គម្រោងសាងសង់ទំនប់វារីអគ្គិសនីស្រែពកក្រោម៣ របស់ប្រធានក្រុមហ៊ុន រ៉ូយ៉ាល់ គ្រុប (Royal Group) និងជាប្រធានសភាពាណិជ្ជកម្មកម្ពុជាលោក គិត ម៉េង ក្នុងខេត្តរតនគិរី នឹងធ្វើឲ្យពលរដ្ឋចំនួន៨ឃុំ មកពីខេត្តរតនគិរី និងខេត្តមណ្ឌលគិរី រងផលប៉ះពាល់ និងប្រឈមបណ្ដេញចេញពីលំនៅឋានទាំងបង្ខំ ។ ពលរដ្ឋរស់នៅតំបន់នោះ ប្ដេជ្ញាចិត្តមិនចាកចេញពីភូមិកំណើត របស់ពួកគាត់ឡើយ។
អាជ្ញាធរខេត្តមណ្ឌលគិរី បានប្រាប់ប្រជាពលរដ្ឋរស់នៅតាមដងទន្លេស្រែពកថា មានពលរដ្ឋចំនួន៨ឃុំ រួមមាន ឃុំសេដា ឃុំកាឡែង ឃុំជ័យឧត្ដម ស្ថិតនៅស្រុកលំផាត់ និងឃុំបរខាំ ឃុំប៉ាតេ ស្រុកអូរយ៉ាដាវ ខេត្តរតនគិរី និង ឃុំណងឃីលិក ឃុំរយ៉ និងឃុំស្រែហ៊ុយ ស្ថិតក្នុងស្រុកកោះញែក ខេត្តមណ្ឌលគិរី នឹងរងផលប៉ះពាល់ពីការសាងសង់ទំនប់វារីអគ្គិសនីស្រែពកក្រោម៣ ដែលមានទីតាំងស្ថិតនៅស្រុកលំផាត់ ខេត្តរតនគិរី។
អាជ្ញាធរលើកឡើងថា ក្រុមហ៊ុន រ៉ូយ៉ាល់ គ្រុប របស់លោក គិត ម៉េង នឹងផ្ដល់សំណងឲ្យពលរដ្ឋផ្ទះធ្វើពីឈើចំនួន១ខ្នង ដែលមានទំហំ ទទឹង៨ម៉ែត្រ បណ្ដោយ១០ម៉ែត្រ ដីលំនៅឋានទទឹង២៥ម៉ែត្រ បណ្ដោយ៥០ម៉ែត្រ និងដីស្រែចម្ការចំនួន៥ហិកតារ ស្ថិតនៅតំបន់៩៥ ក្នុងឃុំស្រែហ៊ុយ ស្រុកកោះញែក សម្រាប់បង្កបង្កើនផលចិញ្ចឹមជីវភាពគ្រួសារ។ ចំណែកពលរដ្ឋដែលរុះរើផ្ទះសម្បែងតាមផែនការរបស់ក្រុមហ៊ុន និងគោលការណ៍របស់អាជ្ញាធរ នឹងទទួលបានប្រាក់២ពាន់ (២.០០០) ដុល្លារ និងប្រាក់ថ្លៃដឹកជញ្ជូនសម្ភារៈចំនួន២ពាន់ដុល្លារថែមទៀត។ នេះបើតាមលិខិត ស្ដីអំពីដំណោះស្រាយផលប៉ះពាល់មួយច្បាប់ ដែលអាជ្ញាធរមូលដ្ឋានឲ្យប្រជាពលរដ្ឋ នៅឃុំណងឃីលិក ស្រុកកោះញែក ខេត្តមណ្ឌលគិរី កាលពីថ្ងៃទី២០ ធ្នូ។
ទោះជាយ៉ាងណា តំណាងពលរដ្ឋរស់នៅឃុំណងឃីលិក លោក ដែង ថក់ ប្រាប់វិទ្យុអាស៊ីសេរី នៅថ្ងៃទី២២ ខែធ្នូថា អាជ្ញាធរបានប្រាប់ឲ្យប្រជាពលរដ្ឋនៅក្នុងឃុំណងឃីលិក ទាំងអស់ត្រូវទទួលយកសំណង ហើយត្រូវរុះរើផ្ទះសម្បែងទៅរស់នៅទីតាំងថ្មីដែលអាជ្ញាធរ និងក្រុមហ៊ុនបានរៀបចំ ប៉ុន្តែប្រជាពលរដ្ឋបានបដិសេធមិនទទួលយកសំណង និងមិនយល់ព្រមទៅរស់នៅទីតាំងថ្មីនេះនោះទេ ដោយសារសំណងដែលក្រុមហ៊ុនផ្ដល់ឲ្យមិនអាចបង្កបង្កើនផលចិញ្ចឹមជីវភាពគ្រួសារបានឡើយ។
លោក ដែង ថក់៖ «ប្រជាពលរដ្ឋស្នាក់នៅមូលដ្ឋានសហគមន៍របស់យើងគឺមិនឯកភាពទេ ទី១សំណងនឹង គឺគេឲ្យយើងតែ៥ហិកតារទេក្នុងមួយគ្រួសារ ហើយយើងមានដីមកពីណាចែកឲ្យកូនចៅយើងទៀត រដ្ឋាភិបាលបើគាត់នៅតែមិនមើលប្រជាពលរដ្ឋ អ៊ីចឹងប្រជាពលរដ្ឋចេះតែតវ៉ា ឬក៏តាមខ្សែបណ្ដាញនានា»។
ប្រជាពលរដ្ឋស្នើឲ្យរដ្ឋាភិបាលគិតពិចារណាលុបចោលគម្រោងសាងសង់ទំនប់វារីអគ្គិសនីស្រែពកក្រោម៣ ពីព្រោះប្រជាពលរដ្ឋរាប់ពាន់គ្រួសារ នឹងរងផលប៉ះពាល់ពីគម្រោងវារីអគ្គិសនីមួយនេះ។
