់វិស័យទេសចរណ៍ធម្មជាតិប៉ុណ្ណោះទេ តែវាក៏បំផ្លាញសម្រស់ធម្មជាតិផ្តល់ជម្រកដល់ភ្ញៀវទេសចរដើរកម្សាន្តដែរ។
លោក លី រ៉ាន់៖«ព្រៃឈើដែលបាត់បង់គ្រោះធម្មជាតិក៏ក្ដៅហួតហែង សត្វពាហនៈក៏គ្មានទឹកគ្មានអីផឹកដែរ។ ដល់ពេលអស់ព្រៃឈើវានឹងអត់កើត ហើយណាមួយវាក្ដៅអត់អាចនៅបាន ហើយបង្កបង្កើនផលក៏មិនដូចពីមុនដែរ។ ធ្វើស្រែធ្វើចម្ការបើយើងអត់ពីព្រៃឈើទាំងអស់នេះ ក៏មិនដឹងធ្វើអីកើតដែរ»។
ជុំវិញរឿងនេះមន្ត្រីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកលោក ប៉ែន ប៊ុណ្ណារ៍ យល់ថា លោកនាយករដ្ឋមន្ត្រី ហ៊ុន ម៉ាណែត ត្រូវចាត់វិធានការលើក្រុមជនល្មើសដែលបំផ្លាញធនធានធម្មជាតិ និងមន្ត្រីពាក់ព័ន្ធដែលប្រព្រឹត្តអំពើពុករលួយមកផ្ដន្ទាទោសតាមច្បាប់ ទើបការបង្កើតសហគមន៍ធម្មជាតិទទួលបានលទ្ធផលល្អ រួមចំណែកទាក់ទាញភ្ញៀវទេសចរ។
លោក ប៉ែន ប៊ុណ្ណារ៍៖«បើសិនជាធ្វើឱ្យ រុញឱ្យនគរបាលយុត្តិធម៌ និងតុលាការលោកឋិតនៅក្នុងភាពស្អាតស្អំ។ អ៊ីចឹងការផ្តល់ឱកាសរបស់អ្នកដឹកនាំប្រាកដជាទទួលបានជោគជ័យ ហើយសហគមន៍ក៏ទទួលបានជីវភាពធូរធារដែរ»។
អត្ថបទដែលទាក់ទង៖
ឧទ្យានជាតិជួរភ្នំក្រវាញកណ្ដាល ដែលមានទំហំជាង ៤សែនហិកតារ (៤០២.៣៥២) លាតសន្ធឹងក្នុងខេត្តចំនួន៣ គឺខេត្តកំពង់ស្ពឺ កោះកុង និងខេត្តពោធិ៍សាត់ និងជាព្រៃទឹកភ្លៀងដ៏ធំបំផុតមួយនៅកម្ពុជា បានទទួលរងការកាប់បំផ្លាញជាង២ទសវត្សរ៍មកហើយ។
ប្រជាសហគមន៍បន្ថែមថា នៅពេលព្រៃឈើបាត់បង់ប្រភពទឹកសំខាន់ៗសម្រាប់សត្វព្រៃចិញ្ចឹមជីវិត ក្នុងតំបន់នោះក៏ថយចុះដែរ ប៉ះពាល់ដល់ជីវិតសត្វព្រៃកម្រជាច្រើនប្រភេទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។