មន្ត្រីជាន់ខ្ពស់នៃក្រសួងព័ត៌មានព្រមានថា ក្រសួងព័ត៌មាននឹងប្រើគ្រប់វិធានការដើម្បីឲ្យប្រព័ន្ធផ្សព្វផ្សាយប្រើប្រាស់គោរមងារ "សម្ដេច"។ ក៏ប៉ុន្តែ អ្នកធ្វើការទាក់ទងនឹងវិស័យសារព័ត៌មានយល់ឃើញថា នេះជាការគំរាមកំហែងលើសេរីភាពសារព័ត៌មាន និងសេរីភាពបញ្ចេញមតិ។
ក្រសួងព័ត៌មាននឹងមិនអត់ឱនឲ្យស្ថាប័នប្រព័ន្ធផ្សព្វផ្សាយទាំងឡាយណាដែលមិនព្រមប្រើប្រាស់គោរមងារ "សម្ដេច" ឲ្យបានត្រឹមត្រូវនៅក្នុងអត្ថបទ ឬការផ្សាយរបស់ខ្លួននោះ។
អនុរដ្ឋលេខាធិការក្រសួងព័ត៌មាន លោក អ៊ុក គឹមសេង ថ្លែងថា កន្លងមកក្រសួងព័ត៌មានបានបង្ហាញជំហរទន់ភ្លន់ទៅស្ថាប័នប្រព័ន្ធផ្សព្វផ្សាយនានា ដូច្នេះ នៅពេលនេះ ដល់ពេលក្រសួងត្រូវធ្វើគ្រប់មធ្យោបាយហើយដើម្បីចាត់វិធានការលើរឿងនេះ។ លោកបន្តថា ក្រសួងមិនអាចទទួលបានទេចំពោះស្ថាប័នទាំងណាមិនធ្វើតាមការណែនាំរបស់ខ្លួន៖ «ខ្ញុំបាននិយាយហើយថា ស្ថាប័នសាធារណៈមួយនេះ ក្រសួងព័ត៌មាននេះបានធ្វើកិច្ចការទន់ភ្លន់ជាមួយស្ថាប័នទាំងអស់ ហើយអង្គភាពទាំងអស់គ្នាពុំផ្ដល់កិច្ចសហប្រតិបត្តិការជាមួយក្រសួងព័ត៌មានវិញ ក្រសួងនឹងធ្វើអ្វីៗ គ្រប់យ៉ាងតាមដែលអាចធ្វើទៅបាន»។
ទន្ទឹមការថ្លែងរបស់មន្ត្រីជាន់ខ្ពស់ក្រសួងព័ត៌មានដូចនេះ ក្រសួងព័ត៌មាន នៅថ្ងៃទី៦ ខែកក្កដា បានចេញសេចក្ដីព្រមានជាលើកចុងក្រោយដែលត្រូវបានផ្សព្វផ្សាយនៅថ្ងៃទី៧ កក្កដា ឲ្យស្ថាប័នសារព័ត៌មានអនុវត្តតាមការបង្គាប់របស់ខ្លួន។ ក្រសួងព្រមានថា បើស្ថាប័នណានៅតែបំពានក្រសួងនេះនឹងចាត់វិធានការតាមភារកិច្ច និងសមត្ថកិច្ចច្បាប់ដែលរដ្ឋាភិបាលបានផ្ដល់ឲ្យ។
ដោយឡែកនាយកវិទ្យាស្ថានកម្ពុជា សម្រាប់ការសិក្សាផ្នែកសារព័ត៌មាន លោក មឿន ឈានណារិទ្ធ និយាយថា ការដែលអ្នកសារព័ត៌មានមិនប្រើគោរមងារ "សម្ដេច" មិនមែនប្រមាថដល់ថ្នាក់ដឹកនាំណាដែលទទួលបានគោរមងារ "សម្ដេច" នោះទេ។ លោកថា សេរីភាពសារព័ត៌មាននៅក្នុងប្រទេសកម្ពុជា ក៏ដូចប្រទេសប្រជាធិបតេយ្យផ្សេងទៀត អ្នកសារព័ត៌មានសេរីភាពរបស់ខ្លួនក្នុងការហៅបុគ្គលណាម្នាក់ដោយមិនចាំបាច់ហៅតាមការណែនាំ ឬបែបបទរដ្ឋបាល ហើយដែលសំខាន់នោះការហៅត្រឹមត្រូវតាមវិជ្ជាជីវៈ៖ «តាមរដ្ឋធម្មនុញ្ញដែលបានធានានូវសេរីភាពសារព័ត៌មាន និងសេរីភាពបញ្ចេញមតិនោះខ្ញុំគិតថា ការគំរាមបិទ ឬដកអាជ្ញាប័ណ្ណ ឬក៏មិនចេញកាតកាសែតឲ្យនោះជាការគំរាមកំហែងសេរីភាពសារព័ត៌មាន»។
