ក្រសួងការងារអញ្ជើញតំណាងសហជីពចំនួន ១៤នាក់ មកពី ៤ស្ថាប័ន ដើម្បីផ្ដល់ព័ត៌មានតាមពាក្យបណ្ដឹងរបស់ក្រុមហ៊ុន បូវឃើរ ហ្គាមិន។
ប្រធាននាយកដ្ឋានវិវាទការងារ នៃក្រសួងការងារ និងបណ្ដុះបណ្ដាលវិជ្ជាជីវៈ លោក អាំង សេងលី កាលពីថ្ងៃទី ២៣ ខែកក្កដា បានចេញលិខិតអញ្ជើញថ្នាក់ដឹកនាំសហជីពសរុបចំនួន ១៤នាក់ មកពីសហជីពឯករាជ្យ សហជីពកម្ពុជា សហជីពសេរីឯករាជ្យ និងសហជីពសេរីភាពកម្មករខ្មែរ ឲ្យទៅកាន់នាយកដ្ឋានវិវាទការងារ នៅថ្ងៃទី ២៩ ខែកក្កដា ដើម្បីផ្ដល់ព័ត៌មានពាក់ព័ន្ធនឹងពាក្យបណ្ដឹងរបស់ក្រុមហ៊ុន បូវឃើរ ហ្គាមេន (Bowker Garment Factory Cambodia)។
ការអញ្ជើញនេះ ធ្វើឡើងតាមពាក្យបណ្ដឹងរបស់ក្រុមហ៊ុន បូវឃើរ ហ្គាមេន កាលពីថ្ងៃទី៣ ខែកក្កដា ដែលបានដាក់ពាក្យប្ដឹងថ្នាក់ដឹកនាំសហជីពទាំង៤ ទៅក្រសួងការងារដោយបានចោទថា សហជីពទាំង៤ មិនបានអនុវត្ត និងមិនគោរពតាមយន្តការដោះស្រាយវិវាទនៅក្នុងក្រុមហ៊ុន ព្រមទាំងផ្សព្វផ្សាយព័ត៌មានមិនពិតតាមបណ្ដាញសង្គមហ្វេសប៊ុក (Facebook) និងផ្ដល់បទសម្ភាសន៍ដល់សារព័ត៌មាន ធ្វើឲ្យប៉ះពាល់ដល់កិត្តិយសក្រុមហ៊ុន និងស្ថិរភាពការបញ្ជាទិញ។ នេះ បើតាមកំណត់ហេតុប្រជុំរបស់សហជីពទាំង៤ នៃក្រុមហ៊ុនបូវឃើរ ហ្គាមេន នៅថ្ងៃទី២៩ ខែកក្កដា។
ប្រភពដដែលឲ្យដឹងថា នៅថ្ងៃទី២៩ ខែកក្កដា មានថ្នាក់ដឹកនាំសហជីពទាំង៤ស្ថាប័ន ចំនួន ១២នាក់ បានចូលរួមតាមការអញ្ជើញរបស់ក្រសួងការងារ ដែលមានតំណាងមកពីក្រសួងការងារ និងបណ្ដុះបណ្ដាលវិជ្ជាជីវៈ លោក អូន ទ្រី ជាប្រធានអង្គប្រជុំ។
ក្នុងកិច្ចប្រជុំនេះ ថ្នាក់ដឹកនាំសហជីពទាំង៤ បានលើកឡើងអំពីបញ្ហាទឹកលេចទឹកក្នុងក្រុមហ៊ុន តាំងពី ២ឆ្នាំមុន ប៉ុន្តែភាគីក្រុមហ៊ុនមិនបានដោះស្រាយឡើយ។ ទន្ទឹមនឹងនេះ សហជីពបានច្រានចោលការចោទប្រកាន់ថា ផ្សព្វផ្សាយព័ត៌មានមិនពិតតាមបណ្ដាញសង្គម និងតាមរយៈសារព័ត៌មាន ហើយសហជីពលើកឡើងថា បើសិនជាក្រុមហ៊ុនមានភស្តុតាងគួរតែយកមកបង្ហាញនៅថ្ងៃសម្របសម្រួល។