ជុំវិញរឿងនេះ វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា និងអភិបាលខេត្តមណ្ឌលគីរី លោក ថង សាវុន ដើម្បីសុំការអធិប្បាយបានទេ នៅថ្ងៃទី២២ ខែធ្នូ។ ចំណែកខាងតំណាងក្រុមហ៊ុន រ៉ូយ៉ាល់ គ្រុប លោក គិត ម៉េង ក៏វិទ្យុអាស៊ីសេរីមិនអាចទាក់ទងបានដែរនៅថ្ងៃដដែលនេះ។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តមណ្ឌលគីរី លោក ប៊ី វ៉ាន់នី យល់ឃើញថា អាជ្ញាធរ និងក្រុមហ៊ុន ត្រូវតែយកគោលការណ៍ច្បាប់របស់រដ្ឋាភិបាល ក្នុងការស្វែងរកដំណោះស្រាយ និងផ្ដល់សំណងសមរម្យ និងតម្លាភាព ដល់ប្រជាពលរដ្ឋរងផលប៉ះពាល់។ លោកបន្ថែមថា អាជ្ញាធរត្រូវតែរៀបចំហេដ្ឋារចនាសម្ពន្ធឲ្យបានត្រឹមត្រូវ និងត្រូវយកការបារម្ភរបស់ពលរដ្ឋទៅដោះស្រាយ ទើបការអភិវឌ្ឍន៍នេះដំណើរការបានជោគជ័យ មិនមានការរំលោភសិទ្ធិមនុស្ស និងរងការរិះគន់ពីមជ្ឈដ្ឋាននានា។
លោក ប៊ី វ៉ាន់នី៖ «ការអភិវឌ្ឍន៍ទាំងអស់គឺជាការរីកចម្រើនប្រទេសជាតិ ដូចជាប្រជាពលរដ្ឋ ហើយបើការអភិវឌ្ឍន៍មួយទៅបំផ្លាញសេដ្ឋកិច្ចរបស់ប្រជាពលរដ្ឋខ្លួនឯង ក៏វាមិនមែនជាការអភិវឌ្ឍន៍មួយរីកចម្រើនដែរ អ៊ីចឹងហើយយើងសង្ឃឹមថា ការអភិវឌ្ឍប្រជាពលរដ្ឋមូលដ្ឋានទទួលបានការអភិវឌ្ឍសេដ្ឋកិច្ចរីកចម្រើនពិតប្រាកដ ឈរលើគោលការណ៍គោរពសិទ្ធិមនុស្ស និងការផ្ដល់សំណងតម្លាភាពតាមច្បាប់រដ្ឋធម្មនុញ្ញ»។
គម្រោងសាងសង់ទំនប់វារីអគ្គិសនីស្រែពកក្រោម៣នេះ អាចផលិតថាមពលបានជាង៣០០មេហ្កាវ៉ាត់ ដែលមានទីតាំងស្ថិតនៅជាប់ព្រំប្រទល់ខេត្តចំនួន២ នៅស្រុកលំផាត់ ខេត្តរតនគីរី និងស្រុកកោះញែក ខេត្តមណ្ឌលគីរី ដែលសាងសង់ដោយក្រុមហ៊ុន រ៉ូយ៉ាល់ គ្រុប(Roya Group) របស់ លោកឧកញ៉ា គិត ម៉េង និងសហការជាមួយក្រុមហ៊ុន ខ្មែរ ហ្វោនដេសិន អឹព្រេហ្សល(Khmer Foundatoin Appraisal )។ គម្រោងសាងសង់ទំនប់វារីអគ្គិសនីមួយនេះ នឹងធ្វើឲ្យប៉ះពាល់ប្រជាពលរដ្ឋរាប់ពាន់គ្រួសារ និងដីស្រែចម្ការរបស់ប្រជាពលរដ្ឋរាប់ម៉ឺនហិកតារ នៅជុំវិញតំបន់នោះ។
បច្ចុប្បន្នទំនប់វារីអគ្គិសនីមានជាង ១០កន្លែងទូទាំងប្រទេស ក្នុងនោះមាន ទំនប់វារីអគ្គិសនីដែលសាងសង់រួចជិត១០កន្លែង ស្ថិតនៅខេត្តកោះកុង ពោធិ៍សាត់ កំពត កំពង់ស្ពឺ និងខេត្តស្ទឹងត្រែង ហើយកំពុងសាងសង់ចំនួន៣កន្លែងផ្សេងទៀត ក្នុងខេត្តកោះកុង និងពោធិ៍សាត់។ ចំណែកគម្រោងទំនប់វារីអគ្គិសនីចំនួន២ទៀត នៅតាមដងទន្លេសេសាន និងទន្លេស្រែពក ក្នុងខេត្តរតនគីរី កំពុងសិក្សា និងគ្រោងសាងសង់នៅពេលខាងមុខ។ ការសាងសង់ទំនប់វារីអគ្គិសនី កន្លងទៅតែងតែធ្វើឲ្យពលរដ្ឋរងផលប៉ះពាល់ពីទឹកលិចលំនៅឋាន ដីស្រែចម្ការ និងផលដំណាំ ដែលធ្វើឱ្យពលរដ្ឋទាំងនោះបង្ខំចិត្តផ្លាស់ប្ដូរទីលំនៅ ហើយទទួលយកសំណងមិនសមរម្យពីក្រុមហ៊ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។