កាលពីដើមខែកក្កដា ក្រសួងព័ត៌មាន បានផ្ញើលិខិតទៅម្ចាស់ប្រព័ន្ធផ្សព្វផ្សាយរំលឹកឲ្យប្រើប្រាស់គោរមងារ "សម្ដេច"។ សព្វថ្ងៃនេះ ប្រព័ន្ធផ្សព្វផ្សាយដែលមិនទាន់ប្រើប្រាស់គោរមងារ "សម្ដេច" រួមមាន វិទ្យុសំឡេងសហរដ្ឋអាមេរិក (VOA) វិទ្យុបារាំងអន្តរជាតិ (RFI) វិទ្យុអាស៊ីសេរី (RFA) កាសែតភ្នំពេញ ប៉ុស្តិ៍ (Phnom Penh Post) កាសែត ខ្មែរ ថែមស៍ (Khmer Times) និងព្រឹត្តិបត្រ ឌឹ ខេមបូឌា ដេលី ជាដើម។
វិធានការដែលក្រសួងព័ត៌មាន នឹងប្រើចំពោះប្រព័ន្ធផ្សព្វផ្សាយមិនប្រើគោរមងារ "សម្ដេច" ដែលក្រសួងចោទថា ស្ថាប័នគឃ្លើននោះ អាចជាការបញ្ចប់ ឬមិនផ្ដល់អាជ្ញាប័ណ្ណបន្តទៀត។ ជាងនេះទៀត ក្រសួងនឹងមិនអនុញ្ញាតអោយស្ថានីយវិទ្យុ អេហ្វ.អឹម (FM) ក្នុងស្រុកជួលម៉ោងផ្សាយទៅឲ្យវិទ្យុបរទេសណាដែលមិនប្រើគោរមងារ "សម្ដេច"។
សព្វថ្ងៃនេះ ក្រសួងព័ត៌មាន កំពុងតាមដានថាតើស្ថាប័នព័ត៌មានណាខ្លះមិនទាន់ប្រើគោរមងារ"សម្ដេច"។ ប៉ុន្តែអនុរដ្ឋលេខាធិការក្រសួងព័ត៌មាន លោក អ៊ុក គឹមសេង មិនទាន់បង្ហាញតួលេខថា មានស្ថាប័នប៉ុន្មានប្រើគោរមងារ "សម្ដេច" និងមិនទាន់ប្រើគោរមងារ "សម្ដេច"។ ក្រសួងព័ត៌មានអះអាងថា នឹងប្រើធម៌ក្ដៅនៅខែកក្កដា នេះហើយ ដោយគ្មានការចរចា ឬជជែកបន្ថែមជាមួយប្រព័ន្ធផ្សព្វផ្សាយទាំងនោះទៀតទេ។
ដោយឡែក នាយកវិទ្យាស្ថានកម្ពុជា សម្រាប់ការសិក្សាផ្នែកសារព័ត៌មាន លោក មឿន ឈានណារិទ្ធ ព្រួយបារម្ភថា ការតម្រូវឲ្យប្រព័ន្ធផ្សព្វផ្សាយប្រើគោរមងារ "សម្ដេច" នៅពេលនេះ រួចហើយ ក្រុមអ្នកកាសែតអាចប្រឈមការចោទបីប្រភេទដូចជា ទាក់ទងបទបរិហារកេរ្តិ៍ ផ្សព្វផ្សាយព័ត៌មានមិនពិត និងបទញុះញង់ ប្រសិនបើអ្នកសារព័ត៌មានណាសរសេរ ឬរាយការណ៍ប៉ះពាល់បុគ្គលមានអំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។