ក្រុមអង្គការការពារសិទ្ធិមនុស្ស និងការពារអ្នកសារព័ត៌មានចំនួន ២០ស្ថាប័ន បានទទូចទៅរដ្ឋាភិបាលកម្ពុជា ឱ្យចាត់វិធានការឱ្យបានឆាប់រហ័ស និងជាក់លាក់ លើករណីឃាតកម្មសម្លាប់អ្នកសារព័ត៌មាន និងអ្នកការពារសិទ្ធិមនុស្សប្រហែល២០នាក់ ដែលបានកើតឡើងជាបន្តបន្ទាប់តាំងពីឆ្នាំ១៩៩៤ ហើយគ្មានការស៊ើបអង្កេតដោយឯករាជ្យ ដើម្បីរកជនប្រព្រឹត្តិមកផ្ដន្ទាទោស។
ចាប់ចាប់តាំងពីឆ្នាំ១៩៩៤ មក យ៉ាងហោចណាស់មានអ្នកសារព័ត៌មាន ១៥នាក់ ត្រូវបានសម្លាប់នៅកម្ពុជា ហើយក្នុងនោះ ១២ នាក់ ជាអ្នក ដែលរាយការណ៍ព័ត៌មានរសើប ប៉ុន្តែមិនមានជនល្មើសណាម្នាក់ត្រូវបានយកមកផ្ដន្ទាទោសឡើយ។ នេះបើតាមការអះអាងរបស់ អង្គការសមាគមចំនួន២០ស្ថាប័ន នៅប្រទេសកម្ពុជា និងមកពីប្រទេសថៃ ឥណ្ឌូនេស៊ី និងម៉ាឡេស៊ី ក្នុងទិវាអន្តរជាតិ ដើម្បីបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន។ អង្គការទាំងនោះ ជំរុញដល់រដ្ឋាភិបាលកម្ពុជា ត្រូវបើកការស៊ើបអង្កេតដោយឯករាជ្យ និងតម្លាភាពលើករណីឃាតកម្មទាំងនោះ។
អង្គការទាំងនោះលើកឡើងក្នុងសេចក្ដីថ្លែងការណ៍រួមថា ការមិនស៊ើបអង្កេតលើករណីឃាតកម្មលើក្រុមអ្នកសារព័ត៌មាន រួមទាំងលើអ្នកវិភាគនយោបាយបណ្ឌិត កែម ឡី និងក្រុមអ្នកការពារសិទ្ធិមនុស្សជាច្រើនរូបទៀត ដូចជា សកម្មជនបរិស្ថានលោក ឈុត វុទ្ធី សកម្មជនសហជីពលោក ជា វិជ្ជា និងលោក រស់ សុវណ្ណារ៉េត បង្ហាញពីការរីករាលដាលខ្លាំងឡើង នៃវប្បធម៌និទណ្ឌភាពនៅកម្ពុជា។
អ្នកនាំពាក្យសមាគមអាដហុក លោក ស៊ឹង សែនករុណា លើកឡើងថា ប្រសិនបើរដ្ឋាភិបាល នៅតែមិនចាត់វិធានការលុបបំបាត់អំពើនិទណ្ឌភាព ដែលបានកើតឡើងលើអ្នកសារព័ត៌មាន និងអ្នកធ្វើការងារការពារសិទ្ធិមនុស្សទាំងនោះទេ នោះវានឹងបន្តធ្វើឱ្យប៉ះពាល់សតិអារម្មណ៍អ្នកសារព័ត៌មាន និងអ្នកធ្វើការងារសង្គម ដោយពួកគេនឹងបន្តភ័យខ្លាចថា ករណីឃាតកម្មទាំងនោះ អាចកើតឡើងបន្តបន្ទាប់ទៀត។
ចំណែកនាយិកាមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) លោកស្រី ឆន សុគន្ធា ចង់ឱ្យរដ្ឋាភិបាលអាណត្តិថ្មីទី៧ នេះ ស្វែងរកយុត្តិធម៌សម្រាប់ក្រុមគ្រួសាររបស់ក្រុមអ្នកសារព័ត៌មាន អ្នកវិភាគ សកម្មជនបរិស្ថាន សកម្មជនសហជីព ដែលត្រូវគេសម្លាប់ទាំងអស់នោះ ដើម្បីបង្ហាញពីការធានាការពារអ្នកសារព័ត៌មានជំនាន់ក្រោយ ដែលហ៊ានរាយការណ៍ព័ត៌មានដោយឯករាជ្យ។
លោកស្រីបន្តថា រដ្ឋាភិបាលគួរឆក់ឱកាស ក្នុងទិវាអន្តរជាតិ ដើម្បីបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន ឈប់ធ្វើទុក្ខបុកម្នេញតាមគ្រប់រូបភាពលើអ្នកសារព័ត៌មានឯករាជ្យ និងបើកចំហសេរីភាពសារព័ត៌មាននៅកម្ពុជាឡើងវិញ ស្របពេលអង្គការអន្តរជាតិ និងក្រុមប្រទេសលោកខាងលិច តែងតែកត់សម្គាល់ឃើញថា មានការរឹតត្បិតកាន់តែខ្លាំងឡើងពីមួយឆ្នាំទៅមួយឆ្នាំ។
វិទ្យុអាស៊ីសេរី មិនអាចសុំការឆ្លើយតបពីអ្នកនាំពាក្យក្រសួងព័ត៌មាន លោក ទេព អស្នារិទ្ធ និងអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានទេ នៅថ្ងៃទី២ ខែវិច្ឆិកា ជុំវិញសេចក្ដីថ្លែងការណ៍របស់អង្គការសង្គមស៊ីវិលនេះ។
ការយាយី និងឧក្រិដ្ឋកម្មប្រឆាំងអ្នកសារព័ត៌មាននៅកម្ពុជា នៅតែជាក្ដីបារម្ភនៅក្នុងឆ្នាំ២០២៣ បន្ទាប់ពីសមាគមសម្ព័ន្ធអ្នកសារព័ត៌មានកម្ពុជា (ខេមបូចា) រកឃើញថា ក្នុងរយៈពេល ១០ខែចុងក្រោយ មានយាយីលើអ្នកសារព័ត៌មាន៣០នាក់ ក្នុងនោះ២៣នាក់ រងអំពើហិង្សា និងការគំរាមកំហែង ៤នាក់រងការយាយីតាមផ្លូវតុលាការ និង ២នាក់ត្រូវឃាត់ខ្លួន ដើម្បីសួរចម្លើយ។
អង្គការអ្នកសារព័ត៌មានគ្មានព្រំដែន (Reporters Without Border) ចេញផ្សាយនៅខែឧសភា បានចាត់ចំណាត់ថ្នាក់សេរីភាពសារព័ត៌មាននៅកម្ពុជា ស្ថិតក្នុងលំដាប់លេខរៀងទី១៤៧ នៅក្នុងចំណោមប្រទេសទាំងអស់ ១៨០ប្រទេស នៅឆ្នាំ២០២៣ ដែលជាតួលេខកាន់តែអាក្រក់ សម្រាប់លំហសេរីភាពសារព័ត៌មាននៅកម្ពុជា ដោយសារចំណាត់ថ្នាក់ បានធ្លាក់ចុះចំនួន៥លេខ បើធៀបទៅនឹងឆ្នាំ២០២២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។