វិទ្យុអាស៊ីសេរីនៅមិនទាន់អាចទាក់ទងភាគីក្រុមហ៊ុន បូវឃើរ ហ្គាមិន ដើម្បីបកស្រាយជុំវិញបញ្ហានេះ បាននៅឡើយទេ នៅថ្ងៃទី២៩ ខែកក្កដា ។
ប្រធានសហព័ន្ធសហជីពសេរីឯករាជ្យប្រចាំរោងចក្រ បូវឃើរ ហ្គាមេន ហ្វេកធើរី លោក សយ ចន្ធូ ប្រាប់វិទ្យុអាស៊ីសេរី នៅថ្ងៃទី២៩ ខែកក្កដាថា ការផ្សព្វផ្សាយតាមបណ្ដាញសង្គម និងសារព័ត៌មាននាពេលកន្លងទៅ លោកបាននិយាយពីការពិត និងមានភស្តុតាងច្បាស់លាស់ពីការរើសអើងសហជីពនៅក្នុងរោងចក្របូវឃើរ។
លោក សយ ចន្ធូ៖«ក្រុមហ៊ុនចោទប្រកាន់គាត់ថា គាត់ឈ្លោះប្រកែកគ្នា ហើយប្រសិនបើពួកគាត់ឈ្លោះប្រកែកគ្នា ហេតុអ្វីគេបញ្ឈប់តែថ្នាក់ដឹកនាំសហជីពយើង ហើយចុះសហជីពផ្សេងមួយទៀតគេអត់បញ្ឈប់។ អាហ្នឹងយើងដាក់សំណួរទៅវិញ ហើយរឿងហ្នឹងជារឿងពិត មិនមែនក្លែងបន្លំ មិនមែនអីទេ ការពិត។ ឥឡូវគិតមកទល់នឹងថ្ងៃនេះ លោកស្រី សុខ ចាន់ថា នៅមិនទាន់បានចូលធ្វើការវិញទេ ក្រុមហ៊ុនគេថា គេអត់យកគាត់ចូលធ្វើការវិញ តែយើងនៅតែទាមទារឲ្យក្រុមហ៊ុនទទួលយកគាត់ចូលធ្វើការងារវិញ ហេតុអ្វីចោទប្រកាន់ថា គាត់ឈ្លោះគ្នា ហើយបញ្ឈប់តែម្នាក់ ។ បើទាក់ទងនឹងការឈ្លោះប្រកែកគ្នា តាមមាត្រា ៨៣ ការឈ្មោះប្រកែកគ្នាគួរតែត្រូវបានបញ្ឈប់ទាំងពីរនាក់»។
ក្រុមហ៊ុន បូវឃើរ ហ្គាមេន ហ្វេកធើរី ខេមបូឌា (Bowker Garment Factory Cambodia Co.,LTD.) គឺជារោងចក្រកាត់ដេរសំលៀកបំពាក់មានទីតាំងស្ថិតនៅភូមិពងទឹក ឃុំបែកចាន ស្រុកអង្គស្នួល ខេត្តកណ្ដាល ដែលមានកម្មករធ្វើការសរុប ៤ពាន់ ២រយនាក់ (៤.២០០)។
ប្រធានសហព័ន្ធសហជីពសេរីឯករាជ្យប្រចាំរោងចក្រ បូវឃើរ ហ្គាមេន ហ្វេកធើរី លោក សយ ចន្ធូ អះអាងថា សហជីពមូលដ្ឋាន នឹងចូលរួមរាល់ការសម្រុះសម្រួលជាមួយក្រុមហ៊ុន និងក្រសួងការងារ ហើយក្នុងករណីមិនសះជា ប្រធានសហជីពរូបនេះ នឹងប្ដឹងទៅក្រុមហ៊ុនបញ្ជាទិញយីហោ អាឌីដាស់ adidasដើម្បីជំរុញឱ្យថៅកែគោរពច្បាប់ការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។